Бургер мен сәулет: әлемдегі ең әдемі «Макдоналдс» мейрамханалары
Бұл жерлерге бургер жеуге емес, готикалық соборға, орта ғасырлық қамал мен футуристік сәулет өнерін тегін тамашалау үшін бас сұғу керек.
Саяхатта жүргенде жергілікті дәмдермен танысқан дұрыс. Бірақ бейтаныс астан бір сәт демалып, өзің білетін тағам жегің келетін сәттер де болады. Инфлюенсер Нұртөре Әбдіқалық төрт жыл ішінде он елді аралап, мынадай бір лайфхак шығарған: ол әлемге әйгілі фастфуд желісіне жылдам ас жеймін деп қана емес, өзгеше сәулет нысандарын көремін деп те арнайы барады екен. Біз McDonald’s-тың бағасы да, сәулеті де сүйкімді жеті нүктесін топтап шықтық. Тізімде қазақстандықтар көп баратын танымал бағыттар да, әлемдік сәулет өнерінің жауһарлары да бар.
Миландағы собор көрінісі (Италия)
Мекенжайы: Piazza del Duomo, 17
Миландағы Дуомо алаңы — сән-салтанат пен туриске толы жер. Осы зәулім собор мен II Виктор Эммануил галереясының асқақ кіреберісіне қарама-қарсы жерде желінің екі қабатты мейрамханасы жұмыс істейтінін бірі білсе, бірі білмейді. Бұл — осы алаңдағы қымбат мейрамханаларға таптырмас балама. Әдеттегі кофе не кока-коланың бағасына екінші қабаттан үстел тауып, Миланның тарихи орталығының ғажап көрінісіне куә бола аласыз.
«Миланда жүргенде Дуомо алаңындағы екі қабатты мейрамханаға бас сұқтым. Ішкі интерьері аса бір ерекше дей алмаймын, бірақ терезедегі көрініске көзің тоймайды. Алаңның орталық бөлігі мен тарихи қасбеттері анық көрінеді. Артық ақша шығындамай, біраз демалып, әдемі кадрлар жасап алуға таптырмас жер». — Нұртөре Әбдіқалық, фуд-блогер
Куала-Лумпурдағы тірі кино (Малайзия)
Мекенжайы: 120-120A, Jalan Bukit Bintang
Малайзия визасыз режим арқасында қазақстандық туристер арасында танымал бағытқа айналып келеді. Куала-Лумпурдың қақ ортасында Букит Бинтанг қиылысы бар — бұл жер Токио мен Нью-Йорктің қоспасына ұқсайтын, қайнаған тіршілігі бір сәтке дамылдамайтын жер. Дәл осы жерді мейрамханадан бұл алаң ғажап көрінеді.
«Бұл мейрамхана қаланың дәл жүрегінде, Pavilion сауда орталығына қарама-қарсы орналасқан. Екінші қабаттағы терезе маңына отыруға тырысыңыз. Өзіңізді құдды бір алып панорамалық экранда кино көріп отырғандай сезінесіз. Бағдаршамға жасыл жанғанда жүздеген адамның ерсілі-қарсылы құжынап жүргенін жоғарыдан бақылаған керемет сезім екен. Сол атмосферасы үшін-ақ мұнда қайта барар едім». — Нұртөре Әбдіқалық, фуд-блогер
Батумидегі футуризм (Грузия)
Мекенжайы: 1a Sherif Khimshiashvili St
Тбилисиде бәрі ескі қалаға хинкали жеуге ағылса, Батумиде футуристік сәулет өнерін көру үшін бір уақ фастфудқа бұрылуға болады. Белгілі грузин сәулетшісі Георгий Хмаладзе жобалаған бұл ғимарат үйреншікті дәмханадан гөрі ғарыш кемесіне не заманауи өнер мұражайына көбірек ұқсайды.
Шыны мен болаттан тұрғызылған бұл ғимарат жанармай құю бекетінің үстінен қалықтап тұрғандай әсер қалдырып, бекетті сырт көзден толық тасалап тұр. Ішкі кеңістік ашық аспан астындағы бірнеше деңгейлі террасалармен табиғи түрде жалғасып жатыр. Террасаларға тірі гүлдер мен гүлзарлар сән беріп тұр. Кешкісін сыртқы жарықтар жанғанда, ғимарат ішінен жарқырап, ерекше атмосфераға бөленеді.
Ханчжоудағы қоңыраулы мекен (Қытай)
Мекенжайы: 7 Shihan Road, Xihu District, Hangzhou, Zhejiang
Табиғи пейзаждарымен аты шыққан Ханчжоу қаласында бренд өте батыл әрі шулы эксперимент жасаған. Мейрамхана қызыл кірпіш пен күңгірт ағаштан салынған екі қабатты виллада ашылды. Бұл ғимарат 1948 жылы Чан Кайшидің үлкен ұлы, Тайваньның болашақ президенті Цзян Цзингоның резиденциясы болған.
2015 жылы бұл ғимаратта McCafe-нің ашылуы тарихшылар мен қоғам арасында үлкен саяси дау тудырды, бірақ атақты Батыс көлінің жағасындағы көне усадьбаның сәулеті бұзылған жоқ. Ішінде жарқыраған пластик маңдайшалар мен неон шамдары жоқ. Интерьер ұстамды стильде жасалған, ал қабырғаларға осы жердің тарихынан сыр шертетін мұрағат суреттері ілінген.
Будапеш вокзалындағы әсемдік (Венгрия)
Мекенжайы: Teréz krt. 55
Будапешттің қақ ортасында, Батыс вокзалының (Nyugati) жанында әлемдегі ең сәнді мейрамханалардың бірі деп танылған орын бар.
Вокзал ғимаратының өзін 1877 жылы Гюстав Эйфельдің компаниясы (иә, әйгілі Эйфель мұнарасын салған инженер) тұрғызған. Ал фастфуд желісі кезінде бірінші класс жолаушыларына арналған мейрамхана болған залда жұмыс істейді. Үйреншікті пластиктің орнына мұнда алып хрусталь люстралар, өрнекті төбелер, әсем бағандар мен классикалық ағаш жиһаздар көздің жауын алады. Тіпті жақында ғана жасалған ауқымды модернизациядан кейін бұл жер кешкі форматты іске қосты: жұма мен сенбі күндері сағат 22:00-ден кейін көне төбелерде бірегей лазер шоуы көрсетіліп, DJ жанды музыка ойнайды.
Портудағы тарихи сарай (Португалия)
Мекенжайы: Praça da Liberdade 126, 4000-322 Porto
Португалияға жолыңыз түссе, Порту қаласындағы 1930 жылдары салынған тарихи Imperial кафесінің ғимаратына соқпай кетпеңіз. Бұл орын планетадағы ең әдемі дәмханалар тізімінде үнемі көш бастап тұрады. Кіреберісте португал мүсіншісі Энрике Морейраның қолынан шыққан алып қола бүркіт тұр, ал ішінде арт-деко стиліндегі көркем интерьер жасалған.
Мұнда үйреншікті минимализмнің орнына биік төбеден салбырап тұрған алып хрусталь шамдарды, сәнді өрнек-мүсіндерді және Португалия тарихы мен атақты портвейн өндірісінен көріністер бейнеленген түпнұсқа витраждарды көруге болады. Бургер жеуге кірген адам бұл жерде өнер музейін аралап шыққандай болады.
