Астанада таңғы асты қайдан ішуге болады?
Қарныңыз да, көңіліңіз де тойып шығатын тоғыз жер.
Таңертең асықпай оянып, күніңізді жайлы кофеханада сүйкімді де тойымды ас ішіп бастағанға не жетсін?! Бірақ кейде ерекше бірдеңе жесем ғой деген оймен тұрғанда, қай жерге барарыңды шеше алмай дал боласың. Сол себепті sur(e) паблигіндегі достарымызбен бірге Астанада таңғы ас ішкенге ең жақсы деген орындарды топтап шықтық. Тізімде сауда орталығындағы жайлы кафелер де, нан-тоқашты өзі пісіретін сәнді кофеханалар да бар.
Культура Диктует
Мекенжайы: Сығанақ көшесі, 33
Орташа чек: 4 500 теңге
Мұнда кез келген талғамға сай таңғы ас табылады. Әсіресе қарақат тосабы жағылған сэндвичтің дәмін көріңіз. Бірақ бұл жерге көбі тамақтан гөрі атмосферасы үшін келеді. Іші өте сәнді, айналада асыққан адам көрмейсіз — бір сәтке өзіңізді Алматыда жүргендей сезінесіз. Таңғы асқа шие қосылған фильтр-кофе алып, жайлы таңның рахатына батыңыз.
Peak Buro
Мекенжайы: Қабанбай батыр даңғылы, 60/14
Орташа чек: 5 500 теңге
Таңғы ас мәзірі мол. Бізге ұнайтыны — албырт балық не пастрами қосылған даниялық таңғы ас. Жұмыртқа, авокадо, ірімшік, йогурт пен гранола бірге беріледі. Ерекше дәм көргіңіз келсе, комбу сорпасында дайындалған қарақұмық ботқасын немесе мисо-пудинг қосылған сүзбелі құймақтың дәмін көріңіз. Атауы тосын естілгенімен, дәмі керемет.
Cafeteria
Мекенжайы: Сығанақ көшесі, 38/1, Mega Silk Way сауда орталығы
Орташа чек: 5 000 теңге
Бұл жердің басты артықшылығы — таңғы асты сағат 16:00-ге дейін береді. Сондықтан асықпай келе беруге болады. Мәзірден трюфель қосылған голланд тұздығы құйылған пашот жұмыртқасы мен картоп хашбраунын ұсынамыз. Пастрами қосылған нұсқасын таңдасаңыз, өкінбейсіз. Жеңілірек ас ішкіңіз келсе, хумус пен түрік симитіне тапсырыс беріп, Жерорта теңізі асханасының дәмін татыңыз. Тамаққа abr командасы жауап береді, сондықтан тағам мен қызмет көрсету сапасына алаңдамасаңыз болады.
Grace
Мекенжайы: Достық көшесі, 9
Орташа чек: 6 000 теңге
Күніңізді сүйкімді ыдысқа сәндеп берілген таңғы аспен бастағыңыз келсе, осы жерге келіңіз. Таңғы ас 13:00-ге дейін беріледі. Жеңіл әрі үйлесімді тағам ұнатсаңыз, пастрами қосылған скрэмбл алыңыз. Ал тәтті жегіңіз келсе, жидек қосылған жұмсақ ірімшік запеканкасын не классикалық сүзбелі құймақты таңдаңыз.
Uno
Мекенжайы: Кенесары көшесі, 13
Орташа чек: 4 500 теңге
Авокадо тосты мен бенедикттен жалықсаңыз, UNO-ға бас сұғыңыз. Бұл жер нанды өзі пісіреді, ірімшікті де өзі жасайды, ал өнімдерін жергілікті фермерлерден сатып алады. Мысалы, баяу бұқтырылған сиыр еті мен трюфельді камамбер қосылған сұлы ботқасын қалай қарайсыз? Тәтті ұнататындарға карамелі мол панкейктер бар. Онымен ванильді балмұздақ өте жақсы үйлеседі.
Caffe Morris
Мекенжайы: Төле би көшесі, 54
Орташа чек: 4 000 теңге
Мұндағы ең танымал тағам — фирмалық Big таңғы асы. Ол — күркетауық еті, ірімшік пен ысталған сиыр еті қосылып, кексше пісірілген ерекше омлет. Онымен бірге үй құймақтары, жаңа піскен көкөністер мен қаймақ беріледі. Барлығы 3 500 теңге тұрады. Ал бұл жердің тағы бір ерекшелігі — өзінің кондитерлік цехы. Сондықтан десерттен ауыз тимей кетпеңіз. Торттары жұп-жұмсақ.
Table
Мекенжайы: Тәуелсіздік даңғылы, 47а
Орташа чек: 3 500 теңге
Артық сән-салтанатты ұнатпайтындарға арналған жер. Мұнда мәзір ықшам, бірақ әр тағам өте сапалы дайындалады. Тағы бір үлкен артықшылығы — оң жағалауда орналасқан. Егер тыныш жерде отырып, асықпай таңғы ас ішкіңіз келсе, тамаша таңдау. Жайлы атмосферасымен, тамағының сапасымен аты шығып келеді.
Lievito Madre
Мекенжайы: Қабанбай батыр даңғылы, 63
Орташа чек: 3 000 теңге
Мейрамханаға бармай-ақ, дәмді сэндвич пен жақсы кофе жетеді десеңіз, бұл жер сізге сөзсіз ұнайды. Lievito Madre туристер көп жүретін көшелерден сәл алыста орналасқанымен, арнайы барғанға әбден лайық. Мұндағы сэндвичтер өте тойымды — түскі асқа дейін қарныңыз ашпайды. Ал наны ерекше жұмсақ.
Точка
Мекенжайы: Бейбітшілік көшесі, 5
Орташа чек: 4 000 теңге
Бұл жерге біраз жылдан бері үзбей баратындар көп. Асүйінің сапасы өзгерген емес: порциялары мол, тағамдары жаңа піскен. Таңғы ас мәзірінде бәріне таныс тағамдар да, ерекше дәмдер де бар. Мысалы, грек йогурты, жаңа тархун мен қарағай бүршігінің тосабы қосылған сүзбені байқап көріңіз. Дәмдер үйлесімі таңдай қақтырады.
