Визасыз қыстауға болатын елдер: жылы теңіз, дәмді тағам мен ойын-сауық
Қыста барғанға ең қолайлы елдерді топтап шықтық.
Қазақстанның қысы кез келген адамға жаға бермейді: кейде саршұнақ аяз бен үскірік желден мезі болғанда, жылы жаққа тартып кеткің келеді. Әлемде қазақстандықтар визасыз бара алатын, жыл он екі ай күншуақ боп тұратын ел біршама. Бұл мақалада танымал демалыс орындары туралы айтып береміз.
Тайланд
- Виза: 60 күн ішінде қайтсаңыз, қажет емес. Алдын ала электронды миграциялық карта — TDAC толтыру керек.
- Ауа температурасы: +26–32 °C.
- Теңіз температурасы: оңтүстігінде +27–30 °C.
Тайланд — ең танымал қысқы бағыттардың бірі. Сізге биік ғимараттары, үлкен сауда орталықтары мен әлемдік жұлдыздардың концерттері өтетін дамыған мегаполистер ұнаса, Бангкокке барыңыз. Қалада коворкингтер мен заманауи кофеханалар өте көп, сондықтан бірнеше апта бойы демалыс пен онлайн жұмысты қатар алып жүруге болады.
Тыныш жерді қалаймын десеңіз, Ко Яо Ной мен Ко Ланта — таптырмас таңдау. Ақ құмды жағажайлары бар бұл шағын аралдарда дайвинг жасаған өте қолайлы. Мұнда дайв-мектептен сертификат алып, кейін нұсқаушысыз-ақ теңіз түбіне сүңги беруге болады. Ал теңізді де, дамыған инфрақұрылымды да болсын десеңіз, Пхукет аралын не материктегі Паттайя курортын таңдаңыз.
Қалай жетуге болады: Бангкокке де, Пхукетке де Алматы мен Астанадан тікелей рейстер бар.
Вьетнам
- Виза: 30 күн ішінде қайтсаңыз, қажет емес.
- Ауа температурасы: +28–32 °C.
- Теңіз температурасы: +27–29 °C.
Снорклингті, жылы теңіз бен күнге қызған құмды жақсы көретіндерге Фукуок пен Нячанг — Вьетнамның ең танымал әрі қолжетімді курорттары.
Елдің солтүстігінде қыста күн райы салқындау, бірақ турист аз, көретін жер көп: Вьетнамның тау бөктеріндегі хайкингке арналған маршруттар, күріш террасалары мен биік сарқырамалар бар.
Қалай жетуге болады: Алматы мен Астанадан Фукуок, Дананг пен Нячангқа тұрақты тікелей рейстер бар. Сәуірден қазанға дейін VietJet Air чартерлері ұшады.
Шри-Ланка
- Виза: әуежайда рәсімделеді не алдын ала сайт арқылы алуға болады.
- Ауа температурасы: жағалауда +27–32 °C.
- Теңіз температурасы: +27–29 °C.
Шри-Ланканы толық аралап көргіңіз келсе, пойызбен жүруге не мопед жалдауға болады. Канди қаласынан Эллаға баратын пойыз шай плантациялары мен ну ормандар арасынан өтеді. Жүріп келе жатқан пойыз есігінен сыртқа еңкейіп тұрған жолаушылардың, артында сарқырамалар көрінетін әйгілі суреттерін көрген боларсыз — дәл сол кадрлар осы жерде түсірілген. Бірінші кластың билеттерін алдын ала алған дұрыс: онда кондиционер бар, өз орныңыз да болады. Үшінші класс арзанырақ, бірақ жолаушы көп болып, отыратын орын жетпей қалуы мүмкін.
Элладан Яла ұлттық паркіне дейін сафариға апаратын трансфер жүреді. Бұл жерге келушілер пілдерді, қолтырауындарды және қабыландарды көруге барады.
Шри-Ланканың жағалауы — серфинг мектептері, сәнді кофеханалар мен апарт-отелдері бар шағын туристік қалашықтар. Қараша мен сәуір аралығында жағалауға жақын жерде киттер жүзіп өтеді. Оларды көруге арналған қайықтар таңертең ерте Мирисса қаласынан шығады.
Қалай жетуге болады: Қазақстаннан тікелей рейстер жоқ, бірақ БАӘ немесе Стамбұл арқылы ауысып отырып ұшып баруға болады.
Хайнань аралы (Қытай)
- Виза: 30 күнге дейін алудың қажеті жоқ.
- Ауа температурасы (қыста): +22–27 °C.
- Теңіз температурасы: +25–27 °C.
Хайнань — Қытайдың материк бөлігінен мүлде өзгеше арал: тропик климаты мен табиғаты ерекше. Ауасы таза, себебі арал қалың джунглимен көмкерілген, ал провинцияда зауыт салуға тыйым салынған. Осы экологияның арқасында мұнда шипажайлар мен сауықтыру орталықтары көп, ал турфирмалар термалды бұлақ көздері мен спа-орталықтарға баруға болатын емдік турлар ұсынады.
Санья ауданы — Хайнаньдағы негізгі курорт, қонақүйлердің көбі осында орналасқан. Ялунвань қойнауы — ұзын жағажайы бар, бес жұлдызды қонақүйлер шоғырланған премиум аймақ, сондықтан бағасы да жоғары. Дадунхай қала орталығына жақын, дүкен мен кафе көп — шопинг жасап, көше тағамдарынан дәм татып, кешке жағалауда серуендеуді ұнататындарға таптырмас жер. Бұл — Хайнаньда халық ең тығыз қоныстанған аудан. Санья Бэй логистика жағынан өте ыңғайлы: әуежайға ең жақын аудан, қолжетімді қонақүйлер мен арзан тамақ мұнда жетіп артылады. Бірақ жағажайлары орташа деңгейде.
Қалай жетуге болады: Алматы мен Астанадан Саньяға тікелей чартерлер ұшады. Сондай-ақ Үрімші немесе Пекин арқылы ауысып отырып жетуге болады.
БАӘ
- Виза: 30 күнге дейін қажет емес.
- Ауа температурасы: +23–28 °C.
- Теңіз температурасы: +22–24 °C.
Қыста БАӘ-нің күн райы жазға қарағанда әлдеқайда жайлы: желтоқсаннан наурызға дейін күндізгі температура әдетте +23–28 °C шамасында болады. Осы кезде серуендеген шілдедегі аптап ыстықта қыдырғаннан әлдеқайда жайлы. Бірақ температура қолайлы болғанымен, БАӘ жаяу жүргіншіге ыңғайсыз ел екенін ұмытпаңыз: қалалар үлкен, ал жайлы жаяу аймақтар барлық жерде бірдей кездесе бермейді. Сол себепті салқын маусымда да такси немесе каршерингпен (Careem, YanGo) жүрген ыңғайлы, ал жоспарды аудан-аудан бойынша құрып алған дұрыс.
БАӘ жеті әмірліктен тұрады, бірақ туристер көбіне Дубайды таңдайды. Мұнда сән-салтанат пен шоппинг үшін келеді: мейрамханалардағы мінсіз қызмет, сәнді қонақүйлер, жеке жағажайлар — бәрі осы жерде. Әлемдегі ең үлкен сауда орталығы — Dubai Mall да осында. Сондай-ақ елдің негізгі ерекшелігі — мегаполис пен курорт өмірі үйлесім тапқан: жылы теңіз, таза жағажайлар (мысалы, атақты Kite Beach не тып-тыныш Mercato Beach) мен заманауи қала өмірі біте қайнасқан.
Қалай жетуге болады: Алматыдан Абу-Даби мен Шарджаға тікелей рейстер бар. Сонымен қатар Стамбұл, Ташкент не Баку арқылы ауысып отырып ұшатын рейстер де кездеседі.
Мальдив аралдары
- Виза: 30 күн ішінде қайтсаңыз, қажет емес.
- Ауа температурасы: +28–32 °C.
- Теңіз температурасы: +28–29 °C.
Мальдивке жұрт ашықхаттың бетінен түскендей керемет көріністер үшін барады: аппақ жағажай, әр тасы мен балығы көрінген тұп-тұнық теңіз бен ғажап күнбатыс. Ел жүздеген шағын аралдан тұрады, әрқайсысында түрлі бюджетке сай қонақүй мен мейрамхана бар.
«Мальдивте теңізге түскеннен басқа ештеңе істей алмайсың» деген пікір негізсіз. Мұнда серфинг мектептері бар, теңіз тасбақаларымен бірге жүзуге не снорклинг жасауға болады. Лавиани атолында әлемдегі ең үлкен суасты мейрамханасында кешкі ас ішуге мүмкіндік бар, ал Баа атолында маржан рифтері мен тамаша дайвинг күтеді. Кей жерлерде ұсақ риф акулалары кездеседі, бірақ қорқудың қажеті жоқ — олардың адамға зияны жоқ.
Қалай жетуге болады: Алматыдан ел астанасы Мале қаласына тікелей рейстер бар. Сондай-ақ БАӘ немесе Қатар арқылы бір рет ауысып отырып жетуге болады.
Филиппин аралдары
- Виза: 30 күн ішінде қайтсаңыз, қажет емес.
- Ауа температурасы (қыста): +26–31 °C.
- Теңіз температурасы: +27–29 °C.
Филиппин аралдары — саны жеті мыңнан асатын, әрқайсысы өзінше ерекше әлем. Палаванда Эль-Нидоның көз сүріндірер көгілдір лагуналары мен әлемдік табиғат мұрасына енген Пуэрто-Принсеса жерасты өзені бар. Себу аралы туристерді аппақ жағажайларымен және «айленд-хоппингке» арналған мінсіз бағыттарымен тартады: бір күннің ішінде сарқырамада шомылып, маржан рифтерінде снорклинг жасап, адам аяғы баспаған жағалауда теңіз өнімдерінен түскі ас ішуге болады. Сиаргао — елдің серфинг орталығы, ал Боракай — Condé Nast Traveler тізіміндегі әлемдегі ең әдемі жағажайлардың төріне енген арал.
Мұнда туристер кит тәрізді акулалармен Ослобта бірге жүзу үшін немесе Моалбоалда сардиналар үйірінің арасында снорклинг жасау үшін келеді (екеуі де Себу аралының бөлігі). Сондай-ақ Тааль жанартауының үстінен күннің қалай ататынын көруге, немесе Бохолдағы шоколад төбелеріне баруға болады — төбелері тегіс, ерекше бедерлі бұл алқап бір қарағанда сурет сияқты көрінеді.
Қалай жетуге болады: Қазақстаннан тікелей рейстер жоқ, бірақ Бангкок немесе Гуанчжоу арқылы ауысып отырып жетуге болады.
Индонезия
- Виза: елге келген кезде рәсімделеді, 30 күнге беріледі.
- Ауа температурасы: әдетте +26–31 °C.
- Теңіз температурасы: +28–30 °C.
Индонезияның ең танымал курорты — Бали аралы. Бірақ саяхаттан алар әсеріңіз таңдаған аралыңызға байланысты болуы әбден мүмкін. Бали бірнеше ауданға бөлінеді. Мәселен, денсаулығымды жақсартып алайын десеңіз, Убудты таңдаңыз — негізгі йога орталықтары, аюрведа мекемелері мен түрлі ретриттер осы жерде шоғырланған. Чангуда қашықтан жұмыс істеуге ең қолайлы жағдай жасалған: кофеханалар мен коворкингтер көп. Кута — жағажай өмірі, мейрамханалар мен түнгі клубтардың орталығы, ал Улуватуда жартас үстіндегі ғибадатханалар мен серфинг алаңдары орналасқан.
Бірақ Индонезияда Балиден басқа да қызық жер көп. Кеме не ішкі рейстермен Ломбок пен Гили аралдарына оңай жетуге болады — турист аз, бірақ жағажайлары ұзын әрі таза. Сондай-ақ Комодо аралына барып, алып келестерді көруге немесе Ява аралына аттанып, Инджен мен Бромо атты екі белсенді жанартауды тамашалауға болады.
Пайдалы кеңестер: «Bali belly-ден» (іш өтуден) сақтану үшін бөтелкедегі суды ішіңіз, кран суынан аулақ болыңыз (тіпті мұздан да), қолды жиі жуыңыз. Байк — жүруге ең жылдам әрі қолайлы көлік, бірақ қозғалыс тығыз, қауіп те көп. Жаңадан келгендерге Grab арқылы такси шақырған әлдеқайда қауіпсіз.
Қалай жетуге болады: Қазақстаннан тікелей рейстер жоқ, бірақ Куала-Лумпур арқылы ауысып отырып жетуге болады.
Малайзия
- Виза: 30 күнге дейін визасыз жүруге болады.
- Ауа температурасы: +27–32 °C.
- Теңіз температурасы: +28–29 °C.
Лангкави аралы — нағыз жағажай демалысына арналған жер: кең жағажайлар, джунгли мен аралдар көрінетін аспалы жол, ал жақын жерде снорклинг пен дайвингке қолайлы Пулау Паяр теңіз қорығы орналасқан. Сондай-ақ Килим паркіне баруға болады — мұнда жұрт тоғайлар мен әктасты бағаналардың арасын бойлай қайықпен серуендеп жатады.
Тағы бір танымал бағыт — Пенанг аралы. Мұнда көше базарларында жүріп, ерекше тағамдардан дәм татуға болады: кокос сүтін қосатын хош иісті наси-лемак, соя тұздығында және теңіз өнімдерін қосып қуыратын чар квай тео кеспесі, ащы ассам лакса сорпасы. Ал жануарларды жақсы көретіндер Сепилок аралына міндетті түрде баруға тиіс: мұнда орангутандарды оңалту орталығы, әлемдегі ең кішкентай аюларды қорғау орталығы және қалың тропикте құстар мен ұсақ жануарлар мекендейтін тропик орманды зерттеу орталығы бар.
Куала-Лумпур — үлкен, заманауи мегаполис. Елдегі ең қауіпсіз қалалардың бірі, отбасымен саяхаттауға да, шоппингке де қолайлы. Мұнда Suria KLCC секілді алып сауда орталықтары да, бренд дүкендері орналасқан сән-салтанатты Starhill да бар. Айтпақшы, Куала-Лумпур — бала-шағамен қыдырғанға өте қолайлы қала.
Қалай жетуге болады: Алматыдан Куала-Лумпурға тікелей рейстер бар. Лангкавиді таңдасаңыз, Куала-Лумпурда ауысып міну қажет.
Саяхатшыларға бірер кеңес
Қашан барған дұрыс?
Жылы елдерге саяхаттағанға ең қолайлы уақыт — желтоқсаннан наурызға дейінгі кез. Бұл уақытта жауын маусымы әлі басталмайды, теңіз жылы, толқындары да майда болады. Бірақ бұл маусымда басқа елдерден де туристер көп келетінін ескеріңіз.
Ұшақ билеттерін аларда қалай үнемдеуге болады?
Aviasales.kz арқылы түрлі нұсқаларды қарап көріңіз. Жаңа жыл қарсаңында және ұзақ демалыстар алдында билет қымбаттайды, сондықтан мереке күні емес, кемінде бір апта бұрын іздеген тиімді. Сондай-ақ арзан билет іздеуге арналған күнтізбемізді де қарап жүріңіз.
Сақтандыру қажет пе?
Көп елде ресми талап жоқ, бірақ өзіңіз үшін сақтандыру алған дұрыс — шетелдегі медицина қызметі қымбат болуы мүмкін.
Байланысты қайтемін?
Бірнеше нұсқа бар: роуминг, e-SIM немесе жергілікті SIM-карта. Ұзақ уақытқа бара жатсаңыз, e-SIM (телефоныңыз оқи ма, тексеріп алыңыз) немесе жергілікті операторды таңдаған тиімді.
Бұл елдерде туристерге қауіп жоқ па?
Тізімдегі елдердің бәрі туристерге қауіпсіз елдер. Дегенмен адам көп жүретін жерлерде қалта ұрылары болуы мүмкін, сондықтан сөмке мен жеке заттарыңызға абай болыңыз.
