Жұрт ағылған Нячангқа жолнұсқау: қонақүйлер, аралдар мен мейрамханалар
Дайвинг, арзан теңіз тағамдары мен ойын-сауық паркі.
Вьетнамның Нячанг қаласы кейінгі жылдары қазақстандықтар арасында ең танымал бағыттың біріне айналды. Себебі түсінікті: елде 30 күнге дейін визасыз жүруге болады, ал Алматы мен Астанадан күн сайын тікелей рейс қатынайды. Мұнда снорклингке таптырмас суы мөлдір теңіз бар, көне ғибадатхана көп, ал жергілікті теңіз тағамдары қалтаны қақпайды. Табиғи жағажайда тынығып, артынша заманауи ойын-сауық саябағына барып демалуға да болады. Ең үлкен артықшылығы — Нячангтағы демалыс Оңтүстік-Шығыс Азияның басқа курорттарына қарағанда әлдеқайда тиімді.
Бұл жолы Нячангқа барарда нені білу керек екенін айтып береміз.
Нячангқа қашан барған дұрыс?
Нячангқа ақпаннан бастап, тамыздың ортасына дейін барған жөн. Бұл уақытта Вьетнамда құрғақ маусым болады, яғни жаңбыр сирек жауады, ал теңіз жылы әрі жайлы болады.
- Аптап ыстықты ұнатпайтын болсаңыз, сапарыңызды ақпан не сәуір айларына жоспарлаңыз — бұл уақытта жаңбыр мүлде жаумайды десе де болады, күн райы шомылғанға да, серуендегенге де қолайлы.
- Ал таза жағажайда демаламын десеңіз, ең тамаша кезең — мамыр мен қыркүйек арасы. Бұл кезде күн райы жылы, теңіз суы мөлдір әрі жайлы болады. Бірақ кейде күн жаууы мүмкін.
- Қазаннан қаңтарға дейін Вьетнамда жаңбырлы маусым болады: күн райы құбылып, теңізде толқын күшейіп кетуі мүмкін.
Сапарыңызды жоспарлағанға ыңғайлы болсын деп, теңіз суының және ауаның орташа температурасын көрсететін кесте дайындадық. Бірақ күн райы жиі өзгеріп тұратындықтан, демалыс уақыты жақындағанда синоптиктер болжамын тексеріп алған дұрыс.
Нячангтағы теңіз суы мен ауаның орташа температурасын көрсететін кесте
Маусым | Температура (°C) | Су (°C) |
|---|---|---|
Қаңтар – Наурыз | 24–26 | 25–26 |
Сәуір – Мамыр | 26–30 | 27–29 |
Маусым – Тамыз | 29 | 28 |
Қыркүйек – Қазан | 27–29 | 28–29 |
Қараша – Желтоқсан | 24–26 | 25–27 |
Қаңтар – Наурыз
Температура (°C)
24–26
Су (°C)
25–26
Сәуір – Мамыр
Температура (°C)
26–30
Су (°C)
27–29
Маусым – Тамыз
Температура (°C)
29
Су (°C)
28
Қыркүйек – Қазан
Температура (°C)
27–29
Су (°C)
28–29
Қараша – Желтоқсан
Температура (°C)
24–26
Су (°C)
25–27
Нячангта қайда тұруға болады?
Ауданды қалай демалғыңыз келетініне қарай таңдаңыз. Климаттың ерекшелігіне байланысты Нячанг кешке қарай «ояна» бастайды, сондықтан орталықтағы кейбір аудандар тыныш демалысты қалайтындар мен балалармен саяхаттайтындарға шулы көрінуі мүмкін.
- Хон Тре аралы — үй ішімен демалғанға тамаша жер. Мұнда бірнеше ірі қонақүй бар: Nha Trang Marriott Resort & Spa, Vinpearl Resort & Spa және Vinpearl Resort Nha Trang. Барлығы жергілікті миллиардер Фам Нят Выонгқа тиесілі, сондықтан қызмет көрсету деңгейі жоғары. Осы аралда VinWonders ойын-сауық саябағы, гольф алаңы, аспалы жол және туристер аз келетін жабық жағажайлар бар. Екі адамға арналған бір түннің бағасы шамамен 1 200 мың донг (шамамен 25 мың теңге). Кемшілігі — қалаға тек аспалы жолмен не катермен жетуге болады.
- Tran Phu аралы — Нячангтағы ең танымал әрі шулы аудан. Жас жұптарға және түрлі қызықтың ортасында болғанды қалайтындарға қолайлы болмақ. Мұнда мейрамханалар, барлар, түнгі базарлар мен алты шақырымдық жағалау жолы бар. Барлық жерге жаяу жүріп жете аласыз. Сондықтан байкке қарап қалмайсыз. Теңіз жағалауындағы қонақүй нөмірі бір түнге 500 мың донгтен (шамамен 10 мың теңгеден) басталады. Бұл аудандағы жағажайда кісі қарасы көп, сондықтан жеке заттарыңызға сақ болыңыз.
- Hon Chong аралы — үнемдеп саяхаттағанды ұнататындарға тамаша таңдау. Мұнда тыныш, қонақүйлер мен туристер аз, ал бағалар өте төмен — бір түнге 250 мың донгтен (шамамен 5 мың теңгеден) басталады. Бірақ орталыққа не қаладағы көрікті жерлерге жету үшін шамамен 15–20 минут жол жүруіңіз керек болады.
Нячанг — негізінен қауіпсіз қала. Бірақ жол жиегінде жүргенде сөмкені қапсыра ұстап алғаныңыз дұрыс. Әйтпесе туристердің затын жұлып әкететін байкерлер бар.
Нячангтың көрікті жерлері
Бұрын Нячанг қарапайым балықшылар ауылы еді. Қазір ол Вьетнамдағы ең танымал курорттардың бірі саналады. Бірақ сол бір шағын әрі тыныш қаланың келбеті әлі де сақталған. Мұны туристер көп жүрмейтін көшелерден анық байқайсыз.
По Нагар Чам мұнаралары
Кіру ақысы: 30 мың вьетнам донгі (шамамен 611 теңге).
Жұмыс уақыты: күн сайын 06:00-ден 18:00-ге дейін. Қазаннан желтоқсанның соңына дейін музей 17:30-да жабылады.
Бұл ғибадатхана кешені көне Чам патшалығына тиесілі және По Нагар құдайына арналған. Ол VII–XI ғасырларда салынған. Әр көктем сайын мұнда құдай құрметіне арналған түрлі-түсті фестиваль өтеді: абыздар құдай мүсініне жаңа киім кигізеді, ұлттық музыка ойнап, дәстүрлі киім киген әйелдер би билейді, ал мұнараларға Вьетнамның түкпір-түкпірінен діндарлар ағылып келеді. Мерекенің нақты күндері ай күнтізбесіне байланысты өзгеріп отырады. 2026 жылы фестиваль 20–23 мамыр аралығында өтеді.
Лонг Шон будда ғибадатханасы
Кіру ақысы: тегін.
Жұмыс уақыты: тәулік бойы ашық.
Бұл — провинциядағы басты будда ғибадатханасы. Жоғарыға көтерілсеңіз, лотос гүлінің үстінде отырған алып Будда мүсіні мен қаланы биіктен көресіз. Биік баспалдақ пен ұзын киім ережесіне дайын болыңыз. Тізе мен иық жабық болуы керек.
Чамхыонг мұнарасы
Кіру ақысы: тегін.
Жұмыс уақыты: тәулік бойы ашық.
Лотос пішініндегі қызғылт мұнара — Нячангтың басты символы. Ол Екінші сәуір алаңында, теңіз жағалауында орналасқан. Суретке түсуге ең қолайлы уақыт — golden hour немесе күн батқаннан кейінгі сәт. Сонда мұнара шамдары жарқырап, ғажап көрінеді.
Христос Патша кафедралды соборы
Кіру ақысы: тегін.
Жұмыс уақыты: дүйсенбі–сенбі аралығында 08:00–16:00, түскі үзіліс 11:30–14:00. Жексенбі күні жабық.
Бұл — неоготикалық стильде салынған католик шіркеуі, француздар отарлаған дәуірінен қалған тарихи мұра (XX ғасырдың бірінші жартысында салынған). Терезелерінде католик дініндегі басты оқиғаларды бейнелейтін түрлі-түсті витраждар бар. Ішінде Мәриям ана мүсіні мен Інжіл көріністері бейнеленген барельефтер орнатылған шағын ғана бақ тұр. Күн ыстықта демалып алғанға таптырмас жер.
Хон Чонг тас бағы
Кіру ақысы: тегін.
Жұмыс уақыты: тәулік бойы ашық.
Нячангтың солтүстігінде орналасқан жартасты мүйіс — теңіз бен қала әдемі көрінетін жер. Мұнда ашық аспан астындағы концерттер өтеді, ал жанында шағын парк пен мұхиттану музейі бар.
Хон Мун
Кіру ақысы: балаға — 11 мың донг (шамамен 225 теңге), ересекке — 22 мың донг (шамамен 450 теңге).
Жұмыс уақыты: тәулік бойы ашық.
Бұл — Хон Тре аралының жанындағы шағын қорық-арал. Снорклинг пен дайвингіге қызығатындар арасындағы ең танымал орынның бірі. Мұндағы теңіз суы тап-таза, әсіресе мамыр мен қыркүйек аралығында су асты тіршілігін анық көруге болады. Аралға Cau Da портынан каноэмен немесе катермен жетуге болады.
Маймылдар аралы
Кіру ақысы: ересектерге — 180 мың донг (шамамен 3 600 теңге), бойы 100–139 см балаларға — 100 мың донг (шамамен 2 мың теңге). Бағасына аралға трансфер, кіру билеті және цирк шоуы кіреді.
Жұмыс уақыты: 08:00–17:00.
Аралда шамамен 1200 маймыл мекендейді. Оларды мұнда 1970 жылдардың аяғында кеңес ғалымдары әкелген. Маймылдар қорық ішінде емін-еркін жүреді, туристерге арналған арнайы қойылымдар да өткізіледі. Кейде маймылдар тосын мінез танытып, тап беруі, заттарыңызды ұрлап кетуі мүмкін.
Нячангта қайда баруға болады?
VinWonders ойын-сауық саябағы
Кіру ақысы: бір күнге лимитсіз билет — ересектерге 40 доллардан (шамамен 20 мың теңге), ал Хон Тре аралына келген қонақтарға — 30 доллардан (шамамен 16 мың теңге) басталады.
Жұмыс уақыты: 09:00–20:00.
Бұл — Вьетнамның Диснейленді. Саябақ аумағында кез келген адамдарға ойын-сауық табылады: хайуанаттар бағы, аквапарк, аттракциондар саябағы, дүкендер мен кафелер, электр шаналары және түрлі тақырыптағы иммерсив шоулар. VinWonders-тен бөлек, Vinpearl Harbour аймағында да серуендеуге болады. Онда мейрамханалар мен кәдесыйлар сататын дүкендер бар.
Ескеріңіз: Нячангтың құрлық бөлігінде тұратын туристер саябаққа аспалы жол арқылы ғана өте алады. Ал арал қонақтары саябақтың артқы жағына электрокарлармен (баггимен) жетсе болады.
Таулы Далат қаласы
Далат — Вьетнамның орталық бөлігінде орналасқан таулы қала, Нячангтан шамамен 3–4 сағаттық жерде. Мұндағы климат жағалауға қарағанда салқындау, табиғаты да өзгеше: жасыл қыраттар, қылқан жапырақты ормандар мен көрікті көлдер бар. Осындай күн райының арқасында мұнда кофе, құлпынай, гүл мен жасыл көкөніс өсіріледі. Сол себепті қалада шағын кофехана, гүл плантациясы мен фермерлік базар көп.
Чи Нгуен океанариумы
Кіру ақысы: ересектерге — 170–175 мың донг (шамамен 3 400–3 500 теңге), бойы 100–140 см балаларға — 85–90 мың донг.
Жұмыс уақыты: 07:00–17:30.
Теңіз арқылы Нячанг шығанағына экскурсияға шықсаңыз, бұл жерге міндетті түрде соғасыз. Океанариум көлемі шағын, бірақ онда жергілікті маржан рифтерінің мақұлықтары мен қызық интерактив экспозициялар бар.
Мұхиттану музейі
Кіру ақысы: 40 мың донг (шамамен 800 теңге), ал 6 жасқа дейінгі балаларға тегін.
Жұмыс уақыты: 06:00–18:00.
Бұл — теңіз жануарларын жақыннан көріп, олар туралы снорклинг кезінде көргеннен де көп білуге мүмкіндік беретін тамаша орын. Мұндағы ең әсерлі экспонат — 18 метрлік алып киттің қаңқасы, салмағы — 18 тонна.
Дайвинг пен снорклинг қайда бар?
Нячанг Вьетнамдағы теңіз түбін зерттегенге ең қолайлы жердің бірі саналады. Суы тұнық, ал мамырдан қыркүйекке дейінгі маусымда көріну қашықтығы 15–20 метрге дейін жетеді.
- Хон Мун аралы (Hon Mun). Мұнда суға сүңгуді ұйымдастырып беретін немесе сертификатталған сүңгушілерді ең үздік нүктелерге апаратын көптеген дайвинг-орталық бар. Қызмет құны орта есеппен 23 доллардан (шамамен 12 мың теңгеден) басталады.
- Хон Там аралы (Hon Tam). Бұл арал снорклингке өте қолайлы. Әсіресе осы аралда демалып жатсаңыз, су асты әлемімен танысқанға бар жағдай жасалған.
Нячангтың үздік жағажайлары
Нячангтың негізгі ерекшелігі — жағажайлары. Құмы аппақ, суы жып-жылы, ал тазалығы мұнтаздай. Жағажайлардың көбі қоғамдық орын саналады, бірақ жекеменшік жағажайлар да бар. Тек оған кіргенге қосымша ақы төлеуіңіз керек.
Tran Phu Beach
Қаладағы негізгі қонақүйлер тұрған көшенің қарсы бетіндегі орталық жағажай. Кіру тегін, бірақ шезлонг пен қолшатыр үшін 100 мың донгқа дейін (шамамен 2 мың теңге) төлеу керек. Жағажай тәулік бойы ашық — күнге қыздырынуға да, күн батқанда отырыс ұйымдастыруға да болады. Алайда түнде жарық шамдар жанбайды, сондықтан абай болыңыз.
Bai Dai Beach
Нячангтан оңтүстікке қарай 30 км жерде орналасқан табиғи жағажай. Тұмса табиғатта демалғанға таптырмас орын. Аппақ құмы сусып тұрады, ауасы таза. Таңертең барған дұрыс, сонда су маңынан ыңғайлы жер тауып үлгересіз. Кіру тегін, бірақ таксимен жол ақысы шамамен 200–250 мың донг (шамамен 4–5 мың теңге) шығады.
Doc Let Beach
Нячангтың солтүстігінде орналасқан жағажай, оған да таксимен жету керек. Кіру ақылы: ересектерге 50 мың донг (1000 теңге), балаларға 25 мың донг (500 теңге). Мұнда кешке дейін жұмыс істейтін бірнеше кафе бар. Жағажай тәулік бойы ашық тұрады, бірақ түнде қалғыңыз келсе, жақын ауылдан немесе Нячангтан қонақүй жалдаған дұрыс.
Bai Tru Beach
Бұл жағажайға Хон Тре аралының қонақтары ғана тегін кіреді. Материктен келсеңіз, жол мен кіру ақысы шамамен 1 100 000 донгқа (шамамен 22 мың теңге) дейін жетуі мүмкін. Бұл бағаға тасымал, «швед дастарханы» үлгісіндегі тамақ пен бассейнге кіру ақысы кіреді. Жағажай әдетте 18:00-ге дейін ғана ашық тұрады.
Арзан әрі дәмді тамақ сататын жерлер
Танымал дәстүрлі тағамдардан дәм ауыз тимей кетпеңіз. Хош иісті сиыр еті қосылған фо сорпасы, қытырлақ спринг-ролдар, асшаян салынған құймақ пен теңіз өнімдері — ас мәзірінде таңдау көп. Ал десертке шырынды манго, маракуйя мен айдаһар жемісін алыңыз. Жергілікті тұрғындар мұның бәрін қою сүт қатқан вьетнам кофесімен ішеді. Тағы бір жағымды тұсы — тамақтары арзан, Алматы не Астанаға қарағанда бірнеше есе төмен. Екі адамға арналған тойымды түскі ас орта есеппен 650–700 мың донгқа (шамамен 13–15 мың теңге) аласыз. Мына жерлерге барып, міндетті түрде асын ішіп көріңіз:
Ramen Kaji — Екінші сәуір саябағының маңындағы рамен мейрамханасы. Мәзірінде бірнеше түрлі рамен, ролдар, дәстүрлі жапон стрит-фуды мен басқа да көп таңдау бар.
MEO Kitchen — Хон Тре аралындағы пирстің оң жағында тұрған мейрамхана. Мұнда классикалық фо-бо сорпасын ішуге болады, сондай-ақ аустралиялық вагю, асшаян және тауық еті қосылған шаурма-кәуаптың да дәмін көріңіз.
Thanh Sương Vinpearl Harbour — Хон Тре аралындағы пирстегі теңіз өнімдері кафесі. Мұнда жаңа піскен теңіз өнімдерін грильде өте қолжетімді бағаға жеуге болады. Үлкен теңіз өнімдерінен құралған комбо табақ — бар болғаны 150 мың донг (шамамен 3 мың теңге).
Madam Phuong — Нячангтың орталығындағы шағын, бірақ өте сәнді вьетнам мейрамханасы. Мәзірінде грильдегі теңіз өнімдері, фо-бо, алуан түрлі жаңа сығылған шырындар бар.
Нячангтан қандай кәдесый алып келуге болады?
- Жеміс себеттері. Кейбір туроператорлар оларды тур бағасына қосып, қонақүйден шыққанда сыйлық ретінде береді. Ең дәмді әрі арзан жемістерді Сом Мой базарынан алған дұрыс: мұнда манго небәрі 13 мың донг (шамамен 270 теңге) тұрады, маракуйяның келісі — 40 мың донг, ал айдаһар жемісі түріне қарай 40–53 мың донг (шамамен 800–1100 теңге) тұрады.Жемістерді қол жүгіне салып алуға болады, бірақ дурианды елден әкетуге тыйым салынғанын есте сақтаңыз.
- Інжу-маржан. Оны жыл бойы жинайды, сондықтан зергерлік дүкендердің бәрінде дерлік інжу әшекейлерін табуға болады. Бағасы формасы мен түсіне байланысты өзгереді: қарапайым бұйымдар арзан, ал кейбір әшекейлердің бағасы мыңдаған долларға жетеді. Зергерлік бұйым сатып алғанда міндетті түрде түпнұсқа сертификатын сұраңыз. Ал кәдесый дүкендерінде қабыршақ пен перламутрдан жасалған әшекейлер мен интерьерге арналған ұсақ бұйымдар сатылады.
- Вьетнам кофесі. Ел кофе өндірісі бойынша әлемде екінші орында. Жергілікті тұрғындар көбіне қою әрі дәмі қанық робуста түрін ішеді, ал туристер арасында арабика көбірек сұранысқа ие. Ерекше әсер алғыңыз келсе, Нячангта сатылатын лювак кофесін байқап көріңіз — ол мусанг атты жануар қорытқан дәндерден дайындалады.
Нячангта сондай-ақ дәмді әрі пайдалы ұсақ-түйек заттарды да сатып алуға болады. Супермаркеттерден балық тұздығын алыңыз — ол вьетнам тағамдарының басты дәмдеуіші (бірақ ескерту: иісі таңсық әрі ерекше). Шайсүйер қауымға сүтті улун, жасмин немесе лотос шайы ұнайды. Дәріханаларда көпшілікке бала кезден таныс «Жұлдызша» бальзамы мен вьетнамдықтар суға араластырып ішетін артишок сығындысын табуға болады — ол ағзаны тазартуға және аурулардың алдын алғанға пайдалы. Ал нағыз пайдалы кәдесый іздесеңіз, бамбуктан жасалған ыдыс-аяқ пен күн астында ұзақ жүргеннен кейін теріні сақтайтын алоэ қосылған гельдерді алыңыз.
Вьетнам туралы тағы не білген жөн?
Ең жайлы маусым
Ақпаннан бастап қыркүйекке дейін — Нячангтағы ең жайлы әрі жылы маусым. Бұл уақытта күн аз жауады, ал теңіз суы тұнық әрі тынық болады. Шомылғанға, снорклинг пен дайвингке таптырмас кез. Дауылға тап болмайын, аптап ыстықта қиналып қалмайын десеңіз, сапарыңызды осы айларға жоспарлаңыз.
Қазақстан азаматтарына кіру ережелері
Қазақстан азаматтарына Вьетнамға 30 күнге дейінгі виза алудың қажеті жоқ. Паспорттың елге кірген күннен бастап кемінде 6 ай жарамды болуға тиіс.
Қала ішінде қалай қатынаған ыңғайлы?
Қалада такси не мототакси шақырғыңыз келсе, Grab, Xanh SM немесе Maxim сияқты қолданбаларды пайдаланыңыз. Бұл жылдам, ыңғайлы әрі көшеде көлік тоқтатқаннан қауіпсіз. Скутер жалдаған арзанырақ әрі қалағаныңызша жүресіз. Тек сенімді жерлерден алыңыз. Азиядағы басқа елдер сияқты, Вьетнамда да жол қозғалысы біраз ретсіз. Сондықтан жолда абдырап қаламын десеңіз, қолданба арқылы мототакси шақырған дұрыс.
Қандай қолданбаларды пайдалаған жөн?
Қалада бағдар табу үшін Google Maps қолданған жөн — ол ең дәл әрі ыңғайлы қолданба, бірақ интернет байланысы қажет. Желісіз қаламын ба қорықсаңыз, алдын ала Maps.me қосымшасынан офлайн-карта жүктеп алыңыз.
Телефон байланысын қайтесіз?
Сапар алдында eSim сатып алыңыз. Ол үшін Airalo немесе Yesim сияқты танымал сервистерді қолдануға болады. Ал телефоныңыз eSim-ді оқымаса, жергілікті SIM-картаны әуежайдан сатып алуға болады.
Банк картасымен төлеуге бола ма?
Туристік аймақтарда картамен төлеген қиын емес. Қонақүйлерде, ірі мейрамханалар мен супермаркеттерде карта қабылдайды. Бірақ біраз қолма-қол ақша алған да дұрыс, карта қабылдамайтын жерлер де бар.
Ақшаны қайда айырбастауға болады?
Ел валютасы — вьетнам донгы. Оның құны шамамен 1 теңге = 50 донг. Қазақстанда бұл валюта әр айырбастау пунктінде бола бермейді, сондықтан банк бөлімшесіне барған дұрыс. Аз мөлшердегі ақшаны әуежайда да айырбастауға болады, бірақ онда курс сәл жоғары.
Нячангта туристер әдетте ақшаны «Сапфир» дүкендер желісінде айырбастайды — атауы үлкен әріптермен орысша жазылған, сондықтан бірден көрінеді.
Сапарға қанша ақша керек?
Нячанг — Вьетнамдағы ең арзан бағыттардың бірі. Ақша үнемдеймін десеңіз, арзан қонақүй тауып, көше тағамын жеп, қоғамдық көлікпен қатынап, 10 күндік демалысқа адам басына шамамен 500 доллар (шамамен 270 мың теңге) жеткізуге болады.
Ал жайлылық керек десеңіз, жақсырақ қонақүй, қымбаттау мейрамхана мен бірнеше экскурсияны (мысалы, снорклинг немесе VinWonders саябағына баруды) қоссаңыз, бюджетіңізді 1000–1200 доллар шамасына (540–650 мың теңге) жоспарлаған жөн.
Суреттерді салған — Олег Бородин.
