Қытайда да жағажай бар: теңізге тиіп тұрған сегіз курорт

Қытай десе, ойымызға жағажай емес, бірден шопинг, шамдары жарқыраған Шанхай, пандалар мен Ұлы Қытай қорғаны келеді. Бірақ бұл елде теңіз жағасында да керемет демалуға болады. Қытайды бірден үш теңіз қоршап жатыр, ал курорттары оңтүстіктегі Хайнань аралынан бастап солтүстіктегі Далянь қаласына дейін созылады. 

Теңіз жағасында демалуға болатын сегіз жерді таңдадық. Қай уақытта барған дұрыс, қалай жетуге болады және қыста қай жерде суға түсуге болатынын айтып береміз.

Қытайға теңізге түсу үшін қашан барған дұрыс?

Қытайда үш теңіз — Оңтүстік Қытай, Шығыс Қытай және Сары теңіз бар. Оңтүстікте жыл бойы дерлік суға түсуге болады, ал солтүстікте теңізге тек жазда түскен дұрыс. Қай курортты таңдау керегін түсіну үшін мына кестеге қараңыз.

Қытайдағы жағажай демалысына арналған үздік курорттар

Курорттарды оңтүстіктен солтүстікке қарай түгендеп шықтық. Алдымен қыста да суға түсуге болатын жерлерді, кейін Сары теңіз жағасындағы жазғы курорттарды таныстырамыз.

Хайнань

Маусымы: қарашадан сәуірге дейін.
Су температурасы: қыста +22–26 °C, жазда +28–30 °C.
Қалай жетуге болады: Алматыдан Саньяға тікелей рейспен не Үрімші, Чэнду, Гуанчжоу арқылы ауысып ұшуға болады.

Хайнань — тропиктегі арал әрі Қытайдың ең оңтүстігіндегі провинция. Мұнда жылына 300 күннен астам күн ашық болады, ал қаңтарда да су температурасы +22 °C-тан төмен түспейді. Сондықтан қыста теңізге барып, визасыз әрі ұзақ жол жүрмей демалғысы келетіндер Хайнаньды таңдайды. Маусымға қарай тікелей чартер рейстері де ашылады. Оларды Aviasales.kz-тің Telegram арнасынан бақылап отырыңыз.

Туристердің көбі аралдың оңтүстігіндегі Саньяға барады. Бірақ Хайнаньда бұдан бөлек провинция астанасы Хайкоу мен серфингшілер қаласы Ваньнин де бар.

Саньядағы ең мөлдір су Ялунвань шығанағында. Жағажай бойында бес жұлдызды қонақүйлер тізіліп тұр. Бірақ туристер көп келетін басқа жерлер сияқты мұнда да тұру мен тамақтану қаладағыдан қымбат. Қытайша да, ағылшынша да білмесеңіз, Дадунхай жағажайының маңынан қонақүй таңдаңыз. Мұнда Саньяның басқа аудандарына қарағанда орысша сөйлейтін гидтер, орысша маңдайшалар мен мәзірлер көп. Әсіресе балалармен не жасы үлкен ата-анаңызбен барсаңыз, ыңғайлы.

Балалармен демалғанға Санья Бэй жағажайы қолайлы. Бұл — аралдағы ең ұзын жағажай. Суы көрші шығанақтардағыдай мөлдір емес, есесіне теңіз біртіндеп тереңдейді, құмы жұмсақ, кафе мен дүкендерге жаяу бірнеше минутта жетесіз. Оның үстіне күннің батуы да ерекше әдемі.

Жағажайда жата бергеннен жалықсаңыз, пароммен Сидао аралына барыңыз. Жол шамамен 20 минут алады. Мұнда балықшылар ауылы, маржан рифі және адам аздау жағажай бар. Аралға кіру мен барып-қайту паромы кіретін бір билет ересектерге шамамен 100 CNY (шамамен 6 700 KZT), балалар мен студенттерге 50 CNY (шамамен 3 350 KZT) тұрады.

• 

  Хайкоудағы көпір
• 

  Ваньнин қаласындағы Шимэй шығанағы

Тағы жарты күнді Наньшань саябағына арнаңыз. Мұнда теңіздің ішінде тұрған биіктігі 108 метрлік Гуаньинь құдайының мүсіні бар. Билет бағасы 120–150 CNY (шамамен 8 040–10 мың KZT), ал саябақтың аумағы өте үлкен. Косметика мен парфюмерия алғыңыз келсе, Sanya International Duty Free City сауда орталығына барыңыз. Хайнаньнан ұшып кететін жолаушыларға, тіпті Қытайдың құрлықтағы бөлігіне қайтатындарға да бажсыз сауда жасаудың арнайы тәртібі қолданылады. Бұл сауда орталығында талапқа сай тауарлар салықсыз сатылады.

Хайкоуда ескі Цилоу көшесін аралаңыз. Мұндағы аркалары мен галереялары бар үйлер өткен ғасырдың басында салынған. Жағажайды қалауыңызға қарай таңдаңыз: Холидейде адам көп, бірақ шезлонгтар мен кафелер жеткілікті. Сисю виндсерфингке қолайлы, ал Байшамэнь тыныш демалғысы келетіндерге ұнайды.

Ваньнин Саньядан көлікпен бір жарым сағаттық жерде орналасқан. Бұл — серфингшілер қаласы. Жиюэ шығанағында толқындар бірқалыпты, сондықтан серфингті жаңадан үйреніп жүргендерге қолайлы. Бірақ алғашқы сабақтарды міндетті түрде серфинг мектебінде нұсқаушымен бірге алыңыз. Теңіз жағасындағы орман мен адам аз жағажай керек болса, Шимэй шығанағына барыңыз. Жақын жерде адам тұрмайтын Цзяцзин аралы бар. Оған су астына сүңгу үшін апарады, бірақ тек сертификаты бар дайвинг орталығы арқылы және нұсқаушымен бірге барған дұрыс.

Макао

Маусымы: суға түскенге мамырдан қазанға дейін қолайлы. Ал қаланы аралағанға қазан–желтоқсан айлары жақсы.
Су температурасы: +25–29 °C.
Қалай жетуге болады: тікелей рейс жоқ. Ең ыңғайлысы — Гонконгқа ұшып, одан әрі пароммен шамамен бір сағатта не автобуспен жету.

Макао 400 жылдан астам Португалияның отары болды. Қазір бұл — Қытайдың арнайы әкімшілік ауданы. Мұнда елге кіру ережелері бөлек, патака дейтін ұлттық валютасы бар. Туристер Макаоға көбіне казинода ойнап, отаршылдық дәуірінен қалған ғимараттарды көруге барады. 

Бірақ мұнда жақсы жағажайлар да бар. Бір нәрсені ескеріңіз: Қытайдың құрлықтағы бөлігінен Макаоға бару елден шығу болып есептеледі. Сондықтан паспорт бақылауынан өтесіз. Оның үстіне Қазақстан азаматтары Макаода визасыз 14 күн ғана жүре алады, ал Қытайдың құрлықтағы бөлігінде бұл мерзім — 30 күн.

Ең танымал жағажай — Колоан аралындағы Хак Са. Ол қара құмымен белгілі, бірақ қазір құмы қарадан гөрі қою сұр түсті. Өйткені жағалауды су шайып, құмның бір бөлігін құрлықтан әкелуге тура келген. Тыныш жер іздесеңіз, жасыл төбелердің арасындағы шағын Чок Ван шығанағына барыңыз. Демалыс күндері жергілікті тұрғындар осында келіп, мангалға ет пісіргенді ұнатады.

• 

  Сенадо алаңы
• 

  The Parisian қонақүйі

Жағажайдан кейін Сенадо алаңынан Әулие Павел соборының қирандыларына дейін жаяу барыңыз. Ескі қала ЮНЕСКО-ның дүниежүзілік мұралар тізіміне енген. Жолай мұнда сатылатын паштел-де-ната — ішіне тәтті крем салынған португал бәлішінен дәм татыңыз. Кешке Котай ауданына барыңыз. Мұнда The Parisian қонақүйінің жанында Эйфель мұнарасының көшірмесі, сондай-ақ сәулетші Заха Хадид жобалаған Morpheus қонақүйі орналасқан. Қонақүйлердің кіреберіс залдарын тегін аралауға болады.

Гонконг

Маусымы: мамырдан қазанға дейін.
Су температурасы: +25–29 °C.
Қалай жетуге болады: Бейжің, Шанхай, Гуанчжоу, Үрімші не Сеул арқылы ауысып ұшуға болады.

Гонконг десе, көбіне бизнес пен шопинг еске түседі. Бірақ оның 260-тан астам аралы бар. Іскерлік орталықтан жағажайға жету Алматыдан Қапшағайға барғаннан да аз уақыт алады. Мұнда Қытайдың құрлықтағы бөлігінен бөлек кіру ережелері, өз валютасы — Гонконг доллары, тіпті бөлек SIM-карталары бар. Макаодағы сияқты Гонконгта да Қазақстан азаматтары визасыз 14 күн жүре алады. Бір жақсысы: Cathay Pacific әуе компаниясы 2027 жылдың басында Гонконг — Алматы тікелей рейсін ашуды жоспарлап отыр.

Ең танымал жағажай — Репалс Бэй. XIX ғасырда бұл шығанақта қарақшылар патрульдерден жасырынған, ал қазір жағалауында қымбат мейрамханалар мен яхта клубтары орналасқан. Аралдың оңтүстігіндегі Шек О жағажайы қарапайымдау. Бірақ оған бұралаң жолмен жетесіз, теңізде толқын да қаттырақ болады. Есесіне серфингшілерге ұнайды.

• 

  Шек О ауылы
• 

  Лантау аралы

Қаладан алысырақ кеткіңіз келсе, Лантау аралындағы Чеун Ша жағажайына барыңыз. Ұзындығы үш шақырымға созылған жағажайды мүйіс екіге бөліп тұр. Бір жағында кафелер бар, екінші жағы адам аяғы сирек басатын табиғи жағажайға ұқсайды. Лантауда Тай О балықшылар ауылы да орналасқан. Мұнда үйлер әлі күнге дейін су үстіне қағылған тіректердің үстінде тұр. Ауылдың каналдарын қайықпен аралауға болады.

Осы тақырыпта басқа не бар?

Гонконгта көретін не бар? Ең қызық жерлер топтамасы

Гуланью

Маусымы: жағажайда демалуға мамыр мен қыркүйек қолайлы. Серуендеуге ерте көктем не күздің соңы жақсы.
Су температурасы: шамамен +25 °C.
Қалай жетуге болады: Сямыньға ауысып ұшып, одан әрі паромға отырасыз. Пароммен жол шамамен 20 минут алады.

Гуланью аралы Сямынь қаласына қарайды. XIX ғасырда мұнда әртүрлі елден келген шетелдіктер тұрған. Әрқайсысы өз елінің сәулет үлгісімен үй салған: викториан стиліндегі зәулім үйлер, готикалық шіркеулер, бағаналы виллалар. Осындай ерекше сәулеті үшін арал ЮНЕСКО-ның дүниежүзілік мұралар тізіміне енген. Мұнда көлік жоқтың қасы, сондықтан емін-еркін жаяу аралауға болады.

Жергілікті тұрғындар күнге қыздырыну үшін аралдың оңтүстігіне барады. Ганцзайхоу жағажайының құмы жұмсақ, ал суға түсетін жері қалқымалармен қоршалған. Күн сәулесі жартасының түбінде адам азырақ. Теңізге түсудің арасында павильондары мен тоғандары бар Шучжуан бағын аралап, Фортепиано музейіне кіріңіз. Өткен ғасырдың басында бай отбасылар аралға пианино әкелген. Сол кезде зәулім үйлердің терезелерінен үнемі музыка естіліп тұратын. Сондықтан Гуланью әлі күнге дейін «фортепиано аралы» деп аталады.

Циндао

Маусымы: маусымнан қыркүйекке дейін.
Су температурасы: +25 °C-қа дейін.
Қалай жетуге болады: Бейжің, Шанхай не Үрімші арқылы ауысып ұшуға болады.

XIX ғасырдың соңында Циндао Германияның концессиясы болды. Мұның ізі әлі күнге дейін байқалады: қызыл шатырлы үйлер мен ағаш үстелдері бар ескі сыраханалар сақталған. Tsingtao сырасы да осы қаладан шыққан. Оның зауытын 1903 жылы неміс қоныстанушылары ашқан.

Негізгі жағажайлар қала орталығынан алысырақ орналасқан. Шилаожэнь жағажайында волейбол алаңдары бар, сапборд пен катамаран жалдауға болады. Ал тыныш демалғыңыз келсе, Хуандао ауданындағы Алтын жағажайға барыңыз.

Қаланың өзінде Чжаньцяо пирсінің соңына дейін барып көріңіз. Ол теңізге қарай 440 метрге созылып жатыр. Пирстің ұшындағы қытай үлгісінде салынған күркені бұрын көрген болуыңыз мүмкін: ол Tsingtao сырасының жапсырмасында бейнеленген. Сыраның тарихын Tsingtao сыра музейінен біле аласыз. Туристер көп келетін маусымда кіру билеті шамамен 60 CNY (шамамен 4 020 KZT) тұрады. Бағаға сыраның екі түрінен дәм тату да кіреді. Күннің батқанын көру үшін Сяоюйшань саябағына көтеріліңіз. Жоғарыдан ескі қаланың қызыл шатырлары мен теңіз көрінеді.

Жазда Циндао жағалауындағы су жиі жасыл түске боялады. Бұл — балдырлардың көбеюінен. Жабдықталған жағажайларға арнайы торлар орнатылады. Сондықтан суға түсуге болады, бірақ теңіз жарнамадағыдай мөлдір боп көрінбеуі мүмкін. Суға түсер алдында жағажайдағы ескертулерді қарап шығыңыз.

Вэйхай

Маусымы: мамырдан қазанға дейін, бірақ суға түсуге шілде–қыркүйек айлары қолайлырақ.
Су температурасы: +20–24 °C.
Қалай жетуге болады: Бейжің не Шанхай арқылы ауысып ұшуға болады.

Вэйхай — Қытайдың солтүстік-шығысындағы Шаньдун провинциясында орналасқан курорт. Мұнда тыныш демалыс үшін барады. Қаланың негізгі жағажайы шамамен үш шақырымға созылып жатыр, туристер көп келетін маусымда да адамға толып кетпейді. Құмы ұндай майда, суы мөлдір, ал бағалар Хайнань мен Гонконгқа қарағанда төмен. Оңтүстік Корея жақын болғандықтан, дүкендерде корей косметикасы мен азық-түлігі көп.

Вэйхайдың халықаралық жағажайында күнге қыздырынып демалуға болады. Басқа жер көргіңіз келсе, Вэньдэн ауданындағы ыстық су көздеріне барыңыз. Қала орталығынан шамамен бір сағатта жетесіз. Бассейндері бар демалыс кешендеріне кіру бағасы курорт пен маусымға қарай 80–150 CNY (шамамен 5 360–10 мың KZT) тұрады. Жергілікті тұрғындар бұл ыстық сулардың түрлі ауруға шипасы бар деп сенеді. Бірақ денсаулығыңызға қарай абайлап, ыстық суға ұзақ түспеген дұрыс.

Бір күніңізді Люгундао аралына арнауға болады. Мұнда орман ішіндегі серуен жолдары мен Қытай теңіз флотының тарихын баяндайтын музей бар. Ал қала ішінде Хуаньцуйлоу саябағын аралап, баспалдақпен павильонға көтеріліңіз. Жоғарыдан бүкіл қала көрінеді.

Далянь

Маусымы: шілдеден қыркүйекке дейін.
Су температурасы: +22–25 °C.
Қалай жетуге болады: Бейжің, Шанхай не Үрімші арқылы ауысып ұшуға болады.

XIX ғасырдың соңында бұл жерді Ресей империясы жалға алып, Дальний портын құрған. Сондықтан Даляньда модерн стиліндегі зәулім үйлер мен кәдесый дүкендері орналасқан жаяу жүргіншілерге арналған Орыс көшесі бар. Қазір Далянь — Қытайдағы ең жасыл қалалардың бірі. Саябақтары төбелердің үстінде орналасқан, ал жағалау сызығы 200 шақырымға созылып жатыр.

Теңізге түсу үшін қала орталығынан алысырақ барған дұрыс, өйткені негізгі шығанақты порт алып жатыр. Ең танымал жағажайлар — Фуцзячжуан мен Цзиньшитань (Алтын тас). Тыныштау жер іздесеңіз, Банчуйдао курортының маңына барыңыз. Жағажайларда кафелер, барбекюге арналған орындар бар, гидроцикл мен катамаран жалдауға болады.

Цзиньшитаньда алты тақырыптық аймағы бар Discovery Kingdom аттракциондар саябағы орналасқан. Оны аралауға бір күн кетеді. Кіру билеті шамамен 210 CNY (шамамен 14 мың KZT), ал бойы 120 сантиметрден аласа балалар тегін кіреді. Таңғы асқа теңіз жағасындағы шағын мейрамханалардың бірінен асшаянға тапсырыс беріңіз. Балықшылар күн сайын таңертең жаңа аулаған теңіз өнімдерін осы мейрамханаларға әкеледі.

Бэйдайхэ

Маусымы: маусымнан қыркүйекке дейін.
Су температурасы: +25–28 °C.
Қалай жетуге болады: Алматыдан не Астанадан Бейжіңге тікелей ұшып, одан әрі жүрдек пойызға не автобусқа отырасыз.

Бэйдайхэ — Қытайдағы ең көне курорттардың бірі. Оның негізі 1898 жылы қаланған. Бейжіңнен 280 шақырым жерде, Сары теңіз жағасында орналасқан. Мұнда яхталар мен қымбат қонақүйлер үшін емес, майда алтын түстес құм мен балаларға қауіпсіздеу, терең емес теңіз үшін барады.

Екі негізгі жағажайды салыстырып көріңіз. Орталық жағажай, яғни Жолбарыс тасы — адам көп келетін, кең жағажай. Ол жолақты ірі тастарына байланысты осылай аталған. Ал Шығыс тау жағажайы тыныштау, суы мөлдір, кафелері азырақ. Лаолунтоуға («Айдаһардың басы») да барып қайтыңыз. Бұл — Ұлы Қытай қорғанының теңізге дейін жететін сирек бөліктерінің бірі. Бэйдайхэден көлікпен шамамен бір сағатта жетуге болады.

Теңіздегі демалысты қала аралаумен ұштастырғыңыз келсе, Қытайға алғаш баратындарға арналған мақаладағы кеңестерді пайдаланып, маршрут жасаңыз. Бейжің мен Бэйдайхэні бір аптаның ішінде аралап шығуға болады.

Осы тақырыпта басқа не бар?

Қытайға алғаш бара жатқандарға гид: қалай жеткен дұрыс, қай қалаларға барған жөн?

Қытай курорттарына қашан барған дұрыс?

Негізгі ереже қарапайым: қыста — оңтүстікке, жазда — солтүстікке барыңыз.

• Оңтүстік Қытай теңізі (Хайнань). Ең жақсы маусым — қарашадан сәуірге дейін. Бұл кезде күн ашық, жауын аз, су температурасы +22–26 °C. Жазда күн ыстық әрі ылғалды, тайфун болуы мүмкін.
• Оңтүстік Қытай теңізі (Гонконг, Макао). Мамырдан қазанға дейін суға түсуге болады, бірақ бұл — жаңбырлы маусым. Қаланы аралауға күз қолайлырақ.
• Сары теңіз (Циндао, Вэйхай, Далянь, Бэйдайхэ). Маусымнан қыркүйекке дейін суға түседі. Шілде мен тамызда су ең жылы болады — +24–26 °C-қа дейін жетеді. Қыркүйекте аптап ыстық басылып, демалуға жайлы болады.

Қазанның алғашқы аптасына және Көктем мерекесіне (қаңтар–ақпан) демалыс жоспарламаған дұрыс. Бұл кезде бүкіл Қытай саяхаттайды: қонақүй бағалары бірнеше есе өсіп, жағажайлар мен паромдарға ұзын-сонар кезек жиналады.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Алматы мен Астанадан Қытай курорттарына қалай жетуге болады?

Қазақстаннан Саньяға тікелей рейс бар, ал басқа курорттарға көбіне ауысып ұшасыз. Әдетте Қытай ішінде тағы бір рейске отыру керек.

1. Алматыдан Үрімші, Бейжің, Шанхай, Гуанчжоу және Саньяға, ал Астанадан Бейжің, Үрімші мен Гуанчжоуға тікелей рейстер бар.
2. Одан әрі Қытай әуе компанияларының ішкі рейстерімен Хайкоу, Сямынь, Циндао, Вэйхай не Даляньға ұшасыз.
3. Бэйдайхэге Бейжіңнен пойызбен, ал Макаоға Гонконгтан пароммен не автобуспен жеткен ыңғайлы.

Екі билетті бөлек сатып алсаңыз, рейстердің арасына кемінде үш-төрт сағат қалдырыңыз. Қытайда ішкі рейске ауысқанда қауіпсіздік тексерісінен қайта өтесіз, ал елге алғаш кіргенде паспорт бақылауынан да өту керек.

Қазақстан азаматтарына Қытай курорттарына бару үшін виза керек пе?

2023 жылғы 10 қарашадан бері Қазақстан мен Қытай арасында визасыз режим бар. Қазақстан азаматтары Қытайда бір сапарда 30 күнге дейін, ал 180 күн ішінде жалпы 90 күннен аспайтын мерзімде визасыз жүре алады. Гонконг пен Макаоның кіру ережелері бөлек.

• Қазақстан азаматтары Гонконг пен Макаода 14 күнге дейін визасыз жүре алады.
• Қытайдың құрлықтағы бөлігінен Гонконгқа не Макаоға бару елден шығу болып есептеледі. Сондықтан паспорт бақылауынан өтесіз. Қайта кіргенде 30 күндік мерзім жаңадан есептеледі, бірақ барлық күн 180 күн ішіндегі жалпы 90 күндік шектеуге кіреді.

Қытай кіру ережесіҚазақстан азаматтарына

Виза қажет емес

ҚР азаматының паспорты

Елге кіру ережесі туралы барлық деректі ресми дереккөзден алдық. Ереже өзгерсе, деректерді жұмыс күні барысында жаңартып қоямыз.

Назар аударыңыз

• 

  Елде болу мерзімі — 30 күнге дейін

Кіру үшін қажет құжаттар

• 

  Паспорттың жарамдылық мерзімі елге кірген күннен бастап кемінде 6 ай болуы керек

Толығырақ

Өзіңізбен бірге не алған, қандай қосымшаларды жүктеп қойған дұрыс?

Қажет қосымшаларды Қазақстанда жүргенде, ұшар алдында орнатып алыңыз. Өйткені олардың көбі Қытайға барған бойда керек болады, ал кейбір VPN қосымшаларын Қытайдың өзінде жүктеу қиын.

1. Alipay не WeChat — Қытайда төлемнің көбі осы қосымшалар арқылы жасалады. Visa не Mastercard картасын алдын ала байланыстырып алған дұрыс. Қазақстан банктерінің көптеген картасын Alipay-ге тікелей қосуға болады.
2. Amap — карта мен навигацияға арналған қосымша. Google Maps Қытайдың құрлықтағы бөлігінде VPN-сіз жұмыс істемейді.
3. Қытай тілінің офлайн пакеті бар аудармашы — интернет болмаса да көмектеседі.
4. VPN — Қытайда Instagram, WhatsApp және TikTok сияқты үйреншікті әлеуметтік желілер жұмыс істемейді. LetsVPN, HitRay не VPN Cat қосымшаларын алдын ала жүктеп алыңыз.

Жағажай демалысына мына заттарды алыңыз:

• күннен қорғайтын крем, суға түсетін киім, жағажай тәпішкесі;
• мамыр–қазан аралығында барсаңыз, жеңіл жаңбырлық не қолшатыр;
• ұсақ шығындарға қолма-қол юань — телефон қуаты таусылып қалса, керек болады;
• пауэрбанк — Қытайда телефонсыз төлем жасау да, такси шақыру да қиын.

Жиі қойылатын сұрақтар

Қытайда жағажайда демалуға ең жақсы жер қайсы?

Хайнань. Мұнда тропик климаты, теңіз суы жыл бойы жылы, ал туристерге арналған жағдай басқа курорттарға қарағанда жақсы дамыған. Саньяда тіл білмейтін туристерге ыңғайлы, Ваньнинде серфинг дамыған, ал Хайкоуда жағажай демалысын қала аралаумен ұштастыруға болады.

Қытайда қыста теңізге түсуге бола ма?

Иә, бірақ Хайнаньда ғана. Мұнда су температурасы сирек жағдайда ғана +22 °C-тан төмен түседі.

Қытайдағы ең жылы теңіз қайсы?

Оңтүстік Қытай теңізі (Хайнань, Гонконг, Макао). Жазда су температурасы +30 °C-қа, қыста +22–25 °C-қа жетеді. Ал солтүстіктегі Сары теңіз (Циндао, Вэйхай, Далянь, Бэйдайхэ) тек жазда жылынады, ең жоғары температурасы шамамен +26 °C.

Қазақстан азаматтарына Хайнаньға бару үшін виза керек пе?

Жоқ. Хайнань — Қытайдың бір бөлігі, сондықтан Қазақстан азаматтарына 30 күнге дейінгі визасыз режим қолданылады.

Қытайдың қай курорты балалармен демалуға қолайлы?

Қыста Хайнаньдағы Санья Бэй жағажайы, ал жазда Бэйдайхэ жақсы. Екеуінде де теңіз жағадан бастап біртіндеп тереңдейді, балалардың суға түсуіне қолайлы.

Суретті салған — Тася Козлова.