Бангкоктағы мына жерлерді көрмей кетпеңіз: туриске толымды гид
Тайланд астанасындағы ерекше жерлер мен пайдалы ақыл-кеңес.
Бангкокқа барсаңыз, бір қалада қыдырып жүріп-ақ, неше түрлі әсер алуға боларына көз жеткізесіз. Таңертең алтынмен апталған будда ғибадатханаларын аралап, түсте тук-тукпен қала кезіп, кешке зәулім ғимараттардың төбесінен шаһардың шамдарын тамашалай аласыз. Арасында көше тағамдардан ауыз тиіп үлгеріңіз. Тек бір нәрсеге дайын болыңыз: Бангкоктың кептелісінен кейін Алматыдағы қарбалас түк еместей көрініп қалады.
Бангкокқа барғанда уақытыңызды жол іздеуге кетірмей, барынша көп жер көріп қайтуыңыз үшін біз ең қызық орындарды бір жерге топтап шықтық. Қайда барып, нені көру керегін және қаланы қалай аралаған ыңғайлы екенін осы гидтен білесіз.
Бангкоктың ең көрікті жерлері
Бангкок 1782 жылы Тайландтың астанасы атанды. Қаладағы ең көне орындардың көбі Чао Прайя өзенінің бойындағы Раттанакосин аралында орналасқан. Король сарайы мен Ват Пхо ғибадатханасы қатар тұр, ал Ват Арунға пароммен бірнеше минутта жетесіз. Сондықтан тізімдегі алғашқы 3 орынды таңертең жаяу аралап шығуға болады. Қалған көрікті жерлер қаланың әр ауданында орналасқан, оларға метро не таксимен барған ыңғайлы.
Үлкен король сарайы мен Изумруд Будда ғибадатханасы
Мекенжайы: Na Phra Lan Road.
Жұмыс уақыты: күн сайын 08:30–16:30, билет 15:30-ға дейін сатылады.
Кіру ақысы: 500 THB (шамамен 6 663 KZT). Билетті ресми сайттан сатып алуға болады.
Бір кездері мұнда Сиам корольдері тұрған. Тайланд бұрын Сиам деп аталған. Қазір сарайда мемлекеттік рәсімдер өтеді, ал туристер алтын мұнараларды, айна сынықтарымен безендірілген қабырғаларды және қақпада тұрған якшаларды — алып жын-періште күзетшілердің мүсіндерін көруге келеді.
Сарай ішіндегі ең маңызды орын — Изумруд Будда ғибадатханасы. Атауы жаңылыстыруы мүмкін: Будда мүсіні изумрудтан емес, нефриттен не яшмадан жасалған. Мамандар оның нақты қандай тастан қашалғанын әлі дөп басып айтқан жоқ. Мүсіннің биіктігі небәрі 66 сантиметр, бірақ ол биік алтын тақтың үстінде отыр. Жылына 3 рет Будданың киімін ауыстырады: ыстық, жаңбырлы және салқын маусымға арналған киімдері бар. Әдетте бұл рәсімді корольдің өзі орындайды.
Билет жеті күнге жарамды. Оған Сирикит патшайымның тоқыма музейіне кіру және театрдағы қысқа кхон қойылымын көру кіреді. Қойылым жұмыс күндері 13:00, 14:30 және 16:00-де өтеді.
Жатқан Будда ғибадатханасы (Wat Pho)
Мекенжайы: 2 Sanam Chai Road.
Жұмыс уақыты: күн сайын 08:00–18:30, аумағы 19:30-ға дейін ашық.
Кіру ақысы: 300 THB (шамамен 3 998 KZT). Бойы 120 сантиметрге жетпейтін балаларға тегін.
Бұл — қаладағы ең көне ғибадатханалардың бірі әрі тай массажының отаны. Ұзындығы 46 метр болатын жатқан Будда мүсіні тұтас бір павильонды алып жатыр. Мүсіннің табанына жақындап қарасаңыз, інжу қабыршағымен көмкерілген табандарында Будданың қасиеттілігін білдіретін 108 белгі бейнеленгенін көресіз.
Қабырға бойына 108 қола ыдыс қойылған. Әрқайсына бір-бір тиын тастау дәстүрі бар. Будданың өзін көрмей тұрып, тиындардың сыңғырын естисіз.
Ғибадатхана аумағында әлі күнге дейін массаж мектебі жұмыс істейді. Жарты сағат массаж 260 THB (шамамен 3 465 KZT), 1 сағаттық сеанс 420 THB (шамамен 5 597 KZT) тұрады. Қалағандар тай массажын үйрену курсына да жазыла алады. Сағат 16:00-ге дейін келіңіз, одан кейін ұзын-сонар кезек тұрады.
Таң шапағы ғибадатханасы (Wat Arun)
Мекенжайы: 158 Wang Doem Road.
Жұмыс уақыты: күн сайын 08:00–18:00, орталық мұнараға 17:30-ға дейін көтерілуге болады.
Кіру ақысы: 200 THB (шамамен 2 665 KZT).
Ғибадатхана Чао Прайя өзенінің арғы бетінде орналасқан. Биіктігі 70 метрден асатын орталық мұнара алыстан қарағанда оюмен безендірілгендей көрінеді. Жақындасаңыз, оның сырты түгел қытай фарфорының сынықтарымен қапталғанын байқайсыз. Кезінде сынған ыдыстарды сауда кемелеріне салмақ үшін тиеген екен. Ал жергілікті шеберлер оларды кәдеге жаратудың әлдеқайда қызық жолын тапқан.
Мұнараға көтерілу оңай емес. Баспалдақтары тар әрі тік, кей жерлерде тасқа қолмен сүйенуге тура келеді. Бірақ жоғарыдан өзен мен арғы беттегі Үлкен сарайдың мұнаралары көрінеді. Түсте көтерілмеген дұрыс, сүйеніштер қызып кетеді, ал жаңбырдан кейін тепкішектер тайғақ болады. Сағат 16:00-ден кейін барған ыңғайлы.
Ғибадатханаға Ват Пхо жанындағы Тха Тьен айлағынан пароммен жеткен оңай. Өзеннен өтуге бірнеше минут кетеді, жолақы шамамен 5 THB (шамамен 67 KZT).
Алтын тау ғибадатханасы (Wat Saket)
Мекенжайы: 344 Chakkraphatdi Phong Road.
Жұмыс уақыты: күн сайын 07:00–19:00.
Кіру ақысы: шетелдіктер үшін төбеге көтерілу 100 THB (шамамен 1 333 KZT), төменгі аумақты тегін аралауға болады.
Ғибадатхана қолдан жасалған, биіктігі 77 метр төбенің үстінде тұр. XIX ғасырда король III Рама мұнда алып ступа — буддизмдегі қасиетті ескерткіш саламын деп жоспарлаған. Бірақ батпақты жердің топырағы шөгіп, құрылыс ондаған жылға созылып кетеді. Төбе қазіргі келбетіне V Раманың тұсында ғана ие болды.
Жоғарыға шамамен 300 тепкішек апарады. Жол бойында қоңыраулар мен шағын субұрқақтары бар бақтан өтесіз. Мұнда көтерілген Ват Арунға қарағанда әлдеқайда жеңіл. Төбенің басында алтын ступа тұр. Аңыз бойынша, онда Будданың қасиетті сүйек қалдықтары сақталған.
Жыл сайын қарашада төбеде Ват Сакет фестивалі өтеді. 2026 жылы ол 17–29 қараша аралығына жоспарланған. Жүздеген адам қолына шам ұстап, төбеге көтеріледі де, ступаны қасиетті қызыл матамен орайды.
Джим Томпсонның үйі
Мекенжайы: 6 Soi Kasemsan 2, Rama I Road.
Жұмыс уақыты: күн сайын 10:00–17:00.
Кіру ақысы: 250 THB (шамамен 3 331 KZT). 10–21 жастағыларға 150 THB (шамамен 1 999 KZT), ал 10 жасқа дейінгі балалар ересек адаммен келсе, тегін. Билеттер мен экскурсия кестесі музей сайтында бар.
Америкалық Джим Томпсон сәулетші болған, соғыс кезінде барлау қызметінде жұмыс істеген. Кейін Бангкокқа қоныстанып, жібек саудасымен айналыса бастайды. 1950 жылдары тай жібегін тоқу өнері ұмытыла бастаған еді. Томпсон оны әлі күнге дейін сатылып келе жатқан танымал брендке айналдырды.
Өзіне әр провинциядан әкелінген, тіреулердің үстіне салынған 6 ескі тай үйін біріктіріп, баспана жасайды. Ішін Будда мүсіндерімен және фарфор бұйымдарымен толтырған.
1967 жылы Томпсон Малайзиядағы Камерон-Хайлендс тауына серуендеуге шығып, сол күйі оралмаған. Оны ешкім таба алмаған. Жолбарыс талап тастады дегеннен бастап, қарақшылар ұрлап кетті дегенге дейін түрлі болжам бар. Ал үйі содан бері еш өзгеріссіз сақталған.
Негізгі үйге тек гидпен кіруге болады. Аяқ киімді шешу керек, үлкен сөмкемен кіргізбейді. Жарқылсыз фото түсіруге рұқсат бар. Экскурсиядан кейін канал жанындағы кафеде тамақтанып алыңыз. Тай шайы мен жабысқақ күріш қосылған мангоны байқап көріңіз.
Люмпини саябағы
Мекенжайы: Rama IV Road.
Жұмыс уақыты: күн сайын 04:30–22:00.
Кіру ақысы: тегін.
Қаланың іскерлік орталығында орналасқан үлкен саябақ. Мұнда көл, пальмалар, жүгіруге арналған жолақтар мен ашық аспан астындағы жаттығу құралдары бар. Таңертең жергілікті тұрғындар осында жүгіріп, спортпен шұғылданады. Кешке кеңсе қызметкерлері серуендейді, ал туристер қыдырыс арасында бір тынығып алады.
Бірақ саябақтың ең қызық тұрғындары — варандар. Құйрығын қосқанда ұзындығы 3 метрге жететін кесірткелер көгалда жатады, жолда жүреді, көлде жүзеді. Адамдарды елемейді де. Сіз де оларға тиісіп жүрмеңіз, тамақ бермеңіз, ұстамаңыз, қастарына тым жақын бармаңыз.
ICONSIAM сауда орталығы
Мекенжайы: 299 Charoen Nakhon Road.
Жұмыс уақыты: күн сайын 10:00–22:00.
Кіру ақысы: тегін.
Бұл тізімге сауда орталығын бекер қосқан жоқпыз. ICONSIAM-ның төменгі қабатында SookSiam деген жабық базар бар. Ішінде қайықтар, сауда орындары мен Тайландтың барлық өңірінен келген тағамдар сатылады. Кәдімгі көше базары сияқты, тек аптап ыстық пен жаңбыр жоқ.
Мұнда 50–300 THB (шамамен 666–3 998 KZT) тамақтануға болады. Ал кешке өзен жағасындағы террасаға шығыңыз. Қаланың шамдары суға шағылысып, Бангкоктың ең әдемі көріністерінің бірін тамашалайсыз.
Бангкокта тағы не істеуге болады?
Бангкоктағы қызық ғибадатханалар мен көрікті жерлермен шектелмейді. Егер қалада бір күннен көп болсаңыз, мына орындарға да барыңыз.
Mahanakhon SkyWalk шолу алаңы
Мекенжайы: 114 Narathiwas Ratchanakharin Road.
Жұмыс уақыты: күн сайын 10:00–00:00, соңғы келушілер 23:00-де кіргізіледі.
Кіру ақысы: уақытқа қарай 500–1 200 THB (шамамен 6 663–16 мың KZT). Билеттер ресми сайтта сатылады.
King Power Mahanakhon зәулім ғимаратын бірден танисыз. Қасбетінің бір бөлігі пиксельдерге бөлініп, опырылып түскендей көрінеді. Бірақ бұл — сәулетшілердің әдейі жасаған дизайны. 314 метр биіктікте едені шыныдан жасалған шолу алаңы бар. Биіктіктен қорықпайтындарға қызық.
Күн батардан бір сағат бұрын келіңіз. Сонда қаланы күндіз де, түнгі шамдар жанғанда да көресіз. Бірақ күн батар кездегі билеттер әдетте қымбатырақ. 1 050 THB (шамамен 14 мың KZT) бір бокал шампан қосылған билет те бар.
Чао Прайя өзенімен қайықта серуендеу
Жергілікті халық әлі күнге дейін қайықты автобус сияқты пайдаланады. Сондықтан өзенмен серуендеу арқылы Бангкоктың күнделікті тіршілігін де көресіз: тіреулерге салынған үйлер, су үстіндегі дүкендер және өзен жақтан мүлде басқаша көрінетін ғибадатханалар.
River City айлағынан дәстүрлі ұзын құйрықты қайыққа (лонгтейл) отырыңыз. Бір сағаттық серуен 300–500 THB (шамамен 3 998–6 663 KZT) тұрады. Бағаны көшедегі делдалдармен емес, қайық жүргізушілерімен тікелей келісіңіз.
Чатучак базары
Мекенжайы: Kamphaeng Phet 2 Road.
Жұмыс уақыты: сенбі және жексенбі, 09:00–18:00.
Кіру ақысы: тегін.
Шамамен 15 мың саудагер, 20-дан астам түрлі тақырыптағы аумақ пен демалыс күндері келетін ондаған мың сатып алушы. Сенбі күні Алматының Барахолкасында болған адам бұл жерде адаспайды. Басқаларына базардың офлайн картасын алдын ала жүктеп алуға кеңес береміз.
Мұнда ескі үлгідегі джинсы мен қыш ыдыстардан бастап, өсімдіктер мен қуырылған жәндіктерге дейін сатылады. Саудаласыңыз, кейде бағаны екі есе түсіруге болады. Су ала жүріңіз. Жабық бөліктерде ыстық әрі қапырық.
Қытай кварталы (Yaowarat)
Мекенжайы: Yaowarat Road.
Бангкоктағы Қытай кварталының тарихы 200 жылдан асады. Күндіз мұнда алтын мен кептірілген саңырауқұлақ сатылады. Ал күн батқаннан кейін көше ашық аспан астындағы үлкен мейрамханаға айналады: неон шамдары жарқырап, вок табаларынан шыққан түтін будақтап, пластик орындықтар тізіліп, ұзын-сонар кезек тұрады.
Мұнда бір қарапайым ереже бар: жергілікті халық тамақтанатын орындарды таңдаңыз. Устрица қосылған хой-тод (hoi tod) омлетін және тәтті тосттарды байқап көріңіз. Сағат 19:00 шамасында келіңіз. Кейін танымал орындардың алдында адам қарасы көп болады.
Каосан көшесі (Khao San Road)
Мекенжайы: Khao San Road.
Кешке бұл көшеде көлік жүргізбейді. Барлар үстелдерін сыртқа қояды, әр есіктен әртүрлі музыка шығып тұрады.
Мұндағы ең танымал сусын — bucket, яғни «шелек». Ром не виски мен коланы пластик шелектің ішіне құйып береді. Бағасы 150–250 THB (шамамен 1 999–3 331 KZT). Барларға кіру әдетте тегін, тек сусынға төлейсіз. Ал батылыңыз жетсе, қуырылған сарышаянның дәмін татып көріңіз.
Сағат 21:00 шамасында барыңыз. Түн ортасына дейін көшеде еркін серуендеуге болады, ал түнгі 1-ге қарай адам қатты көбейеді. Паспорт пен көп қолма-қол ақшаны қонақүйде қалдырған дұрыс. Саяхатшылар қалта ұрыларынан сақ болуды ескертеді.
У-шудан шаршасаңыз, Сой Рамбуттри көшесіне жаяу барыңыз. Онда да бар мен тамақ көп, адам азырақ.
«Вегастағы бойдақтар кеші 2» фильміндегі бар
Мекенжайы: State Tower, 1055 Silom Road.
State Tower ғимаратының 63-қабатындағы Sky Bar есіңізде ме? «Вегастағы бойдақтар кеші 2: Вегастан Бангкокқа» фильмінде бас кейіпкерлер Пол Джаматти ойнаған кейіпкермен дәл осы жерде кездеседі.
Ашық террасадан өзен мен ғимараттың алтын күмбезі көрінеді. Күмбезді фильм кадрларынан бірден танисыз. Фильм шыққаннан кейін бар мәзіріне Hangovertini деген коктейль қосылған. Мұнда смарт-кэжуал киім үлгісі талап етіледі. Спорттық киіммен, жағажай тәпішкесімен не жеңсіз жейдемен кіргізбейді.
Бангкокта бір күнде не көруге болады: дайын гид
Қалада небәрі бір күніңіз болса, ал көргіңіз келетін орындар бір аптаға да сыймаса, мына маршрутты пайдаланыңыз. Оны күндізг аптапта көп жүрмейтіндей етіп, қаланың бір шетінен екіншісіне сабылмайтындай етіп жасадық.
Таңертең
08:30 — Үлкен король сарайы. Сарай ашылғанда келіңіз. Бұл кезде күн әлі қатты ысымаған, туристер мінген автобустар да жетіп үлгермейді. Аралауға шамамен 2 сағат бөліңіз.
10:45 — Ват Пхо. Сарайдан қабырға бойымен 5–7 минут жаяу жүресіз. Жолда тук-тук жүргізушісі ғибадатхана бүгін жабық десе, күлімсіреп, жолыңызды жалғастыра беріңіз. Бұл — туристерді алдаудың бір тәсілі. Сеніп қалсаңыз, ғибадатхананың орнына зергерлік не кәдесый дүкенінен бір-ақ шығуыңыз мүмкін. Ғибадатхананы аралауға бір сағат жетеді.
Түсте
12:00 — Тха Тьен айлағының жанында түскі ас. Өзен көрінетін кафе тауып, краб қосылған омлет, сом-там (som tam) не том-ям жеңіз.
13:00 — Ват Пхо мектебінде массаж. Күннің ең ыстық уақытын Ват Арунның баспалдағында емес, массаж үстелінде өткізген әлдеқайда жақсы.
16:00 — Ват Арунға пароммен өту. Фарформен қапталған мұнараны аралап, өзенді тамашалауға бір сағат бөліңіз.
17:00 — Тхонбури каналдарымен қайықта серуендеу. Лонгтейл Ват Арун жанындағы айлақтан жүреді. Серуен 1–1,5 сағатқа созылады. Мұнда Бангкоктың басқа қырын — тіреулерге салынған жергілікті тұрғындардың үйлерін, су жағасындағы базарлар мен туристерге арнап әдеміленбеген күнделікті тіршілікті көресіз.
Су, кепка мен күннен қорғайтын крем алыңыз. Су үстінде күн қаттырақ күйдіреді.
Кешке
19:00 — Яоварат. Grab арқылы жетіңіз. Кешкі асқа 1,5–2 сағат бөліңіз. Хой-тод, кеспе, тост пен жабысқақ күріш қосылған манго жеп көріңіз.
21:00 — шатырдағы барда коктейль ішу. Мысалы, Marriott Sukhumvit қонақүйінің төбесіндегі Octave не Tichuca барына барыңыз. Коктейль 400–550 THB (шамамен 5 330–7 329 KZT) тұрады. Қаланы тамашалайтын жақсы орын алу үшін ертерек барған дұрыс.
Бангкокта қайда тоқтаған дұрыс?
Метро жанындағы шыны мұнарада да, өзен бойындағы ағаш үйде де тұруға болады. Бәрі сізге не маңызды екеніне байланысты: түнгі сауық па, әдемі көрініс пе, жоқ әлде үнемдеу ме? Туристер жиі таңдайтын үш ауданға тоқталайық.
Сукхумвит
Сукхумвит — қазіргі Бангкоктың келбетін көрсететін аудан. Терезе түбінде BTS станциялары бар, көшенің арғы бетінде сауда орталықтары тұр, ал барлар таң атқанша жұмыс істейді. Хостелде түнеу шамамен 800 THB (шамамен 11 мың KZT), Ibis Styles деңгейіндегі қонақүйде 2 500–3 000 THB (шамамен 33–40 мың KZT) тұрады. Бір кемшілігі — адам өте көп, сондықтан у-шу, лас. Бангкокқа ұйықтаймын деп келмегендерге жақсы таңдау.
Риверсайд
Риверсайд ауданындағы қонақүйлер өзен жағасында орналасқан. Көбінің жеке айлағы және метроға дейін жеткізетін тегін қайығы бар. Бағасы қымбатырақ: өзен көрінбейтін қарапайым бөлменің өзі 2 500 THB (шамамен 33 мың KZT) басталады. Есесіне қонақүйден шықпай-ақ Ват Арун үстінен батып бара жатқан күнді тамашалай аласыз. Романтиканы ұнататындарға арналған аудан.
Ескі қала
Ескі қалада метро бекеті өте аз. Бірақ ғибадатханаларға жаяу жетуге болады. Хостелдегі бір төсек 300 THB (шамамен 3 998 KZT), ал тәуір қонақүй 1 500–2 000 THB (шамамен 20–27 мың KZT) басталады. Қаланың басқа аудандарына жету ұзағырақ. Бірақ Бангкокқа 2–3 күнге көрікті жерлерді аралау үшін келсеңіз, осы аудан — ең ыңғайлысы.
Шатырында бассейні бар қонақүй іздеңіз. Кейде ол үшін бірнеше жүз бат артық төлеуге тура келеді. Бірақ күні бойы ыстықта жүргеннен кейін бұл ақшаға өкінбейсіз. Ал қалада 1–2 ай қалуды жоспарласаңыз, Бангкокта қыстау туралы мақаламызды оқыңыз.
Бангкокта қайда тамақтануға болады?
Тай тағамдары ащы әрі дәмдеуішке бай. Оған бәрінің бірдей үйренуі оңай емес. Бірақ жергілікті тағамдармен таныспай кетпеңіз. Дұрыс таңдай білсеңіз, тіпті тай асханасын жақсы көріп кетуіңіз де мүмкін. Ал тым ащы тағамға дайын болмасаңыз, «май пхет» («ащы емес») деп айтыңыз.
Jay Fai
Мекенжайы: 327 Maha Chai Road.
Бағасы: негізгі тағамдар 1 500 THB (шамамен 20 мың KZT) басталады.
Қызып тұрған вок табасының алдында шаңғы көзілдірігін тағып тұрған егде жастағы әйел — Бангкоктың танымал аспаздарының бірі. Jay Fai мейрамханасының «Мишлен» жұлдызы бар. Ал Netflix-тің «Көше тағамдары: Азия» сериалы оны бүкіл әлемге танытты. Әсіресе краб қосылған омлеті танымал.
Сыртынан бәлішке ұқсайды, бірақ шын мәнінде бұл — ішіне краб еті салынған қуырылған жұмыртқа. Үстелді алдын ала брондаған дұрыс. Адам көп келеді.
Thipsamai
Мекенжайы: 313 Maha Chai Road.
Бағасы: омлетке оралған пад-тай шамамен 150 THB (шамамен 1 999 KZT). Сейсенбіде жабық.
Қаладағы ең танымал пад-тайды Thipsamai мейрамханасында дайындайды. Ол Jay Fai-дан бірнеше минуттық жерде орналасқан. Басқа филиалдарында баға қымбатырақ болуы мүмкін. Жұқа омлетке оралған асшаян қосылған пад-тайға тапсырыс беріңіз.
Сауда орталықтарындағы фуд-корттар
Бағасы: бір тағам 30–80 THB (шамамен 400–1 066 KZT).
Көп адам бағалай бермейтін, бірақ өте ыңғайлы нұсқа. Siam Paragon не Terminal 21 сауда орталықтарында арнайы карта сатып алып, ондаған сауда орнынан тамақ таңдайсыз. Сосын кондиционер қосылған салқын жерде отырып ішесіз. Terminal 21-дегі Pier 21 фуд-корты 5-қабатта орналасқан. Карри қосылған күріш, пад-тай, сорпа, смузи — дәмді әрі арзан. Оның үстіне алғашқы күндері асқазаныңызға таңсың тамақ болмайды.
Бангкокқа барар алдында не білу керек?
Бангкокқа қалай жетуге болады?
Алматыдан Бангкокқа Air Astana тікелей ұшады. Жол шамамен 7 сағатқа созылады. 2026 жылы 11 желтоқсаннан бастап әуе компаниясы Астанадан да рейс ашады. Ұшақтар сейсенбі және жұма күндері қатынайды, жолға 8 сағатқа жуық уақыт кетеді.
Басқа нұсқалар — Ташкент, Гуанчжоу, Ыстанбұл, Доха не Дубай арқылы ауысып ұшу. Қаланың басты әуежайы — Суварнабхуми (BKK). Одан қалаға Airport Rail Link электр пойызымен жеткен оңай. BTS желісіне ауысуға болатын «Пхаятхай» станциясына дейін шамамен 30 минут, жолақы 45 THB (шамамен 600 KZT).
Есептегішпен жүретін такси 300–500 THB (шамамен 3 998–6 663 KZT) тұрады. Бұған 50 THB (шамамен 666 KZT) әуежай алымы мен ақылы жолдардың құны қосылады. Такси тұрағы терминалдың 1-қабатында, 4 және 7-есіктердің арасында орналасқан.
Екінші әуежай — Донмыанг (DMK). Ол негізінен AirAsia мен Nok Air сияқты арзан әуе компанияларының рейстерін қабылдайды. Бұл әуежайдан қалаға SRT Red Line пойызы не A1 және A2 автобустары қатынайды. «Мочит» станциясына дейінгі автобус билеті — 30 THB (шамамен 400 KZT). Екі әуежайдың арасында ауысып ұшатын болсаңыз, тегін шаттл бар.
Виза керек пе?
Жоқ. Қазақстан паспортымен Тайландта 30 күнге дейін визасыз жүруге болады. 6 ай ішінде визасыз өткізетін жалпы уақыт 90 күннен аспауы керек. Ұзағырақ қалғыңыз келсе, иммиграция кеңсесінде болу мерзімін тағы 30 күнге бір рет ұзартуға болады. Паспортыңыздың жарамдылық мерзімі кемінде тағы 6 ай болуға тиіс.
Тайландқа ұшар алдындағы 3 күн ішінде TDAC электронды келу картасын толтыру қажет. Оны ресми сайтта тегін рәсімдейсіз. QR-кодты телефоныңызға сақтап қойыңыз. Қайтар билет пен қонақүй бронын да дайындап жүріңіз: шекарада сұрауы мүмкін. Сондай-ақ қолма-қол ақшаңызды көрсетуді талап етуі ықтимал: 1 адамға 20 мың THB (шамамен 267 мың KZT) не отбасына 40 мың THB (шамамен 533 мың KZT).
Бангкокқа қашан барған дұрыс?
Қарашадан ақпанға дейін күн райы құрғақтау әрі салқындау болады. Ғибадатханалар мен базарларды аралауға ең қолайлы кезең. Бірақ туристер көбейіп, қонақүйлер қымбаттайды.
Наурыздан мамырға дейін ыстық әрі ылғалды. Температура жиі +35 °C-тан асады. Сондықтан таңертең және кешке серуендеп, күндіз музейлер мен сауда орталықтарына кіріп жүрген дұрыс.
Маусымнан қазанға дейін жаңбыр жауады. Нөсер қысқа болғанымен, қатты құяды. Артынша күн қайта шығады. Туристер аз, бағалар төмен. Тек жаңбырлық пен су болса да аяй қоймайтын аяқкиім алыңыз.
Бангкокта немен қатынаған ыңғайлы?
BTS (жерүсті пойызы) мен MRT (метро) — жылдам, салқын әрі кептеліске түспейді. Бір ғана кемшілігі бар: Ескі қалада бекет өте аз. BTS жолақысы орталықта 17–47 THB (шамамен 227–626 KZT), ал алыс бағыттарда 65 THB (шамамен 866 KZT) дейін жетеді. Бір реттік билет не Rabbit картасы қажет. MRT бағалары да шамалас.
Chao Phraya Express өзен трамвайлары да — кептелісті айналып өтудің жақсы жолы. Қызғылт сары бағыттағы жолақы 19 THB (шамамен 253 KZT). Таксиге тек есептегішпен отырыңыз не Grab пен Bolt арқылы шақырыңыз.
Банк карталары өте ме?
Сауда орталықтары мен ірі кафелерде Visa және Mastercard карталары қабылданады. Ал базарларда, көше саудасында және шағын кафелерде қолма-қол ақша қажет. Банкоматтар шетелдік картамен ақша шешкен сайын тұрақты комиссия ұстайды. Сондықтан ақшаны жиі-жиі аз мөлшерде алғанша, сирек әрі көбірек сомада шешкен тиімді.
Бангкоктан не ала келуге болады?
Тайландтан жұрт әдетте табиғи косметика, қант қосылмаған кептірілген манго, Poy-Sian мен Counterpain бальзамдары, анчан деп аталатын көк шай әкеледі. Жібек бұйымдарын Jim Thompson дүкендерінен алған дұрыс. Базарларда жалған өнімдер жиі кездеседі.
Әрине, Бангкоктың сауда орталықтарында Uniqlo да бар. Бірақ жергілікті брендтен бірдеңе алғыңыз келсе, Jaspal дүкеніне кіріңіз. Бұл — матасының сапасы жақсы, бағасы да қолайлы жергілікті киім бренді. Дүкендері Siam Paragon мен CentralWorld сауда орталықтарында бар. Футболкалар 800–1 500 THB (шамамен 11–20 мың KZT), көйлектер 2 000 THB (шамамен 27 мың KZT) басталады. Ал Boots, Watsons және 7-Eleven дүкендерінен күннен қорғайтын крем, пластырь, электролиттер, бетке арналған матадан жасалған маскалар және танымал Ponds опаларын сатып алуға болады.
Көп сауда жасайтын болсаңыз, такс-фри арқылы салықты қайтаруды ұмытпаңыз.
