Тайландқа барарда TDAC картасын қалай толтыру керек? Толымды нұсқау

Тайландқа саяхаттаймын деп жоспарлап жүрсеңіз, ұшақ билеті мен қонақүй брондаудан бөлек тағы бір нәрсені ұмытпаңыз. Елге кірер алдында TDAC деп аталатын электрондық картаны толтыру керек. TDAC картасын қайдан және қанша күн бұрын толтыруға болады? Ол үшін қандай мәліметтер қажет? Қате жіберіп қойсаңыз, қалай түзетесіз? Осы сұрақтарға жауап беріп, картаны толтыру жолын көрсетеміз.

TDAC деген не және оны кімдер толтыруы керек?

TDAC (Thailand Digital Arrival Card) — Тайландқа кіретін шетел азаматтары толтыруға міндетті электрондық карта. Ол бұрын қолданылған TM6 қағаз миграциялық картасының орнына енгізілген. TDAC картасын Тайландқа кіргелі жатқан кез келген шетел азаматы толтыруға міндетті. Ұшақпен, жермен, болмаса теңіз арқылы келсін – бәрібір барлығынан сұралады.

Тек Тайландтың паспорт бақылауынан өтпей, халықаралық транзит аймағында қалатын жолаушылар мен арнайы Border Pass құжатымен кіретін адамдар TDAC толтырмайды.

TDAC виза орнына жүре ме?

Жоқ, виза орнына жүрмейді. Егер сіздің еліңіз бен Тайландтың арасында визасыз режим болса, онда осы картаны ғана толтырасыз. Қазақстан азаматтары Тайландта визасыз 30 күнге дейін жүре алады. Бірақ 180 күн ішінде елде өткізген уақыт жиынтығында 90 күннен аспауы керек.

Егер Тайландқа кіру үшін кәдімгі туристік виза не келгеннен кейін алынатын Visa on Arrival керек болса, онда оны бөлек рәсімдейсіз. Ал TDAC картаны бөлек толтырасыз. Яғни қандай жағдай болсын карта толтыру қажет.

Балаларға да TDAC толтыру керек пе?

Иә. Жасына қарамастан, Тайландқа кіретін әр шетел азаматына TDAC қажет. Тіпті жаңа туған нәрестеге де толтырылады. Балалардың атынан картаны ата-анасы не заңды өкілі толтыра алады. Бір топтық өтінішке он адамға дейін енгізуге болады.

TDAC картасын қай жерден толтыру керек?

Картаны Тайланд иммиграция қызметінің ресми сайтында толтырасыз. TDAC толтыру тегін. Ресми сайтта банк картаңыздың деректерін енгізудің не қандай да бір ақы төлеудің қажеті жоқ.

Интернетте TDAC рәсімдеп береміз деп ақша сұрайтын делдал сайттар кездесуі мүмкін. Сондықтан сайттың мекенжайын мұқият тексеріңіз. Тек tdac.immigration.go.th мекенжайын пайдаланыңыз.

TDAC картасын қашан толтыру керек?

Картаны Тайландқа келерден үш күн бұрын толтыруға болады. Бұл мерзімге елге кіретін күніңіз де кіреді. Мысалы, Тайландқа 26 қарашада келсеңіз, TDAC картасын 23 қарашадан бастап толтыра аласыз. 

• Ертерек толтыруға бола ма? Жоқ. Ресми жүйе өтінішті белгіленген мерзімнен ерте қабылдамайды.
• Ұшатын күні толтыруға бола ма? Иә. Картаны сол күні де толтыра аласыз.
• Тайландқа жеткен соң толтырса бола ма? Иә, әуежайда интернетке қосылып толтыруға болады. Бірақ паспорт бақылауына дейін рәсімдеп үлгеруіңіз керек.

Кей әуежайларда картаны толтыруға арналған арнайы құрылғылар мен Wi-Fi бар. Дегенмен әуежайда уақыт жоғалтпау үшін TDAC картасын алдын ала толтырған дұрыс.

TDAC толтырмасаңыз, не болады? Паспорт бақылауынан өтер алдында картаны рәсімдеуіңіз керек. Онсыз елге кіру рәсімін аяқтай алмайсыз.

Осы тақырыпта басқа не бар?

Паттайя жақсы ма, Пхукет пе: Тайландтағы танымал екі жер

Ұят емес: Тайландтағы секс-туризм сырлары

Тайландта қыстаған қазақ: виза машақаты, Бангкоктағы тіршілік

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

TDAC толтыру үшін қандай мәліметтер қажет?

Картаны толтыруға кіріспес бұрын мына деректерді дайындап алыңыз:

1. Төлқұжат. Аты-жөніңіз, төлқұжат нөмірі, берілген елі және жарамдылық мерзімі қажет. Тайландқа барғанда төлқұжатыңыздың жарамдылық мерзімі кемінде алты ай қалғанын да тексеріңіз.
2. Рейс нөмірі. Ұшақпен барсаңыз, Тайландқа қонатын рейстің нөмірін жазыңыз. Басқа көлікпен кірсеңіз, соған қатысты мәліметтер қажет.
3. Тұратын жеріңіздің мекенжайы. Қонақүйдің не жалдаған пәтеріңіздің атауы мен толық мекенжайын дайындаңыз.
4. Келетін күніңіз. Тайландқа нақты қай күні кіретініңізді білуіңіз керек.
5. Электрондық поштаңыз. Өтініштің расталғаны туралы хат осы мекенжайға келеді.
6. Кейінгі сапарларыңыз туралы ақпарат. Жүйе кейінгі екі аптада қай елдерде болғаныңызды сұрауы мүмкін.

TDAC жүйесінде денсаулық туралы мәліметтерге арналған бөлім де бар. Сапар бағытыңызға қарай қосымша сұрақтар шығуы мүмкін.

Тайланд кіру ережесіҚазақстан азаматтарына

Виза қажет емес

ҚР азаматының паспорты

Елге кіру ережесі туралы барлық деректі ресми дереккөзден алдық. Ереже өзгерсе, деректерді жұмыс күні барысында жаңартып қоямыз.

Назар аударыңыз

• 

  Елде болу мерзімі — 30 күнге дейін
  30 күннен артық қалғыңыз келсе, көші-қон бюросына алдын ала хабарласыңыз

Кіру үшін қажет құжаттар

• 

  Thailand Digital Arrival Card (TDAC)
  Онлайн түрде елге баруға 3 күн қалғанда толтыру қажет
• 

  Паспорттың жарамдылық мерзімі сапар аяқталатын күннен бастап кемінде 6 ай болуы керек

Толығырақ

TDAC картасын қалай толтырамыз?

Енді картаны толтыру жолын ретімен көрсетейік. Сайттың сыртқы көрінісі мен кей батырмалары жаңартылып отыруы мүмкін, бірақ негізгі тәртібі мынадай.

1. Ресми сайтқа кіріңіз

tdac.immigration.go.th сайтын ашыңыз. Жаңа карта толтыру үшін Arrival Card бөлімін таңдаңыз.

2. Жаңа өтініш бастаңыз

Сайтта жеке не топтық өтініш толтыру мүмкіндігі бар.

• Individual Application — бір адамға арналған өтініш.
• Group Application — үй ішіңізбен не топпен бара жатсаңыз, бірнеше адамға арналған өтініш. Топтық өтінішке ең көбі он адам енгізіледі.

3. Жеке деректеріңізді жазыңыз

Мұндағы мәліметтерді төлқұжатыңызда қалай жазылса, дәл солай енгізіңіз.

• First Name / Given Name: Есіміңіз. Мысалы, ZHADYRA.
• Middle Name: Әкеңіздің есімі. Бұл жолды толтыру міндетті емес, қалдырып кетуге болады.
• Family Name / Surname: Тегіңіз. Мысалы, AKKAIYR.
• Gender: Жынысыңыз. Male — ер, Female — әйел.
• Date of Birth: Туған күніңіз. Күн, ай мен жылды сайт сұраған форматта көрсетіңіз.
• Nationality: Азаматтығыңыз. Қазақстан азаматы болсаңыз, KAZAKHSTAN дегенді таңдаңыз.
• Country of Residence: Тұрақты тұратын еліңіз.
• Occupation: Мамандығыңыз не айналысатын ісіңіз. Мысалы, MANAGER, ENGINEER, STUDENT не RETIRED.

Аты-жөніңізді кирилл қаріптерімен емес, төлқұжатыңыздағыдай латын әріптерімен енгізіңіз.

4. Төлқұжат деректерін енгізіңіз

Келесі кезеңде төлқұжатыңыз туралы ақпарат сұралады.

• Passport No. / Passport Number: Төлқұжат нөмірі.
• Expiry Date: Төлқұжаттың жарамдылық мерзімі.
• Country of Issue: Төлқұжатты берген ел.

Нөмірді құжатта қалай көрсетілсе, дәл солай жазыңыз. Мысалы, төлқұжатыңыздағы нөмір N әрпінен басталса, оны да міндетті түрде енгізіңіз. Артық бос орын, № белгісі не басқа таңба қоспаңыз.

5. Сапарыңыз туралы мәлімет беріңіз

Бұл бөлімде Тайландқа қалай және қашан баратыныңызды көрсетесіз.

• Travel Mode: Қандай көлікпен барасыз? Air — ұшақпен, Land — құрлық арқылы, Sea — теңіз арқылы.
• Transport Mode: Көлік түрі. Мысалы, әдеттегі жолаушылар рейсімен ұшсаңыз, Commercial Flight.
• Arrival Airport: Тайландтағы қай әуежайға қонасыз? Мысалы, Бангкоктағы Суварнабхуми — BKK, Пхукет — HKT.
• Flight No. / Flight Number: Рейс нөмірі. Мысалы, SU274 не KC563.
• Country of Boarding: Тайландқа тікелей ұшатын рейске қай елде отырасыз?
• Arrival Date: Тайландқа келетін күніңіз.
• Purpose of Visit: Сапар мақсаты. Демалуға бара жатсаңыз, Holiday не Tourism таңдаңыз.

Егер басқа ел арқылы ұшсаңыз, ең алғашқы рейсті емес, Тайландқа қонатын рейстің нөмірін енгізіңіз. Мысалы, Алматыдан Дубайға, одан Бангкокқа ұшсаңыз, Дубай – Бангкок рейсінің нөмірін жазасыз.

6. Тұратын жеріңіздің мекенжайын көрсетіңіз

Енді Тайландта қайда тұратыныңызды жазасыз.

• Accommodation Type: Тұратын жердің түрі. Мысалы, Hotel, Apartment не Resort.
• Accommodation / Hotel Name & Address: Қонақүйдің не пәтердің атауы мен мекенжайы.
• Province: Провинция. Мысалы, Phuket не Bangkok.
• District / Sub-district: Аудан және шағын аудан.
• Postal Code: Пошта индексі.

Қонақүйді Booking не басқа сервис арқылы брондасаңыз, мекенжайын брондау құжатынан көшіріп алуға болады. Тек қала атауын жазып қоймай, толық мекенжайын көрсетіңіз.

7. Денсаулық туралы мәліметтерді толтырыңыз

TDAC жүйесінде Health Declaration деп аталатын бөлім бар. Мұнда кейінгі екі аптада барған елдеріңіз туралы ақпарат сұралуы мүмкін. Кей жағдайда денсаулығыңыз туралы қосымша сұрақтар шығады. Сайт қандай мәлімет сұраса, соны шынайы толтырыңыз. Барлық жолаушыға бірдей қосымша талап қойылмауы мүмкін.

8. Мәліметтерді тексеріп, өтінішті жіберіңіз

Соңғы кезеңде электрондық поштаңыз бен байланыс деректеріңізді енгізіп, барлық ақпаратты тексеріңіз. Әсіресе аты-жөніңізге, төлқұжат нөміріне, рейс нөміріне және келетін күніңізге назар аударыңыз. Бәрі дұрыс болса, қажетті келісімдерді растап, Submit батырмасын басыңыз.

9. TDAC картасының расталғанын сақтап алыңыз

Өтінішті жібергеннен кейін жүйе тіркелгенін растайтын құжат береді. Ол электрондық поштаңызға да жіберіледі. QR-коды бар сол құжатты PDF түрінде сақтап не скриншот жасап алыңыз. Тайландқа келгенде осы растауды иммиграция қызметкеріне көрсетуге дайын болыңыз. Қағазға басып шығару міндетті емес, телефоннан көрсете аласыз. 2026 жылғы қазандағы жүйе жаңартуларынан кейін кей жолаушылардың растау хатында автоматты паспорт бақылауынан өту мүмкіндігі туралы да ақпарат көрсетілуі мүмкін.

TDAC картасын толтыру үлгісі

Мысалы, Жадыра Аққайыр есімді Қазақстан азаматы 2026 жылғы 26 қарашада Пхукетке барады делік. Ол TDAC картасын былай толтырады:

Бұл — тек мысал. Нақты сауалнама толтырғанда өз төлқұжатыңыздағы деректерді, рейс нөмірін және қонақүй мекенжайын көрсетіңіз.

TDAC толтырғанда қандай қателер жиі кездеседі?

Кейде адамдар асығып отырып…  

1. Аты-жөнін қате жазып қояды. Мысалы, ZHADYRA дегенді ZHADIRA деп жіберуі мүмкін. Ондай қате жібермес үшін төлқұжатқа мұқият қарап толтырған дұрыс. 
2. Төлқұжат нөмірін қате жазып жібереді: Қазақстан азаматтарының құжаты N деп басталады. Кейбірі сол әріпті тастап кетіп, тек қалған сандарды жазуы мүмкін. Бос орын мен қажетісіз символдар да қате дерек деп есептеледі. 
3. Рейс нөмірін қате жазады: Кейде ауысып мінетіндер ең бірінші шыққан рейсінің нөмірін жазып қояды. Электрон картаға сіз Тайландқа тіке ұшатын рейсті жазуыңыз керек. 
4. Келетін күнін дұрыс көрсетпейді: Кіретін күннің орнына шығатын күнді жазып қоюы мүмкін. 
5. Қонақүйдің мекенжайын толық жазбай қояды: Қаланы ғана жазып, қонақүйдің атауын жазбай кететіндер болады. 

Қате жіберсем, қалай түзетемін?

Кей мәліметтерді өтініш жіберілгеннен кейін де өзгертуге болады. Ол үшін ресми сайттағы Update Arrival Card бөліміне кіріңіз. Жүйе TDAC нөмірін, туған күніңізді және азаматтығыңызды сұрауы мүмкін. Ал аты-жөніңізді, азаматтығыңызды не туған күніңізді қате жазсаңыз, сауалнаманы басынан толтырған дұрыс. Төлқұжат нөмірінде қате болса да, жаңадан өтініш берген жөн. 

Осы тақырыпта басқа не бар?

Ұшақ билетін алып жатқанда мәліметтерді қалай дұрыс толтыру керек?

Сатып алған ұшақ билетін қалай тексереміз?

Чартерлік рейс дегеніміз не және оған сенуге бола ма?

TDAC толтырғаннан кейін жоспарым өзгерсе не істеймін?

Рейсім не қонақүйім өзгерсе ше?

Егер басқа рейспен ұшар болсаңыз не қонақүйді ауыстырсаңыз, TDAC сайтындағы Update Arrival Card бөлімі арқылы өзгертуге болатын мәліметтерді жаңартып көріңіз. Жүйе түзетуге мүмкіндік бермесе, келетін күніңізге арналған мерзім ішінде жаңадан өтініш толтырыңыз. Ең бастысы — Тайландқа келгенде картадағы деректер сапарыңызға сәйкес болуы керек. 

QR-код не растау хаты келмесе ше?

Алдымен электрондық поштаңыздағы «Спам» бөлімін тексеріңіз. Растау хаты ол жерден де табылмаса, Тайланд иммиграция қызметіне хабарласыңыз. Ал TDAC картасындағы мәліметтерді тексеру немесе өзгерту үшін ресми сайттағы Update Arrival Card бөліміне кіріңіз. Ол үшін TDAC нөмірін, туған күніңізді және азаматтығыңызды енгізу керек.

Жиі қойылатын сұрақтар

Балаларға TDAC толтыру керек пе?

Иә. Тіпті жаңа туған нәрестеге де TDAC қажет. Оны ата-анасы не заңды өкілі толтыра алады. Бір топтық өтінішке он адамға дейін енгізуге болады.

TDAC картасын қағазға шығару керек пе?

Жоқ. Растау құжатын телефонға сақтап алсаңыз жеткілікті. Дегенмен телефоныңыздың қуаты таусылып қалуы мүмкін деп алаңдасаңыз, қағазға шығарып алуға да болады.

QR-кодты телефоннан көрсетуге бола ма?

Иә. TDAC расталғанын телефон экранынан көрсетуге болады. Иммиграция қызметкері қажет болған жағдайда құжатты тексереді.

TDAC картасына рейс нөмірін жазу міндетті ме?

Ұшақпен бара жатсаңыз, жүйе сұраған рейс мәліметтерін енгізу керек. Тайландқа тікелей қонатын рейстің нөмірін көрсетіңіз.

Тайланд арқылы транзитпен өтсем, TDAC керек пе?

Егер әуежайдың халықаралық транзит аймағынан шықпай, паспорт бақылауынан өтпесеңіз, TDAC толтырудың қажеті жоқ. Ал жүк алу, рейске қайта тіркелу не қалаға шығу үшін Тайландтың паспорт бақылауынан өтсеңіз, TDAC міндетті.

Қате жіберсем, бұрынғы өтінішім автоматты түрде жойыла ма?

Ресми нұсқау бойынша, соңғы толтырған жарамды өтініш қолданылады. Бірақ бұл — алдыңғы өтініштеріңіз жүйеден жойылады деген сөз емес. Сондықтан жаңа өтініш толтырсаңыз, соңғы расталған нұсқасын сақтап алыңыз.

Осы тақырыпта басқа не бар?

Ұшақ билетінде кеткен қатені түзетуге қалай болады

Тайландтан шығып, қайта кірсем, TDAC-ты тағы толтырамын ба?

Иә. TDAC картасын Тайландқа әр кірген сайын жаңадан толтыру қажет.

TDAC картасын орысша толтыруға бола ма?

Сайтта бірнеше тілдегі нұсқаулық не интерфейс болуы мүмкін. Бірақ жеке деректерді төлқұжаттағыдай латын әріптерімен, ал қалған мәтіндік мәліметтерді ағылшынша енгізген дұрыс.

Тайландқа ұшарда нені тексеріп алу керек?

Сапарға шығар алдында TDAC картасын толтырып, растауын телефонға сақтап қойыңыз. Төлқұжатыңыздың жарамдылық мерзімін, рейс нөмірі мен қонақүй мекенжайын тағы бір тексеріңіз. Ең бастысы, TDAC картасын тек ресми сайттан толтырыңыз. Бұл қызмет тегін, сондықтан делдалдарға ақша төлеудің қажеті жоқ. Қосымша ақпаратты Тайланд иммиграция қызметінің толтыру нұсқауынан және жиі қойылатын сұрақтар бөлімінен қарай аласыз.

Суретті салған — Тася Козлова.