Астанадағы LRT: бекеттер, жұмыс кестесі мен билеттің түрлері
Tarlan Astana деп аталатын жеңіл рельсті көлік елорданың негізгі нүктелерін байланыстырады. LRT-ны астаналықтар аз күткен жоқ. Бірақ онымыз ақталды: биікте жүретін вагондардан зәулім ғимараттар мен жасыл желек ғажап көрінеді, ал қалада кептеліс күшейіп келе жатқан тұста бұл көлікпен діттеген жеріңізге тез-ақ жетіп алуға болады. Қала қонақтары LRT арқылы Астананың ең көрікті жерлерін бір күнде аралап шыға алады. Оған біз арнайы маршрут жасап, қай бекеттен мініп, қай жерден түсіп, жолай қандай жерлерге соғуға болатынын жазғанбыз.
Ал бұл мақаладан маршрут картасы, бекеттер тізімі, жұмыс кестесі, жол ақысы мен төлем тәсілдері сынды жолаушыға қажет ақпараттың бәрін табасыз.
LRT сызбасы мен бекеттері
LRT желісінің ұзындығы — 22,4 шақырым. LRT қаладағы әуежай мен «Нұрлы жол» теміржол вокзалын жалғайды. Желі Есіл және Алматы аудандары арқылы өтеді. Бағыт Қабанбай батыр даңғылы, Сығанақ көшесі мен Тәуелсіздік даңғылы маңын қамтиды.
LRT-ның бойында Астананың негізгі нысандары орналасқан. Бұл көлікке мініп, Назарбаев Университеті, Бас мешіт, «Астана Арена», EXPO аумағы, Ботаника бағы мен басқа да көрікті жерлерге жете аласыз. Қазіргі LRT желісінде 18 бекет бар. Стансаларға эскалатор мен лифт орнатылған, ал платформаларға қауіпсіздік мақсатында қалың әйнек қоршаулар қойылған.
Екі балам LRT-ны ойыншық пойыз деп көреді. Сонда барайықшы деп сұрап тұрады. Жұмыс күндері түсте адам аз жүреді. Сол кезде екеуін апарып, аяқ киімдерін шешіп, орындыққа тұрғызып қоямын. Көргендерін айтып, пойыздың тоқтағанына, жүргеніне қызығып, бірнеше бекеттен соң түсіп қаламыз. Әдетте «Ұлттық музейден» түсеміз. Әбден қыдырып болғанда, LRT-ға отырып, үйге қайтамыз. Баламен жүрген адамға LRT өте ыңғайлы. Такси шақырсаң, бала арбасын бүгіп, жинап, жеткенде қайта ашып, біраз әуре боласың. LRT-да лифт бар, арбаны көтеріп жүрмейсің. Бірақ тек адам аз кезде жүрген ыңғайлы екенін ескеру керек. Таңертең не кешкі алтыларда іші лық толады.
LRT-мен қала орталығына жету
Әуежайдан LRT-ға мініп, қаланың орталығына тез жетуге болады. Әсіресе кептеліс кезінде уақыт жоғалтып алмайсыз. № 1 «Әуежай» бекеті халықаралық әуежайдың жолаушылар терминалдарының жанында орналасқан. Әуежайдағы LRT белгілеріне қарап, бекетке бара аласыз.
Әуежайдан «Университет» бекетіне шамамен 15–20 минутта, «Бәйтерекке» 30 минуттай уақытта жетуге болады. Ал «Нұрлы жол» вокзалына дейінгі толық жол шамамен 40 минут алады.
№ | Бекет атауы | Маңында не бар? |
|---|---|---|
1 | Әуежай | Халықаралық әуежайдың T1 және T2 терминалдары, автотұрақ |
2 | Атамекен | Арнасай тұрғын алабы |
3 | Есіл | Қабанбай батыр даңғылы бойындағы тұрғын үй кешендері |
4 | Мәңгілік Ел | Тұрғын үй кешендері |
5 | Астана жұлдызы | Бас мешіт |
6 | Нұра | Емханалар мен ауруханалар |
7 | Университет | Назарбаев Университеті, MEGA Silk Way сауда және ойын-сауық орталығы, EXPO |
8 | Ұлы дала | Ботаникалық бақ, тұрғын үй кешендері |
9 | Астана Арена | «Астана Арена», «Сарыарқа» велотрегі, «Алау» мұз сарайы |
10 | Жекпе-жек сарайы | Жақсылық Үшкемпіров атындағы жекпе-жек сарайы, тұрғын үй кешендері |
11 | Сығанақ | Ұлттық ғылыми кардиохирургия орталығы, Ұлттық нейрохирургия орталығы, Ұлттық онкология орталығы |
12 | Бәйтерек | Abu Dhabi Plaza, The Ritz-Carlton, Бейжің сарайы, «Бәйтерек» монументі |
13 | Министрліктер үйі | Министрліктер, Astana Musical, Қазақконцерт, Ақорда |
14 | Ұлттық музей | ҚР Ұлттық музейі, Тәуелсіздік сарайы, Бейбітшілік және келісім сарайы |
15 | Мыңжылдық аллеясы | Мыңжылдық аллеясы, тұрғын үй кешендері |
16 | Театр | Қалибек Қуанышбаев атындағы театр, тұрғын үй кешендері |
17 | Жібек жолы | Қаланың оң жағалауына баратын жолдар |
18 | Нұрлы жол | «Нұрлы жол» теміржол вокзалы, қалааралық автобус бағыттары |
1
Бекет атауы
Әуежай
Маңында не бар?
Халықаралық әуежайдың T1 және T2 терминалдары, автотұрақ
2
Бекет атауы
Атамекен
Маңында не бар?
Арнасай тұрғын алабы
3
Бекет атауы
Есіл
Маңында не бар?
Қабанбай батыр даңғылы бойындағы тұрғын үй кешендері
4
Бекет атауы
Мәңгілік Ел
Маңында не бар?
Тұрғын үй кешендері
5
Бекет атауы
Астана жұлдызы
Маңында не бар?
Бас мешіт
6
Бекет атауы
Нұра
Маңында не бар?
Емханалар мен ауруханалар
7
Бекет атауы
Университет
Маңында не бар?
Назарбаев Университеті, MEGA Silk Way сауда және ойын-сауық орталығы, EXPO
8
Бекет атауы
Ұлы дала
Маңында не бар?
Ботаникалық бақ, тұрғын үй кешендері
9
Бекет атауы
Астана Арена
Маңында не бар?
«Астана Арена», «Сарыарқа» велотрегі, «Алау» мұз сарайы
10
Бекет атауы
Жекпе-жек сарайы
Маңында не бар?
Жақсылық Үшкемпіров атындағы жекпе-жек сарайы, тұрғын үй кешендері
11
Бекет атауы
Сығанақ
Маңында не бар?
Ұлттық ғылыми кардиохирургия орталығы, Ұлттық нейрохирургия орталығы, Ұлттық онкология орталығы
12
Бекет атауы
Бәйтерек
Маңында не бар?
Abu Dhabi Plaza, The Ritz-Carlton, Бейжің сарайы, «Бәйтерек» монументі
13
Бекет атауы
Министрліктер үйі
Маңында не бар?
Министрліктер, Astana Musical, Қазақконцерт, Ақорда
14
Бекет атауы
Ұлттық музей
Маңында не бар?
ҚР Ұлттық музейі, Тәуелсіздік сарайы, Бейбітшілік және келісім сарайы
15
Бекет атауы
Мыңжылдық аллеясы
Маңында не бар?
Мыңжылдық аллеясы, тұрғын үй кешендері
16
Бекет атауы
Театр
Маңында не бар?
Қалибек Қуанышбаев атындағы театр, тұрғын үй кешендері
17
Бекет атауы
Жібек жолы
Маңында не бар?
Қаланың оң жағалауына баратын жолдар
18
Бекет атауы
Нұрлы жол
Маңында не бар?
«Нұрлы жол» теміржол вокзалы, қалааралық автобус бағыттары
LRT-ның жұмыс кестесі
LRT күн сайын 06:00–23:00 аралығында жүреді. Пойыздар әдетте 5–6 минут сайын қатынайды, бірақ жолаушы саны мен қозғалыс жағдайына қарай бұл аралық өзгеруі мүмкін. Жұмыс күндері мен демалыстағы кесте бірдей, тек пойыздардың жүру аралығы өзгеруі мүмкін. Мереке күндері немесе қалада ауқымды іс-шаралар өткенде кесте өзгерсе, оператор бұл туралы алдын ала хабарлайды.
Өзім Тұран көшесінің бойында тұрамын. Таңертең кептеліс болғанда Қабанбай батыр көшесіне дейін жаяу барып, «Жекпе-жек сарайы» бекетінен LRT-ға отырамын. Лық толы автобусты күтіп, сосын тағы біраз уақыт кептелісте тұрғанша осы жақсы. «Министрліктер үйіне» дейін 20 минутта жетемін. Таңертең LRT-ның вайбы да ерекше болады.
LRT билетінің бағасы мен абонементтер
Көліктегі бір реттік жол ақысы — 200 теңге. Банк картасымен, QR-кодпен не көлік картасымен төлесеңіз де, баға бірдей. LRT-ның операторы — City Transportation Systems (CTS). Компания бірнеше сапарға арналған пакеттер де ұсынады.
- 5 сапар — 900 теңге;
- 10 сапар — 1 800 теңге;
- 20 сапар — 3 500 теңге;
- 30 сапар — 5 мың теңге.
LRT-мен жиі жүретін болсаңыз, мынадай абонементтер сатып алған тиімді:
- 1 күндік — 500 теңге;
- 3 күндік — 1 500 теңге;
- 5 күндік — 2 500 теңге;
- 10 күндік — 4 мың теңге;
- 15 күндік — 5 мың теңге;
- 1 айлық — 7 500 теңге;
- 3 айлық — 20 мың теңге.
Бірнеше сапарға арналған пакеттер алғашқы төлемнен кейін іске қосылады. Айлық абонементті айдың 15-іне дейін алсаңыз, сол айдың соңына дейін пайдалана аласыз. 15-інен кейін сатып алынған абонемент келесі айдың басынан бастап жарамды болады. Абонементтер мен сапар пакеттері көлік картасына жазылады. Карта жоғалса, ондағы тарифтерді жаңа картаға көшіру мүмкін емес.
Зейнеткерлер, көпбалалы аналар, мүгедектігі бар адамдар, 18 жасқа толмаған астаналықтар мен заңда көрсетілген басқа санаттар арнайы көлік картасымен тегін жүре алады. Тегін жүруге арналған картаны transcard.kz сайтында рәсімдеуге болады. Ол үшін жеке мәліметтеріңізді толтырып, фотосурет пен жеңілдікке құқығыңызды растайтын құжаттарды жүктейсіз. Картаны дайындау 1200 теңге тұрады. Дайын болғанда SMS келеді. Оны Рақымжан Қошқарбаев даңғылы, 50/1 мекенжайындағы CTS кассасынан алып кетесіз.
LRT-да жол ақысын төлеу тәсілдері
LRT бекеттерінде бірнеше төлем тәсілі бар.
- Банк картасы: Контактісіз төлем жасауға болатын банк картасын турникетке тигізесіз.
- Көлік картасы: CTS жүйесінің көлік картасымен төлеуге болады. Таңдаған тарифіңізге қарай жол ақысы есептеледі.
- Телефон немесе QR-код: QR-код арқылы, сондай-ақ Apple Pay және Samsung Pay көмегімен төлеуге болады.
- Жеңілдік картасы: Тегін жүруге құқығыңыз болса, арнайы жеке картаңызды турникетке тигізесіз.
- Face Pay: Бет-әлпетті тану жүйесі арқылы да төлем жасауға болады. Ол үшін алдын ала тіркелу қажет.
LRT билетін алатын жерлер
- Автоматтан (TVM): Бекеттердегі билет автоматтарынан бір реттік билет алып, көлік картасының балансын толықтыруға болады.
- Кассадан: Қолма-қол ақшаға билет алғыңыз келсе, бекеттегі кассаға бара аласыз.
- Турникеттен: Қағаз билет алудың қажеті жоқ. Банк картасын не смартфонды турникетке тигізіп төлей аласыз.
- Қағаз билет керек пе: Жоқ, міндетті емес. Бірақ банк картасы, смартфон немесе көлік картасы болмаса, бекеттен бір реттік билет алуға болады.
Жиі қойылатын сұрақтар
Астанада LRT жылдамдығы қандай?
Пойыздардың ең жоғары жылдамдығы — 80 км/сағ. Ал бекеттерге тоқтайтынын ескерсек, орташа жылдамдығы шамамен 50–60 км/сағ.
LRT кестесі жұмыс және демалыс күндері әртүрлі бола ма?
Негізгі жұмыс уақыты бірдей — 06:00–23:00. Бірақ пойыздардың жүру аралығы күнге және жолаушы санына қарай өзгеруі мүмкін.
Жол ақысын телефон не банк картасымен төлеуге бола ма?
Иә. Банк картасын турникетке тигізіп, Apple Pay, Samsung Pay не QR-код арқылы төлеуге болады.
Астанадағы LRT-да қанша бекет бар? Жаңа желілер салына ма?
Қазір жұмыс істеп тұрған LRT желісінде 18 бекет бар. Алдағы уақытта тағы 20 бекет салу жоспарланған. Жаңа желілер қаланың оң жағалауын, Жағалау тұрғын алабын және Қосшы қаласын қамтиды. Қосшыға қарай тартылатын 9 шақырымдық жолдың құрылысы 2026 жылы мамырда басталды, қазір тіректер мен эстакада салынып жатыр. Ал оң жағалауда әзірге жер зерттеліп, құрылысқа дайындық жүріп жатыр. Жаңа желілер толық іске қосылса, Астанадағы LRT бекеттерінің саны 38-ге жетеді. Құрылыстың нақты қашан аяқталатыны әзірше белгісіз.
Әуежайдан қаланың орталығына дейін қанша уақытта жетуге болады?
Әуежайдан «Университет» пен EXPO маңына шамамен 15–20 минутта, «Бәйтерекке» 30 минутта жетесіз. Ал соңғы «Нұрлы жол» бекетіне дейін шамамен 40 минут жүреді.
Суретті салған — Кира Кустова.
