Астанада көретін не бар: мешіт ішіндегі кофе, жаңа саябақ пен Есіл жағасындағы шай
Астаналықтардың өзі баратын жерлер.
Астана десе, біраз адамның көз алдына әлі де кең даңғылдар, әйнек ғимараттар мен Бәйтерек қана келуі мүмкін. Бірақ қалада тұратын адамға бұл жердің ерекше қыры көп. Жазда Есіл маңында тіршілік қайнайды: жұрт өзен жағасында серуендеп, велосипед тебеді, террасаларда отырады, оң жағалаудың ескі аудандары мен сол жағалаудың жаңа саябақтарында демалады. Қыста температура −20°C-тан төмен түсіп, тіршілік жылы жерге көшеді: жұрт музейге, терезесінен қала көрінетін кофеханалар мен жабық жағажайға ағылады. Оның үстіне LRT іске қосылғалы қаланы кез келген күн райында ыңғайлы аралап шығуға болады.
Астананың ең көрікті жерлері
Алдымен көпшілік білетін жерлерді аралайық, сосын туристер сирек баратын орындарға ат басын бұрамыз.
Бәйтерек
Мекенжайы: Нұржол бульвары, 14.
Жұмыс уақыты: күн сайын 10:00–21:00.
Билет бағасы: ересектерге — 2500 теңге, 6–15 жастағы балаларға — 1250 теңге.
Астананың жаңа орталығымен танысуды Бәйтеректен бастаңыз. Биіктігі 105 метр монумент түркілердің Өмір ағашы туралы аңызының желісімен салынған. Аңыз бойынша ағаштың басында Самұрық құстың жұмыртқасы жатыр. 97 метр биіктікте қаланы жоғарыдан көретін алаң бар. Бұл жерден Нұржол бульвары, Ақорда мен жаңа аудандар көрінеді. 97 метрдің де өз мәні бар: Қазақстан астанасы Ақмолаға 1997 жылы көшірілген.
Нұржол бульвары
Мекенжайы: сол жағалаудың орталығы, Ақордадан Ханшатырға дейін.
Жұмыс уақыты: тәулік бойы.
Кіру: тегін.
Нұржол — жаңа орталықтағы басты жаяу жүргіншілер бульвары. Мұнда субұрқақтар, әкімшілік ғимараттар, тұрғын үйлер, кафе мен шағын аллеялар бар. Бәйтеректен бір жаққа жүрсеңіз Ақордаға, екінші жаққа жүрсеңіз Ханшатырға жетесіз. Серуенге ең жайлы уақыт — жазғы кеш. Шамдар жанып, субұрқақтардың маңына жұрт жиналады. Күннің қызарып батқаны бұл жерден әдемі көрінеді. Жасыл желегі де ерекше әдемі.
Ақорда президент резиденциясы
Мекенжайы: Нұржол бульвары, 1. Туристерді ішке кіргізбейді — бұл президенттің жұмыс істейтін резиденциясы.
Көгілдір күмбезді ақ ғимарат Нұржол бульварының бір шетінде тұр. Ақорда қатаң күзетіледі, сондықтан ғимараттың дәл жанына бара алмайсыз. Есесіне 2026 жылы Ақорданың алдындағы аумақты көгалдандырып, ағаш егіп, серуендейтін жер жасаған. Енді мұнда жұрт күмбезді көруге ғана емес, Нұржолдың жаңа жасыл бөлігінде серуендеуге де келеді. Тек жасақ өкілдері тоқтатып, сұрақ қоюы ғажап емес.
ҚР Ұлттық музейі
Мекенжайы: Тәуелсіздік даңғылы, 54.
Жұмыс уақыты: сейсенбі–жексенбі 10:00–18:00, дүйсенбі — демалыс.
Билет бағасы: ересектерге — 1000 теңге, студенттерге — 700 теңге, оқушылар мен зейнеткерлерге — 500 теңге, жеті жасқа дейінгі балаларға — тегін.
Музей аралауға бірнеше сағатыңыз ғана болса, осы жерге барған дұрыс. Мұнда археологиялық, этнографиялық және тарихи жәдігерлер, өнер туындылары мен алтын бұйымдар коллекциясы бар. Музейдегі ең әйгілі жәдігер — «Алтын адам». Музей үлкен, сондықтан бір барғаннан бәрін көремін деп әуре болмаңыз. Бірнеше залды таңдап, бір жарым-екі сағат бөлген дұрыс.
Алтын залдарына кірсеңіз, билет қымбатырақ: ересектерге — 2000 теңге, студенттерге — 1400 теңге, оқушылар мен зейнеткерлерге — 1000 теңге.
Тәуелсіздік алаңы мен «Қазақ елі» монументі
Мекенжайы: Тәуелсіздік даңғылы, Ұлттық музейдің жанында.
Жұмыс уақыты: тәулік бойы.
Алаңның айналасына бірнеше маңызды нысан жиналған: «Қазақ елі» монументі, Ұлттық музей, Тәуелсіздік сарайы мен Әзірет Сұлтан мешіті. Бәрінің ішіне кірмесеңіз де, алаңды бір айналып, ғимараттарды сыртынан көріп шыққан дұрыс.
«Нұр-Сұлтан» мешіті
Мекенжайы: Мәңгілік Ел даңғылы, 65.
Жұмыс уақыты: күн сайын 04:00–23:00.
Кіру: тегін.
Мешіт 2022 жылы ашылған. Бұл — Қазақстандағы ең үлкен және Орталық Азиядағы ірі мешіттердің бірі. Биіктігі 130 метр төрт мұнарасы бар, бас күмбезінің диаметрі — 62 метр. Ішіне кіргенде ауқымы тіпті қатты сезіледі: айналаның бәрі ақ мәрмәр, витраж, ою-өрнек. Ондаған мың адам сыятын бас намаз залында турист болып келсеңіз де, асықпай бәрін қарап шыққыңыз келеді.
Киімге қойылатын талапты сақтаңыз. Әйелдерге басы мен тізесін жабатын жамылғы береді. Шолақ шалбармен келген ерлерге де жабық киім беріледі.
Мешіттің күнделікті тіршілігі де қызық. Ішінде кітап, кәдесый мен діни тауар сататын дүкендер бар. Төменгі қабатта арзан асхана, екінші қабатта кофехана жұмыс істейді. Басқа мешіттердегідей аяқкиімді кіреберісте шешесіз. Едені жылы, сондықтан жұрт капучиноны шұлықпен отырып ішеді, балалар жалаңаяқ жүгіріп жүреді. Сөреде десерт, круассан, сэндвич, тіпті хот-дог бар. Мәзірде кофе, шай мен басқа да сусындар бар. Бағасы қаладағы кәдімгі кофеханалармен шамалас, бәрі дәмді.
Бейбітшілік және келісім сарайы
Мекенжайы: Тәуелсіздік даңғылы, 57.
Жұмыс уақыты: күн сайын 10:00–21:00.
Билет бағасы: экскурсияға не іс-шараға байланысты.
Бұл — Норман Фостер жобалаған биіктігі 63 метр әйгілі пирамида. Ішінде концерт және көрме залдары бар, ал төбесінде көгершіндер бейнеленген үлкен витраж тұр. Экскурсияға бармасаңыз да, пирамиданы сыртынан айналып шығыңыз. Астананың ашық аспанының астындағы қатаң геометриясы фантастикалық фильмнің декорациясына ұқсайды. Одан кейін Президент саябағына түсуге болады.
Тағы көп жер көріп, оған ақша жұмсамағыңыз келмесе, Астанада тегін баруға болатын жерлер туралы гидімізді оқыңыз. Онда 0 теңгеге кіретін саябақ, музей мен қаланы жоғарыдан көретін орындар бар.
Президент саябағы
Мекенжайы: Тәуелсіздік даңғылы, Бейбітшілік және келісім сарайының айналасы.
Жұмыс уақыты: күн сайын 08:00–22:00.
Кіру: тегін.
Саябақ өте үлкен әрі қыратты. Кей тұсы сол жағалаудағы жаңа саябақтардай күтімі мінсіз емес, бірақ қызығы да сонда. Кең жолдар, көгал, жылғалар мен субұрқақтар бар. Жоғарғы жағынан Пирамида жақсы көрінеді.
Мұнда күндіз емес, күн батарда келген дұрыс. Саябақты Есіл жаққа қарай кесіп өтсеңіз, арғы жағынан өзенге түсетін соқпақтар табылады. Жазда жұрт көгалға көрпе төсеп, су жағасында отырады, күн батысын көреді. Қармақ алып келетіндер де бар. Бәйтерек пен Нұржолға қарағанда турист аз, тыныш отырып демалуға болады.
Ханшатыр мен Ғашықтар саябағы
Мекенжайы: Тұран даңғылы, 37.
Жұмыс уақыты: күн сайын 10:00–22:00.
Кіру: сауда орталығына тегін, ойын-сауыққа бөлек төлейсіз.
Бұл — Фостердің тағы бір туындысы әрі Астананың әйгілі ғимараттарының бірі. Шатырдың ішінде дүкен, мейрамхана, ойын-сауық паркі, тіпті жабық жағажай бар. Бірақ мұнда сауда жасау үшін емес, ғимараттың өзін көруге де келуге болады. Ең әдемі көрініс қарсы беттегі Ғашықтар саябағынан ашылады. Әсіресе кешке Хан Шатырдың шамдары жанғанда әдемі.
GreenLine жасыл бульвары
Мекенжайы: Нұра ауданы, Хан Шатырдың артында.
Жұмыс уақыты: тәулік бойы.
Кіру: тегін.
GreenLine — Нұра ауданы арқылы біртіндеп ұзарып келе жатқан жаңа жаяу жүргіншілер бульвары. Ашылған бөліктерінде жаяу және велосипед жолдары, жасанды су айдындары, ойын алаңдары, көгал мен демалатын орындар бар. Бульвар әлі толық біткен жоқ, бірақ қазірдің өзінде серуендеуге болады.
Мұнда жазғы кеште келген жақсы. Су жағасына жұрт жиналады, балалар алаңда ойнайды, жаңа үйлердің сәулесі суға түседі. Бульварға көлік кірмейді, сондықтан айналадағы үлкен даңғылдарға қарағанда тып-тыныш.
Астанада не істеуге болады?
Көпшілік білетін жерлерді көрдік, енді астаналықтардың өзі бос уақытында баратын орындарды аралайық.
Шәмші Қалдаяқов көшесінде серуендеу
Жазда Шәмші Қалдаяқов көшесі жаңа ауданда серуендеуге жақсы жердің біріне айналады. Тротуары кең, көшеттер егілген, айналасында жаңа үйлер мен бірінші қабатта түрлі дәмхана бар. Кешке мұндағы тіршілік Бәйтеректің маңынан мүлде бөлек: жұрт серуендейді, террасаларда отырады, бір кафеден екіншісіне кіріп жүреді. Музей аралап болған соң, осында келіп біраз демалып алған жақсы.
Қаланы 22-қабаттан көру
Астананың дронмен түсірілгендей көрінетін талай суретін 22-қабаттағы Raul Coffee & Snacks кофеханасынан түсіруге болады. Панорамалы терезелерінен Ботаникалық бақ пен жаңа аудандар көрінеді. Күн батарға жақын келіп, терезе жанындағы орынды ертерек алып қойыңыз. Бағасы кәдімгі кофеханадан жоғары. Мұнда ақшаны ең алдымен осы бір көрініс үшін төлейсіз.
Ботаникалық бақты аралау
Raul-дан шығып, бірден Ботаникалық баққа түсуге болады. Ұзын жаяу және велосипед жолдары, су айдындары, көгал мен демалатын орындар бар. Жазда астаналықтар мұнда жүгіреді, велосипед тебеді, пикник жасайды, көгалда жатады. Таңертең не күннің қызуы қайтқан кешке барған дұрыс.
Кешті Ататүрік саябағында өткізу
Бұл — сол жағалаудағы үлкен саябақтарға мүлде ұқсамайтын шағын жасыл саябақ. Үлкен ағаштар, көлеңкелі жолдар, орындықтар мен су жағасында отыратын жерлер бар. Жазғы кеште түрік шайы мен симит — күнжіт себілген түрік тоқашын алып, Есілге жақынырақ отырып көріңіз.
Жағалау мен «Атырау» көпірін аралау
«Атырау» көпірін толқын тәрізді металл қаңқасынан бірден танисыз. Оны Атырау облысы Астананың 20 жылдығына сыйлаған. Пішіні балыққа ұқсайды. Көпірден өтіп, арғы жағалаудағы Орталық саябақпен серуенді жалғастыруға болады. Жазда жұрт велосипед тебеді, көше музыканттары өнер көрсетеді, отбасылар кешке дейін қыдырады.
Ескі Целиноградты аралау
Ескі Астананы көргіңіз келсе, Fading.TSE жобасының экскурсиясына барып көріңіз. Маршрут сол жағалау пайда болмай тұрып салынған ескі көшелер мен көпестер тұрған аудандар арқылы өтеді. Гидтер Ақмола мен Целиноградтың қандай болғанын, алғашқы мектеп, вокзал мен сауда үйлері қай жерде тұрғанын, қай ғимараттар бүгінге дейін сақталғанын айтып береді. Кестесі мен жиналатын жерін Fading.TSE Instagram парақшасынан қараңыз.
Астанада не көруге болады: 1 күнге дайын маршрут
LRT-ны қаланы аралайтын дайын маршрут ретінде пайдалануға болады. Автобус пен такси де қажет емес: керекті стансаға дейін барып, ары қарай жаяу жүресіз.
Жолақысы — 200 теңге. Көлік не банк картасымен, QR-код, Apple Pay, Samsung Pay не Face Pay арқылы төлеуге болады. Бірінші желіде «Бәйтерек», «Ұлттық музей», «Театр» және «Астана Арена» бекеттері бар. Сондықтан бір күнде астананың бір-біріне ұқсамайтын бірнеше бөлігін көресіз. Пойыздың өзі де қызық: жолдың едәуір бөлігі жер үстімен өтеді.
- 09:00 — «Бәйтерек» стансасы. Ең танымал жерден бастаңыз. Бәйтерекке көтеріліп, Нұржолмен Ақордаға дейін барып, қайтадан стансаға оралыңыз. Асықпай аралау үшін екі сағаттай уақыт қалдырыңыз. Таңертең мұнда кешке қарағанда адам аз болады.
- 11:15 — «Бәйтерек» → «Ұлттық музей». Ұлттық музейден түсіңіз. Негізгі залдарды бір жарым сағатта аралауға болады. Одан кейін Тәуелсіздік алаңы, Әзірет Сұлтан мешіті мен Бейбітшілік және келісім сарайына жаяу барыңыз. Күн райы жақсы болса, Пирамидадан кейін Президент саябағы арқылы Есілге түсіңіз. Бәрі жақын, көлік қажет емес.
- 14:30 — «Ұлттық музей» → «Театр». Стансадан Шәмші Қалдаяқов көшесіне шығасыз. Музейлерден кейін үзіліс жасайтын уақыт: серуендеп, жаңа ауданды көріп, мысалы, төменде айтатын Chia-да түскі ас ішуге болады. Бұл ауданға бір жарым сағаттай бөліп, кейін сол бекетке қайтыңыз.
- 16:15 — «Театр» → «Астана Арена». Бұл жерден Ботаникалық баққа барыңыз. Алдымен Raul-дың 22-қабатына көтеріліп, қаланы жоғарыдан көріңіз, одан кейін төмен түсіп, бақты аралаңыз. Күн райы жақсы болса, екі сағаттай уақыт қалдырған дұрыс. Мұнда енді музей жоқ — кофе, жасыл желек пен жаңа үйлер.
- 18:30 — «Астана Арена» → «Бәйтерек». Кешкі шамдарды көру үшін қайтадан орталыққа оралыңыз. Бекеттен «Москва» бизнес орталығына жаяу барып, 25-қабаттағы «Вечное небо» мейрамханасында кешкі ас ішуге болады. Күшіңіз қалса, Нұржолмен тағы бір жүріп өтіңіз. Түнде бұл жер мүлде басқаша көрінеді.
Астанадағы тамағы дәмді жерлер
Серуен арасында тез тамақтанып алатын, қазақтың ұлттық асын жейтін немесе кофе мен десертке отыратын бірнеше жер ұсынамыз.
Chia
Мекенжайы: Шәмші Қалдаяқов көшесі, 3.
Жұмыс уақыты: күн сайын 09:00–22:00.
Орташа чек: шамамен 3000 теңге.
Қалдаяқов көшесімен серуендеп жүрсеңіз, Chia-ға кіріп шығыңыз. Бұл — италиялық тағамдар әзірлейтін шағын кафе. Мұнда түскі асты тез ішіп, серуенді жалғастыруға болады. Қызық тағамының бірі — паноццо. Бұл пиццаның қамырына ұқсайтын жұмсақ наннан жасалған италиялық сэндвич.
Aula
Мекенжайы: Сарайшық көшесі, 8.
Жұмыс уақыты: күн сайын 12:00–00:00.
Орташа чек: 5–8 мың теңге.
Aula — қазақ және Орталық Азия тағамдарын заманауи интерьерде жеп көргісі келетіндерге арналған жер. Мәзірінде ет тағамдары, дәстүрлі сусындар мен десерт көп. Іші тыныш әрі жайлы, асықпай түскі ас ішуге де, үй ішімен кешкі асқа келуге де болады. Астананың орталығы үшін бағасы аса қымбат емес.
Peak Buro
Мекенжайы: Қабанбай батыр даңғылы, 60/14.
Жұмыс уақыты: жұмыс күндері 08:30–22:00, демалыста 09:00–22:00.
Орташа чек: шамамен 4000 теңге.
Сол жағалауды аралап жүріп таңғы ас ішуге немесе кофе алуға болатын жақсы жер. Мұнда спешелти кофе дайындайды, таңғы ас, боул мен салат бар. Нан мен бәлішті өздері пісіреді. Тәттіге сәбізді кекс немесе шоколад не карамель салынған краффин — круассан мен маффиннің ортасындағы бәліш алып көріңіз. Интерьері минималистік. Термокружка, кофе демдейтін воронка немесе әдемі кружка да сатып алуға болады.
Tochka
Мекенжайы: Бейбітшілік көшесі, 5.
Жұмыс уақыты: жексенбі–бейсенбі 09:00–22:00, жұма мен сенбі 23:00-ге дейін.
Орташа чек: шамамен 7000 теңге.
Tochka — ескі орталықтағы, Есіл жағалауына жақын кафе. Таңғы асты күні бойы береді. Кофеден бөлек рамен, үй пастасы, хумус-сет, салат пен авторлық тіскебасарлар бар. Фирмалық десерті — бала кезден таныс қоюлатылған сүт салынған үй жаңғақтары. Орын шағын әрі еркін: мұнда ноутбукпен жұмыс істеуге, достармен кездесуге немесе ескі орталықты аралап шаршағанда демалуға келеді. Айтпақшы, үй жануарымен де кіргізеді.
Keks
Мекенжайы: Гейдар Әлиев көшесі, 2, Ботаникалық бақтың жанында.
Жұмыс уақыты: күн сайын 08:30–22:00.
Орташа чек: 5–10 мың теңге.
Ботаникалық бақтан кейін кофе мен тәтті жегіңіз келсе, Keks-ке кіріңіз. Бәліш пен десертті өздері жасайды: брауни, кекс, чизкейк, торт бар. Таңғы ас, кофе, шай мен какао да береді. Іші жарық әрі тыныш. Таңғы ас ішуге де, күндіз біраз демалуға да жақсы.
«ҚазМұнайГаз» маңындағы мейрамханалар
Мейрамхананы көңіл күйге қарай таңдағыңыз келсе, «ҚазМұнайГаз» ғимаратының жанындағы аулаға барыңыз. Бір-бірінен бірнеше минуттық жерде мейрамхана көп, сондықтан алдын ала біреуін таңдап, үстел брондап қою міндетті емес. Италия және Еуропа тағамдары — Del Papa-да, грузин асханасы — Gruzin Kuzin немесе PRO.Хинкали-де. Асықпай кешкі ас ішкіңіз келсе, «Сыроварняға» баруға болады. Айналасында басқа кафе мен кофехана да жетеді. Сондықтан жазда достармен келуге ыңғайлы: алдымен Нұржолды аралап, кешкі асты қайда ішетініңізді сол жерде шешесіз.
Астанадан не алып қайтуға болады?
Кәдімгі кәдесыйдан бастап, үйде шынымен пайдаланатын заттарға дейін бірнеше нұсқа бар.
Бәйтеректің шағын мүсінін
Тым қарапайым кәдесый шығар, бірақ Астанадан басқа не алып қайтасыз?! Бәйтеректің шағын мүсіні, ашықхат пен магнитті монументтің маңынан және орталықтағы кәдесый дүкендерінен табасыз. Мысалы, Keruen Souvenirs-те бар. Салмағы жеңіл, қол жүгіне оңай сияды. Бағасы орташа, брелокты 3500 теңгеге алуға болады.
Ағаш ыдыс
Шағын кесе, табақ не кішкентай астау магниттен қызығырақ әрі үйде кәдеңізге жарайды. Қазақы ою-өрнегі бар бұйымдарды Sheber-ден іздеңіз. Үлкен ыдыс алудың қажеті жоқ: кішкентайын алып жүру оңай әрі арзанырақ. Кесені 2–3 мың теңгеге алуға болады.
Қазақстандық брендтердің әшекейі мен киімін
Кәдімгі кәдесыйдың орнына заманауи қазақы нақышы бар сырға, алқа, орамал, футболка немесе шопер алуға болады. Мына жергілікті брендтерді қарап көріңіз:
- Balausa Jewelry — заманауи қазақы стильдегі күміс әшекейлер;
- Qazaq Soul — фольклорлық нақыштағы авторлық әшекей, аксессуар мен киім;
- Ademi-Ai — дәстүрлі ою-өрнегі бар сыйлық, кәдесый мен әшекей.
Бұл брендтердің көбін қаладағы сауда орталықтарынан немесе өз дүкендерінен табасыз. Мұндай сыйлық сөреде шаң басып тұрмайды, тағып не киіп жүруге болады.
Астананың сыртында қайда баруға болады?
Астанада екі күннен артық болсаңыз, қаладан шығып, мына екі жерге барып қайтуға болады.
Бурабай мен Көкшетау қыраты
Қашықтығы: Астанадан шамамен 250 шақырым.
Жол: көлікпен немесе Burabay Express пойызымен шамамен үш сағат.
Билет бағасы: Burabay Express-тің бірінші класы — 6200 теңге, екінші класы — 4200 теңге, үшінші класы — 3500 теңге.
Астанадан кейін орман, көл мен жартас көргіңіз келсе, ең оңай нұсқа — Бурабай. Burabay Express-пен барған ыңғайлы: вагондары жаңа, үш класқа бөлінеді. Бірінші класта арқалығы реттелетін орындық, жеке үстел, USB, Wi-Fi мен мультимедиа жүйесі бар. Пойыз Нұрлы жол вокзалынан шығып, шамамен үш сағатта «Бурабай курорты» стансасына жетеді.
Астанадан бірден таксимен барсаңыз, бір көлік әдетте 16–20 мың теңгеге шығады. Бірнеше адам болып барсаңыз, бірнеше пойыз билетінің бағасымен шамалас болуы мүмкін. Бурабайға таңертең барып, кешке қайтуға болады. Бірақ бір күнде бүкіл көл мен көрініс алаңын аралаймын деп әуре болмаңыз. Бір күнді түгел арнаған немесе бір түн қонған дұрыс.
Қорғалжын қорығы
Қашықтығы: Астанадан шамамен 130 шақырым.
Жол: шамамен екі сағат.
Экскурсия маусымы: мамырдан қазанға дейін.
Қорғалжын ауылындағы визит-орталық жыл бойы, сейсенбіден жексенбіге дейін 09:00–18:00 аралығында жұмыс істейді. Дүйсенбі — демалыс. Бұл — ауылдың өзіндегі қорық туралы шағын музей. Оған ешқандай рұқсатсыз кіре аласыз. Ал қорықтың қорғалатын аумағына тек арнайы рұқсатпен және қызметкер не гидпен бірге кіргізеді.
Қорғалжынға жазық дала, көл мен құс көруге барады. Өңір әсіресе қызғылт қоқиқаздарымен әйгілі. Бірақ оларды жыл бойы көре алмайсыз: қоқиқаздар ұя салатын сәуірдің ортасынан қыркүйекке дейін келеді.
Сапарды қорық әкімшілігімен алдын ала келісу керек. Сондықтан Астанадан сертификаты бар гидпен барған дұрыс, рұқсатты сіз үшін солар алып береді. Ережесі мен ашық маршруттарын алдын ала тексеріп, сапарға бір күнді түгел арнаңыз.
Астанаға қай кезде барған дұрыс?
Ұзақ серуендеу үшін мамыр, жаздың басы мен қыркүйектің бірінші жартысы жақсы. Жазда күн ыстық болуы мүмкін, есесіне күн ұзақ, кешке дейін жүре аласыз. Күзде адам азаяды, бірақ күн райы құбылмалы. Қыста температура −30°C-тан төмен түсіп, жел аязды одан сайын күшейтеді.
Бірақ Астананың аязы да сұлу: ағаштарға қырау қатып, айнала түгел аппақ болып, басқан сайын қар қытырлап, ғажап көрініске куә боласыз. Тек күнді қысқа-қысқа серуенге бөліп тастаңыз: музей, LRT, кафе, аздап далада жүріп, бір жылынып алыңыз да, тағы сыртқа шығыңыз.
Туристерге кеңес
- Картадағы қашықтыққа алданып қалмаңыз. Астанада жер жақын сияқты көрінгенімен, жаяу біраз жүруге тура келуі мүмкін. Жолға уақыт қалдырыңыз.
- Күн райы тез өзгереді. Жазда күннен қорғайтын крем, су мен жеңіл күрте алыңыз. Көктем мен күзде желден қорғайтын күрте, қыста жылы аяқкиім керек.
- Кафе, музей мен көліктің көбінде картамен төлей аласыз. Дегенмен аздап қолма-қол ақша алып жүрген дұрыс.
- Мешітке иық пен тізені жауып тұратын киіммен барыңыз. Аяқкиімді кіреберісте шешесіз.
- Сол жағалау мен Есіл күн батарда ерекше әдемі көрінеді. Сондықтан кей серуенді кешке қалдырыңыз.
Суретті салған — Кира Кустова.
