Астанада жұбыңмен кездесуге баратын 12 жер. Сақтап алыңыз
Біз таңдаған жерлер өте ерекше.
Байқаған шығарсыз, Астанада кейінгі жылдары жасыл желек пен жарқыраған шамға толы сұлу саябақ, көңілді де, қарынды да тойдыратын мейрамхана, шығармашыл адамдар шүйіркелесіп қайтатын орын көбейді. Сүйгеніңізді не ұнатып жүрген адамыңызды естен кетпес кездесуге шақырамын деп жүрсеңіз, мархабат, бірнеше ұсынысымыз бар. Күн жылып келеді, сондықтан тізімді сақтап алып, барлық жерді апта сайын аралап шықсаңыздар да болады.
Қарапайым мейрамханалардан жалықсаңыз
Алдымен дәмханалардан бастайық. Біз таңдаған жерлер өте ерекше.
Ginza мейрамханасы
Тізіміміздегі ең классикалық, бірақ көзірі бар орын. Мұндағы Sen men Sat анонстарын бақылап жүруге кеңес береміз. Бұл — Музыкалық жас көрермен театры әртістерінің шығармашылық бірлестігі. Олардың перформанстары TikTok-та жиі шығады, ал ескі де жаңа қазақ әндері жанды дауыста шырқалғанда, залда әлдекімдер сүйіктісіне сөз салып жатады. Шамның жарығы мен театр эстетикасы — нағыз романтикаға таптырмас рецепт.
Грузин Кузин
Сүйіктіңіз Грузияда болып, сол жақтың тағамдарын сағынып жүрсе, ойланбастан осында алып келіңіз. Мұхамедханов пен Қонаев көшесіндегі нүктелерінде кейде жанды дауыста музыкалық кештер өтеді (бағдарламаны Instagram-нан алдын ала қарап алған жөн). Ал сәрсенбі күндері мұнда 3 990 теңгеге шектеусіз шарап ұсынылады. Жайлы кеште ұзақ сырласып қайтқанға тамаша таңдау.
Kөktem кафесі
Бәйтерекке қарап тұрған, таңғы астан бастап кешкі асқа дейін кез келген уақытта келуге болатын танымал классика. Серігіңіз веган не вегетариан болса, осы жерге міндетті түрде соғыңыз: мұнда тағам таңдауы қаладағы ең мол жер десе де болады. Іші у-шу боп жататын бұл жер сырласқанға жайсыз болуы мүмкін, бірақ десерттен соң Нұржол желекжолына серуенге шығып кетсеңіздер, мәселе оңай шешіледі.
Signora Viva италиялық мейрамханасы
Серігіңізді нағыз аутентик асханамен таңғалдырғыңыз келсе, осы жерге келіңіздер. Мейрамхана иесі Италияда ұзақ тұрып, сол жақтың шуақты атмосферасын Астанаға ала келген. Басты құпия: сәрсенбі күндері сағат 19:00-ден кейін қонақтарға тегін тирамису ұсынылады (нағыз гастрономиялық ләззат!). Тіпті алғашқы кездесуде не айтарыңызды білмей отырсаңыз да, мінсіз паста мен десерт кешіңізді сәтті етеді.
- Kotiko
- Kotiko
Үйде бары
Мінсіз кездесу міндетті түрде пафосты мейрамханада өтуі керек деп кім айтты? Серігіңіз авторлық сусындар мен гастрономиялық эксперименті ұнатса, осы барға тартып кетіңіздер. Мұнда ерекше тұнбалар (мысалы, ананас тұнбасы) мен қолдан жасалған сусындар бар, ал мәзірде қаланың ешбір жерінен таба алмайтын аңызға айналған «том-ям бауырсақтары» ұсынылады. «Астанада бәрін көрдім» дейтін гурмандарды да таңғалдыратын орын.
Japyraq
Бөлме өсімдіктері, жирен мысық пен винил күйтабақ — хипстерлерге бұдан артық атмосфера тапқан қиын, сірә. Мұнда стильді гүл шоғын алуға не құмырадағы үй өсімдігін таңдауға болады (екі күннен соң солып қалатын гүлге қарағанда экологиялық балама). Музыкалық сеттер әдетте күндіз болады, сондықтан ерте кездесуді ұнататындар үшін таптырмас орын. Кестесін Instagram-нан бақылаңыздар.
Kotiko котокафесі
Мысық деген әдемі ғой, әдемі. Мысық деген бізге көптік етпейді! Серігіңіз жануарларды жақсы көрсе, бұл жер нағыз жұмақ: пырылдаған мысықтарды әбден сипалап, құшақтап, бірге «мысықтерапияден» өтуге болады. Ал қызықтырақ өтсін десеңіз — ыстық шай мен үстел ойындарын таңдаңыз. Мұндай компанияда кешіңіз көңілсіз өтпейтіні анық.
Қияли жұптарға
Кітап, өнер сүйер қауымға не жай ғана жаңаша демалысты қалайтындар мына тізімді ұсынамыз.
Mi’sul Art & Coffee Studio
Бұл студияда мольберт алдында сурет салуға, трендтегі қонжық-брелоктарды жасауға немесе бенто-торт түріндегі майшам «пісіруге» болады. Бұл — алғашқы кездесудегі жайсыздықтың жеңудің ең жақсы жолы: қолыңыз істен босамайды, ал бірлескен шығармашылық іс адамдарды жақындастыра түседі.
«Кітапашар»
Қаладағы ең жылы әрі ең жайлы букинист дүкені осы шығар. Мұнда өткеннің эстетикасына ену үшін келу керек: сирек кездесетін басылымдарды парақтап, балалық шағыңыздағы сол бір қымбат кітапты тауып, сөрелер арасында кофе ішудің жөні бөлек. «Кітапашарда» сырлы кештер өтіп тұрады, ал мұндағы жайлылыққа ретро-интерьер ғана емес, жергілікті мысықтар да ерекше үлес қосады. Салмақты әрі интеллектуал кездесу үшін таптырмас орын. Анонстары Instagram-дағы парақшасында жарияланады.
- Ұлттық музей
Музыкалық жас көрермен театры
Қаладағы әр жұп баруға тиіс жер. Мәдени кеш қалап тұрсаңыз, бірақ опера не балет тым ауыр көрінсе, бұл театрдың қойылымдары — мінсіз таңдау. Олар өте ырғақты, мазмұнды да шынайы. Бірге тебіреніп қайту үшін аңызға айналған «Гауһартасты» не қарым-қатынастағы дағдарысты еңсеру туралы «Қоштасқым келмейді» драмасын көруге кеңес береміз. Бұл — әдемі киініп, кешті сәнді өткізгенге жақсы себеп. Айтпақшы, билеттер мұнда тез-ақ сатылып кетеді, сондықтан Instagram парақшасын бақылап жүріңіздер.
Ұлттық музей
Қаланың ең ауқымды музейі, мұнда бірнеше сағатқа «жоғалып кетуге» болады. Тарих пен заманауи өнер тоғысқан жер: аңызға айналған «Алтын адамнан» бастап, динозаврлары бар палеонтология залы мен қазіргі заманғы суретшілердің көрмелеріне дейін бар. Қаланың у-шуынан қашып, галереяларды аралап, суреттерді талқылағанға тамаша жер. Ал билет құны өте арзан (бар болғаны 1500 теңге).
Су тегін
- Орталық жағалау
Күн райы жақсы болса не желді елемейтіндей ессіз ғашық болсаңыздар, ең дұрысы — қаланы шарлап шығу.
Президент паркі
Тегін романтика үшін осында келіп, күннің батқанын тамашалаңыздар — Астананың қызара батқан күні сұмдық әдемі! Екеуіңіз құлаққап тағып алып, сүйікті әуендеріңізді қосып, серуеннен ләззат алыңыздар.
Орталық жағалау мен Орталық саябақ
Күннің батысын бақылайтын тағы бір тамаша жер. Өзен бойымен серуендей жүріп, көңіл көтергіңіз келсе, аттракциондарға барыңыз. Дәл қасында Ататүрік саябағы бар: мамырда мұнда мамыргүл гүлдеп, фотосессия мен көгалдағы пикникке шыққанға керемет локацияға айналады.
Жақын тани түсемін десеңіздер
Әуежай
Мұнда кем дегенде қаланың ең «қымбат кофесін» ішуге және серігіңіздің жоспарсыз саяхатқа қаншалықты дайын екенін тексеру үшін келуге болады. Ол да өзіңіз сияқты батыл болса, Aviasales.kz-тен билет қарап, жып-жылы Шымкентке кәуап жеуге ұшып кетіңіздер. Адамды сапарда танисың деген сөз бекер айтылмаса керек.
«Аламан» ипподромы
«Қыз қуу» ойынын ойнап көргенге не жай ғана атпен серуендеп қайтқанға таптырмас жер. Бір сағат атқа міну 5 000 теңгеден басталады, ал атпен шабуды да үйрететін екі сағаттық сабақ бір адамға 20 000 теңге болады.
SPA-кездесу
Алғашқы кездесу артта қалып, бір-біріңізге бауыр баса бастасаңыздар, SPA-да демалатын уақыт келді. Екі адамға орта есеппен 70 000 теңгеге толық кешенді аласыздар: массаж, скраб, хаммам мен соңында жайлы шай рәсімі болады. Пайдалы істі жағымды демалыспен ұштастырудың ең үздік жолы.
Қайда барсаңыздар да, әр кездесу көңілді тербеп, жанды жылытатын кішігірім саяхатқа айналсын!
Фото: Айдана Шынарбек, Әйгерім Пазылбек.
Сурет: Дада Кирей.
