Астанадағы тоғыз бассейн: бағасы, тереңдігі мен мекенжайы
Жағажай клубтарынан бастап олимпиадалық бассейндерге дейін.
Биыл Астанада жаз ерте басталып кетті. Аптап ыстықта бір салқындап алғыңыз келсе, алысқа ұзамай-ақ суға түсіп қайтуға болатын жер жетерлік. Қалада ашық аспан астындағы демалыс орындарынан бастап, жабық спорттық кешендерін дейін сан түрлі бассейн бар. Өзіне ұнағанын таңдасын деп, жақсы деген бассейндерді топтап шықтық.
Ашық бассейндер
Жаздың ыстық күндерін таза ауада өткізіп, күнге қыздырынсам, суға түссем дегендерге ашық аспан астындағы бассейндер ұнары сөзсіз. Астанада мұндай орын көп емес. Ең танымалдары мыналар:
Oasis Beach Club аймағы
Мекенжайы: Тұран даңғылы, 8/1а (Орталық саябақтың іргесінде).
Бағасы: Ересектерге — 10 000 теңгеден, балаларға — 5 000 теңгеден басталады. Демалыс пен мереке күндері ақысы бұдан қымбатырақ.
Бұл — қаланың қақ ортасында орналасқан ең танымал ашық демалыс аймағы. Оның атмосферасы қала сыртындағы шипажайларды еске түсіреді. Кешен аумағында ұзындығы 25 метрлік үлкен бассейн бар, ал айналасына шезлонгтар мен VIP-шатырлар қойылған. Балалар үшін қауіпсіз әрі таяз бөлек бассейн мен ойын алаңы жұмыс істейді. Демалыс күндері адам көп болатындықтан, ертерек барған жөн. Сенбі-жексенбі күндері мұнда DJ ойнайды, жазғы би кештері мен көбікті шоулар ұйымдастырылады. Ұзақ жол жүрмей, қала ішінде шомылғысы келетіндерге өте ыңғайлы.
BalQaragai отбасылық демалыс аймағы
Мекенжайы: Малотимофеевка кенті, 2 (Астанадан 20 шақырым жерде).
Бағасы: Тек бассейннің өзіне ересектер — 10 000 теңге, балалар — 6 000 теңге төлеп кіре алады.
Қаланың шуынан қашып, табиғат аясында демалғысы келетіндерге арналған ең танымал орындардың бірі. Аңқыған қайыңды орман ортасында орналасқан. Мұнда Астана маңындағы ең үлкен жылытылатын ашық бассейн (өлшемі 30х18 метр) бар. Судың температурасы +28°C деңгейінде сақталады. Балаларға +30°C-қа дейін жылытылатын бөлек ашық бассейн бар. Одан бөлек балалар қалашығы, ойын алаңдары мен кішігірім зообақ та бар. Оған бөлек төлейсіз. Достармен барып, бассейнге шомылып қана қоймай, квадроцикл айдауға, атқа мінуге, футбол мен волейбол ойнап қайтуға таптырмас жер.
Жабық бассейндер (жыл он екі ай істейді)
Енді жазда жүзіп үйренгісі келетіндерге не күнге күймей, спортпен айналыссам дегендерге қолайлы жабық кешендерді топтап шығайық.
Sky Beach Club демалыс орны
Мекенжайы: Тұран даңғылы, 37 («Хан Шатыр» СОО, 5-қабат).
Бағасы: Ересектерге бір күнге кіру құны — 20 000 теңге, балаларға — 12 000 теңге.
Мальдив атмосферасын Астанада да сезінуге болады. Бұл бассейн «Хан Шатыр» сауда орталығының ең жоғарғы қабатында орналасқан. Оның басты ерекшелігі — Мальдив аралдарынан арнайы әкелінген табиғи ақ құмы. Кешеннің шатыры әйнектен жасалғандықтан, іші әрдайым жарық әрі тропикалық климат сақталады (+30°C). Балалар құммен ойнап, таяз бассейнде қауіпсіз шомыла алады. Ал ересектер мен достарға бұл жер әдемі фотосессия жасауға, жұмыстан кейін «аква-барда» коктейль ішіп демалғанға өте қолайлы. Бір күнге бір реттік билетпен кіруге немесе бірнеше айға клуб картасын сатып алуға болады. Күнделікті қабылдайтын адам саны шектеулі болғандықтан, алдын ала брондаған дұрыс.
iSwim жүзу академиясы
Ірі филиалдары: Мәңгілік ел даңғылы, 57 (Quantum), М. Жұмабаев даңғылы, 39, Республика даңғылы, 34 («Жастар» сарайы).
Бағасы: Бір рет кіруге рұқсат жоқ, тек 8 не 12 сабақтан тұратын айлық абонементтер сатылады. Бағасы балаларға — 35 000 теңгеден, ересектерге — 40 000 теңгеден басталады.
Бұл — Астанадағы ең ірі бассейндер желісі, қала бойынша жеті жерде жұмыс істейді. Мұнда бапкерсіз, өз бетінше еркін жүзгісі келетіндер үшін де 12 сабақтық абонемент қарастырылған. Академияда сәбилерді суға бейімдеу бағдарламалары және балаларға арналған кәсіби топтық сабақтар бар. Егер мүлдем жүзе алмайтын болсаңыз, ересектерге арналған «Нөлден бастап үйрету» топтары жұмыс істейді. Жазғы күндері жұмыстан кейін сергіп, денені демалтып әрі спортпен айналысқанға өте ыңғайлы.
Swim Feels Astana
Мекенжайы: Тұран даңғылы, 4/1.
Бағасы: Абонементтік жүйемен жұмыс істейді. Бір айға ересектер абонементі — 40 000 теңгеден, балаларға — 37 000 теңгеден басталады.
Swim Feels — Астанадағы тағы бір ірі бассейндер желісі. Олар баланың жасына қарай әртүрлі санаттағы абонементтерді ұсынады. Тіпті бір жасқа толмаған сәбилер үшін «Ана мен бала» абонементі де бар. Мұндағы бапкерлер баланың физикалық дамуына арналған авторлық бағдарлама бойынша жұмыс істейді және ата-аналарға ай сайын баланың даму барысы туралы видео-есептер түсіріп береді. Топтық сабақтарға да, бапкермен жеке жаттығуларға да қатысуға болады. Балаңыз жүзуді кәсіби спорт ретінде меңгеріп, жарыстарға қатыссын десеңіз, оны осы жердегі құрама командаға қосуға мүмкіндік бар. Ересектер үшін де бөлек жаттығу абонементтері қарастырылған.
«Априори» спорт клубы
Мекенжайы: Қорғалжын тас жолы, 2а.
Бағасы: Бір реттік кіру құны ересектерге — 8 000 теңгеден, балаларға — 6 000 теңгеден басталады.
Қорғалжын тас жолы бойында орналасқан ірі фитнес-клуб. Кешен ішінде ұзындығы 18 метрлік, суы +28°C жылы бассейн бар. Мұнда 3 жастан асқан балаларды және кез келген ересек адамды жүзуге үйрететін тәжірибелі бапкерлер мен арнайы бағдарламалар бар. Одан бөлек, аяғы ауыр әйелдерге арналған «Аквамама» сабақтары мен жеке үйрету бағдарламалары қарастырылған. Жай ғана жүзіп қоймай, судағы белсенді жаттығулар — Aqua Crossfit, Aqua Cardio және Aqua Box сияқты заманауи топтық сабақтарға қатысуға болады. Жүзуден кейін орыс, фин сауналары мен хамамға кіру мүмкіндігі абонемент құнына кіреді. Бұл жерге бір реттік билетпен де барып шомылуға болады.
«Барыс Арена» спорт кешені
Мекенжайы: Тұран даңғылы, 57 (Халықаралық әуежай бағытында).
Бағасы: Бір рет кіру ересектерге — 4 000 теңге, балаларға — 2 000 теңге.
Қаладағы ең үлкен бассейн. Мұнда ұзындығы 50 метр, тереңдігі 2 метр болатын 10 кәсіби жүзу жолағы бар. Сондай-ақ биіктігі 10 метрге дейін жететін арнайы секіру мұнараларымен жабдықталған бөлек, терең бассейн жұмыс істейді. Судың сапасы мен тазалығы халықаралық жарыстар өткізу стандарттарына сай қатаң бақыланады. 6 жастан асқан балаларға арналған үйірмелер мен топтық бапкерлік бағдарламалар өте жақсы дамыған. Кешеннің іші кең, киім ауыстыратын бөлмелері мен душ кабиналары баламен келгенге өте ыңғайлы әрі қауіпсіз. Бұл орын — триатлонмен айналысатындарға, кәсіби спортшыларға және таңертеңгілік белсенді спортты ұнататын ересектерге өте қолайлы.
Ozen Swim кешені
Мекенжайы: Әйтеке би көшесі, 2 (Жаңа вокзал мен Мыңжылдық аллеясына жақын)
Бағасы: Үйірмелер бағасы 36 000 теңгеден басталады.
Кешенде ұзындығы 25 метрлік және 14 жолағы бар үлкен бассейн жұмыс істейді. Мұнда балалар мен ересектерге арналған тиімді айлық абонементтер жүйесі қарастырылған. Бұл — кішкентай баласы бар аналарға таптырмас орын, өйткені мұнда сәбилерді 3 айлығынан бастап суға бейімдеу бағдарламасы бар. Сонымен қатар балаларға арналған бөлек қауіпсіз бассейн, су добы (ватерполо) мен синхронды жүзу үйірмелері жұмыс істейді. Балаңызды кәсіби спортқа баулу үшін ең үздік орындардың бірі. 14 жолақтың арқасында мұнда адам көп болса да қабаттасып жүрмей, еркін жүзгенге орын табылады. Жұмыстан кейін достарыңызбен келіп, премиум деңгейдегі фин сауналары мен хамамда демалуға, сондай-ақ ересектерге арналған кәсіби жаттықтырушылармен жүзу техникасын дамытуға болады.
«Алатау» спорт сарайы
Мекенжайы: Тәуелсіздік даңғылы, 1/1
Бағасы: Бір рет кіру ересектерге — 2 400 теңге, балаларға — 1 310 теңге.
Қаланың оң жағалауында орналасқан, айлық абонементі арзан мемлекеттік кәсіби бассейн. Демалыс, музыка не коктейль іздегендер мұнда келмей-ақ қойса болады. Бұл жер — спорт, тәртіп пен үлкен қашықтыққа жүзсем дейтіндерге арналған. Бассейннің ұзындығы — 50 метр, ені — 25 метр, ал ең бастысы, тереңдігі 4 метрге жетеді. Мұнда кәсіби спортшыларға арналған секіру мұнаралары мен трамплиндер орнатылған. Суды тазалау халықаралық стандарттарға сай бақыланады. Оған қоса, кішкентай бүлдіршіндерге арналған, тереңдігі 50 см-ден 120 см-ге дейін баратын бөлек жылы балалар бассейні жұмыс істейді. Мұнда балаларға арналған мемлекеттік және жеке спорттық үйірмелер де көп.
Бірер ақыл-кеңес
- Медициналық анықтама. Спорттық және абонементтік бассейндерге (мысалы: iSwim, Алатау) бару үшін ересектерге де, балаларға да терапевт пен дерматологтан медициналық анықтама қажет. Барар алдында міндетті түрде қоңырау шалып анықтап алыңыз. Ал Sky Beach пен Oasis сияқты ойын-сауық демалыс орындарына анықтама керек емес.
- Ақша мен уақытты үнемдеу. Демалыс күндеріндегі адам нөпірінен қашқыңыз келсе, аквапарктер мен ашық бассейндерге жұмыс күндері (дүйсенбі-бейсенбі) таңертең барыңыз. Ол күндері билет бағасы арзанырақ болады, адам да аз.
- Балаларға арналған керек-жарақ. Аквапарктер мен бассейндерге барарда балаға арналған су өткізбейтін арнайы памперстер мен қолтықшаларды ала барған жөн. Кешендердің ішінде олар қымбатқа түседі.
Суретті салған — Дада Кирей.
