Грузияда шаңғы тебейік: бәріне ыңғайлы болатын үздік бес курорт

Қазақстандағы тау-шаңғы курорттарының бәрін аралап, енді жаңа жер көрсем ғой деп отырсаңыз, Тбилиси не Кутаисиге билет алыңыз. Грузияда тау спортын сүйетіндерге таңдау көп. Мұнда шаңғы тебуді енді үйреніп жүргендерге арналған жеңіл беткейлер де, экстремалдарға арналған күрделі трассалар да, трамплиндер мен Оңтүстік Кавказдағы ең ұзын шаңғы жолы да бар. Бұл мақалада Грузиядағы бес курорт — Гудаури, Бакуриани, Хацвали, Тетнулди мен Годердзи туралы айтамыз. Ски-пасс қанша тұратынын, қандай трассалар барын, қалай жетуге болатынын және қай курорт кімге сай келмейтінін түсіндіреміз.

Грузиядағы барлық тау-шаңғы курортын бір мемлекеттік компания — Mountain Trails Agency басқарады. Сондықтан бәрінің ережесі бірдей. Көтергішке міну үшін пластик мультикарта қажет. Оның бағасы — 5 GEL (шамамен 874 KZT). Картаны кейін кассаға өткізсеңіз, ақшаңызды қайтарып береді. Алты жасқа дейінгі балалар тегін тебеді, ал 6–12 жастағыларға балалар тарифі қолданылады. Жел күшейіп не жарығы өшіп, көтергіштер тоқтап қалса, пайдаланылмаған күннің ақшасы қайтарылмайды.

Гудаури

Гудаури — Грузияның негізгі тау-шаңғы курорты. Ол 1988 жылдан бері жұмыс істейді. Тбилисиден солтүстікке қарай 120 шақырым жерде, Әскери-Грузин жолының бойында орналасқан. Көлікпен екі жарым сағатта жетуге болады. Сондықтан Грузияға ұшып келген күні-ақ шаңғы тебуге үлгересіз.

Гудаури түгелдей орман белдеуінен жоғары орналасқан. Кент теңіз деңгейінен 2200 метр биікте, ал ең жоғарғы көтергіш станциясы 3279 метрде тұр. Мұнда ағаш жоқ, сондықтан беткейлері кең. Күн ашық кезде ондаған шақырымға созылған тау жоталары көрінеді. Бірақ мұның кемшілігі де бар. Тұман түсіп, боран соққанда жол тапқан қиын. Ал үш мың метр биікте күн қатты күйдіреді. Тіпті қаңтарда да күнге күйіп қалуыңыз мүмкін. Сондықтан күннен қорғайтын крем жағып алуды ұмытпаңыз.

Қалай жетуге болады?

Ең ыңғайлысы — көлікпен бару. Грузияға келген соң автомобиль жалдауға не Gotrip сервисі арқылы трансферге тапсырыс беруге болады. Бір көлікке шамамен 250 GEL (шамамен 44 мың KZT) төлейсіз. Арзанырақ нұсқа — автобус. Тбилисидегі Дидубе автостанциясынан шағын автобустар жүреді. Жолақысы бір адамға 20–30 GEL (шамамен 3 494–5 242 KZT).

Трассалар мен шаңғы мектептері

Гудауриде күрделілігі төрт деңгейге бөлінген 20 трасса бар. Ең жеңілі — жасыл, ең қиыны — қара трассалар. Одан бөлек, оннан астам көтергіш жұмыс істейді. Трассалар Халықаралық шаңғы спорты федерациясының сертификатын алған. Сондықтан мұнда шаңғы тебуге де, үйренуге де жағдай жасалған. Көтергіштер 10:00–17:00 аралығында жұмыс істейді.

Шаңғы тебуді енді үйренетіндерге төменгі станциялардың жанында еңісі аз жасыл беткейлер мен шаңғы мектептері бар. Бірақ Гудауриге көпшілік фрирайдты іздеп келеді. Бұл — арнайы дайындалмаған, қалың қар басқан тау беткейлерімен сырғанау. Мұндай жерлер көтергіштердің жанынан-ақ басталады.

Мұнда хели-ски де бар. Бұл — шаңғышылар мен сноубордшыларды тікұшақпен адам аяғы баспаған қарлы шыңға апарып, сол жерден төмен сырғанайтын экстремал спорт түрі. Ал түрлі трюк жасай алатындарға арналған сноупарк жұмыс істейді.

Баға

Бір күндік ски-пасс 70 GEL (шамамен 12 мың KZT) басталады, балаларға — 35 GEL (шамамен 6 115 KZT). Алты күндік билет 340 GEL (шамамен 59 мың KZT), кешкі сырғанау  30 GEL (шамамен 5 242 KZT) тұрады. 

45 GEL (шамамен 7 862 KZT) бөлек билет алып, гондоламен Коби аңғарына барып қайтуға болады. Тау жоталарының үстімен өтетін сапар 45 минутқа созылады. Тіпті шаңғы не сноуборд теппейтін адамдардың өзі Гудауриге осы көріністі тамашалауға келеді.

Гудауриде елдегі ең дамыған тау-шаңғы инфрақұрылымы бар. Қонақүйлер, пәтерлер, жабдық жалға беретін орындар, барлар мен спа орталықтары жеткілікті. Ең ыңғайлысы — Жаңа Гудауриде тұру. Ол жақтан гондолаға дейін шаңғымен жетуге болады.

Шаңғы жабдықтарының толық жиынтығын жалға алу күніне 40–80 GEL (шамамен 6 989–14 мың KZT) тұрады. Баспана жағынан Гудаури — Грузиядағы ең қымбат курорт. Қонақүй үлгісіндегі жеке үйден бөлме не хостелден орын бір түнге 50 GEL (шамамен 8 736 KZT) басталады. Жаңа Гудауридегі студия пәтерлер күніне қарай 100–280 GEL (шамамен 17–49 мың KZT) тұрады.

Орташа деңгейдегі қонақүй нөмірі — шамамен 300 GEL (шамамен 52 мың KZT). Ал Gudauri Lodge сияқты трассаның дәл жанындағы қонақүйлерде бір түн  450 GEL (шамамен 79 мың KZT) басталады.

Бакуриани

• 
• 

Бакуриани — Самцхе-Джавахети аймағындағы қылқанжапырақты орман ішінде орналасқан отбасылық курорт. Гудауриден айырмашылығы — Бакуриани саябағы, мейрамханалары, сырғанақтары мен мұз айдыны бар үлкен кент. Сондықтан шаңғы теппейтіндер де жалықпайды.

Кент теңіз деңгейінен 1700 метр биікте, ал ең жоғарғы станция 2702 метрде орналасқан. Орман беткейлерді желден қорғайды. Сондықтан мұнда Гудауриге қарағанда тынышырақ әрі жылырақ. Бірақ шаңғы маусымы қысқалау. Өткен қыста көтергіштер 29 наурызда-ақ тоқтаған. Қар аз жауған жылдары трассаларға жасанды қар шашатын құрылғылар қолданылады.

Қалай жетуге болады?

Тбилисиден Бакурианиге дейін 180 шақырым. Жол Боржоми арқылы өтеді, шамамен үш сағат жүру керек. Трансфер бір көлікке 250 GEL (шамамен 44 мың KZT) басталады. Жалға алған көлікпен барсаңыз, жолай Боржомиге тоқтаңыз. Мұнда минералды суды тікелей бұлақтан ішуге болады. Боржомиде «Алма-Ата» қонақүйі де бар. Оны бір грузин Алматыда өткен жастық шағы мен әскери қызметін еске алып ашқан.

Трассалар мен шаңғы мектептері

Шаңғы мен сноубордпен сырғанамасаңыз, Бакурианиде шағын каток бар

Бакурианиде 12 көтергіш пен жалпы ұзындығы 33 шақырым болатын трассалар бар. Олар Дидвели, Кохта және Митарби дейтін үш аймаққа бөлінген. Бұл аймақтар бір-бірімен шаңғы трассалары арқылы жалғанбаған. Сондықтан бірінен екіншісіне көлікпен не таксимен баруға тура келеді. Көтергіштер 10:00–17:00 аралығында жұмыс істейді. Ал Дидвелиде кешке жарық қосылады, сондықтан түнде де шаңғы тебуге болады. 

Шаңғы тебуді енді үйренетіндерге Бакуриани — Грузиядағы ең дұрыс нұсқа. Дидвелиде еңісі аз, ұзын трассалар бар. Үйренгенге өте ыңғайлы. Сонымен қатар мұнда кәсіби спортшыларға да жағдай жасалған. 2023 жылы Бакурианиде фристайл мен сноубордтан әлем чемпионаты өткен. Ал фрирайд үшін бұл жерге келудің қажеті шамалы. Тәжірибелі шаңғышылар мұндағы трассаларды екі-үш күнде аралап шығады.

Баға

2025–2026 жылғы маусымда бір күндік ски-пасс 55 GEL (шамамен 9 610 KZT), балаларға 28 GEL (шамамен 4 892 KZT) тұрады. Бір апталық билет — 296 GEL (шамамен 52 мың KZT). Ски-пасс үш аймаққа да жарамды. Бірақ Дидвелидегі кешкі сырғанауға бөлек төлеу керек.

Нұсқаушымен жеке сабақ бір сағатқа 70 GEL (шамамен 12 мың KZT) басталады. Шаңғы жабдықтарының толық жиынтығын жалға алу күніне  30–50 GEL (шамамен 5 242–8 736 KZT) тұрады. Жалға беру орындары төменгі станциялардың жанында да, кенттің ішінде де бар.

Бакурианиде баспана Гудауриге қарағанда едәуір арзан. Қонақүй үлгісіндегі жеке үйде бір түн 40 GEL (шамамен 6 989 KZT), пәтерлер мен шағын қонақүйлер 95 GEL (шамамен 17 мың KZT), ал жайлы қонақүйлер 190 GEL (шамамен 33 мың KZT) басталады. Көп қонақүйде таңғы ас бағаға кіреді. Ең қымбат қонақүйлер Дидвели көтергішінің жанында орналасқан. Жаңа жыл мерекесі мен мектеп демалысы кезінде баспана бағасы бірнеше есе қымбаттайды.

Хацвали

Хацвали — Сванетияның орталығы Местия кентінің үстіндегі шағын тау-шаңғы аймағы. Хацвалиде теңіз деңгейінен 1868–2348 метр биіктікте сырғанайды.

Трассалары көп емес, есесіне айналасы өте әдемі. Беткейден қос шыңы бар Ушба тауы көрінеді. Ал Местияның өзінде орта ғасырлардан қалған сван мұнаралары сақталған. Кешкі асқа кубдари жеп көріңіз. Бұл — ішіне туралған ет салынған свандардың дәстүрлі бәліші.

Қалай жетуге болады?

Ең қиыны — Местияға жету. Тбилисиден 460 шақырым жерде орналасқан. Көлікпен күрделі тау жолы арқылы шамамен тоғыз сағат жүру керек. Алты адамдық көлікке трансфер 670 GEL (шамамен 117 мың KZT) басталады. Ұшақпен де баруға болады. Vanilla Sky әуе компаниясының шағын ұшақтары Тбилиси маңындағы Натахтари мен Кутаисиден ұшады. Бір жаққа билет орта есеппен 150 GEL (шамамен 26 мың KZT) басталады.

Бірақ рейстер тұрақты емес. Билеттер сатылымға шыға салысымен ресми сайттан алып үлгеру керек. Оның үстіне қыста күн райына байланысты ұшақтар жиі тоқтатылады. Сондықтан Местиядан қайтатын рейсті халықаралық ұшуыңыздың алдындағы күнге жоспарламаңыз. Местиядан Хацвалидің төменгі станциясына дейін сегіз шақырым асфальт жол бар. Көліксіз де жетуге болады: кент орталығынан Хацвалиге аспалы жол көтеріліп тұрады.

Трассалар мен шаңғы мектептері

Хацвалиде барлығы бес трасса бар. Жалпы ұзындығы — шамамен 5,5 шақырым. Ең жеңіл трасса 500 метрге созылады. Көтергіштер 10:00–16:00 аралығында жұмыс істейді. Өткен маусым 27 желтоқсаннан 29 наурызға дейін созылған.

Шаңғы тебуді енді үйренетіндер үшін жақсы орын. Жоғарғы жазықта сүйреткіш көтергіштер мен еңісі аз беткейлер бар. Оның үстіне жету жолы қиын болғандықтан, мұнда адам үнемі аз. Ал тәжірибелі шаңғышыларға Хацвалиде бір күн сырғанау жеткілікті. Одан кейін Тетнулдиге барған дұрыс.

Баға

2025–2026 жылғы маусымда бір күндік ски-пасс 50 GEL (шамамен 8 736 KZT) тұрған. Ол Хацвали мен Тетнулдиге бірдей жарамды. Сондықтан бір сапарда екі курортты да аралап көруге болады. Баспана, жабдық жалға беретін орындар мен дәмханалар тек Местияның өзінде бар.

Местияда қонақ қабылдайтын үйлер өте көп. Отбасылық қонақүйде бір адамға бір түн 80–120 GEL (шамамен 14–21 мың KZT) тұрады. Әдетте бұл бағаға таңғы және кешкі ас кіреді. Ал қонақүйдегі екі адамдық нөмір 150–200 GEL (шамамен 26–35 мың KZT) тұрады. Қаңтар мен ақпанға баспананы алдын ала брондаған дұрыс. Өйткені қыста қонақүйлердің бір бөлігі ғана жұмыс істейді.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Тетнулди

Тетнулди — Сванетиядағы екінші тау-шаңғы курорты әрі Грузиядағы биіктігі жағынан екінші орында тұрған курорт. Тетнулдиде 2260–3165 метр биіктікте шаңғы тебеді. Бұл — фрирайд әуесқойларына таптырмас жер. 2024 жылдың ақпанында Тетнулдиде фрирайдтан әлемдегі басты жарыс — Freeride World Tour кезеңі өткен.

Қалай жетуге болады?

Алдымен жоғарыда айтылғандай, Местияға көлікпен не ұшақпен жету керек. Одан Тетнулдиге дейін тағы 15 шақырым. Күн сайын таңертең көтергішке көлікпен баруға тура келеді. Сондықтан трансферге немесе толық жетекті көлік жалдауға ақша қарастырыңыз.

Трассалар мен фрирайд

Тетнулдидің мақтанышы — Оңтүстік Кавказдағы ең ұзын шаңғы трассасы. Оның ұзындығы он шақырымға жуықтайды. Местиядағы Хацвали мен Тетнулдиді қосқанда шамамен 19 шақырым трасса және тоғыз көтергіш бар.

Көк және қызыл трассалардың саны шамалас. Бірақ курорт биік әрі шалғай жерде орналасқандықтан, жаңадан үйренетіндерге алдымен Хацвалиге барған дұрыс. Мұнда қар ұзақ жатады. Өткен қыста Тетнулди 9 сәуірге дейін жұмыс істеген. Көтергіштер 16:00-де тоқтайды.

Баға

Ски-пасс Хацвалидегімен бірдей. 2025/26 жылғы маусымда бір күндік билет 50 GEL (шамамен 8 736 KZT) тұрған. Беткейде инфрақұрылым жоқтың қасы. Көтергіштің жанында бір ғана жабдық жалға беру орны жұмыс істейді. Қалған жалға беру орындары, қонақүйлер мен мейрамханалар Местияда орналасқан.

Тетнулдидің өзінде қонақүй жоқ. Сондықтан туристер Местияда тұрады. Отбасылық қонақүйде таңғы және кешкі аспен бірге бір адамға 80–120 GEL (шамамен 14–21 мың KZT), ал қонақүйдегі екі адамдық нөмірге 150–200 GEL (шамамен 26–35 мың KZT) төлейсіз. Кей қонақүйлер қысқы демалыс пакетіне көтергішке дейінгі трансферді қосады. Брондағанда сұрап алыңыз. Сонда таксиге ақша үнемдейсіз.

Годердзи

Годердзи — Грузиядағы қар ең көп жауатын әрі ең арзан тау-шаңғы курорты. Годердзи таулы Аджариядағы аттас асуда, теңіз деңгейінен 2027 метр биікте орналасқан. Қара теңіздің жақындығы — курорттың басты артықшылығы. Мұнда жауын-шашын көп түседі, ал қар жұмсақ болады.

Қалай жетуге болады?

Ең ыңғайлысы — Батумиден бару. Асудың арасы 112 шақырым, жол таумен өтеді. Ал Тбилисиден 260 шақырым. Көтергіштің жанында қонақүйлер мен дәмханалар аз. Сондықтан мереке күндеріне баспананы алдын ала брондаңыз.

Трассалар мен фрирайд

Годердзи шағын курорт: сегіз шақырым трасса және үш көтергіш бар. Олар — гондола, орындықты көтергіш және сүйреткіш көтергіш. Жұмыс күндері 10:00–16:00, демалыс күндері 17:00-ге дейін жұмыс істейді. Өткен маусым 27 желтоқсаннан 29 наурызға дейін созылған.

Жаңадан үйренетіндер үшін қысқа жаттығу беткейлері бар. Годердзиге адамдар қылқанжапырақты орман арасындағы беткейлер мен тыныштық үшін келеді. Кәдімгі шаңғы тебуден бөлек, мұнда ски-тур, кэт-ски және хели-ски бар.

Ски-тур — көтергішсіз, шаңғымен тауға өзіңіз көтеріліп, кейін төмен сырғанау. Кэт-скиде сізді тауға ратрак деп аталатын арнайы қар көлігімен апарады. Ал хели-скиде тікұшақпен жеткізеді. Бұлар — экстремал спорт түрлері. Тәжірибелі гидсіз тауға шықпаған дұрыс.

Баға

Өткен маусымда бір күндік ски-пасс 30 GEL (шамамен 5 242 KZT) тұрған. Грузияда бұдан арзан тау-шаңғы курорты жоқ. Көтергіштің дәл жанында коттедждер бар. Екі адамдық бөлме бір түнге 100 GEL (шамамен 17 мың KZT), төрт адамдық бөлме 150 GEL (шамамен 26 мың KZT) тұрады.

Жақын маңдағы коттедж үлгісіндегі қонақүйде бөлмелер арзанырақ — 60–120 GEL (шамамен 10–21 мың KZT). Курортта орын аз, сондықтан маусым қызған кезде трасса жанындағы баспана қымбаттайды. Үнемдегіңіз келсе, үш шақырым жердегі Даниспараули ауылына тоқтаңыз. Мұнда отбасылық қонақүй көп. Көбінде таңғы және кешкі ас бағаға кіреді.

Осы тақырыпта басқа не бар?

Өзі арзан, өзі маржан: қырғыздың Қарақол тау-шаңғы курорты

Қазақстанда шаңғы тебетін жерлер қайда және оған қанша ақша кетеді?

Грузиядағы қай тау-шаңғы курортын таңдаған дұрыс?

Елдегі барлық тау-шаңғы курортында бір мультикартаны пайдалануға болады. Бірақ әрқайсысы әртүрлі демалысқа лайық.

Грузияға алғаш шаңғы тебуге бара жатсаңыз, Гудауриді таңдаңыз. Тбилисиден жеткен оңай, ал трассаларында бір апта бойы жалықпай сырғанайсыз. Тбилисиге ұшақ билетін әсіресе Жаңа жыл қарсаңында алдын ала алған дұрыс. 

Осы тақырыпта басқа не бар?

Тбилисимен танысу: қаладағы ең көрікті жерлерге гид

Бакуді, Тбилиси мен Ереванды көріп қайттым. Қайсысы көбірек ұнағанын айтайын

Грузияда тау-шаңғы маусымы қашан басталады?

Көтергіштер әдетте желтоқсанның жиырмаларында іске қосылып, наурыздың аяғында немесе сәуірдің ортасында тоқтайды. Нақты мерзім қардың қанша жауғанына байланысты.

Бағдар болуы үшін өткен жылдардағы маусым ұзақтығын жинадық.

• Гудаури — желтоқсанның аяғынан сәуірдің ортасына дейін.
• Бакуриани — желтоқсанның жиырмаларынан наурыздың аяғына дейін.
• Хацвали — желтоқсанның аяғынан наурыздың аяғына дейін.
• Тетнулди — қаңтардың басынан сәуірдің басына дейін.
• Годердзи — желтоқсанның аяғынан наурыздың аяғына дейін.

Ең жақсы уақыт — қаңтардың ортасынан наурыздың басына дейін. Бұл кезде қар көп болады, ал баспана мереке күндеріндегіден арзанырақ. Жаңа жыл аптасында Гудаури мен Бакурианидегі пәтерлер бірнеше есе қымбаттайды әрі бос орындар ерте таусылады.

Наурыз мерекесіндегі ұзақ демалыста барғыңыз келсе, Гудаури не Тетнулдиді таңдаңыз. Наурыздың жиырмаларында бұл курорттарда әлі де жақсы сырғанауға болады. Ал қалғандары шамамен бір аптадан кейін жабылады.

Грузияда тау-шаңғы курорттарында демалған қанша тұрады?

Негізгі шығындарды ларимен есептедік. Қонақүй бағаларын қоспадық, өйткені олар маусымға, мерекелерге және орналасқан жеріне қарай қатты өзгереді.

Ақша үнемдеудің екі жолы бар. Біріншісі — бірнеше күнге арналған ски-пасс алу. Мысалы, Гудауриде алты күн бойы күн сайын бөлек билет алсаңыз, 420 GEL (шамамен 73 мың KZT) жұмсайсыз. Ал алты күндік ски-пасс 340 GEL (шамамен 59 мың KZT) тұрады. Екіншісі — жабдықты көтергіштің жанынан емес, кенттің ішінен жалға алу. Онда әдетте арзанырақ. Ақша төлерде шаңғының қырлары мен бекіткіштерін тексеріңіз. Жалға берілетін жабдықтардың сапасы әртүрлі болады.

Жиі қойылатын сұрақтар

Грузияға алғаш рет шаңғы тебуге баратындар жиі қоятын сұрақтарға жауап берейік.

Грузиядағы ең үлкен тау-шаңғы курорты қайсы?

Гудаури. Мұнда 20 трасса мен 18 көтергіш бар. Ең жоғарғы станциясы 3279 метр биікте орналасқан. Бұл Шымбұлақтың үшінші станциясының биіктігімен шамалас. Қалған курорттар шағындау. Бакурианиде 33 шақырым, Местияның екі аймағында 37 шақырым, ал Годердзиде сегіз шақырым трасса бар.

Шаңғы тебуді жаңадан үйренетіндерге қай курорт жақсы?

Бакуриани. Дидвели аймағында еңісі аз трассалар бар. Нұсқаушымен сабақ бір сағатқа 70 GEL (шамамен 12 мың KZT) басталады. Ал айналасындағы орман беткейлерді желден қорғайды. Тағы бір нұсқа — Сванетиядағы Хацвали. Бірақ оған Местияға баруды жоспарлап отырсаңыз ғана тоқталған жөн.

Грузияда балалармен қай жерде шаңғы тебуге болады?

Бакурианиге барған дұрыс. Грузиядағы барлық курортта алты жасқа дейінгі балалар көтергіштерді тегін пайдаланады. Ал 6–12 жастағыларға балалар тарифі бар. Бакурианиде бір күндік билет 28 GEL (шамамен 4 892 KZT) тұрады. Кентте шаңғыдан бөлек саябақ пен басқа да ойын-сауық орындары бар. Боржоми де алыс емес.

Грузияда сноубордты қай жерде тепкен жақсы?

Гудауриде. Мұнда ағашсыз кең трассалар, сноупарк және көтергіштердің жанында фрирайдқа арналған беткейлер бар. Ал қалың қарда сырғанағысы келетін сноубордшылар Тетнулди мен Годердзиге барады.

Тбилисиге жақын қандай тау-шаңғы курорттары бар?

Ең жақыны — Гудаури. Тбилисиден 120 шақырым, көлікпен екі жарым сағатта жетуге болады. Тіпті бір күнге барып қайтуға да ыңғайлы. Бакурианиге дейін 180 шақырым, жолға үш сағат кетеді. Қалған курорттарға бөлек сапар жоспарлаған дұрыс. Местияға көлікпен сегіз-он сағат жүру керек, ал Годердзиге Батумиден барған ыңғайлы.