Түріктердің өзі демалатын Түркиядағы жеті жер
Туристер көп бара бермейтін жерлер керек десеңіз, мархабат.
Түркия десе, көбіміздің көз алдымызға бірден Ыстанбұл, Анталия, Аланья, Белек, Кемер сияқты жерлер келеді. Мен де бұрын Түркияны солай елестететінмін: all inclusive қонақүй, бассейн, швед үстелі, жағажайдағы шезлонг. Бірақ Түркияда бұдан мүлде бөлек әлем бар. Түріктердің өзі жазда қашып баратын, аса көп жарнамаланбаған, кейде жету қиын, кейде сервисі ақсайтын, бірақ атмосферасы керемет жерлер бар. Соларды шолып шығайық.
Датча
Мармарис пен Бодрумның ортасындағы шағын түбек. Бір жағын — Эгей теңізі, мына бетін Жерорта теңізі шайып жатыр. Жолдың өзі біраз шаршатады: Мармаристен автобуспен шамамен 1,5 сағаттай жүресіз, ал Бодрум жағынан келсеңіз, пароммен өтуге болады. Паром уақыты маусымға қарай өзгереді, бірақ жол шамамен 1,5-2 сағатқа созылады.
Датча маған «кішкентай грек аралы» сияқты көрінді. Ақ үйлер, көк терезелер, тар көшелер, есік алдында гүл өсіріп қойған әжелер, баяу өмір. Мұнда «тез-тез суретке түсіп, келесі жерге барайық» деген режиммен жүре алмайсыз. Датчада жай ғана жаяу қыдырып жүру керек. Ескі Датчаға барып, тас үйлердің арасында адасып кеткің келеді. Книдос көне қаласына күн батарда барған дұрыс. Күн теңіздің ар жағына батып бара жатқанда, шынымен «осы үшін келген екенмін ғой» дейсіз.
Қонақүй таңдағанда орталықта қалуға болады, бірақ мен болсам Ескі Датча не Паламутбүкү жақты қарар едім. Мысалы, Eski Datça Pansiyon Cafe сияқты шағын пансиондар, Flow Datça Surf & Beach Hotel, Palaia Hotel Datça сияқты теңізге жақын қонақүйлер бар. Жаз ортасында екі адамға бір түн $75-250 аралығында кетуі мүмкін, яғни шамамен 35-120 мың теңге.
Бозджаада
Эгей теңізіндегі кішкентай арал. Түріктер, әсіресе ыстанбұлдықтар, тыныштық керек болғанда осы жаққа қашады. Мұнда жүзім алқаптары, шарапхана, тас үйлер, жел диірмендері бар. Күнбатысы ерекше әдемі.
Бірақ бірден айтайын: Бозджаада — арзан жер емес. Арал болғандықтан баға материкке қарағанда жоғары. Кейбір кафеде тамағы «wow» емес, бірақ бағасы «wow» болуы мүмкін. Сондықтан алдын ала Google Maps пікірлерін міндетті түрде оқып алған дұрыс.
Мұнда міндетті түрде Бозджаада қамалын көру керек, Айазма жағажайына бару керек, кешке күн бататын жаққа шығып, желге тоңып қалмас үшін өзіңізбен жеңіл күрте алған дұрыс. Иә, жазда да жел болуы мүмкін. Аралға Гейиклиден паром жүреді, көлікпен барар болсаңыз, жазда алдын ала брон жасаған дұрыс.
Қонуға NEVALINN, Aika Akvaryum, Bozca Oda сияқты шағын отельдер мен пансиондарды қарауға болады. Бағалары шамамен 30-95 мың теңге. Бірақ бір ескерту бар: аралда көліксіз жүрген ыңғайсыз. Такси аз, жағажайлар бір-бірінен алыс. Сондықтан көлікпен барған дұрыс не жергілікті маршруттарды алдын ала қарап алған жөн.
Каш
Фетхие мен Анталияның ортасындағы кішкентай қала. Бірақ атмосферасы мүлде бөлек. Мұнда үлкен resort, даңғаза музыка, қалың туристерден гөрі дайвинг, яхта, тас көшелер, кішкентай кафелер, теңізге секіретін платформалар көбірек.
Мен Кашты Түркиядағы ең романтикалық шағын қалалардың бірі дер едім. Таңертең порт жақта кофе ішесіз, күндіз Капуташ жағажайына барасыз, кешке орталықтағы тар көшелерде жүресіз. Капуташ Каштан шамамен 15 км жерде, суының түсі шынымен фотодағыдай көк. Баламен не көп затпен барсаңыз, алдын ала дайын болыңыз: баспалдақ көп, күн ыстық болса, жоғары-төмен жүрген азап.
Кашта дайвинг өте танымал, ал Кековаға каякпен бару — бөлек әсер. Бірақ мен мұнда ең арзан турды емес, пікірі жақсы турды таңдар едім. Өйткені теңізде 5-6 сағат жүресіз, гид нашар болса, бүкіл әсерді бұзылады. Кекова каяк турлары шамамен $50–90 болуы мүмкін.
Қонақүйден Pastel Rooms, Medusa Hotel, Kaş Maki Hotel, Hideaway Hotel сияқты нұсқаларды қарауға болады. Бағалар маусымда екі адамға бір түнге шамамен $40–150 аралығында, яғни 20–70 мың теңге айналасында болуы мүмкін.
Айвалык және Алибей (Джунда) аралы
Айвалык — Эгей жағалауындағы грек архитектурасы сақталған қала. Мұнда теңізден бұрын тас үйлер, зәйтүн ағаштары, ескі көшелер, шіркеуден мешітке айналған ғимараттар, кішкентай дүкендер есте қалады. Ал жанындағы Джунда аралы — түріктердің кешкі ас пен күн батуы үшін арнайы баратын жері.
Айвалыкта Cunda Esen Otel, Cunda Taş Otel, Cunda Oteli сияқты қонақүйлер бар. Орташа бағалар маусымда $65-тен басталып, кейбір отельдерде $300-ден асып кетуі мүмкін. Яғни 30 мың теңгеден 150 мың теңгеге дейін барады.
Мұнда міндетті түрде Шайтан Софрасы деген көрініс алаңына баруға болады. Күн батарда өте әдемі, бірақ адам көп. Маған Айвалыктың ең жақсы жері — асықпай жүру, зәйтүн майын сатып алу, таңғы аста лор ірімшігі мен жергілікті тосап жеу сияқты көрінді.
Акьяка
Мармариске жақын, бірақ атмосферасы бөлек курорт. Бір жағында — тау, бір жағында — өзен, бір жағында — теңіз. Азмак өзенінде қайықпен жүріп көріңіз. Су мөлдір, айнала көкпеңбек.
Акьяка кайтсерфингпен де белгілі. Жел жақсы болса, аспанда ондаған кайт ұшып жүреді. Бірақ өзім сияқты тек бақылап тұратын адам болсаңыз да, қызық. Мұндағы үйлер де ерекше: ағаш балкондар, шатырлар, дәстүрлі архитектура. Акьяканың осы стилін сақтап қалғаны қатты ұнады.
Қонақүйден İskelem Otel деген атау жиі кездеседі, жағажайға жақын, көрінісі жақсы. Бірақ бағасы да соған сай: кей деректерде бір түн $200 маңайынан басталады. Ал жалпы Акьякада қонақүйді $60–100-ден бастап табуға болады.
Гөкчеада
Түркияның ең үлкен аралы. Бірақ үлкен арал деген аты болмаса, тып-тыныш. Мұнда тұмса табиғат, ескі грек ауылдары, жүзімдіктер мен бос жағажайлар бар. Бұл арал «маған тыныштық керек, ешкім тимесін» дейтіндерге арналған.
Гөкчеадаға Қабатепеден пароммен өтеді. Жол шамамен 1 сағат 15 минуттан 1,5 сағатқа дейін созылады. Жазда көлікпен барап болсаңыз, паромды алдын ала тексеру керек. Өйткені аралға жетемін деп ойлап барып, портта ұзақ күтіп қалуыңыз мүмкін.
Мұнда Зейтинликөй, Калекөй, Текирдже сияқты ескі ауылдарды аралауға болады. Кей ауылда уақыт тоқтап қалғандай. Сервис барлық жерде бірдей керемет емес. Бір кафеде кофе жақсы, екіншісінде «осы үшін ақша төледім бе?» деп қалуыңыз мүмкін. Сол үшін бұл аралға Анталиядағыдай комфорт күтпей бару керек.
Қонақүйден Cinarli Kasri Hotel, Gökçeada Helios Pansiyon, Fengari Ada Evi, Otel Kefalos сияқты нұсқаларды қарауға болады. Бағалар шамамен $65–135 аралығынан басталады, яғни 30–65 мың теңге.
Трабзон өңірі
Мүлде басқа Түркия. Мұнда көк теңізден гөрі биік таулар, тұман, шай плантациясы, қаратеңіздік климат үшін келеді.
Трабзонға барған адам Сумела монастыріне бармай кетпеуі керек. Ол Мачка ауданындағы Алтындере ұлттық паркінде, жартастың ішіне салынғандай көрінеді. Бірінші көргенде «мынаны қалай салған?» деп тұрып қаласың. Таңертең күн ашық болып, түсте тұман түсіп кетуі мүмкін. Сондықтан фото үшін ерте барған дұрыс. Сумела монастырі теңіз деңгейінен шамамен 1200 метр биіктіктегі жартаста орналасқан.
Қонуға Трабзон орталығында қалуға болады: Life Point Hotel, Mercure Trabzon, Ramada Plaza by Wyndham Trabzon, Sera Lake Resort Hotel сияқты нұсқалар бар. Expedia мен Kayak деректерінде Трабзонда қонақүй бағасы $50–дан басталады, ал шілде сияқты жоғары маусымда орташа баға айтарлықтай қымбаттауы мүмкін.
Трабзонға барғанда міндетті түрде бір күнді Узунгөлге не Хамсикөйге қалдыру керек. Бірақ мұнда да бір гәп бар: кей жерлер Instagram-да күшті көрінгенімен, барған кезде тым басқаша көрінуі мүмкін. Сонда да Қара теңіздің тұманы, таудағы шай, жаңбырдан кейінгі иіс — бәрібір бөлек әсер қалдырады.
Айтпағым
Түркияны тек Анталиядағы all inclusive арқылы таныған аздық етеді. Датчада баяу өмір бар. Бозджаадада жел мен шарап бар. Кашта көгілдір су мен романтика бар. Айвалыкта зәйтүн мен тас үйлер бар. Акьякада өзен мен кайтсерфинг бар. Гөкчеадада тыныштық бар. Трабзонда тұман, тау, шай бар, мүлде басқа Түркияны көресіз.
Меніңше, басқа Түркияны көру үшін кейде жолдың қиындығына, қызмет көрсетудің нюанстарына, қымбат чекке, паром күтуге дайын болу керек. Бірақ дәл сол қиындықтардан кейін есіңде қалатын сапар шығады. Туристік Түркия демалғанға жақсы, ал мен айтқан жерлерге Түркияны тани түссем дейтіндер баруы керек.
