Қазақстанда жоқ екпені балаға қалай салдырдық? Түркиядағы клиникаға сапар
Менингококкқа қарсы екпе іздеп Түркияға қалай барғанымыз туралы хикая.
Бәрі былтыр жазда басталды. Мен, күйеуім, екі баламыз жиырма жәшік затымызды арқалап, Австриядан Қазақстанға көшіп келдік. Көшкенге дейін балалардың екпесін Австрияның күнтізбесі бойынша салдырып жүргендіктен, міндетті екпелердің бір бөлігін сол жақта алып үлгердік.
Алайда елге оралуға дайындалғанда бір мәселе алдымыздан көлденең шықты: біз бастаған вакцинация курсының кейбір препараттары Қазақстанда жоқ екен. Соның бірі — менингококктың В тобына қарсы қолданылатын Bexsero препараты. Біз оны Еуропадан «салқындық тізбегін» қатаң сақтай отырып, өзіміз әкелуге тырыстық. Бірақ соңында бюрократия кедергі болып, дәрігерлер де күмән келтірді.
Бұл мақалада екпе үшін неліктен Ыстанбұлға ұшуға тура келгенін, оның қаншаға шыққанын және мұндай сапарды бас ауыртпай қалай ұйымдастыруға болатынын айтып беремін.
Екпені Венадан Астанаға алдырмақ болдық
Әңгімені басынан бастайын. Австриялық педиатрлар вакцинаны осы жерден сатып алыңдар да, термосөмкеге салып, өздеріңмен бірге ала кетіңдер деп кеңес берді. Бір қарағанда бәрі оп-оңай: сатып аласың, жеткізесің, салдырып аласың. Бірақ бұл өте қауіпті шешім еді, өйткені тасымалдау кезінде температура режимі сәл бұзылса, препарат күшін жояды.
Австриядан Қазақстанға дейінгі жолымыз Ыстанбұл арқылы жиыны 11 сағатқа созылды. Үш түрлі вакцинаны арнайы мұздатқыш элементтері бар медициналық термоконтейнерге салып алдық. Жол бойы термометрге қараумен болдық, бәрі сәтті өткендей еді. Бірақ...
Қазақстанда салдыра алмадық
Астанаға қонған соң осындағы мамандар өз бетімізше әкелген вакцинаны қолданған қауіпті екенін айтты. Олардың айтуынша, мұндай препараттарды тасымалдаудың қатаң регламенті бар және біздің барлық нюанстарды ескеріп, құрамның сапасын сақтағанымызға ешкім кепілдік бере алмайды.
Жақсы жаңалық та жоқ емес: біз әкелген үш екпенің екеуін (Prevenar мен Hexaxim-ді) жергілікті клиникалардан табуға болады екен. Ал В тобындағы менингококкқа арналған Bexsero Қазақстанның ұлттық екпе күнтізбесіне кірмейді, сондықтан оны ел ішінен табу мүмкін болмады.
Бұл препарат табылатын жақын маңдағы елдер: БАӘ, Германия, Беларусь пен Түркия. Визасыз режим болғандықтан және бұрын барып жүрген, өзіме таныс бағыт деп, мен Түркияны таңдадым.
Сөйтіп Ыстанбұлға аттандық
Биыл қаңтар айында қызым екеуміз Ыстанбұлға шықтық. Қалада халықаралық желілік клиника көп, бірақ мен Acibadem-ді таңдадым: олардың операторлары тез жауап берді және ақпаратты нақты түсіндірді. Барлық байланыс ағылшын тілінде өтті. Оператор қыз бізді педиатрға жазып, қонақүй таңдауға көмектесті, трансфер де ұйымдастырып берді.
Turkish Airlines әуе компаниясының Астана – Ыстанбұл бағытындағы тікелей рейсіне екі адамға (барып-қайту) 231 000 теңге кетті. Біз билет алғанда қызым 1 жастан енді асқан. Екіге толмаған балаға бөлек орын берілмейді. Бірақ алдыңызда отырса да, оған билет алу керек. Бағасы ересек жолаушының билетінен әлдеқайда арзан болады.
Еш қиналмай жетіп алдық, ал әуежайда бізді емхана өкілі Health Point бұрышында күтіп алды. Басқа емделушілерді де күтіп, шамамен жарты сағаттан соң бәрімізді тұраққа алып кетті.
Сырты аздап шаңды демесеңіз, өте жайлы минивэнмен қонақүйлерге таратты. Жолда бірге келе жатқан жолаушылармен сөйлесіп қалдым. Олар Хорватиядан онкологиялық ауруын емдетуге келіпті. Балқан түбегінде бұл салада мықты маман мен заманауи құрылғылар әлі де тапшы екен. Ал Түркия медицинасына жұрт «бәрі ішінде» форматы үшін қызығады: емдейді, жатын жай бередң, құжаттарды тез рәсімдеп, тегін трансфермен қамтиды.
Көлік бізді Шишли-Меджидийекөй ауданына тастап кетті. Клиниканың емделушілерге арналған арнайы жеңілдіктері бар серіктес қонақүйлері болады екен, мен соның ішінен Cettia қонақүйін таңдадым. Бұл жер туристік аймақ емес, бірақ өмір қайнап тұрған жер екен: супермаркеттер, мейрамханалар мен алып Cevahir сауда орталығы — бәрі жап-жақын.
Қонақүйге жайғасып аламыз дегенше, қызым сол жердің басыбайлы тұрғыны — жүні үрпиген мысықпен біраз ойнап алды
Бөлмеміз
Таңғы ас
Қызығы, бұл қонақүй көп ірі клиникамен жұмыс істейді екен. Таңғы ас ішіп отырып, құйқасы таңылған ер кісілерді (шаш ектіргендер), мұрындарына гипс қойылған, беті ісіңкіреген әйелдерді (пластикалық отадан кейін) жиі кезіктірдік. Клиника ұсынған қонақүйлер ұнамаса, шамамен сол бағаға басқа жерлерді іздеп көруге болады.
Қалай өтті, қанша төледім?
Аурухананың аумағы атшаптырым болса да, адасып кету мүмкін емес. Бағыт-бағдар беретін белгілер өте ыңғайлы қойылған. Клиниканың іші жарқырап тұр, дәліздері кең әрі жарық. Бізді шетелдік пациенттерге қызмет көрсету орталығына шақырып, қасымызға тегін аудармашы қосып берді.
Бізге көмекке Түркіменстаннан келген жас жігіт келді. Ол үш тілде, соның ішінде түрік тілінде де еркін сөйлейді екен. Жол-жөнекей ол Қазақстаннан келетін емделушілердің көбі онкология дерт бойынша жүгінетінін айтты. Сондай-ақ ауруханада Грузиядан келген балалар көп екен. Оларда балалар онкологиясын Түркия, Израиль мен Испанияда емдетуге арналған мемлекеттік бағдарлама жұмыс істейді екен.
Педиатрия бөлімі — өзінше бір әлем: жеке тіркеу орны мен өте әдемі вестибюлі бар. Құжаттарды толтырып, кабинетке кірдік. Педиатр қабылдауы стандартты өтті, ағылшынша сөйлестік. Баланы тексеріп болған соң, біз іздеп келген әлгі екпені салып берді.
Төлем жасауға келгенде қуанып кеттім: шот алдын ала айтылған сомадан 70 долларға арзан болып шықты. Жиыны 290 доллар (шамамен 141 000 теңге) төледім. Бұған екпенің құны (70$) мен педиатрдың тексеруі (220$) кірді. Алдын ала есептегенде оператор комиссияны артығымен қосқан болуы керек. Үнемделген ақшаға қуанып, Ыстанбұлдың тарихи орталығын аралауға кеттік.
Жолсапардың жалпы бюджеті
Ыстанбұлға барып-қайтудың жалпы шығыны 657 000 теңге болды. Бұл сомаға мыналар кіреді:
- Ұшақ билеттері;
- Қонақүйде тұру;
- Клиника қызметі;
- Тамақтану;
- Мобильді байланыс және кәдесыйлар (сувенирлер).
Түйін
Ертеңіне суық Астанаға қайтып ұштық. Сөйтіп «вакцина салдыру» деген желеумен керемет қысқа мерзімді демалысқа барып-қайттық.
Аурухана ұсынған тегін трансфердің арқасында логистикаға кететін ақшаны біраз үнемдедік. Егер шетелде екпе салдыруды жоспарлап жүрсеңіз, сөзсіз Түркияны ұсынамын. Мұнда брондау не қала ішінде жүріп-тұру мәселесіне бас ауыртпайсыз. Медициналық ұйым бәрін өз мойнына алады.
