Анталья: көрікті жерлер, қаладағы қызықтар. Туриске дайын гид
Жоспар құрып шаршамаңыз. Бәрін дайындап қойдық.
Анталья — Түркиядағы ең әйгілі курортты қалалардың бірі. Бұл жақты көбі жағажайда жатып, күнге қыздырынатын жер деп ойлауы мүмкін. Әйтсе де, Антальяда теңізден де бөлек қызық аз емес. Әсіресе, антика дәуірінен қалған ескерткіштер, музейлер, сонау Осман заманында салынған ғимараттарға қызығатындарға бұл қала — нағыз must see. Жерорта теңізінің жағасында орналасқан әсем қалада көруге тұрарлық не бар екенін шолып шығып, дайын гид ұсынамыз.
Антальяның ең көрікті жерлері
Тарихқа толы Калеичи
Калеичи — Антальядағы ең көне тарихи аудан. Түрік тілінен аударғанда Kaleiçi «қамал ішінде» дегенді білдіреді. Күні бүгінге дейін жартылай болса да сақталған Калеичи қамалдарының қабырғаларын ежелгі гректер, византиялықтар, селжүктер мен османдар салған екен. Ауданды 2-3 сағаттай аралайсыз.
Адриан қақпасы (Hadrian Kale Kapısı)
Қаланың символдарының бірі. Қақпа б.з. 130 жылы Рим императоры Адриан құрметіне салынған. Күллі Түркиядағы ежелгі Рим қақпаларының ішіндегі ең жақсы сақталғаны да — осы. Монумент мәрмәр бағандар мен декорациялық элементтері бар үш аркадан тұрады. Антальяның тарихи ауданына кіретін бас қақпа — сурет-видео түсіргенге таптырмас локация.
Саат Күлесі мұнарасы (Saat kulesi)
Саат Күлесі Калеичиге кіреберіс қақпа жақта орналасқан. Осман дәуірінен қалған маңызды һәм тарихи ескерткіштердің бірі. Бұл мұнара қашалмаған тастардан тұрғызылғандықтан, осы маңайда жүргенде құдды орта ғасырға топ ете қалғандай боласыз. 20-ғасырда мұнараға сағат орнатылып, содан бері Saat kulesi деп атап кеткен. Кешке қарай серуендеуге шықсаңыз, шамдары самсап, керемет әсер сыйлайды.
Йивли мұнарасы (Yivliminare Cami)
Бұл мешіт 13-ғасырда, селжүктер заманында салынған. Мұнараның биіктігі — шамамен 38 метр. Алыстан менмұндалап тұрады. Қаланың қай жағынан қарасаңыз да, төбесі көрінеді.
Анталья порты (Antalya Port)
Айлақ Калеичидің етегінде. Бұрынырақта дәл осы тұстан Жерорта теңізінің түкпір-түкпіріне саудагерлер кемесі аттанған екен. Ал қазір порт жақта мейрамхана, кафе, экскурсия жасауға арналған қайықтар, серуендейтін түрлі локация көбейген. Толқыған теңізге, биік-биік жартастарды тамашалап отырғыңыз келсе, жанға жайлы жердің бірі — осы. Күн батқан сәтті тамашалағанға таптырмас орын. Теңізден жаңа ауланған балықтардан дәм татсаңыз да болады.
Мермерлі жағажайы (Mermerli Plajı)
Жұмыс уақыты: 8:30-21:00.
Құны: шамамен 500 TRY (шамамен 4 998 KZT).
Порттан солға қарай жүре берсеңіз, Мермерлі ақылы жағажайы бар. Шағын, бірақ тап-таза әрі әдемі. Балалармен барғанға аса қолайлы деп айта алмаймыз. Осымен аттас мейрамханаға барып тамақтануға болады. Дегенмен Антальяда жазда күн ерте батады. Кешкі сегізден өте қараңғы түсе бастайды.
Дюден сарқырамасы (Aşağı Düden Şelalesi)
Төменгі Дюден — осы аймақтағы ең әйгілі жерлердің бірі. Биік жартастан құлай аққан су тура барып Жерорта теңізіне құяды. Табиғаттың сирек құбылысын тамашалауға әлемнің түкпір-түкпірінен көп турист келеді. Жағалаудың айналасында шолу алаңдары бар. Осылайша сарқыраманы әр қырынан қарап көре аласыз.
Коньяалты жағажайы (Konyaaltı Plajı)
Жұмыс уақыты: жағажай тәулік бойы ашық тұрады.
Құны: кіру тегін, жатақты жалға алуға болады, шамамен 200–400 TRY (шамамен 1 999–3 998 KZT).
Коньяалты — тек Анталья емес, тұтас Түркиядағы ең үздік жағажайлардың бірі. 13 шақырымға созылып жатқан жағажайдың суы мөп-мөлдір. Судың сапасы жоғары, маңай қауіпсіз әрі инфрақұрылым дамыған. Жағажайға ұсақ малта тастар төселген. Сондықтан арнайы аяқ-киім ала барыңыз. Аспан түстес теңіз суы да, ар жағында көрініп тұратын таңғажайып Торос таулары да сурет-видеоның сәнін келтіреді. Күндіз жағада құтқарушылар жүреді.
Караалиоғлу саябағы (Karaalioğlu Park)
Жұмыс уақыты: саябақ тәулік бойы ашық тұрады.
Құны: кіру тегін.
Караалиоғлу — қаладағы ең әдемі саябақтардың қатарында. Жерорта теңізінің жағасында орналасқан. Тарихы терең Калеичи ауданының маңында. Антальяда бір жақсысы - бару керек басты жерлер бір-біріне жақын. Біз айтып отырған саябақ та солай. Серуендеп қана қоймай, қаланың көрінісін шолу алаңынан тамашалап, Торос тауларына, теңіз бен тауға қарап отырған неткен ғанибет! Бұл саябақ 1940 жылдары ашылған. Аумағы — 140 мың шаршы метрдей. Мұнда пальма, қарағай, эквалипт, фикус, бугенвиллия мен Жерорта теңізінің басқа да ағаштары өседі. Сондықтан аптап ыстық Антальядан салқын лебі бар жер іздесеңіз, осы саябаққа барғайсыз. Ағаштардың көлеңкесінде тынығып алуға болады. Оған қоса, мұнда аллеялар, субұрқақтар, балалар ойнайтын жерлер, кафелер де бар.
Антальядағы бір күнге дайын гид
Сіз демалыста жоспар құрып, басын қатырмасын деп, дайын маршрут ұсынып отырмыз. Бәрін қамтуға тырыстық.
08:30. Түрік таңғы асын ішеміз
Түркияға барған адам түрік таңғы асын міндетті түрде жеп көруі керек. Бұл — жазылмаған ереже. Дәстүрлі түрік таңғы асын алдырсаңыз, жаңа піскен нан, ірімшіктің бірнеше түрін, зәйтүн, қолдан басқан джем, менемен мен қоп-қою қара шай әкеліп береді. Турист көп баратын, Instagram-да тег көп жасалған кафелерге бару міндет емес. Жергілікті халықтың сүйікті кафелерін таңдасаңыз, жаңылмайсыз. Айналада ескі ғимараттар болғандықтан, Калеичиге барып таңғы ас ішсеңіз, Осман империясында жүргендей боласыз.
10:00. Калеичиді аралап, серуендейміз
Таңғы асқа тойып алған соң, көшелері тар, лабиринт сияқты жерлерден өтуге дайын болғайсыз. Жолда Адриан қақпасын, Йивли мұнарасын, ескі осман үйлері мен шағын шығармашылық галереяларын көресіз. Жергілікті ұсталар мен шеберлердің жұмыстарын қарап шығуға болады.
11:30. Ескі порт жаққа барамыз
Тарихи айлаққа қарай түсіңіз. Көз алдыңызда телефонды алып суретке түсіре бергіңіз келетіндей көрініс ашылады. Келім-кетіп қайықтар мен кемелерге көз тастап қойып, кофе ішіңіз. Болмаса, катерге отырып, жағалауы бойлап аралап шығуға болады.
13:30. Жерорта теңізіне қарап отырып түскі ас ішеміз
Ескі портта мейрамхана жетіп артылады. Картаға кіріп, ішінен пікірлерді шолып шықсаңыз, қайсысы шынымен дәмді, қайсысы нашар екенін біле аласыз. Мұндағы кафелердің көбінде теңіз көрінетін ашық терраса болады. Дәстүрлі түрік мезесін, кебаб не жаңа ғана ауланған балық жеп көріңіз.
15:00. Караалиоғлу саябағы
Түстен кейін Антальядағы ең әдемі саябаққа барып, серуендеңіз. Пальма мен қарағайдың саясында демалып алуға болады. Жерорта теңізінің көрінісі көзіңіз тойып, Хыдырлык мұнарасына қарап отырасыз.
16:30. Төменгі Дюден сарқырамасы
Жақсылап тынығып алған соң, такси шақырып, Дюден сарқырамасына бет алыңыз. Бұл жердің қандай керемет екенін жоғарыда айттық. Шолу алаңдарын тамашалап, міндетті түрде естелікке суретке түсіп алыңыз.
18:00. Коньяалты жағажайына барамыз
Кешке қарай Коньяалты жағажайына барыңыз. Жүзе алмайтын болсаңыз да, осы маңды аралап, серуендегеннің өзі бір ғанибет. Түрік кофесін не анар шырынын алыңыз. Күннің баяу бара жатқан сәтіне куә болыңыз. Мұндай ғажап көріністі сөзбен сипаттап жеткізген қиын.
20:00. Калеичиден кешкі ас ішеміз
Қараңғы батқанда қалаға қайтып, тамақтанып алыңыз. Түнгі қаланың көрінісі күндізгіден кем емес. Самсап шам жанады, неше түрлі әуен естіліп тұрады, түрік тағамының иісі мұрын жарады. Атмосферасы бөлек.
Антальяда қайда тоқтауға болады?
Тұратын жер таңдарда өзіңіз қалайтын демалыс түрін анықтап алыңыз. Мысалы, сізге тарихи жерлер қызық болса, онда Калеичи ауданында тұрған дұрыс. Ал жаныңыз теңізге түсіп, пассив демалысты қаласа, Лара жаққа тоқтаңыз.
Калеичи: тарихи орталықта тұрғыңыз келсе
Жаяу көп жүріп, музей аралайтын ойыңыз болса, Антальяның Калеичи ауданы ыңғайлы. Өйткені қаладағы ең көрікті жерлер осында. Бутик-қонақүй, мейрамхана, бар, кафе де көп. Бірақ көшелері тар, жолдарына тас төселіп жатқандықтан балалар арбасымен қолайсыз болуы мүмкін. Жеке жағажай жоқтың қасы.
Орташа бағасы:
- Гестхаустағы бір түн — 2 400–3 800 TRY (шамамен 24–38 мың KZT);
- Бутик-қонақүйдегі бір түн — 4 200–8 000 TRY (шамамен 42–80 мың KZT);
- Тарихи премиум қонақүйлердегі бір түн — 10 мың TRY (шамамен 100 мың KZT) басталады.
Коньяалты: балалармен барар болсаңыз
Антальяға бала-шағамен барайын деп жатсаңыз, ең қолайлы аудан — Коньялты. Ойын алаңы, саябақ, жағажай көп. Тарихи орталыққа қоғамдық көлікке отырып бар болғаны 15-20 минутта жете аласыз. Отбасылық нөмірлердің де, апартаменттердің де іші кең. Балаларға қызық болатын біраз локация осы маңда орналасқан. Бірақ жазда адам қарасы көп болғандықтан, орын тапқан қиындау.
Орташа бағасы:
- апартаменттер — 3 000 TRY (шамамен 30 мың KZT) бастап;
- 4 жұлдызды қонақүйлер — 4 800–9 000 TRY (шамамен 48–90 мың KZT);
- Отбасылық курортты қонақүйлер — 9 000–17 мың TRY (шамамен 90–170 мың KZT).
Лара: All Inclusive демалыс қаласаңыз
Ларада бесжұлдызды қонақүй көп. Премиум демалыс қалағандар осы ауданды таңдайды. Балалар клубы мен аквапарк жетіп артылады. Қонақүйден шықпай, маңайдан ұзамайтындарға және бөпесі барларға ыңғайлы. Одан қала берді жағажайы тас емес, құм, бассейндері үлкен. Бір кемшілігі — орталықтан алыстау, бағасы басқа аудандарға қарағанда қымбат.
Орташа бағасы:
- 4 жұлдызды қонақүйлер — 6 300–10 мың TRY (шамамен 63–100 мың KZT);
- 5 жұлдызды All Inclusive қонақүйлер — 12–24 мың TRY (шамамен 115–240 мың KZT).
Мұратпаша: бүкіл жағынан ыңғайлы нұсқа
Антальяның орталық ауданы. Мұнда көбіне жергілікті халық тұрады. Арзандау үй тауып, түріктердің тіршілігімен жақынырақ танысқысы келетіндерге жақсы. Қоғамдық көлікпен де қалаған жаққа оңай жетесіз. Жағажайлардан алыстау, курортта жүргендей әсер бермейтінін ескеріңіз.
Орташа бағасы:
- Арзан қонақүйлер — 1 800–3 100 TRY (шамамен 18–31 мың KZT);
- 3-4 жұлдызды қонақүйлер — 3 800–6 300 TRY (шамамен 38–63 мың KZT).
Қай жерден тамақтануға болады?
Seraser Fine Dining
Тарихи орталықтағы ең әйгілі мейрамханалардың бірі. Авторлық тағамдар ұсынады. Тарихи вайбы бар. Бір адамға орташа чек — 16-20 мың теңге.
7 Mehmet
Хит мейрамхана десек болады. Ар жағында теңіз көрініп тұрады. Тамақтың түрі көп. Орташа бағасы бір адамға — 20 мың теңге.
Pio Gastro Bar & Bistro
Қаланың орталығында орналасқан мейрамхана. Мәзірінде Жерорта теңізі асханасына тән заманауи тағамдар мол. Бір адамға шамамен 8-14 мың теңге кетеді.
Vanilla Lounge
Еуропалық және түрік асханасының тағамдарын жегіңіз келсе, Калеичиде осы мейрамханаға барсаңыз болады. Бір адамға шамамен 8 мың теңге.
Жиі қойылатын сұрақтар
Антальяға немен жетуге болады?
Антальяда әуежай бар. Қазақстанның Астана, Алматы, Шымкент, Ақтау, Атырау сияқты бірнеше қаласынан тура ұшып жете аласыз. Айтпақшы, тамызға қарай елдің әр қаласынан чартер рейс көбейеді. Өте арзан бағаға билет тауып ала аласыз. Бірақ қайтарда дәл сондай арзан бағаға табыла қоймауы мүмкін. Әуежайдан қала орталығына трамвай, автобус, такси не трансфермен жете аласыз.
Антальяға қашан барған дұрыс?
Суға түсіп, жағажайда жатып демаламын десеңіз, мамыр мен қазан аралығы шомылатын маусым саналады. Ал экскурсия жасаймын, жан-жақты аралаймын десеңіз, жазда бармаған абзал. Күн қайнап тұрады.
Қала ішінде әрі-бері жүріске ыңғайлы нұсқа қандай?
Антальяда автобус пен трамвай желілері жақсы дамыған. Шалғайда орналасқан жерлерге барып көремін десеңіз, такси шақырған не машина жалдаған жөн.
Антальядан не ала келуге болады?
Жұрт естелікке көбіне түрік шайын не кофесін, рахат-лукум, дәмдеуіштер, зәйтүн майы, керамикадан жасалған бұйымдар, маталар мен үйге керек декор алып жатады.
Антальяны аралауға қанша күн керек?
Қаладағы негізгі жерлерді көріп шығуға ары кетсе 2-3 күн жеткілікті. Ал шеткері шығып, молырақ көргіңіз келсе, онда кемінде бір апта арнағаныңыз абзал.
Антальяға барарда не білуіңіз керек?
- Елде болу мерзімі — жарты жыл ішінде 90 күнге дейін
- Паспорттың жарамдылық мерзімі елге кірген күннен бастап кемінде 150 күн болуы керек
Ешқандай тур сатып алмай-ақ барып қайтқанға ыңғайлы бірден-бір қала осы — Анталья. Туристерге жақсы жағдай жасалған, инфрақұрылымы дамыған. Қоғамдық көлікке қатысты қиындық бола бермейді. Оған қоса, басты локациялар бір-біріне жақын орналасқан, жаяу да жетуге болады.
Суға түсетін маусым аяқталып қойса да, мұнда көруге тұрарлық жер көп. Алдын ала маршрут ойластырып, экскурсия мен жағажайды үйлестіре алсаңыз, бір оқпен екі қоянды атасыз. Сондықтан алғаш рет шетелге шыққалы жүргендер, жайлы әрі тыныш демалыс іздегенде осы қаланы таңдайды.
