Түркияда 3,5 миллион теңгеге босандым: перзентханада не көрдім?

Менің атым — Мөлдір, 30 жастамын. Қазір отбасымызбен Түркияның Измир қаласында тұрамыз. Жұбайым осындағы жоғары оқу орнына түсіп, көшіп келгенбіз. Екеуіміз де дәрігерміз, арасы жақын үш баламыз бар. Тұңғышымыз төртте, ортаншымыз екі жарымда, ал кенжеміз жақында бірге толды.

Үшінші перзентім осында, Түркияда туды. Бұл мақалада қалай дәрігер іздегеніміз жайлы, неге кесар тілігіне жүгінгеніміз туралы және баланың құжаттарын қалай рәсімдегенімізді айтып беремін.

Босанардан бұрын

Измирге көшіп келгенде жүктіліктің 25-аптасында едім. Шынымды айтсам, бөтен елде босануға іштей дайындалғаныммен, қорқыныш та аз болған жоқ. Маған әсіресе екі мәселе маза бермеді: нәрестенің денсаулығы қалай және тіл білмегенім кедергі болмай ма деп уайымдадым. Түрікше білмеймін, дәрігерлермен қалай түсініспекпін?

Отбасымыз бізге көп көмектесті. Измирде қайын сіңілім тұрғаны зор көмек болды: ол — студент, тілді жақсы біледі. Алғашқы уақытта ол бізге жолбасшы болып, тұрмыстық мәселелерде де, дәрігер қабылдауында да аудармашы ретінде қолғабыс етті.

Түркияда босану үшін виза мен сақтандыру қажет пе?

Көбі шетелде босану үшін бума-бума құжат керек деп ойлайды, бірақ Түркияда бәрі әлдеқайда оңай екен:

• Арнайы виза не сақтандыру: Мен оларды рәсімдеген жоқпын.
• Шекарадан өту құжаттары: Қолымда тек көк паспорт болды.
• Ықтиярхат (икамет): Келген бойда бірден тұруға рұқсат алуға құжат тапсырдық. Ол үш айда дайын болды, перзентханада дәл осы құжатты көрсеттім.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Клиника іздеу

Біз делдалдарға не агенттіктерге жүгінбей, клиниканы өзіміз іздедік. Талаптарымыз нақты болды: шетелдіктермен жұмыс істеу тәжірибесі бар, білікті дәрігер, қолайлы баға және үйге жақын болса дедік. Сөйтіп Özel Çınarlı Hastanesi атты жекеменшік госпиталін таңдадық.

Бастапқыда тіл білмегенім біраз кедергі болды. Аудармашы жалдамадық, өз күшімізбен — ағылшынша сөйлеп, кейде Google Translate-ке жүгініп жүрдік. Таңқаларлығы, бір-бірімізді түсінгенге осының өзі жеткілікті болды.

Менің дәрігерім Фаджрин Мамадова болды. Оның пациенттерге деген қарым-қатынасы мені таңғалдырды. Ол тәулік бойы байланыста болып, тіпті жұмыстан тыс уақытта да өзі хабарласып, жағдайымды сұрап отыратын.

Маңызды анализдер мен аяқ астынан босану

Түркия медицинасының өзіне тән ерекшеліктері бар. Қазақстанда жүкті әйелдер қан мен зәр тапсыра бергенге үйренген. Мұнда бәрі басқаша:

• Артық жүгіріс жоқ: Менде «гипотиреоз» (қалқанша безінің қабынуы) диагнозы болса да, қанды бір рет қана тапсырдым.
• Дәрігердің сабырлығы: Егер ешқандай шағымыңыз болмаса, сізді анализдермен мазаламайды. Айына бір рет дәрігерге қаралсаңыз жетіп жатыр.

Алайда 32-аптада УДЗ-ға түскенде, қағанақ суының аздығы белгілі болды. Жағдай қиындап, гипоксия қаупі туындады — шаранаға оттегі жетіспеуі мүмкін еді. Дәрігерлер күтуге болмайтынын түсіндіріп, 35-аптада шұғыл түрде кесар тілігін жасауды тағайындады.

Басқа елдерде босану туралы мақалаларымыз

АҚШ

Швейцария

Оңтүстік Корея

Сәбиіммен қауышқан күн

• 
• 
• 

Бұдан бұрын екі баламды өзім босанғандықтан, дәрігерлер бұл жолы да мүмкіндік беріп көрді. Толғақ шақыру үшін окситоцин салды, бірақ үш сағат ішінде еш нәтиже болмады. Соңында мені шұғыл түрде ота жасауға алып кетті.

Ота үстелінде қатты қорықтым. Бәрі тез боп жатты: дәрігерге келіп, аз уақыттан соң ота жасайтын бөлмеден бір-ақ шықтым. Қасымда жақындарым жоқ, айналамдағы адамдардың сөзін түсінбеймін. Бірақ медицина қызметкерлері менің жайлылығым үшін барын салды. Олардың ілтипаты мен сезімталдығына тәнті болдым: дәрігер тіпті ота кезінде не боп жатқанын түсіндіру үшін телефонындағы аудармашыны қолданды. Осылайша 2024 жылдың 9 желтоқсанында ұлым дүниеге келді.

Палатадағы тамақ

Отадан кейін мені палатаға ауыстырды. Оның іші керемет екен: тап-таза, жайлы, өзімді ауруханада емес, бес жұлдызды қонақүйде жүргендей сезіндім. Кесар тілігінен кейін бір сағат өтпей жатып маған шай, кофе мен сусындар, ал содан соң құнарлы ас әкелді — ешқандай диета не тамаққа шектеу болған жоқ. Наркоздың әсерімен ауырғанын сол күні сезбедім, тек ертесіне сыздап тұрды. Соған қарамастан, жағдайымды тұрақты деп, бір тәуліктен соң үйге шығарып жіберді.

Өкінішке қарай, перзентханадан баламды құшақтап шығудың сәті түспеді — гипоксияға байланысты ұлымды реанимацияда қалдырды.

Реанимациядағы он күн

Мен босанған жекеменшік госпитальда бос кювез болмай шықты, сондықтан нәрестені 10 күнге мемлекеттік клиникаға ауыстырды. Жұбайым екеуімізге бұл ауыр күйзеліс пен қорқынышқа толы кезең болды, бірақ дәрігерлер сабырлық танытты. Олар Түркияда мұны үйреншікті жағдай деп сендірді. Өзім медицина маманы болсам да, бала емізу мен күтім жасауды мейірбикелер ерінбей қайта-қайта көрсетіп, түсіндіріп берді.

Тағы бір қызық жайт: жетінші күні мені баланың қасына жатқызды. Алдымен жеңілдетілген қарқынды терапия бөліміне, кейін әдеттегі палатаға ауыстырды. Бұл менің нәрестеге қайта үйреніп, аппараттардан кейін оған күтім жасауды меңгеруім үшін жасалды. Осылайша, тура 10 күннен кейін біз аман-есен үйге оралдық.

Қанша ақша кетті?

Түркия — өмір сүргенге жайлы ел, бірақ мұнда медицина, әсіресе оқыс болған жағдайда қымбаттау екен. Біздің жағдайда шұғыл жасалған кесар тілігі мен ұлымныі реанимацияда жатқаны босану шығындарын көбейтіп жіберді.

Медициналық шығындар сметасы

Бағам: 1 лира = 15 теңге.

Құжат рәсімдеу мен бюрократия машақаты

Ұлым ауруханадан шыққан соң құжат рәсімдеу машақаты басталды. Ең үлкен қиындық — ол кезде Измирде Қазақстанның консулдығы болмады. Құжаттарды реттеу үшін Ыстанбұлға үш рет баруға тура келді.

Алдымен туу туралы куәлікке өтініш бердік. Бір аптадан соң ол дайын болғанда екінші рет барып, куәлікті алып, төлқұжатқа құжат тапсырдық. Төлқұжат екі айдай дайындалды, сондықтан оны алу үшін үшінші рет жолға шықтық.

Төлқұжатты алған соң, Измирдегі көші-қон қызметінен балаға ықтиярхат (икамет) рәсімдеу керек болды. Қажет құжаттар тізімі аз емес:

• Өтініш пен биометриялық фотосуреттер;
• Баланың төлқұжаты мен туу туралы куәлігі;
• Медициналық сақтандыру;
• Тұрғылықты мекенжайын растайтын құжат;
• Ата-анасының төлқұжаттары мен қолданыстағы ықтиярхаттары;
• Неке қию туралы куәлік.

Құжат рәсімдеу шаруасына да біраз шығындалдық. Ыстанбұлға ұшатын билеттер, жатын жай, тамақтану мен мемлекеттік баж салығы (Түркияда қызмет көрсету құны Қазақстанмен салыстырғанда әлдеқайда қымбат). Оның үстіне сервис те аса жылдам емес: құжатты тапсырып, екі күннен кейін алып кете салмаймыз.

Құжат рәсімдеу шығындары

Сөз соңында

Түркияда босанамын деп отырсаңыз, айтар ақылым — біраз ақша дайындап қойыңыздар. Мұнда біз елде үйреніп қалған «тегін» деген ұғым жоқ. Екі баламды Астанадағы ЭКСПО маңындағы мемлекеттік перзентханада босанғанмын, ол жерде бәрі жоғары деңгейде әрі тегін болған.

Измирде төлеген ақшама бесжұлдызды қонақүй деңгейіндегі сервиске ие болдым: мінсіз күтім, жайлылық және персоналдың ізеттілігі. Иә, бұл аз ақша емес, ал құжаттармен болған әуре-сарсаң біраз жүйкені жұқартты, бірақ ең бастысы — нәтиже. Барлық қиындық пен реанимациядағы 10 күнге қарамастан, ұлым екеуіміз аман-есен үйдеміз.