Ыстанбұл бойынша дайын гид: көретін жердің бәрін жазып шықтық
Бұл қала неге осы көктемде барғанға ең тамаша жер екенін түсіндірейік.
Түркияның бас қаласы, қазақстандықтарға танымал транзиттік хаб әрі көне де көрікті мегаполис — иә, біз бүгін Ыстанбұл туралы айтамыз. Мұнда негізгі маусым жазда басталғанымен, көктемде де істейтін іс жетерлік. Сәуір айында бүкіл қала бойынша мыңдаған қызғалдақ егіліп, Ыстанбұл қызғалдақтар фестивалі өтеді. Күн райы жаяу серуендегенге тамаша: суық та емес, ыстық та бастала қоймаған, шамамен +15–20°C шамасында. Теңіздің таза ауасы тынысыңды ашып, күндізгі уақыт ұзарып, қонақүйлер жазғы маусымға қарағанда 20–30% арзан тұрады.
Бұл мақалада біз Ыстанбұл сапарыңыз жылдың қай мезгілінде болса да, мінсіз өтуі үшін ең маңызды мәліметтерді жинақтадық.
- Қазақстан азаматтарының елге кіру ережесі
- Ыстанбұлда баруыңыз керек жерлер
- Ыстанбұлда не істеуге болады?
- Тамақ ішетін жерлер
- Ыстанбұлды 1 күнде көру: дайын маршрут
- Ыстанбұлда қайда тоқтауға болады?
- Ыстанбұлдан базарлыққа не алуға болады?
- Tax Free арқылы ақшаны қалай қайтаруға болады?
- Сапар алдындағы маңызды ақпарат
Қазақстан азаматтарының елге кіру ережесі
Қазақстандықтар Түркияға 90 күнге дейін визасыз кіре алады. Басты шарт — төлқұжаттың жарамдылық мерзімі елге кірген күннен бастап кемінде бес ай болуы тиіс. Сондай-ақ, шекарада қонақ үй бронын, қайту билетін және сақтандыруды сұрауы мүмкін. Сондықтан бұл құжаттардың қағаз нұсқасын немесе скриншотын дайын ұстаған жөн.
- Елде болу мерзімі — жарты жыл ішінде 90 күнге дейін
- Паспорттың жарамдылық мерзімі елге кірген күннен бастап кемінде 150 күн болуы керек
Ыстанбұлда баруыңыз керек жерлер
Ыстанбұлдың негізгі көрікті жерлері қаланың еуропалық бөлігінде шоғырланған, сондықтан олардың бәрін бір-екі күнде аралап шығуға болады. Мешіттерге барғанда киім кию үлгісі мен өзін-өзі ұстау ережелерін қатаң сақтау керек, себебі олардың көбі — жұмыс істеп тұрған құлшылық үйлері.
Айя-София мешіті
Жұмыс уақыты: тәулік бойы ашық. Жұма күндері туристер үшін жұма намазы кезінде жабылады (шамамен 12:30-дан 14:30-ға дейін).
Кіру құны: балконға шығатын билет — 1 200 TRY (шамамен 12 847 KZT).
Әлемдік сәулет өнерінің басты ескерткіштерінің бірі әрі қазіргі таңда жұмыс істеп тұрған мешіт. Айя-София бірнеше дәуірді бастан өткерді: алдымен византиялық собор, кейін мұражай, ал енді мешіт болды. Балконында христиандық сюжеттер бейнеленген мозаикалар сақталса, төменгі жағында араб каллиграфиясымен жазылған алып медальондар тұр. Намаз кезінде мозаикалардың бір бөлігі жарық перделерімен жабылып, намаздан кейін қайта ашылады.
Көк мешіт
Жұмыс уақыты: 08:30-дан 18:00-ге дейін (қыста 17:00-ге дейін). Жұма күндері туристер тек 14:30-дан кейін кіре алады.
Кіру: тегін.
Іші мыңдаған көгілдір қыш тақташамен безендірілгендіктен, оны «Көк мешіт» деп атайды. Бұл — әлемдегі алты мұнарасы бар санаулы мешіттердің бірі. Ол жұмыс істеп тұрған мешіт болғандықтан, құлшылыққа келген жергілікті тұрғындарға құрметпен қараңыз. Кіре берісте аяқ киімді міндетті түрде шешу керек (сізге арнайы пакет беріледі) және әдеп сақтау қажет: иық пен тізе жабық болуға тиіс, ал әйелдер басына орамал тағуы керек.
Топкапы сарайы
Жұмыс уақыты: 09:00-ден 18:00-ге дейін, сейсенбі — демалыс.
Кіру: біріктірілген билет (сарай, гарем, Айя Ирини шіркеуі) шамамен 62 USD (шамамен 29 525 KZT) тұрады.
Шамамен 400 жыл бойы бұл сарай Осман империясы билеушілерінің бас резиденциясы болды. Аумағы өте үлкен: мұнда зергерлік бұйымдар, сұлтанның ыдыс-аяғы мен әйгілі «Қасықшы» алмазы (аңыз бойынша оны тапқан балықшы оны үш қасыққа айырбастаған деседі) сақталған қазына нүктесі, әйгілі Гарем мен қонақ күту залдары бар. Сондай-ақ сарайда мұсылмандардың қасиетті жәдігерлері: Қағбаның кілттері мен құлыптары және Мұхаммед пайғамбардың шапаны сақтаулы. Сарайды аралауға кемі 3-4 сағат бөліңіз және алдын ала тамақтанып алыңыз. Іште тек бір дәмхана бар, онда үнемі ұзын-сонар кезек.
Базилика цистернасы
Жұмыс уақыты: күн сайын 09:00-ден 22:00-ге дейін.
Кіру: 18:30-ға дейінгі билет — 1 300 TRY (шамамен 13 918 KZT), кешкі сеанстар — 2 000 TRY (шамамен 21 412 KZT).
Су астындағы сарайға ұқсайтын ежелгі су қоймасы. Көктемгі жаңбырдан тығылғанға немесе кинодағыдай кадрлар түсіруге таптырмас орын: жүздеген бағана қараңғылыққа сіңіп, жарық су бетіне әдемі шағылысады. Бағаналарды астынан ұстап тұрған Медуза Горгонаның екі басын көру үшін ең соңына дейін баруды ұмытпаңыз.
Гюльхане саябағы
Жұмыс уақыты: тәулік бойы.
Кіру: тегін.
Топкапы сарайының етегінде орналасқан бұрынғы патша бағы. Сәуір айында мұнда қызғалдақтың миллиондаған түрі егіледі. Бұл жер — пикник жасауға не Босфорға қарап отырып, орындықта бір сәт тынығып алғанға таптырмас мекен. Ал ең дәмді үзіліс үшін кіре берістен ыстық симит не қуырылған каштан сатып алуға болады.
Галата мұнарасы
Жұмыс уақыты: күн сайын 08:30-дан 23:00-ге дейін.
Кіру: мұнараға — 1 500 TRY (шамамен 16 059 KZT), бақылау алаңына — 250 TRY (шамамен 2 677 KZT).
Қаланың еуропалық бөлігіндегі ең үздік шолу алаңдарының бірі. Мұнара Бейоглу ауданының үстінде асқақтап тұр, оның төбесінен Алтын мүйіз, Босфор мен бүкіл тарихи орталық 360 градусқа алақандағыдай көрінеді. Кіру кезегі бір сағатқа созылуы мүмкін. Кезекте тұрғыңыз келмесе, мұнараның етегінде суретке түсіп, дәл астындағы кофеханаға «Сан-Себастьян» чизкейкін жеуге барыңыз.
Истикляль көшесі
Жұмыс уақыты: тәулік бойы.
Кіру: тегін.
Қаланың бас сауда және жаяу жүргіншілер күретамыры. Мұнда тіршілік қайнап жатады: көше музыканттары, дүкендер, жайлы кондитерлік дүкендер мен көне консулдық ғимараттары да осында. Міндетті түрде қызыл ретро-трамвайға мініңіз. Ол өте баяу жүреді, сондықтан қауіпсіз әрі әдемі суреттер түсіруге ыңғайлы.
Ыстанбұлда не істеуге болады?
Ыстанбұл — әркім қалағанын таба алатын алып та жанды мегаполис. Сүйіп көрген түрік сериалдары түсірілген жерлерді аралап шаршасаңыз, шопингіге баруға, жергілікті мұражайларға кіруге немесе Босфорда қайықпен серуендеуді ұсынамыз.
Базарлаңыз
Түрік қазыналарын іздеуге арналған екі басты базар бір-біріне жақын орналасқан, сондықтан бір күніңізді тек шопингке арнай аласыз.
Гранд-базар (Kapalıçarşı)
Жұмыс уақыты: әдетте 08:30-дан 19:00-ге дейін. Жексенбі күні жабық (мереке күндері жұмыс кестесі өзгеруі мүмкін, бәрі нақты дүкенге байланысты).
Жабық базар. Мұнда кәдесыйлар, тоқыма бұйымдары, кілемдер, былғары, зергерлік бұйымдар — бәрі табылады. Біз мұнда көне жәдігерлер іздеп келдік, бірақ базардың туристерге бейімделгенін тез түсіндік. Көне заттар бар, бірақ олар қымбат. Бұл жерге оның колориті үшін баруға тұрады — өрнектелген күмбезді төбелер, тобырдың арасымен шай тасып жүрген шеберпаз сатушылар. Кейбір дүкендерде тауарды суретке түсіруге тыйым салынғанымен, біз бәрібір түсіріп алдық.
Мысыр базары (Mısır Çarşısı)
Жұмыс уақыты: күн сайын 08:00-ден 19:30-ға дейін.
Гранд-базар алтын мен зергерлік бұйымдар мекені болса, Мысыр базары — тамақтың ордасы. Бұл — дәмдеуіштердің, тәттілердің, шайлардың және жеуге жарамды кәдесыйлардың басты базары.
Музейлер
Шоколад музейі (Pelit Çikolata Müzesi)
Жұмыс уақыты: күн сайын 10:00-ден 17:00-ге дейін.
Кіру: 600 TRY (шамамен 6 424 KZT).
Мұны Ыстанбұлдағы ең «дәмді» музей деуге болады. Кіреберісте қонақтарға тәтті ұсынып, билет орнына бір плитка шоколад береді. Ішінде шоколадтан жасалған мүсіндер, түрлі инсталляциялар, субұрқақтар, тіпті қасық алып жақындап дәмін татуға болатын шоколад сарқырамасы да бар. Бұл жер балаларға да, бала күнінен Вилли Вонка фабрикасына билет тапсам деп армандаған ересектерге де қызық.
Рахми М. Коч музейі (Rahmi M. Koç Müzesi)
Жұмыс уақыты: сейсенбі–жұма 09:30-дан 17:00-ге дейін; сенбі–жексенбі 10:00-ден 18:00-ге дейін; дүйсенбі — демалыс.
Кіру ақысы: 1 000 TRY (шамамен 10 706 KZT).
Бұл — көлік пен техника тарихына арналған жеке музей. Мұнда көне автокөліктердің, велосипедтердің, ұшақтардың, мотоциклдердің, трамвайлар мен пойыздардың бай коллекциясын тамашалауға болады. Бұдан бөлек, ойындар мен басқатырғыштарға арналған арнайы зал бар — сондықтан балаларды да жалықтырмай, қызық уақыт өткізуге жағдай жасалған.
Тамақ ішетін жерлер
Бұл қалада әр қадам сайын тамақ табуға болады және әрбірінің дәмі тіл үйіреді. Аңқау туристерді көздеген қымбат орынға ұрынып қалмас үшін мәзірдегі шайдың бағасына қараңыз: ол қымбат болса, басқа тағамдардың бағасы да орташа деңгейден жоғары деген сөз. Біздің өлшеміміз бір кесе шай үшін 30 TRY (шамамен 321 KZT) басталып, 60 TRY (шамамен 642 KZT) аяқталды. Баға одан жоғары болса, сіз не панорамалық көрініске, не мекеменің мәртебесіне бола артық төлеп жатқан болуыңыз мүмкін.
Түрік таңғы асы
Бағасы: бір порция үшін 800 TRY (шамамен 8 565 KZT)
Бұл таңғы ас үшін ерте оянуға не қонақүйдегі тегін астан бас тартуға әбден тұрады. Бүкіл үстел кішкентай тәрелкелерге толады: жұмыртқа, омлет, ірімшіктің бірнеше түрі, ет тілімдері, жаңа піскен көкөністер, зәйтүн, джемдер мен қара түрік шайы — бәрі болады. Бастысы асықпаңыз және жаңа піскен нанды бәріне малып жей беріңіз. Порциялары өте үлкен. Төртеу кісіге екі порция да жетеді — кешке дейін тоқ жүресіздер.
Кумпир
Бағасы: порциясы 300 TRY (шамамен 3 212 KZT)
Ыстанбұл стритфудының мақтанышы. Ішіне сары май, ірімшік пен қалауыңызша түрлі салмалар салынған пеште піскен алып картоп. Ең дәмді кумпирлер Ортакёй ауданында сатылады.
Балық дурум
Бағасы: порциясы 200 TRY (шамамен 2 141 KZT)
Жылдам, арзан әрі ерекше. Жаңа ауланған балықты көз алдыңызда қуырып, көкөністер мен дәмдеуіштер қосып, лавашқа орап береді. Оны Каракёй жағалауындағы барлар көшесінен іздеңіз. Галата көпірінің астындағы мекемелерден аулақ болыңыз — онда баға негізсіз қымбат.
Сютлач
Бағасы: порциясы 100 TRY (шамамен 1 071 KZT)
Нәзік десерттерді ұнатсаңыз, құмырада піскен мына пудингіні жеп көріңіз. Дәмі тәтті күріш ботқасына ұқсайды. Оны кез келген асханадан таба аласыз, бірақ кешке қарай таусылып қалатындықтан, түскен дейін алған дұрыс.
Баклава мен кюнефе
Пісте қосылған бақлава немесе ірімшігі созылған ыстық кюнефе үшін аңызға айналған Hafız Mustafa 1864 желісіне барыңыз. Ең ыңғайлы филиалдары Истикляль көшесі мен Бейоглу ауданында. Мұнда дәм татып қана қоймай, сыйлыққа әдемі темір қораптағы жиынтықтарды сатып алуға болады.
Сан-Себастьян чизкейгі
Бағасы: порциясы 200 TRY (шамамен 2 141 KZT)
Үсті сәл күйіп піскен, балқытылған сүтті шоколад құйылған атақты чизкейк. Бұл десерт Галата ауданының жаңа символына айналды. Оны Viennese Coffee кофеханасынан жеп көріңіз. Сондай-ақ катаифи қосылған джелатоны (шоколад пастасы мен қытырлақ қамыр қосылған балмұздақ) байқап көруді ұсынамыз.
Шырын, симит пен каштан
Ыстанбұлда қолмен шырын сығатын аппараттары бар ер кісілерді әр бұрыштан көресіз. Көз алдыңызда апельсин не анар шырынын дайындап береді. Ал ыстық каштандар мен симиттер (күнжіт себілген тоқаштар) Сұлтанахмет ауданында қаптап тұр. Шырын, симит пен каштан — қала аралап жүргенде талғажау еткенге таптырмас жиынтық.
Тек каштандарды қонақ үйге алып кетіп, пеште қыздыруға тырыспаңыз — олар қап-қатты әрі дәмсіз боп қалады.
Ыстанбұлды 1 күнде көру: дайын маршрут
Қалада ұзақ транзитпен жүрсеңіз не негізгі орындарды көріп шыққанға бір-ақ күніңіз болса, бүкіл қаланы аралап үлгеруге тырыспаңыз. Тарихи орталыққа назар аударып, оны жақсылап зерттеген дұрыс.
Таңертең (09:00-ден 13:00-ге дейін)
Күнді тойымды түрік таңғы асымен және хош иісті кофемен бастауды ұсынамыз. Содан кейін Сұлтанахмет алаңына қарай серуендеңіз. Мұнда Айя-София, Көк мешіт пен Феодосий обелискі бір-біріне жақын орналасқан. Жергілікті қызметкерлердің мысықтарды қалай тамақтандыратынын, ал шағалалардың симит қоқымына қалай таласатынын бақылаңыз. Осыдан кейін Базилика цистернасына кіруге болады — кіре берістің қарсысында салеп (ыстық сүт сусыны) сататын дүңгіршек бар, ол көктемнің салқын таңында бойыңызды жылытады.
Күндіз (13:00-ден 17:00-ге дейін)
Сұлтанахмет алаңынан Эминёню жағалауына түсіңіз. Мұнда балықшылардың қасында отырып, әйгілі балық дурум (балық-экмек) жеп алуға болады. Әрі қарай Галата көпірі арқылы жаяу жүріп өтіңіз. Бұл — қаланың сұлбасы мен мешіттерді көгілдір аспан аясында тегін тамашалауға арналған ең жақсы орындардың бірі. Көпірден тар көшелер арқылы Камондо баспалдағының қасынан өтіп, Галата мұнарасына қарай көтеріліңіз. Өрлеп шыққан қиын, сондықтан осы шағын серуеннен кейін тамақтанып алуға кеңес береміз.
Кешкісін (17:00-ден 20:00-ге дейін)
Күнді Истикляль көшесіндегі серуенмен аяқтаңыз. Көктемде ымырт кеш түсетіндіктен, мұнда қыдырған өте жайлы. Қызыл ретро-трамвайға мініп, Таксим алаңына дейін жетіңіз. Hafız Mustafa-ға пістелі бақлава мен кюнефе жеуге міндетті түрде кіріңіз. Әрине, бұл бағытқа қызық мұражайлар мен Топкапы сарайының әр залын егжей-тегжейлі көру кірген жоқ, өйткені оларға көбірек уақыт керек, бірақ осының өзінде сіз Ыстанбұлдың ең-ең деген жерлерін көріп шыға аласыз.
Ыстанбұлда қайда тоқтауға болады?
Қонақүй немесе апартамент жалдайтын аудан сіздің бюджетіңізге де, сапардан алған әсеріңізге де тікелей әсер етеді. Локацияны өз сұранысыңызға қарай таңдаңыз, бірақ Ыстанбұлың үлкен қала екенін және такси өте қымбат екенін ескеріңіз. Жолға ақша шығындағанша, жақсы ауданға артық төлеген тиімдірек болуы мүмкін.
Сұлтанахмет
Бұл — Ыстанбұлдың ең туристік ауданы, көрікті жерлердің бәрі маңайда тұрады. Егер азан дауысымен оянып, Айя-Софияға қарап таңғы ас ішкіңіз келсе, осында келіңіз. Кемшіліктері де бар: қонақүй бағасы қымбат және туристердің көптігінен у-шу болуы мүмкін.
Галата мен Каракёй
Бұл аудандар негізгі туристік бағыттан сәл шеткері, бірақ Галата мұнарасы мен көпіріне жақын орналасқан. Қымбат Сұлтанахмет пен алыс азиялық бөлік арасындағы жақсы орташа нұсқа. Мұнда стильді бутик-отельдер мен дизайнерлік кофеханалар көп.
Бейоглу мен Таксим
Ыстанбұлға бар-хоппинг пен түнгі өмір үшін келсеңіз, Таксим алаңына жақын жерді таңдаңыз, бірақ у-шуға дайын болыңыз. Артықшылығы: бұл жерден әуежайға автобуспен жеткен өте ыңғайлы.
Кадыкёй мен Ускюдар
Қалаға екінші не үшінші рет келіп тұрған болсаңыз, Ыстанбұлдың азиялық бөлігінде тұрып көріңіз. Бұл тып-тыныш аудандарда тамақ арзан, туристер әлдеқайда аз. Еуропалық бөліктегі негізгі орындарға жету үшін күн сайын пароммен жүзуге тура келеді, бірақ бұл да бір қызық аттракцион. Қалалық паром билеті 50 TRY (шамамен 535 KZT) дейін тұрады.
Ыстанбұлдан базарлыққа не алуға болады?
Барлық туыс-туғанға магнит әкелуден шаршасаңыз, қызықтырақ нұсқаларға назар аударыңыз.
Ұнтақ шай
Кез келген жергілікті дәмхананың мәзірінде алма шайы бар — ол дәл осындай ұнтақтан жасалады. Гранд-базарда дәмдердің түрі көп: классикалық алмадан бастап, анар мен шие қосылған микстерге дейін бар. Сатушылар дәм татқызып, сатып алған затыңызды вакуумдап орап береді. Үйде мұндай ұнтақты кәдімгі шайға қосуға болады: көктем мен күзде бойыңызды жақсы жылытады, ал жазда сергітетін мұздай шайға айналады.
Insan Kurukahveci кофесі
Кофе жақсы көрсеңіз, Гранд-базардағы Insan Kurukahveci нүктесіне соғыңыз. Мұнда эфиопиялықтан түрінен бастап колумбиялық сорттарға дейінгі қуырылған дәндердің кез келген түрін табуға болады. Сатушыға кофені қалай дайындайтыныңызды (түрік шәйнегінде ме, кофемашинада не фильтр арқылы ма — соны) міндетті түрде айтыңыз. Кофені көз алдыңызда тартып, иісі шығып кетпес үшін арнайы клапаны бар фирмалық пакетке салып береді.
Пісте қосылған Damak және Ulker шоколады
Түріктің пістелі шоколады — жарнамасы жер жарған, бірақ бағасы әлдеқайда арзан «Дубай шоколадына» берілген жауап. Оны туристік аймақтардан сатып алмаңыз, Migros не Carrefour сияқты кез келген ірі супермаркетке кірген дұрыс.
Лукум
Кәдесыйдың тағы бір ұтымды түрі — түрік лукумы. Сұлтанахмет ауданындағы TADO дүкенінен сатып алыңыз. Мұнда бағалар қолайлы, ассортимент өте кең және ең бастысы — сатып алмас бұрын бәрінен дәмін татқызады.
Пасталар, бал және ерекше тосаптар
Мысыр базарында фундук, бадам және зәйтүн пасталарын, сондай-ақ хош иісті қарағай балын татып көруге тұрады. Ерекше тосаптарға назар аударыңыз — да оны баклажаннан, қарбыздан және раушан гүлінің күлтелерінен де қайнатады. Тағы бір жаңалық — махлеп (шие сүйегінің ұнтағы), оны хош иіс беру үшін қамырға қосады.
Ментол кристалдары
Бұл — үй дәрі қобдишасы үшін таптырмас зат, әсіресе суық тиген кезде керек. Оларды қайнаған суға салып, буымен дем алсаңыз жеткілікті. Гранд-базардың кіре берісінен неғұрлым алыс тұрған дүкенге барсаңыз, соғұрлым арзан кристалдар да табуға болады.
Kash Gülhane күтім өнімдері мен декор
Гюльхане метро станциясының дәл қасында эстетикалық дүкен бар. Онда қолдан жасалған сапалы сабындар, майшамдар, иіссу майлары және кестеленген түрік сүлгілері сатылады. Жеуге жарамды сыйлықтарды ұнатпайтындар үшін жақсы балама.
Tax Free арқылы ақшаны қалай қайтаруға болады?
Ыстанбұл — шопингіге тамаша орын. Мұнда әлемдік брендтердің көбі Қазақстанға қарағанда арзан, сонымен қатар түрік өніміндегі заттарды өте төмен бағаға алуға болады. Салықтың бір бөлігін (соманың шамамен 5%-ын) қайтарып алсаңыз, сауда жасаған тіпті тамаша. Салықты қайтару құжатын дүкеннің өзінде толтыруды ұмытпаңыз: витриналардағы Tax Free жапсырмаларын іздеңіз (әдетте бұл Zara, LC Waikiki сияқты ірі брендтер). Сауда сомасы 1 000 TRY (шамамен 10 706 KZT) жоғары болуға тиіс. Кассада төлқұжатты немесе оның фотосын көрсетіп, Tax Free формасын толтыруды сұраңыз. Әрі қарай әуежайға ертерек, ұшудан төрт сағат бұрын барыңыз.
Алдымен кеден (customs) бағанына барып, заттарды көрсетіңіз (олар жаңа, этикеткасы тұруға тиіс) және чектерге мөр бастырыңыз. Паспорттық бақылаудан өткен соң қайтару кеңсесін (мысалы, Global Exchange) тауып, ақшаңызды қолма-қол не картаға қайтарып алыңыз.
Сапар алдындағы маңызды ақпарат
Қалай жетуге болады?
Қазақстанның Алматы, Астаны, Шымкента, Атырау мен Ақтау қалаларынан Ыстанбұлға біраз тікелей рейс бар. Қалада екі әуежай бар: еуропалық бөліктегі алып жаңа әуежай (IST) және азиялық бөліктегі Сабиха Гёкчен (SAW). Екеуінен де қала орталығына жайлы Havaist автобустары қатынайды, ал жаңа әуежайға метро желісі тартылған.
Қай кезде барған дұрыс?
Маусымның қызған кезі — жаз: Ыстанбұл Анталья, Аланья мен басқа да жағалаудағы қалаларға барар жолдағы транзиттік нүктеге айналады. Сондай-ақ саяхат үшін ең қолайлы уақыт — сәуір-мамыр айлары. Бұл кезде қалада қызғалдақтар фестивалі өтіп, Гюльхане сияқты саябақтар нағыз кино декорациясына айналады. Сәуірде ауа температурасы әдетте 20°C шамасында болады, бұл ұзақ серуендеуге таптырмайды. Аптап ыстық жоқ, бірақ суық та емес, десе де рюкзакқа су өткізбейтін жеңіл плащ салып алған артық етпейді.
Байланысты қалай қосамыз?
Уайфай барлық қонақүй мен дәмханада бар, бірақ қала ішін шарлап жүргенде үнемі онлайн болған дұрыс. Ең оңай жолы — eSIM сатып алу: бір апталық пакет шамамен 9 доллар тұрады. Егер қаладан кәдімгі SIM-карта алуды ұйғарсаңыз, әуежайда олардың бағасы өте жоғары екенін ескеріңіз. Сондай-ақ көптеген туристік карта телефон нөмірінсіз сатылады, ал нөмір, мысалы, Uber арқылы такси шақыру үшін керек болуы мүмкін.
Валютаны қайда айырбастау керек?
Қазір Түркияда инфляция жоғары, сондықтан лирамен тұрған бағалар тез өзгереді. Әуежайда бірден үлкен соманы айырбастамаңыз — курс тиімсіз. Ең жақсы айырбастау нүктелері Лалели, Сиркеджи аудандарында және Гранд-базарда орналасқан. Қазақстандық Visa және Mastercard карталары барлық жерде дерлік жұмыс істейді, бірақ базардағы кішкентай дүкендерде немесе көше саудагерлерінде қолма-қол лира бәрібір керек болады. Доллар алып барсаңыз, жаңа купюраларды алуға тырысыңыз, өйткені ескі (2006 жылға дейінгі) купюраларды үлкен комиссиямен қабылдауы немесе мүлдем қабылдамауы мүмкін.
Алаяқтарға қалай алданбау керек?
Ыстанбұл — қауіпсіз қала, әрине, бірақ жергілікті алаяқтар қып-қызыл әртіс! Классикалық әдіс — аяқ киім тазалаушы щеткасын алдыңызға «кездейсоқ» түсіріп алады. Егер сіз оны көтеріп берсеңіз, ол алғыс ретінде аяқ киіміңізді тазалауды ұсынады да, соңында қызметі үшін қомақты сома талап етеді. Истикляль көшесінде сізге брендті парфюм сатып алуды ұсынуы мүмкін: иіскетіп көреді де, сыртын жыртып тастап, полиция шақырамын деп қорқытып, ақша талап ете бастайды. Мұндайды байқасаңыз, жай ғана күлімсіреп өтіп кете беріңіз. Ыстанбұлдың сіз іздеген қазыналары ешкімге күштеп таңылмайтынын ұмытпаңыз.
