Ата-анамызбен Стамбұлға барып қайттық. Оған қанша ақша кетті?
Саяхатқа дайындық, транспорт, қонақүй мен көрген жерлеріміз.
2023 жылдың көктемінде әйелім екеуіміз ата-анамызды алып, Стамбұлға барып демалып қайттық. Ата-анамызды бірге шетелге апарсақ деп бұрыннан ойлап жүргенбіз. Негізі басында Өзбекстанға барғымыз келген. Бірақ, шыны керек, ол жаққа барсақ шетелге барғандай болмайды, шетелдің атмосферасын сезбейді деп, Түркияның Стамбұлын таңдадық. Бұл бекерден бекер емес — Түркияның менталитеті де жақын, тағамдары да таныс. Сапарымыз Наурыз мейрамымен және қасиетті Рамазан айымен қатар келіп, тіпті керемет болды. Бұл мақалада ата-анамызбен барған саяхатымыздың қалай өткенін және қанша ақша жұмсағанымызды айтып беремін.
Саяхатқа дайындық
Біз бұған дейін аналарымызды бөлек-бөлек Грузияға апарып, қыдыртқан едік, сондықтан олардың паспорты бар еді. Ал біз Стамбұлға барамыз деп шешкенде әкелеріміздің паспорты болған жоқ. Біз оларға паспорт істетіп, оны күтіп отыратын уақыт та тығыз болды. Сол себептен билеттерді алып тастап, бір уақытта паспорт істете бердік.
Ата-аналары шетелге шығып көрмеген, паспорттары жоқ адамдарға лайфхак: Түркияға баратын болсаңыз, билетті Anadolujet немесе Pegasus әуе компанияларынан сатып алыңыздар, олар бірден паспорт сұрамайды. Тек ескеретін маңызды жайт: аты-жөніңізді ағылшын тілінде қатесіз енгізіңіз.
Біз билетті екі ай бұрын алдық. Баруға Анкара арқылы Anadolujet компаниясымен (Turkish Airlines-ке қарасты лоукостер), қайтуға тікелей Астанаға Pegasus компаниясына алдық. Алты адамның билеті (бару-қайту) 1 000 000 теңгеге шықты. Сонда бір билет шамамен 83 000 теңге болып тұр. Anadolujet лоукостер болғандықтан билетке тамақ кірмейді, бірақ ата-анамыз ұшақта тамақ ішіп көрсін деп, 28 000 теңгеге бөлек ыстық тамақ сатып алдық. Бұлай істегеніміз дұрыс болды, өйткені ұшақта тамақ ішіп, тынығып, жайлы жетіп алды.
Астана әуежайында Стамбұлға ұшар алдында
Ұшақтағы түскі ас
Үлкен адамдармен саяхаттайтын болсаңыз, әсіресе олар алғаш рет саяхатқа шығып жатқан болса, сапардың алдында оларға бәрін түсіндіріп, нақтылап айтып беріңіз. Қай елге баратыныңызды, ол елдің қайда орналасқанын, қандай мәдени, табиғи ерекшеліктері бар екенін айтып, барынша көбірек ақпарат берсеңіз, олар да артық уайымдамай, тыныш болады.
Біз Стамбұлға бес күнге ғана барғандықтан, көп киім керек болмады, сондықтан әрқайсымыз тек 5 кг қол жүгімен шектелдік. Дегенмен қайтар жолда ата-анамыздың Түркиядан базарлық, кәдесыйлар алатыны анық еді. Сол үшін біз барар кезде өзімізбен бірге шабадан алмай, қайтар кезде Түркиядан жаңа шабадан сатып алып, алған заттарымызды соған салдық. Лоукостермен ұшқан кезде бірден жүк сатып алғаннан осылай жасаған әлдеқайда тиімді.
Транспорт
Әуежайдан апартаментіміз орналасқан Таксим ауданына дейін Havabus деп аталатын автобуспен жетіп алдық. Алты адамға жалпы 10 000 теңге ғана жұмсадық. Бірақ қайтар жолда ата-анамыз әуежайда рейсті күтетіндіктен әрі ұзақ жол жүретіндіктен, шаршамасын деп әуежайға дейін 18 000 теңгеге минивенге тапсырыс бердік. Бұдан бөлек жалпы бес күндегі такси, трамвай, метро, фуникулерға шамамен 20 000 теңге кетті.
Сұлтанахмет алаңы
Айя-София мешіті
Қонақүй
Алтау болып бара жатқандықтан, баға жағынан да, жайлылық жағынан да қонақүй емес, апартамент алған дұрыс деп шештік. Қонақүй болса, әркім өзімен-өзі болып, көп уақытын бөлек өз бөлмесінде өткізетін еді. Ал біз ата-анамыздың бірге әңгіме-дүкен құрып, шай ішіп, өздерін үйде жүргендей еркін сезінгенін қаладық. Апартаментті Airbnb сайты арқылы брондадық. Стамбұлдың Истикляль ауданындағы 6 жатын бөлмесі және ас үйі бар жайлы пәтер 5 күнге 168 000 теңгеге шықты.
Тамақтану
Біз көбіне таңғы асты үйден ішіп шығып жүрдік. Тек бір рет әйгілі түрік таңғы асының дәмін көрейік деп, Долмабахче сарайының жанындағы Milli Saraylar деп аталатын шағын кафеге бардық. Босфор бұғазына көз тастап, шағалалардың даусын естіп отырып, түрік шайын ішкен ата-анамызға қатты ұнады.
Ал қалған уақытта кафе, мейрамханалардан тамақтандық. Тамаққа жалпы осы бес күнде шамамен 210 000 теңге жұмсадық. Бұл жағынан өзімізді шектемедік, ақша үнемдемей, ұнаған жерлерге бардық. Әр күні әртүрлі тағамдарды жеп көруге тырыстық, көбіне түріктердің ұлттық тағамдарынан дәм татайық дедік. Саяхаттың маңызды атрибуты — симит, донер, каштан сияқты көше тағамдарын да жеп көрдік.
Ата-анамызға тағы бір ерекше ұнаған жер — Галата көпірінің астындағы Galata Sembol Balik балық мейрамханасы. Мұнда сіздің көз алдыңызда жаңа ауланған балықты әдемі қылып пісіріп береді.
Milli Saraylar дәмханасындағы таңғы ас
Galata Sembol Balik мейрамханасындағы кешкі ас
Экскурсия мен музейлер
Үлкен адамдармен серуендеген кезде жүретін маршрутыңызды тыңғылықты дайындап алған жөн. Аяқ астынан шешім қабылдап, маршрутты өзгерткен оларға көп жағдайда ұнамай қалуы мүмкін. Сондықтан біз баратын жерлерімізді оларға алдын-ала айтып, ақылдасып алдық. Көрікті орындардың бір-біріне жақын болуына мән бердік, көп жүріп шаршамайтындай жерлерді таңдауға тырыстық.
Стамбұлда көруге тұрарлық жерлер өте көп. Бірақ біз көп жағдайда жаяу серуендеп, қаланың атмосферасын сезінгіміз келді. Айя-София мешітін, Сұлтанахмет мешітін көрдік. Әйгілі Мысыр базарын аралап, Галата мұнарасының жанында серуендедік.
Долмабахче сарайындағы экскурсия
Босфор бұғазында кемедегі серуен
Ақылы музейлерден тек Долмабахче сарайына кірдік. Алты адамға билет бағасы 65 000 теңге болды. Аудиогид алып, сарайды асықпай аралап, түрік сұлтандарының өмірімен толық танысып шықтық. Сән-салтанаты жарасқан сарайдың сұлулығына тәнті болдық. Әсіресе, түрік сериалдарын сүйіп қарайтын ата-анамыз үшін керемет есте қалар сәт болғаны сөзсіз.
Бір кешті арнайы Босфор бұғазы бойымен кемеде серуендеуге арнадық. Өйткені Стамбұлдың көшесінде жүрген бір бөлек, ал оны кемеде отырып, аралаған мүлде басқа әсер қалдырады. Төрт адамға бір сағаттық серуен бар болғаны 11 000 теңгеге шықты. Кемеде отырып, ыстық шай ішіп, фотографтан сурет алып, өздерінің жастық шақтарын еске түсірді.
Интернет және басқа шығындар
Маған жұмыс бойынша үнемі интернет керек болғандықтан, қымбат болса да 15 000 теңгеге түрік симкасын алдым. Бұдан бөлек кәдесый, тәтілер және тағы басқа заттарды сатып алдық, бірақ олардың есебін тек аналарымыз бен әйелім біледі.
Сапар үшін алты адамға кеткен қаражат — шамамен 1 600 000 теңге. Әлбетте, бұдан аз да, көп те жұмсауыңызға болады.
Қорытынды
Жалпы үлкен адамдармен саяхаттаған қызық қой. Алғаш рет ұшаққа отырғаны, көшеде жүргені, басқа адамдармен сөйлескені, таныс емес нәрселерге таңдағаны... Олардың осы бір риясыз эмоцияларын қасында көріп жүру үшін ғана саяхаттай беруге болады.
Адамды жақсырақ білгің келсе, онымен бірге сапарға шық деген сөздің жаны бар екен. Осы сапар құда-құдағайларды да бір-бірімен қатты жақындастырған сияқты. Енді олардың саяхатқа деген құлшынысы оянып, көзқарастары сәл де болса өзгергендей. Баршаңызға ата-анаңызбен шетелде саяхаттау бұйырсын! Ал арзан билеттерді, әрине, Aviasales.kz–тен таба аласыздар.
