Ұшақта алкоголь алып жүруге бола ма? Багаж бен қолжүкке қатысты ереже

Армениядан коньяк, Грузиядан шарап, Пхукеттен ром сатып алып қайтқыңыз келді делік. Бірақ ұшар алдында бірнеше сұрақ туындайды: бөтелкені ұшақ салонына кіргізуге бола ма? Багажға қанша литр алкоголь салуға рұқсат? Әуежайдағы тексерісте сыйлыққа алған ішімдігіңізді алып қоймай ма?

Қысқаша айтқанда, ұшақта алкоголь тасымалдауға болады, бірақ оның мөлшері мен күшіне байланысты шектеулер бар. Бұған авиациялық қауіпсіздік ережелері, әуе компаниясының талаптары және баратын елдің кеден заңдары әсер етеді.

Ұшақта қандай алкоголь алып жүруге болады?

Алкоголь тасымалдау ережесі ең алдымен ішімдіктің күшіне байланысты. Халықаралық әуе көлігі қауымдастығының (IATA) ережелеріне сәйкес, құрамындағы алкоголь мөлшері 24%-дан асатын ішімдіктерге арнайы шектеулер қойылған. Ал алкоголь мөлшері 70%-дан асатын ішімдіктерді ұшаққа мүлде алып кіруге болмайды. Оларды қолжүкке де, багажға да салуға рұқсат жоқ.

Қолжүкке талап басқа. Әуежайдағы қауіпсіздік тексерісінде алкоголь де басқа сұйықтықтар сияқты тексеріледі. Әдетте ұшақ салонына көлемі 100 миллилитрден аспайтын ыдыстағы сұйықтықтарды ғана кіргізуге болады. Duty Free дүкенінен сатып алынған, арнайы қаптамаға салынған ішімдіктерге келгенде, ереже аздап өзгереді.

Халықаралық рейспен ұшсаңыз, баратын елдің кеден ережелерін де ескеруіңіз керек. Әр мемлекет қанша литр алкогольді баж салығын төлемей әкелуге болатынын, оны неше жастан бастап кіргізуге рұқсат екенін өзі белгілейді. Кейбір елдерге алкоголь әкелуге мүлде тыйым салынған.

Багажға қанша литр алкоголь салуға болады?

Алкогольді тасымалдаудың ең ыңғайлы жолы — оны багажға салу. Бірақ үш нәрсені тексеріп алыңыз: ішімдіктің күші 70%-дан аспауы керек, күшті алкогольдің жалпы көлемі бес литрден көп болмауға тиіс және баратын елдің кеден талаптарына сай келуі қажет.

• Сыра, шарап, сидр және газдалған шарап. Құрамындағы алкоголь мөлшері 24%-дан аспайтын ішімдіктерге IATA ережелері бойынша арнайы көлем шектеуі қойылмайды. Бірақ багаждың салмағы билет тарифінде көрсетілген мөлшерден аспауы керек. Мысалы, Air Astana әуе компаниясының кейбір стандарт тарифтерінде салмағы 23 келіге дейінгі бір шабадан алып жүруге болады.
• Арақ, коньяк, виски, ром және джин. Құрамындағы алкоголь мөлшері 24%-дан жоғары, бірақ 70%-дан аспайтын ішімдіктерді бір адам бес литрге дейін тасымалдай алады. Әр ыдыстың көлемі де бес литрден аспауы керек. Мысалы, 700 миллилитрлік жеті бөтелке немесе бір литрлік бес бөтелке алып жүруге болады.

Мұндай ішімдіктер міндетті түрде дүкенде сатылатын түпнұсқа қаптамасында болуға тиіс. Ал алкоголь мөлшері 70%-дан асатын ішімдіктерді багажға салуға болмайды.

Бірақ ұшақта бес литр алкоголь тасымалдауға рұқсат берілгені — оны кез келген елге кіргізуге болады деген сөз емес. Мысалы, әуе компаниясы бес литр коньякты багажға қабылдауы мүмкін, ал баратын елдің кедені баж салығынсыз бір-ақ литр өткізе аласыз деуі мүмкін. Сондықтан ұшар алдында әуе компаниясының ғана емес, баратын елдің де талаптарын тексеріңіз.

Алкогольді қолжүкке салуға бола ма?

Болады, бірақ қолжүкке қатысты талаптар багажға қарағанда қатаңырақ. Алкогольге де басқа сұйықтықтарды тасымалдау ережесі қолданылады.

• Әр ыдыстың көлемі 100 миллилитрден аспауы керек. Бөтелкенің ішінде қанша сұйықтық қалғаны емес, ыдыстың жалпы көлемі есептеледі.
• Сұйықтықтар түссіз пакетке салынуға тиіс.
• Бір жолаушы алып өтетін сұйықтықтардың жалпы көлемі бір литрден аспауы керек.

Әуе компаниялары бұдан да қатаң талап қоюы мүмкін. Мысалы, FlyArystan қолжүкке Duty Free дүкенінен сатып алынған алкогольді ғана алуға рұқсат береді. Демек, қаладағы дүкеннен сатып алған көлемі 100 миллилитрлік кәдесый бөтелкесін де ұшақ салонына кіргізе алмауыңыз мүмкін. Сондықтан шағын бөтелке болса да, әуе компаниясының ережесін алдын ала қарап шыққан дұрыс.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Duty Free дүкенінен алған алкогольді ұшаққа қалай кіргізуге болады?

Әуежайдағы қауіпсіздік тексерісінен өткен соң Duty Free дүкенінен алкоголь сатып алсаңыз, оны ұшақ салонына алып кіруге болады. Бірақ бірнеше талапты орындау керек.

• Біріншіден, дүкен қызметкері бөтелкені арнайы мөрленген пакетке салып беруге тиіс. Оны сапар аяқталғанша ашпаған дұрыс.
• Екіншіден, сатып алғаныңызды растайтын чек пакет ішінде болуы керек. Ол ішімдіктің әуежайдағы дүкеннен алынғанын растайды.
• Үшіншіден, әуе компаниясының қолжүкке қатысты талабын тексеріңіз. Мысалы, FlyArystan халықаралық рейстерінде өлшемі 56 × 23 × 36 сантиметрден аспайтын Duty Free пакетін салонға тегін алып кіруге рұқсат береді.

Егер басқа әуежайда ауысып мінетін болсаңыз, ерекше сақ болыңыз. Транзит кезінде қолжүк қайта тексерілуі мүмкін. Сол кезде бірінші әуежайдан сатып алған алкогольді келесі рейске кіргізуге рұқсат бермеуі ықтимал.

Сондықтан бірнеше рейспен ұшатын болсаңыз, алкогольді соңғы ауысып мінетін әуежайдан сатып алған ыңғайлы. Немесе мүмкіндік болса, бөтелкені багажға салыңыз.

Тағы бір маңызды жайт: Duty Free дүкенінен сатып алынған алкогольге де баратын елдің кеден ережесі қолданылады. Мысалы, Мальдив аралдарына алкоголь әкелуге тыйым салынған. Оны Duty Free дүкенінен сатып алсаңыз да, кеденде алып қояды.

Осы тақырыпта басқа не бар?

Неліктен Duty Free-де қымбат — керісінше болмайтын ба еді?

Алкогольді багажға қалай салған дұрыс?

Шыны бөтелке багаж тасымалданғанда сынып қалуы мүмкін. Әуежайда шабадандар жүк таспасына қойылады, бір жерден екінші жерге тасылады, басқа жүктермен бірге жиналады. Сондықтан бөтелкені жақсылап ораған дұрыс.

1. Бөтелкені түпнұсқа қаптамасында қалдырыңыз. Күшті алкогольге бұл — міндетті талап. Ал қорап не арнайы қаптама шыныны соққыдан қосымша қорғайды.
2. Қақпағын тексеріңіз. Қақпақ жақсы жабылғанына көз жеткізіңіз. Қажет болса, сыртын скотчпен бекітуге болады.
3. Бөтелкені су өткізбейтін пакетке салыңыз. Зип-пакет не аузын мықтап байлауға болатын қалың пакет жарай береді. Бөтелке сынып қалса, сұйықтық басқа заттарға төгілмеуі мүмкін.
4. Сыртын жұмсақ затпен ораңыз. Көпіршікті қаптама, жемпір не бірнеше футболка пайдалануға болады.
5. Бөтелкені шабаданның ортасына орналастырыңыз. Сонда сырттан соққы тию қаупі азаяды.
6. Шабаданның қабырғасына жақын қоймаңыз. Әсіресе жұмсақ шабаданда бөтелкенің сыну қаупі жоғары.
7. Бірнеше бөтелкенің арасын жұмсақ затпен бөліңіз. Бөтелкелер бір-біріне тиіп тұрмауы керек.
8. Багаждың салмағын тексеріңіз. Бір литрлік шыны бөтелкенің салмағы бір келіден асады. Артық салмақ үшін төлейтін ақшаңыз кейде бөтелкенің өз бағасынан да қымбат болып кетуі мүмкін.

Тағы нені сапалы орап алған жөн:

Қазы

Тамақ

Бал

Қазақстан ішіндегі рейстерде алкоголь тасымалдауға бола ма?

Иә. Қазақстан ішіндегі рейстерде кедендік шектеулер қолданылмайды. Бірақ авиациялық қауіпсіздік ережелері мен әуе компаниясының талаптарын сақтау керек.

Сыра мен шарапты багажға салуға болады. Құрамындағы алкоголь мөлшері 24%-дан аспаса, авиациялық ережелер бойынша көлеміне арнайы шектеу жоқ. Дегенмен багаждың салмағы билет тарифінде көрсетілген мөлшерден аспауға тиіс.

Құрамындағы алкоголь мөлшері 24%-дан жоғары, бірақ 70%-дан аспайтын ішімдіктерді бір адам бес литрге дейін тасымалдай алады. Олар дүкенде сатылатын түпнұсқа қаптамасында болуы керек. Ал 70%-дан күшті ішімдіктерге тыйым салынған.

Қолжүкке қатысты сұйықтықтарды тасымалдау ережесі қолданылады: әдетте көлемі 100 миллилитрден аспайтын ыдыстарға ғана рұқсат беріледі.

Қазақстан ішіндегі рейстерде Duty Free дүкендері болмайды. Сондықтан көлемі 100 миллилитрден асатын бөтелкені багажға салған дұрыс.

Ұшақта өзіңіз алып келген алкогольді ішуге болмайды. Air Astana мен FlyArystan мұндайға тыйым салады. Бұл Duty Free дүкенінен сатып алынған ішімдіктерге де қатысты. Ережені бұзған жолаушыны рейстен түсіріп, полицияға тапсыруы мүмкін.

Халықаралық рейстерде қандай ережелер бар?

Шетелге ұшқанда үш түрлі талапты ескеру керек.

Біріншісі — әуе компаниясының ережесі. Кейбір шетелдік тасымалдаушылар IATA талаптарынан да қатаң шектеулер қояды. Мысалы, Air France үйде дайындалған және шағын өндірісте жасалған кейбір алкоголь түрлерін тасымалдауға рұқсат бермейді. Ішімдіктің күші белгіленген мөлшерден аспаса да, оны ұшаққа кіргізбеуі мүмкін.

Екіншісі — баратын елдің кеден ережесі. Мысалы, ұшақта бес литр коньяк тасымалдауға рұқсат болғанымен, Тайландқа бір литр алкогольді ғана баж салығынсыз кіргізуге болады. Ал Мальдив аралдарына алкоголь әкелуге мүлде тыйым салынған.

Үшіншісі — транзит. Егер ауысып мінетін әуежайда багажыңызды алып, кеденнен қайта өтсеңіз, сол елдің де талаптары қолданылады. Ал әуежайдан шықпасаңыз да, қолжүгіңіз қайта тексерілуі мүмкін. Мұндай жағдайда бірінші әуежайдағы Duty Free дүкенінен алған алкогольді келесі рейске өткізбей қоюы ықтимал.

Қай елге қанша литр алкоголь кіргізуге болады?

Әр елдің кеден ережесі әртүрлі. Кей мемлекеттер алкогольдің жалпы көлемін есептесе, басқалары ішімдіктің күшін, бөтелке санын не бағасын да ескереді. Төмендегі кестеде бір жолаушының баж салығын төлемей алып кіре алатын алкоголь мөлшері көрсетілген.

Кестедегі мөлшер бір жолаушыға шақталып есептелген. Алкогольді баланың атына рәсімделген багажға салып, оның есебінен қосымша лимит пайдалануға болмайды. Кеден ережелері өзгеруі мүмкін. Сондықтан сапар алдында баратын елдің кеден қызметінің ресми сайтынан талаптарды тексеріп алған дұрыс.

Жиі қойылатын сұрақтар

Үйде дайындалған алкогольді ұшақта тасымалдауға бола ма?

Үйде дайындалған шарап пен сыраның құрамындағы алкоголь мөлшері 24%-дан аспаса, авиация ережелері бойынша көлеміне арнайы шектеу жоқ. Бірақ бөтелкені жақсылап орау керек. Әуе компаниясының қосымша талаптары болуы мүмкін. Ал 24%-дан жоғары, 70%-ға дейінгі алкогольді тек дүкенде сатылатын түпнұсқа қаптамасында тасымалдауға рұқсат беріледі. Сондықтан үйде дайындалған самогон немесе пластик бөтелкеге құйылған чача бұл талапқа сай келмейді. Алкоголь мөлшері 70%-дан асатын ішімдіктерді мүлде тасымалдауға болмайды. Кейбір әуе компаниялары үйде дайындалған алкогольге толық тыйым салады.

Ұшақта өзім алып келген алкогольді ішуге бола ма?

Әдетте болмайды. Көп әуе компаниясы жолаушыларға өзімен бірге алып келген алкогольді ішуге тыйым салады. Бұл Duty Free дүкенінен сатып алынған ішімдіктерге де қатысты. Ұшақта тек экипаж ұсынған алкогольді ішуге рұқсат берілуі мүмкін. Ережені бұзған жолаушыға шара қолданылып, рейстен түсірілуі де ықтимал.

Қазақстанға қанша литр алкоголь кіргізуге болады?

18 жасқа толған бір адам Қазақстанға үш литрге дейін алкоголь мен сыраны баж салығынсыз кіргізе алады. Үш литрден асатын, бірақ бес литрден көп емес алкоголь үшін қосымша баж салығын төлеу керек. Белгіленген мөлшерден асқан әр литрге 10 EUR (шамамен 5 064 KZT) есептеледі. Мысалы, 4,5 литр алкоголь әкелсеңіз, артық 1,5 литр үшін 15 EUR (шамамен 7 595 KZT) төлейсіз. Ал бес литрден көп алкоголь кіргізуге тыйым салынған.

Ұшақтың багажында қанша литр алкоголь тасымалдауға болады?

Құрамындағы алкоголь мөлшері 24%-дан аспайтын сыра мен шарапқа авиациялық ережелер бойынша арнайы көлем шектеуі қойылмайды. Бірақ багаждың салмағы мен кеден талаптарын ескеру керек. 24%-дан жоғары, 70%-ға дейінгі алкогольді бір адам бес литрге дейін тасымалдай алады. Ал 70%-дан күшті ішімдіктерге тыйым салынған.

Бірнеше бөтелке алкоголь алып жүруге бола ма?

Иә. Авиация ережелерінде күшті алкогольдің бөтелке саны емес, жалпы көлеміне шектеу бар. Бір адам 24%-дан жоғары, 70%-ға дейінгі алкогольден бес литрге дейін алып жүре алады. Әр ыдыстың көлемі де бес литрден аспауға тиіс.

Бірақ кей елдердің кеденінде бөтелке саны да есептеледі. Мысалы, Оңтүстік Кореяға баж салығынсыз екі бөтелкеге дейін алкоголь кіргізуге рұқсат беріледі. Оның жалпы көлемі екі литрден, ал құны 400 USD (шамамен 181 мың KZT) аспауы керек.

Белгіленген мөлшерден артық алкоголь алып жүрсем не болады?

Бұл қай ережені бұзғаныңызға байланысты. Қолжүгіңізде Duty Free дүкенінен алынбаған, көлемі 100 миллилитрден асатын бөтелке болса, оны қауіпсіздік тексерісінен өткізбей қоюы мүмкін.

Ал багажға бес литрден артық күшті алкоголь не құрамындағы алкоголь мөлшері 70%-дан асатын ішімдік салсаңыз, әуе компаниясы оны тасымалдауға қабылдамайды.

Кеденде де әр елдің талабы әртүрлі. Қазақстанда үш литрден асатын, бірақ бес литрден көп емес алкоголь үшін баж салығын төлеуге болады. Тайландта бір литрден артық алкогольді декларациялау қажет. БАӘ-де артық ішімдікті алып қоюы мүмкін. Ал Мальдив аралдарына алкоголь кіргізуге мүлде рұқсат жоқ.

Сондықтан алкоголь сатып алмас бұрын әуе компаниясы қанша литр тасымалдауға рұқсат береді, бөтелкені қайда саласыз және баратын елге қанша алкоголь кіргізуге болады деген үш сұраққа жауап тауып алған дұрыс.