Ұшаққа қандай тамақ ала кіруге болады? Қысқа-нұсқа ереже

Ұзақ жолға шығарда сүйіп жейтін асыңызды қол жүгіне салып аларда мұны тексерісте өткізе ме өзі деп  бір рет болсын ойланған шығарсыз. Ендеше бұл нұсқау сізге арналады. Қол жүгіне ғана емес, багажға да не салуға болмайтынын жазып шықтық. 

Ұшаққа тамақ ала кіруге бола ма?

Иә, болады. Алайда бұл жекелеген әуе компаниясының ережесіне, сондай-ақ бара жатқан елдің қауіпсіздік пен кеден талаптарына байланысты өзгеруі мүмкін. Сондықтан сапар алдында өзіңіз ұшқалы жатқан әуе компанияның талаптарын тексерген дұрыс. Біз бұл мақалада көп әуежай мен елге ортақ ережелерді топтап беріп отырмыз. Алдымен қол жүгіне, содан соң багажға не салуға болатынын және нені салуға тыйым салынғанын түсіндіреміз. 

Қол жүгі 

Ұшақ салонына тамақ ала кіруге болады, бірақ оның түрі мен қаптамасына қойылатын талаптарды білген жөн. Тасымалданатын өнімдер құрғақ, иісі өткір емес және жеуге ыңғайлы болуға тиіс. Мынаны қол жүгіне салуға болады:

• Құрғақ тағамдар: печенье, крекер, чипстер, жаңғақтар, шоколад пен кептірілген жемістер.
• Дайын тағам: сэндвичтер мен бутербродтар.
• Сұйықтық ережесі: йогурт, сорпа, соус, тосап сияқты жартылай сұйық тағамдарды тек 100 мл-ден аспайтын құтымен ғана өткізе аласыз. Бұл өнімдердің жалпы көлемі 1 литрден аспауы керек және түссіз пакетке салынуға тиіс.
• Балалар тағамы мен дәрі-дәрмекке 100 мл шектеуі жүрмейді, бірақ тексеру кезінде дәрігер анықтамасы сұралуы мүмкін. Оңай алынатын жерге салып қойыңыз. 

Осы тақырыпта басқа не бар?

Қол жүгімен саяхаттау: ең қажетті заттарды қалай сыйдырамыз?

Ал мына заттарды бортқа алып кірмеңіз:

• 100 мл-ден асатын сұйық тағам (сусын, сорпа, йогурт).
• Өткір иісі бар өнімдер (балық, кейбір ірімшік түрлері) — бұл басқа жолаушыға жайсыз болуы мүмкін.
• Тез бұзылатын тағамдар (шикі ет, теңіз өнімдері).
• Әуежай қызметкерлері сыртынан қарап ішінде не барын ажырата алмайтын, зауыттық белгісі жоқ белгісіз өнімдер. Қолдан оралған күдікті тағамдар қауіпсіздік талаптарына сай келмегендіктен, тексеру кезінде тәркіленуі мүмкін. 

Саяхатта тағы не пайдалы болады?

Дәрі-дәрмек

Косметика

Әтір

Бала арбасы

Пышақ

Ұстара

Багаж

Тіркелген жүкте тамақ тасымалдау ережелері қол жүгіне қарағанда әлдеқайда жеңіл. Мұнда <100 мл дейтін шектеу жоқ, сондықтан негізгі азық-түлік қорын үлкен шабаданға сала салған дұрыс. Тағам төгіліп, киімдеріңізді бүлдірмес үшін оны герметикалық контейнерлерге немесе тығыз пакетке салып, жақсылап орау керек. Мынаны багажға салуға болады:

• Сұйық өнімдер: үлкен көлемдегі сусындар, шырындар мен консервілер.
• Өткір иісті тағамдар: салонға алып кіруге рұқсат етілмейтін иісі бар өнімдерді багажға тапсыра аласыз.

Мына заттарды багажға салмаңыз:

Әуе компаниясы рұқсат бергенімен, баратын еліңіздің кеден қызметі мына заттарды тәркілеп алуы мүмкін:

• Шетелге: Еуропа елдері, АҚШ пен Австралия сияқты біраз мемлекет ет-сүт өнімдерін, жаңа піскен жемістер мен көкөністерді, тұқымдарды кіргізуге тыйым салады.
• Қазақстанға ұшқанда: ветеринарлық сертификатсыз ет-сүт өнімдерін, сондай-ақ өндірушісі белгісіз тағамдарды әкелуге рұқсат жоқ.
• Қазақстаннан ұшқанда: ет, сүт пен бал сияқты табиғи өнімдерді шетелге шығаруда баратын еліңіздің сертификат талап ететінін не мүлде кіргізбейтінін ескеріңіз.

Тексеруден өткен соң Duty Free не әуежай ішіндегі дүкендерден сатып алынған сусындар мен тағамдарды ұшаққа емін-еркін алып кіре аласыз. Тек ұшқанға дейін мөрленген пакетін ашып тастамаңыз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Жиі қойылатын сұрақтар

Ұшақ салонына сусын алып кіруге бола ма?

Қауіпсіздік бақылауына дейін сатып алынған сусындарды қол жүгіне салып кіруге болмайды. Бірақ тексеруден өткеннен кейін әуежай ішінде немесе duty free дүкендерінен алынған сусындарды ұшаққа алып кіруге рұқсат етіледі.

Duty Free-ден алынған тағамды ұшаққа алып кіруге бола ма?

Иә, олар арнайы мөрленген пакетте беріледі, тек ұшқанға дейін ашпаған жөн.

Багажға тамақ салуға бола ма?

Иә, бірақ тағамды герметикалық қаптап, төгілмейтіндей етіп орау керек. Сондай-ақ баратын елдің кедендік талаптарын ескеру қажет.

Жолға жейтін не алсам болады?

Ұшаққа ұзақ сақталатын, төгілмейтін, иісі жоқ жеңіл тағамдар алған жөн. Әсіресе ұзақ рейстерде не бортта ас берілмейтін жағдайда жаңғақтар, кептірілген жемістер мен протеин батончиктерін салып алыңыз. Алма, банан, печенье мен крекер сияқты өнімдер жол үстінде тез әрі пайдалы тамақтанғанға жақсы.