Қол жүгімен саяхаттау: ең қажетті заттарды қалай сыйдырамыз?

Егер сіз ең арзан билет сатып алсаңыз немесе бірнеше күнге ғана ұшатын болсаңыз, қол жүгін ғана алып сапарға шығу — тамаша шешім. Бұл мақалада неге бұл ыңғайлы екенін, өзіңізбен бірге не алуға болатынын және бәрін шағын шамаданға немесе рюкзакқа қалай сыйғызуға болатынын айтып береміз.

Үнемді саяхаттау және басқа да пайдалы нұсқаулықтар — әлеуметтік желілерімізде

Telegram

Instagram

Қол жүгі деген не және оның қандай шектеулері бар?

Қол жүгі — жолаушының ұшақ салонына өзімен бірге алып кіретін сөмкесі немесе рюкзагы. Қол жүгін алып саяхаттау — уақытты үнемдеудің тиімді жолы. Багажды тіркеуге немесе оны тасымалдауға уақыт кетпейді. Ұшып келген соң үлкен жүктің шығуын күтпей, әуежайдан бірден шығып кете аласыз.

Қол жүгін алып саяхаттаған арзанға шығады. Көптеген әуе компаниясы тек қол жүгі кіретін билеттерді арзанға сатады. Сонымен қатар, тек қажетті заттарды өзіңізбен бірге алып жүру қозғалысқа да ыңғайлы — сапар барысында еркін әрі жеңіл жүре аласыз.

Қазақстан әуе компанияларының қол жүгіне қатысты нормалары:

Кемшіліктері туралы айтатын болсақ, ең бастысы — тек қол жүгін алып жүрсеңіз, көп киім немесе жеке заттарды салу қиын болады. Таңдау азаяды: өзіңізбен тек ең қажет деген киім-кешек пен гаджеттерді ала аласыз. Сондықтан базарлық немесе артық заттар үшін сөмкеде орын қалмауы мүмкін.

Рұқсат етілген және тыйым салынған заттар

Саяхатқа шығарда немесе ұшаққа отырмас бұрын не алуға болатынын, ал неге тыйым салынатынын біліп алу өте маңызды. Өзіңізбен бірге алып жүруге болатын және болмайтын заттардың тізімін осы жерден таба аласыз.

Смартфон, ноутбук, камера сияқты құрылғыларды алып жүруге рұқсат етіледі. Сонымен қатар, дәрігер жазып берген дәрілерді, құжаттарды және кітаптарды да алуға болады. Бірақ дәрілердің құрамын алдын ала қарап, рұқсат етілген дәрілер тізімімен танысып алған дұрыс. Жеңіл тамақ, су (100 мл-ден аспайтын бөтелкеде) және косметика заттарын да ұшаққа алып кіруге болады. Косметиканың әрқайсысы 100 мл-ден аспауы керек және барлығы 1 литрлік мөлдір пакетке салынуы тиіс.

Бет күтіміне арналған косметика немесе әтір секілді заттарды шағын саяхатқа арналған құтыларға құйып алыңыз. Кейде құтының ішінде 100 мл-ден аз сұйықтық қалса да, оның жалпы көлемі 500 мл болуы мүмкін. Мұндай жағдайда тексеріс кезінде оны тәркілеп алып жатады.

Ал 100 мл-ден көп сұйықтықтарды, өткір заттарды (мысалы, қайшы, пышақ) және тыйым салынған заттарды (газ баллоны, жарылғыш заттар) ұшаққа алып өтуге болмайды. Бұл ережелер — жолаушылардың қауіпсіздігі үшін қойылған.

Қол сөмкесі, рюкзак, жылы жамылғы немесе дьюти-фриден алған сөмке көп жағдайда қол жүгіне жатпайды. Бірақ нақты ақпаратты әуе компаниясының ережелерінен біліп алған жөн.

Саяхат кезінде не қажет болады?

Құжаттар мен ақша. Паспорт, виза және билеттер (электронды нұсқасы смартфонда болса да, тосын жағдайлар үшін қағаз түрі де болғаны жақсы). Шекарадан өткенде құжаттарды жиі тыңғылықты тексереді, сондықтан оларды алдын ала дайындап, оңай табылатын жерге салып қойған дұрыс. Сонымен қатар, банк карталары мен аздаған мөлшерде қолма-қол ақша (баратын еліңіздің валютасында) алып жүрген жөн.

Гаджеттер мен техника. Пауэрбанк — саяхатта ең қажет құралдардың бірі. Күніңіз белсенді өтсе, розетка іздеп жүрмейсіз. Бірақ соңғы кездері пауэрбанкке қатысты талаптар қатайып жатыр. Көптеген әуе компаниясы оны тек қол жүгінде ұстап жүруге кеңес береді. Сондай-ақ, баратын елде розетка түрі басқа болуы мүмкін, сондықтан әмбебап адаптер де артық етпейді.

Киім мен дәрі-дәрмек. Артық киім алмауға тырысыңыз. Өзара үйлесетін бірнеше киім болса жеткілікті. Қысқа уақытқа баратын болсаңыз, көп зат алып, бәрін киіп үлгермеуіңіз мүмкін. Ең ауыр киімді (мысалы, худи немесе күртеше) ұшаққа отырарда киіп алған дұрыс — бұл жүк салмағын азайтуға көмектеседі.

Cөмке немесе рюкзакты қалай таңдау керек?

Саяхатқа арналған сөмке таңдағанда бірнеше маңызды нәрсеге назар аударған дұрыс: ең бастысы — сөмке сапалы әрі ыңғайлы болуы керек. Алдымен оның қатты не жұмсақ екенін анықтап алыңыз. Жұмсақ рюкзак жеңіл және икемді келеді, бірақ ол ішіндегі заттарды сыртқы соққыдан жақсы қорғай алмайды. Сөмкеде қалталар неғұрлым көп болса, соғұрлым жақсы. Құжаттар мен гаджеттерге арналған бөлек қалталар заттарыңызды реттеп орналастыруға көмектеседі және керегін тез табуға мүмкіндік береді.

Барлық затты қалай сыйғызуға болады?

Шыны керек, сөмкені дұрыс жинау — нағыз өнер. Дегенмен, көмегі тиетін бірнеше кеңесіміз бар.

Киімді бүктемей, шиыршықтап жинаңыз. Бұл әдіс киімді ықшамдап, кеңістікті тиімді пайдалануға көмектеседі. Заттарды біркелкі формада және көлемде орналастырсаңыз, сөмкеде бос орын қалмайды да, бәрі тығыз сыяды. Ішкиім мен шұлықты жақсылап орап, аяқкиімнің ішіне немесе шалбар мен күртешенің қалталарына салып қойыңыз — осылайша тағы да орын үнемдейсіз. 

Егер сөмкеде сынғыш заттар болса, оларды сөмкенің дәл ортасына қойыңыз. Киімдермен қоршалған мұндай заттар ұшу кезінде немесе жолда зақымданбайды.

Заттарды санаттарға бөліп жинау өте ыңғайлы. Егер органайзерлерді қолдансаңыз, киім, косметика немесе аксессуарларды бөлек сақтап, керек затты жылдам табуға болады.

Компрессиялық пакеттерді пайдалануға болады. Киімді тығыздап, көлемін азайту арқылы сөмкеде көп орын үнемдейсіз. Бұл әсіресе көп киім алатындар үшін пайдалы әдіс. Бірақ мұндай пакеттер киімнің көлемін азайтқанымен, салмағын өзгертпейді. Оған қоса, қайтар жолда ауа сорғыш құрылғы болмаған жағдайда, оларды қайта жинау қиын болуы мүмкін. Сондықтан бұл әдісті қолданбас бұрын, жақсылап ойланып алған жөн.

«Керек болып қалар» деп артық зат алмаңыз. Егер бірдеңе шынымен қажет болса, оны кейін сатып алуға болады.

Суретті салған — СашаШура.