Транзитпен ұшқалы жатқандарға ақыл-кеңес
Саяхатшылар мұндай рейсті неге таңдайды, қазақстандықтар көп таңдайтын транзиттік елдер.
Транзиттік рейс деп ұшып бара жатқан жерге тура емес, жолда бір қалаға аялдап барып жетуді айтады. Мұндай рейсті таңдаған жолаушы ұшақтың ауысқанын күтеді не сол әуежайдан келесі рейске мініп кетеді.
Әлемдегі танымал транзиттік хабқа Дубай (DXB), Доха (DOH), Ыстамбұл (IST), Франкфурт (FRA) жатады.
Саяхатшылар мұндай рейсті неге таңдайды?
Транзиттік рейстің көп жолаушыға оңтайлы көрінетіні — ол тікелей ұшатын рейстерге қарағанда арзанырақ болады.
Оған қоса транзит кезінде аялдайтын ел сапардың тағы бір нүктесіне айналып, саяхат кезінде көбірек жер көре аласыз. Транзиттік рейспен бір елге бір не одан да көп күнге қалып, қыдырып қайтсаңыз болады.
Рейстер арасында күту уақыты ұзақ болса және сіздің қолыңызда қажет құжаттар (виза, қалаға кіруге рұқсат) болса, әуежайдан шығып, қаланы аралап келе аласыз. Кейде уақыт тапшылығына байланысты қалаға шыға алмасаңыз да, үлкен транзиттік тораптарда уақыт өткізетін дүкендер, демалыс орындары, кафелер мен ойын-сауық орындары болады. Шығындалғыңыз келмесе, еркіңіз білсін, дүкен аралауға болмайды деген заң жоқ қой.
Мысалы,Turkish Airlines транзитпен ұшқан жолаушыға үш түрлі ваучер ұсынады. Ваучер транзиттік уақыттың ұзақтығына байланысты өзгереді. Ең аз транзит уақыты 6 сағат болуы керек. 6 сағат арасындағы транзит жолаушыларына тегін тамақ воучері беріледі, транзит уақыты 6 сағаттан 24 сағатқа дейін болса Ыстамбұл қаласы бойынша тегін Touristanbul турын ұсынады. Эконом-класс жолаушыларының транзиттік уақыты 12 сағаттан, бизнес-класс жолаушыларының уақыты 9 сағаттан көп болса, тегін трансфер және тарихи қала орталығындағы 4 жұлдызды қонақ үйде тұру воучері ұсынылады. Сіз тек бір воучерді таңдай аласыз.
Ұшу маршрутының билеттерін бір әуе компаниясынан сатып алған болсаңыз немесе бүкіл сапарыңыз бір әуе компаниялардың альянсіне тиесілі болса, тасымалдаушы тіркелген жүгіңізді өз мойнына алады. Алғашқы ұшып келген жеріңізде жүкті алып, қайта тіркеудің қажеті жоқ, себебі жүгіңіз автоматты түрде келесі рейске бағытталады. Сондай-ақ транзиттік рейсіңіздің алғашқы рейсінде кешігулер мен өзгертулер болған жағдайда, бұл әуе компаниясы көмек көрсетуге және қосымша ақысыз балама рейске билет беруге міндетті.
Транзитттік рейспен ұшу кейде діттеген жерге жетудің жалғыз жолы болуы мүмкін екенін де ескерген жөн.
Транзиттік рейстердің кемшілігі
Транзиттік сапардың көп айтыла бермейтін кемшін тұстары да барын ұмытпаңыз.
Билеттерді әр түрлі әуе компанияларынан бөлек-бөлек сатып алған болсаңыз, рейстер арасындағы ауысып міну және уақыттылы рейске жетуге толықтай өзіңіз жауапты боласыз. Тіркелген жүгіңізді өзіңіз алып, келесі рейске қайта тапсыруыңыз қажет болады. Ал рейстің бірі кешіксе, келесі ұшаққа үлгермей қалуыңыз мүмкін. Мұндайда абдырап қалмас үшін барлық сценарийге дайын болғаныңыз жөн.
Сапар алдында транзиттік елдің виза ережесімен алдын ала танысып алған дұрыс. Әуежай аумағынан шықпаймын деп жоспарласаңыз да, кей жағдайларда транзиттік виза талап етіледі. Қолыңызда қажет құжат болмаса, сізді рейске отырғызбауы да мүмкін.
Кейде транзиттік рейстердің арасындағы уақыт тым ұзақ болуы мүмкін. Бірақ транзиттік рейстердің көбі кешке не түнде ұшады, сондықтан келген қалаңызда көлік (түнгі шаттл болмаса) жүрмейді. Әуежайдағы дүкендер де жабық болады. Мұндайда әуежайдағы орындықта сөмкелеріңізді құшақтап ұйықтап аласыз. Беліңіз сәл-пәл ауырып қалатыны мен ары-бері жүретін адамдарды ескермесек, бұл да бір саяхат романтикасы ғой.
Транзиттік сапар — ерекше көңіл-күй мен естен кетпес тәжірибе сыйлайтын тамаша мүмкіндік. Әр адам осындайдан өткенде ғана нағыз «саяхатшы» дәрежесіне көтеріледі.
Транзиттік бағытты қалай таңдау керек?
Транзиттік бағытты таңдауда мынадай бес критерийге назар аударыңыз:
- Рейстер уақыты — екі рейс арасындағы уақыт тым қысқа да (1-3 сағат), тым ұзақ та (6-14 сағат) болмағаны дұрыс. Түнде ұшасыз ба, күнбіз бе — оған да мән беріңіз. Ыңғайыңызға қарай таңдаңыз.
- Рейстер бағасы — кейде транзиттен гөрі тікелей ұшқан тиімдірек болуы мүмкін. Салыстырып көріңіз.
- Әуежай инфрақұрылымы — екі рейс арасы ұзақ болса, бара жатқан әуежайыңызда демалатын, тамақтанатын, интернетке қосылатын жер бар-жоғын тексеріп алыңыз.
- Жүк тіркеу — кейбір транзитте жүгіңізді қайта тіркеудің қажеті жоқ болса, кейде қайта тапсыруға тура келеді. Екі түрлі әуе компаниясымен ұшқалы жатсаңыз, осыған мән беріңіз.
Лайфхак: Aviasales.kz сайтынан билет іздегенде сүзгілерді қолданыңыз. Сонда сіз қанша рет ауысып отыратыныңызды, транзит арасындағы уақытты таңдай аласыз. «Қайта тіркелмеу» және «бір әуежайдан ұшу» деген сүзгінің де билет аларда пайдасы зор.
Транзит кезінде қаладағы басқа әуежайдан ұшуыңыз керек болса, оны да міндетті түрде ескертеміз (скриншотқа қараңыз).
Қазақстандықтар көп таңдайтын транзиттік елдер
Түркия (Стамбұл): Жиі таңдалатын бағыт. Қазақстан азаматтарына 30 күнге дейін визасыз жүруге болғандықтан, бұл қалада 2-3 күнге тоқтап, аралап шықсаңыз болады. Стамбұлдан Еуропа елдеріне ұшуға ыңғайлы рейстер табуға болады.
БАӘ (Дубай, Абу-Даби): Ультрамодерн хабтар. Қазақстан азаматтары 30 күнге дейін визасыз жүре алады. Бұл жерде де 2-3 күн тоқтап, қажет рейстерді асықпай табуға болады.
Өзбекстан (Ташкент): Жақын әрі бағасы қолжетімді. Ташкент арқылы Оңтүстік Азия елдеріне оңай жетесіз. Қазақстан азаматтары 30 күнге дейін визасыз жүре алады.
Қытай (Пекин, Шанхай): Қазақстан азаматтары 30 күнге дейін визасыз жүре алады. Қытай арқылы Корей Республикасы немесе Жапонияға ұшуға болады.
Қатар (Доха): Qatar Airways арқылы әлемнің кез келген нүктесіне жетуге болады. 30 күнге дейін жүрсеңіз, виза сұрамайды.
Таиланд (Бангкок, Пхукет): қысқы демалысқа қолайлы бағыт. Визасыз 30 күнге дейін жүресіз.
Грузия (Батуми, Тбилиси): Демалыс пен транзитті біріктіретін тамаша бағыт. 30 күн виза талап етпейді. Қазақстаннан тікелей рейстер бар. Артынша Еуропаға арзан билеттер табуға да болады.
Әзербайжан (Баку): Қысқа транзитке ыңғайлы. Баку арқылы Еуропа мен Азия бағыттарына ұша аласыз. Визасыз 30 күнге дейін жүруге болады
Малайзия (Куала-Лумпур): Азия елдеріне жол тартсаңыз ыңғайлы нұсқа. Визасыз 30 күнге дейін жүруге болады.
Франкфурт-на-Майне (Германия): Еуропадағы ең ірі әуе хабтарының бірі. Бірақ Германияға кіруге шенген визасы қажет.
Варшава (Польша), Прага (Чехия) және Будапешт (Венгрия): Еуропадағы әуе хабтары. Шенген визасы керек. Қазақстаннан тікелей рейстер бар.
Транзитпен ұшқанда рейс кешіксе, не істеу керек?
Кез келген сапарда күтпеген жағдай болуы мүмкін. Рейсіңіз кешігіп жатса, жолаушы ретінде қандай құқығыңыз бар екенін білуіңіз керек.
Рейсіңіз әуе компаниясының кесерінен кешіксе, компания тегін қонақ үй, тамақ және балама рейс ұсынуға тиіс. Билеттеріңізді бір компаниядан сатып алған болсаңыз, сіздің келесі транзиттік рейске үлгеруіңізге солар жауапты болады. Артық уайым қажет емес десеңіз, билетті бір компаниядан алғаныңыз дұрыс.
Келесі рейсіңізге үлгермей жатсаңыз не ендігі кешігіп қалсаңыз, әуежайдағы компания өкілдеріне хабарласып, жағдайды түсіндіріп, басқа жолын ұсынуды талап етіңіз. Әуе компаниялары өз міндетін жақсы біледі, сондықтан алаңдамаңыз. Қысқаша айтқанда:
Жолаушы құқығы
- Транзиттік рейс әуе компаниясының кесірінен кешіксе, сізге тегін қонақ үй, тамақ, басқа рейс ұсынуы керек.
- Билеттер бір броньда болса, сіздің келесі рейске үлгеруіңізге компания жауапты.
Ал рейске үлгермей қалсаңыз:
- Дереу әуе компаниясының өкілдеріне жүгініңіз.
- Альтернатив рейс не өтемақы сұрауға құқығыңыз бар.
Қорытынды
Транзиттік сапар — ақша үнемдеудің, жаңа жер көрудің тамаша жолы. Бірақ үнемдеймін деп, шаршап қалмаңыз. Дұрыс жоспарласаңыз, транзиттік жолды қызық әрі жайлы етуге болады. Ең бастысы — бағытты мұқият таңдап, виза талаптарын зерттеп, рейстер арасындағы уақытты дұрыс есептеу.
