Будапештті көп адам туристер термалды суға түсіп, гуляш жеп, асықпай демалатын әдемі қала деп елестетеді. Бірақ Венгрия астанасының басқа қыры да бар — мұнда ересектерге арналған ойын-сауық индустриясы жақсы дамыған. Бұл мақалада қаланың түнгі өмірі қалай өтетінін, техно кештерге қайда баруға болатынын, қандай ойын-сауық заңды екенін және алаяқтарға алданып қалмаудың жолдарын айтамыз.
Будапештке неге көңіл көтеруге барады?
Венгрия дегеніңіз визасыз кіре салатын Пхукет емес. Мұнда бару үшін Шенген визасын рәсімдеп, жұмыстан анықтама жинап, консулдықтың шешімін күту керек. Бірақ рейв, диджей-сет пен таң атқанша билегенді ұнатсаңыз, машақатыңыз толықтай ақталады.
Будапешттің ерекшелігі — қалада бірнеше нәрсе қатар үйлесіп тұрғаны. Мұнда көрші елдердің бәрінде бірдей кездесе бермейтін еркіндік бар, ал клуб мәдениетінің ауқымы Берлинмен салыстыруға келеді. Оның үстіне баға Батыс Еуропадағыдай қымбат емес, сондықтан бірер күнде бар ақшаңызды жұмсап тастамайсыз. Сол себепті Будапештті достармен көңіл көтеруге не үйленер алдындағы бойдақтар кешін өткізгенге жиі таңдайды. Қалада термалды моншалар да бар. Қызыққа толы түннен кейін ес жинауға таптырмайтын жер.
Будапештке көңіл көтеруге бара жатқан адамға берер кеңесім — Sziget фестивалі кезінде ұшыңыз. 2027 жылы ол 10–14 тамызда өтеді. Осы күндері қаланың әр шаршы метрінде бір кеш өтіп жатқандай болады.
Қаладағы ірі би алаңдары
Будапешттің басты ерекшеліктерінің бірі — бос тұрған ғимараттар мен аулаларда ашылған руин-барлар. Сыртынан қарағанда оғаш, тіпті сәл қорқынышты көрінуі мүмкін. Бірақ ішінде жақсы музыкасы мен бағасы қолжетімді сусыны бар қауіпсіз орындар жұмыс істейді. Қалада бір түнде бірнеше барды аралап шығатын бар-хоппинг те танымал.
Жергілікті жұрт әдетте алдымен бағасы арзан барларда отырады да, бірнеше сағаттан кейін ғана клубқа барады. Осылайша би алаңында алкогольге артық ақша жұмсамайды.
Барлардың көбі Gozsdu Udvar ауласында және Blaha Lujza tér алаңының маңында орналасқан. Танымал клубтарға кіру көбіне ақылы — шамамен 1 000–2 000 HUF (шамамен 1 366–2 732 KZT). Бірақ тегін кіретін жерлер де бар. Өзіміз білетін бірнеше орын:
- Szimpla Kert — Будапешттегі ең танымал руин-бар. Бір рет болса да кіріп шыққан дұрыс. Интерьері ескі заттардан құрастырылған, келушілері сан алуан, адам көп, сусын бағасы да қымбат емес;
- Instant-Fogas Complex — үш қабатты үлкен кешен, кіру тегін. Ішінде музыкасы әртүрлі бірнеше бөлме бар. Жергілікті жұрт бірнеше барды аралап шыққаннан кейін осында келіп, көпшілікпен бірге билеп кетеді;
- Doboz — екі би алаңы бар қымбатырақ руин-бар. Ауласында ағаштан жасалған алып Кинг-Конг тұр. Мұнда кіргізерде адамды мұқият қарайды: агрессия көрсеткен, қатты мас болған немесе орынға сай киінбеген адамды кіргізбеуі мүмкін;
- A38 Hajó — Дунай жағасына тоқтаған ескі жүк кемесіндегі концерт алаңы мен клуб. Күн жылы кезде жұмыс істейді;
- Pontoon — Дунайдың дәл жағасындағы тағы бір жазғы орын. Кіру тегін, көрінісі әдемі, көбіне хаус ойнайды;
- Otkert пен Heaven — демалыс күндері танымал музыка, рэп пен хип-хоп ойнайтын адам көп клубтар;
- Széchenyi термалды моншасы — күндіз мұнда қала тұрғындары мен туристер демалады, ал ақпаннан желтоқсанға дейін сенбі түндері әйгілі Sparty өтеді. Бұл — Будапештке тән ерекше кеш: электронды музыка ойнайды, акробаттар өнер көрсетеді, отты шоу мен лазер болады, ал сіз ашық аспан астындағы ыстық термалды бассейнде билейсіз. Билет 24–28 мың HUF (шамамен 33–38 мың KZT) венгр форинтінен басталады. Оны шараның ресми сайтынан алдын ала алған дұрыс. Ішке шомылатын киіммен кіргізеді. Тәпішке мен сүлгіңізді ұмытпаңыз.
Кезекте тұрып, би алаңында сығылысып жүргенді ұнатпасаңыз, мынаны ескеріңіз: демалыс күндері Szimpla, Instant, Heaven және Otkert сияқты тегін әрі туристер көп баратын жерлерде ине шаншар орын болмайды. Бірнеше барды асықпай аралағыңыз келсе, Gozsdu көшесіне немесе Blaha Lujza tér алаңына барған дұрыс.
Будапешттегі электронды музыка
Будапешт — Еуропадағы техно жақсы дамыған қалалардың бірі. Электронды музыка, рейв пен андеграунд ұнаса, таңдау көп:
- Turbina — қаладағы сәнді орындардың бірі. Хаус пен техно ойнайтын бірнеше би алаңы бар. Екінші қабатта пианино қойылған тыныштау жер бар, сол жерде біраз демалып алуға болады;
- Arzenál — рейвті ұнататындар баратын танымал техно-клуб. Іші өндіріс орны сияқты безендірілген, дыбысы қатты әрі сапалы, кіреберісте адамды жіті тексереді;
- Aether Club — жер астындағы дарк-техно клуб. Дыбысы жақсы;
- Toldi Klub — күндіз артхаус кинотеатры, түнде электронды андеграунд ойнайтын клубқа айналады;
- Sziget — Обуда аралында тамызда өтетін Еуропадағы ірі фестивальдердің бірі.
Өзіме ең қатты ұнайтыны — Turbina. Атмосферасы керемет, хаус пен техно ойнайды, музыкасы әртүрлі бірнеше залы бар. Екінші қабатында пианино тұрған демалыс орны да бар. Ал сапалы дарк-техно тыңдағыңыз келсе, Aether мен Toldi жақсы.Афишадан жергілікті танымал диджейлер Metha мен Peter Makto-ны да іздеңіз. Metha-ның Be Massive деген өз лейблі бар. Олар тарихи жерлерде керемет техно кештер өткізеді. Мысалы, Буда қамалының етегіндегі Várkert Bazár немесе Балықшылар бастионында. Осындай жерде көңіл көтерудің өзі ерекше, ұзаққа есте қалады.
Казиноны қайдан табуға болады?
Венгрияда құмар ойынға заңмен рұқсат берілген және бұл саланы мемлекет қатаң реттейді. Сенімді казинолардың көбі ірі қонақүйлерде орналасқан. Мысалы, Будапештте Las Vegas Casino желісінің бірнеше орны бар, соның бірі Sofitel қонақүйінде орналасқан.
Барар алдында таңдаған казиноның сайтынан ережесін тексеріңіз. Кіру үшін паспорттың түпнұсқасы керек. Кей жерде киімге де талап қояды: смарт-кэжуал не салтанатты киім келуді талап етуі мүмкін.
Стриптиз-шоуды қайдан көруге болады?
Будапешт орталығында ересектерге арналған шоу көрсететін орын көп. Олардың көбі Andrássy даңғылы мен Nagymező көшесінің маңында орналасқан.
Стрип-клубқа барсаңыз, қала орталығындағы пікірі жақсы, ірі орындарды таңдаңыз. Шет жақтағы күмәнді жертөле клубтарына бармаған дұрыс: кіретін ақшаңызды үнемдеймін деп, кейін картаңыздан жасырын төлем алынып қалуы мүмкін. Тағы бір маңызды ереже — сусынды бардан өзіңіз сатып алып, шектеусіз шот аштырмаңыз.
Венгриядағы секс-қызмет: заң не дейді?
Будапештте секс-қызмет көрсетуге заңмен рұқсат берілген, бірақ бірқатар шектеу бар. Венгрия заңына сәйкес секс-қызметкерлердің жұмыс істеуге рұқсаты болуы керек және олар үнемі медициналық тексеруден өтіп тұруға тиіс.
Ал жеңгетайлыққа және жезөкшелер үйін ұстауға заңмен қатаң тыйым салынған. Секс-қызметкерлер тек жеке кәсіпкер ретінде жұмыс істей алады. Делдалдыққа тыйым салынғандықтан, туристерге заңды қызметті табу оңай емес. Көшеде жұмыс істеуге тек мектептер мен шіркеулерден алыс орналасқан арнайы аймақтарда рұқсат етіледі. Бұл салада заңсыз қызметке, алаяқтыққа тап болу және қауіпсіздік кепілдігінің болмау қаупі жоғары екенін ескерген дұрыс.
Гоу-гоу барлар көбірек қызықтырса, Тайландтағы секс-туризм туралы материалымызды оқыңыз. Онда көп адам сұрауға қысылатын сауалдарға ашық жауап бергенбіз.
Қауіпсіздік пен әдеп ережелері
- Денсаулық пен қорғану. Кез келген жағдайда мүшеқап қолдану керек. Секс-қызметкердің медициналық анықтамасы болса да, ол қауіп жоқ дегенге жүз пайыз кепіл болмайды;
- Келісім. Қызметке ақша төлеу адамға ойына келгенін істеуге құқық бермейді. Екі жақтың да нақты келісімі болуы керек. Адам белгілі бір әрекетке «жоқ» десе, сол жерден тоқтау керек;
- Ақша мен шарттар. Кейін жанжал не ақша бопсалау болмас үшін ақырғы баға мен қызмет шарттарын алдын ала нақты келісіп алыңыз;
- Заң. Кәмелетке толмаған адаммен, қатты мас болған не қысым көріп отырған адаммен жыныстық әрекетке бару — ауыр қылмыс.
Қауіпсіздік ережелері
Будапешт — қауіпсіз қала. Бірақ түнгі өмірде туристерді алдап, оңай олжаға кенелгісі келетіндер бар. Демалысыңыз қиындықсыз өтуі үшін бірнеше қарапайым ережені есте сақтаңыз:
- Бардағы алаяқтардан сақ болыңыз. Жаңа танысқан адам картада жоқ белгілі бір барға барайық деп қоймаса немесе мәзірде баға көрсетілмесе, ол жерден кетіп қалыңыз.
- Ресми такси пайдаланыңыз. Клубтың алдында өздері келіп қызмет ұсынған жүргізушілердің көлігіне отырмаңыз. Олар алаяқтармен бірге жұмыс істеуі мүмкін. Көлікті Bolt қосымшасымен шақырыңыз не мекеме қызметкерлерінен лицензиясы бар сары такси, мысалы Főtaxi шақырып беруін сұраңыз.
- Заттарыңыз бен жеке деректеріңізге абай болыңыз. Сусыныңызды қараусыз қалдырмаңыз, әмияныңызды киімнің ішкі қалтасына салып жүрген дұрыс.
Қызыққа беріліп кеткенде көп адам қарапайым қауіпсіздік ережелерін ұмытып кетеді. Жалғыз жүрмеңіз, есіңізден танғанша алкоголь ішпеңіз. Бейтаныс адамның қолынан ештеңе алмаңыз, тіпті ашылып қойған су болса да. Жеке мәліметіңізді айтпаңыз: кездейсоқ танысқан адамға қай қонақүйде тұрғаныңызды, жалғыз жүргеніңізді айтпаңыз және онымен бірге адам жоқ жерге бармаңыз. Қызметкерлерден көмек сұраудан қысылмаңыз. Барда немесе клубта біреу күмәнді әрекет жасап, өзіңізді қауіпсіз сезінбей қалсаңыз, бірден барменге немесе күзетшіге барыңыз. Будапештте қызметкерлер мұндай жағдайға бірден араласады — тәртіп бұзған адамды сыртқа шығарып жібереді.
Будапешттің түнгі өмірі талай адамды таңғалдыра алады. Ал қатты музыка мен неоннан шаршасаңыз, қалада тыныш музейлер, әдемі тарихи көшелер мен ертеңгі күнге күш жинап алатын термалды моншалар жетеді.
Суретті салған — Дада Кирей.
