Ұшақта секспен айналысқанның салдары қандай?
Бір сәттік ләззат үшін басыңыз бәлеге қалмасын.
Mile High Club (10 000 метр биікте көңіл қосқандардың бейресми клубы) мүшесі атанған — тек кинода әдемі. Шын мәнінде, борттағы әжетхана тар, сыртта жолаушылар шық та шық деп тыпыршып тұрады, ал әуежайға қонғанда заң бұзғандарды полиция ұстап әкетуі мүмкін. Бірнеше ел ұшақта жыныстық қатынаспен айналысқандарды қалай жауапқа тартатынын жазып шықтық.
Қазақстанда кесілетін жаза
Әкімшілік кодексте ұшақта секспен айналысқандар туралы арнайы бап жоқ. Оның үстіне, кейінгі жылдары елдегі әуе компанияларының рейстерінде мұндай шулы жайттар мүлдем тіркелмеген: жолаушыларымыз тым инабатты-ибалы ма, әлде жолсеріктер мәселені ың-шыңсыз шеше ме — ол жағы енді белгісіз. Дегенмен осындай бір ой маза бермей жүрген болса, салдары қандай болуы мүмкін екенін оқып шығыңыз.
Ұсақ бұзақылық
Бұл — Әкімшілік кодекстің 434-бабы. Ұшақ салоны да, дәретхана кабинасы да қоғамдық орын болып саналатындықтан, ондағы сексті осы бапқа оңай телуге болады. Мұндай «романтиканың» соңы — 20 АЕК (2026 жылы бұл 86 500 теңге) көлемінде айыппұл арқалауға немесе 5 тәуліктен 15 тәулікке дейін әкімшілік қамауға әкеп соғады.
Әуе кемесінде мінез-құлық қағидаларын бұзу
Бұл — Әкімшілік кодекстің 566-бабы. Ғашықтардың әрекеті экипаж жұмысына кедергі келтірсе не ұшу қауіпсіздігіне тікелей қатер төндірсе, осы бап іске қосылады. Бұл жерде қамауға алу жазасы қаралмаған, бірақ қалтаңызды қағып алуы әбден мүмкін. Төленетін сома хаттамаға баптың қай бөлігі жазылатынына байланысты:
Стюард сөзін елемеу: егер жұп экипаждың алғашқы талабынан кейін интимдік қатынасты тоқтатудан немесе турбуленттілік кезінде орындарына отырудан бас тартса, айыппұл көлемі 3 АЕК (12 975 теңге) болады.
Камераға түсіру: егер сіз ұшақ жермен жүріп бара жатқанда, ұшу немесе қону сәтінде телефонды «авиарежимге» қоймай, процесті таспаға басуды жөн көрсеңіз, ескерту аласыз немесе 5 АЕК (21 625 теңге) айыппұл төлейсіз.
Қайталау: ұшақта мінез-құлық ережесін бұзып, бір жыл ішінде екінші рет көзге түскендер үшін айыппұл 10 АЕК-ке (43 250 теңге) дейін өседі.
566-бап — бұл ең жеңіл әрі «базалық» сценарий. Ал егер құштарлық үстінде басқа жолаушылармен жанжал туындаса не жұп әуе компаниясының мүлкіне зақым келтірсе (мысалы, дәретхананың құлпын сындырса), полиция істі бірден қамауға алу қаупі бар «Ұсақ бұзақылық» бабымен қайта саралайды.
Шетелдегі жағдай: Азия, Еуропа мен Әмірліктерде қандай жаза күтіп тұр?
Шетелде авиациялық ережелер мен жергілікті заңдар біздікінен әлдеқайда қатал, ал курортты елдердің сақшылары сезімге беріліп кеткен жұптарға түсіністік таныта қоймайды. Шетелдік тасымалдаушы орындайтын халықаралық рейсте оңашалануға тырысу не ұшақ қонар алдында тәртіп бұзу депортацияға не түрме жазасына әкеп соқтыруы мүмкін.
Түркия
Қазақстандықтар жиі баратын бұл елде қоғамдық орында (ал ұшақ салоны — бәріне ортақ ашық кеңістік) шектен шыққандады қатаң жазалайды. Түркия Қылмыстық кодексінің 225-бабына сәйкес, көпшілік алдында секспен айналысқаны не әдеп бұзып жалаңаштанғаны үшін 6 айдан 1 жылға дейін бас бостандығынан айыру жазасы қарастырылған.
БАӘ
Әмірліктерде қоғамдық мораль мәселесіне мейлінше қатал. Елдің Қылмыстық кодексінің 358-бабы бойынша, қоғамдық орында әдепсіз әрекеттер жасағаны үшін 1 000-нан 50 000 дирхамға дейін ірі көлемде айыппұл салынады. Егер жолаушылар бұл әрекет үстінде екінші рет ұсталса не экипаж бен полицияға қарсылық көрсетсе, олар 3 айға дейін қамалып, артынан елге қайта кіру құқығынан өмір бойына айырыла отырып, депортацияланады.
Тайланд
Күлкі патшалығы сырт көзге ескішілдіктен ада, еркін көрінгенімен, Қылмыстық кодекстің 388-бабы бойынша, қоғамдық орында әдепсіздік танытқандарға 5 000 THB (шамамен 72 мың KZT) дейін айыппұл салынады. Ал жұп ұшақ салонында оңашалануды ұйғарса, оның соңы күтпеген жағдайға әкелуі мүмкін. 2024 жылдың желтоқсанында Бангкоктан Цюрихке ұшқан рейсте ғашықтар ұшқыштар кабинасының алдындағы өтпелі жолда «кездесу» ұйымдастырған. Олар есік үстіне ұшқыштар қауіпсіздігі үшін камера орнатылғанын ескермеген. Нәтижесінде, олардың интимдік сәтін бақылау панеліндегі экран арқылы бүкіл экипаж тамашалаған. Кейінірек бұл кадрлар әлеуметтік желілер мен әлемдік БАҚ-қа тарап кетіп, The South China Morning Post басылымында үлкен жанжал тудырды.
Египет
Жергілікті әдеп нормаларына жеңіл қарауға болмайтын тағы бір бағыт. Египет Қылмыстық кодексінің 269 және 278-баптары «қоғамдық орында моральға қарсы әрекет жасағанды» қатаң жазалайды. Қоғамдық орында (соның ішінде ұшақ бортында) шектен шыққандар 1 жылға дейін түрме жазасын арқалауы мүмкін.
Көбіне тәртіп бұзушылар Египет түрмесіне жетпей-ақ тұтқындалуы мүмкін. Қызыл теңіз шипажайларына ұшатын рейстер ішімдікке елітіп, құштарлығы оянып кеткен жұптардың кесірінен ортада жолда шұғыл қонуға мәжбүр болады.
Мысалы, 2024 жылдың мамыр айында Хургада шипажайына бара жатқан easyJet әуе компаниясының ұшағы борттағы ғашықтардың ерсі мінез-құлқы салдарынан Грекияға шұғыл қонуға мәжбүр болды. Ираклион әуежайында тәртіп бұзушыларды жергілікті полиция алып кетті, ал бүкіл салон оларды мазақтап, масқаралап шығарып салды.
Вьетнам
Мұнда шетелдіктердің борттағы мұндай ерсі әрекеттері қоғамдық тәртіпті дөрекі түрде бұзу және жергілікті мәдениетті аяққа таптау деп қарастырылады. Мұндай саяхатшылар үшін бұл жағдай қомақты әкімшілік айыппұлмен қатар, туристік визаның күшін жоюға, жолаушылардың өз есебінен дереу депортациялануына және өмір бойына елге кіруге тыйым салынуына әкеп соғады.
АҚШ пен Еуропа
Мұнда тәртіп бұзушылар қоғамдық орында әдепсіз мінез-құлық көрсеткені үшін жазаланады. 2025 жылдың шілдесінде Коннектикуттан келген жұп Флоридаға бара жатқан ұшақ ішінде, басқа жолаушылар мен балалардың көзінше орындықта көңіл қосқан. Салдарынан ғашықтар ұшақ қонған бойда тұтқындалып, бұл оқиға жаңалықтардан көрсетілді. Ал экипажбен дауласа бастасаңыз, жағдай тіпті қиындайды. АҚШ-та бұл ұшу құрамының жұмысына килігу деп бағаланады және федералды қылмыс саналады. Жақында ғана, 2026 жылдың мамыр айында Панамадан ұшқан рейсте интимдік қатынасқа түскен бизнес-класс бағытындағы екі жолаушыны Аргентинада әуе полициясы ұшақтан алып кетті.
Әуе компанияларының жазасы
Әуежайдағы полиция тек ескертумен шектелген күннің өзінде, тасымалдаушының өз тәрбиелеу әдістері бар. Әуе компаниялары гигиена және басқа жолаушылардың жайлылығы үшін мұндай нәрселерге принципті түрде қарайды. Әлемдік әуе компанияларының көбі қолданатын шаралар мынадай:
Өмірлік банға кетеді
Құштарлығы тасып кеткен жұптарға ең жиі қолданылатын шара — мәңгілік «қара тізімге» ену. Бұдан былай сіз тасымалдаушының рейстеріне билет сатып ала алмайсыз.
Траптан полиция күтіп алады
Жолсеріктер аспанда айқай-шу шығармайды. Ұшақ командирі жердегі қызметтерге хабарлама жібереді, осылайша ұшақ қонған сәтте есік алдында тәртіп бұзушыларды полиция жасағы күтіп алады.
Жолаушылар есебінен шұғыл қонады
Егер жұптың әрекеті бортта жанжал тудырса не ұшқыштар қауіпсіздікке қатер төнді деп есептесе, ұшақ ең жақын маңдағы әуежайға қонады. Артық отын шығыны, әуежай жарналары мен ашуға мінген жүздеген жолаушыға төленетін өтемақы — 10 мың USD (шамамен 5 млн KZT) бастап — толығымен кінәлілердің мойнына артылады.
Дәретханада қайдағы романтика?
Сонымен қатар қауіпсіздік мақсатында ұшақ дәретханасының есіктері сыртынан оп-оңай ашылатынын ескеру керек. Іште екі адам ұзақ уақыт отырса, жолсеріктердің құлыпты ашуға толық құқығы бар. Осындай масқара жағдайға тап болғыңыз келмесе, тәуекел етпегеніңіз жөн.
