Ұят емес: Тайландтағы секс-туризм сырлары
Қоюға қысылып отырған сұрақтарыңызға жауап береміз.
Туристер Тайландқа жылы мұхит пен шырынды манго үшін ғана бармайды. Көпшілікті қарапайым массаждан бастап экзотикалық шоуларға дейінгі түнгі ойын-сауық қызықтырады. Біреуді сөккеннен аулақпыз. Алайда қауіпсіздік талаптарын сақтауға, қызметкерлерге құрметпен қарауға және әр мекеменің ішкі ережелерін ұстануға кеңес береміз. Бұл материалда Тайландтағы секс-индустрия қалай жұмыс істейтіні, нені ескерген дұрыс екені және оның заңдық мәртебесі қандай екені туралы кеңінен тоқталамыз.
Заң мен тәртіп
Патшалықта ресми түрде секс-индустрия жоқ: «Жезөкшеліктің алдын алу туралы» заң мұндай қызметке 1990 жылдардың ортасынан бері тыйым салады. Алайда іс жүзінде бұл заң ішінара ғана қолданылады. Туристік аймақтарда мекемелер тыныштық сақтап, салық төлеп отырған жағдайда билік оған көз жұма қарайды. Қарапайым туристің секс-қызметті сатып алғаны үшін қамауға алыну қаупі өте төмен.
Соған қарамастан, заң бойынша клиентке мың батқа дейін айыппұл (шамамен 16 мың теңге) мен бір айға дейін қамауға алу жазасы қарастырылған.
Тайландта, өзге елдердегідей, кәмелетке толмағандармен көңіл қосу — аса ауыр қылмыс. Партнері 18-ге толмаған адам (бір жылдан алты жылға дейін не одан да ұзақ мерзімге) бас бостандығынан айырылады және тергеу аяқталғанға дейін елден шығарылмайды.
Қызық іздейтін жерлер
Таиландтың ірі қалалары мен аралдарының бәрінде мұндай қызмет түрлері бар, алайда туристер ең жиі баратын бірнеше негізгі орталық қалыптасқан.
Паттайя
Тып-тыныш, отбасылық демалысқа келген болсаңыз, бұл қала көңіліңізден шықпауы мүмкін. Қаланың басты көшесі — Walking Street — күн батқаннан кейін неон шамдары жарқыраған, гоу-гоу барлар тізілген, адам ығы-жығы ұзын дәлізге айналады.
Ал біршама тыныш, бағасы қолжетімді нұсқаны қаласаңыз, Beach Road жағына барған жөн. Жағалау бойында, пальмалар көлеңкесінде, өз бетімен жұмыс істейтін фрилансерлер қызмет ұсынады. Мұндағы баға Walking Street-тегі барларға қарағанда төменірек, бірақ қауіп те көбірек. «Алтын ортаны» іздегендер үшін Жағалау мен Екінші көшенің арасындағы шағын бұрылыстар (сои) бар. Соның бірі — Soi 6: бұл көше түгелдей шағын барлардан тұрады және бағасы салыстырмалы түрде қолжетімді.
Бангкок
Астанада бұл индустрия бір жерде шоғырланбаған, бірнеше ірі кварталға бөлініп орналасқан. Ең танымал орын — Nana Plaza. Үш қабатты бұл кешенді мұндағы жұрт «ересектерге арналған әлемдегі ең үлкен ойын алаңы» дейді. Мұнда неше түрлі гоу-гоу бар жұмыс істейді.
Екінші маңызды аймақ — Soi Cowboy. Қызыл неонға малынған қысқа көше «Мальчишник в Вегасе–2» фильмінен кейін тіпті кеңінен танылды. Бұл жер туристерге бейімделген: көпшілік мұнда сыра ішіп, би көріп қайту үшін келеді. Жапон стиліндегі караоке-барлар мен премиум санаттағы массаж салондарын іздегендер үшін Patpong және Huai Khwang аудандары бар. Бұл жерлердегі қызмет ауқатты аудиторияға бағытталған.
Пхукет
Тайландтағы ең танымал аралда түнгі өмірдің қызатын орталығы — Патонг жағажайы маңы. Bangla Road көшесі — Паттайядағы Walking Street-тің шағын нұсқасы іспетті. Мұнда бәрі аралас: кәдімгі отбасылық мейрамханалар үстелде билейтін қыздары бар барлармен қатар орналасқан.
Негізгі гоу-гоу орындары көбіне шағын бұрылыстар ішінде жасырынған. Пхукетте баға әдетте Паттайя мен Бангкокке қарағанда жоғары: ұзақ уақытқа серіктес жалдау құны маусымға қарай сағатына екі мың баттан (шамамен 30 мың теңге) басталып, одан да қымбаттауы мүмкін.
Қызмет түрлері мен бағасы
Эротик массаж (боди массаж)
Қанша тұрады: бір сеанстың бағасы 1 500–3 500 бат аралығында (23–54 мың теңге). Егер жыныстық қызмет қажет болмаса, бірден нақтылап алған дұрыс.
«Thai Massage» деген жазуы бар кәдімгі салондарда массажист киімін шешпейді, негізгі екпін бұлшық еттер мен буындарға түседі — бұл әдепті, классикалық орындар. Ал боди-массаж салондарында жақынырақ физикалық байланыс көзделеді. Әдетте бұлар — витринасы «аквариум» үлгісінде жасалған ірі мекемелер, онда қызмет көрсетушіні нөмірі бойынша таңдауға болады.
Пинг-понг шоу
Қанша тұрады: кіру құны 1 000 баттан басталады (шамамен 15 мың теңге). Көбіне бұл бағаға бір сусын да кіреді.
Кешкі шоулардың ерекше санатында әйелдер жамбас бұлшықеттерін пайдаланып бөтелке ашу, темекі ұстау не үстел теннисінің шарларын ату сияқты нөмірлер көрсетеді.
Гоу-гоу барлар
Гоу-гоу барларда әртістер подиумда би билейді, ал келушілер коктейль ішіп отырып, соны тамашалайды. Егер біреу ұнап қалса, әдетте Lady Drink — яғни әртіске арналған сусын сатып алу дәстүрі бар. Бұл — әңгімені жалғастыруға мүмкіндік беретін ишара. Ал биші қызды ауысымы аяқталмай тұрып өзіңізбен бірге алып кеткіңіз келсе, Bar Fine төлеуге тура келеді. Бұл — қызметкердің жұмыс орнын уақытша тастап кетуі үшін мекеме кассасына төленетін белгіленген сома.
Секс-қызметтер: шорт және лонг
Секс-қызмет көрсетушілерді барлардан да, тікелей жағалаудан да кездестіруге болады. Шарттарды келісу үшін көбіне калькулятор не қарапайым ағылшын тілі жеткілікті. Кездесулер әдетте Short Time (қысқа) және Long Time (ұзақ) болып бөлінеді.
Қысқа кездесу бір-екі сағатқа созылып, бағасы 600–2 500 бат аралығында (9–39 мың теңге) болады. Ал Long Time форматында серіктес түнге немесе бірнеше күнге қалады, кейде аударма жасап, қала ішінде бағыт-бағдар беруге көмектеседі. Мұндай қызметтің құны тәулігіне мың баттан (шамамен 15 мың теңге) басталады. Бұл ретте тамақ, такси, қонақүй сияқты барлық қосымша шығынды клиент өтейді.
Қауіпсіздік ережесі
Демалыста басыңыз бәлеге қалмас үшін негізгі ережелерді біліп алыңыз.
- Қандай жағдай болмасын, презерватив қолданыңыз. Партнер денсаулығы туралы анықтама көрсетсе де, орал қатынас кезінде де қорғану құралын пайдаланған дұрыс.
- Ешқашан ақшаны алдын ала толық беріп тастамаңыз: көшедегі делдалдар депозит сұраса, алаяқ болуы әбден мүмкін. Төлемді қызмет көрсетілгеннен кейін жасаған жөн.
- Кездесуді бейтарап аумақта ұйымдастырған дұрыс. Мысалы, бірер сағатқа берілетін қонақүйге барыңыздар. Құжаттар мен бағалы заттар сақталған жеке нөміріңізге бейтаныс адамды ертіп барған қауіпті болуы мүмкін.
- Барлық шарт пен соңғы бағаны алдын ала нақтылап алыңыз — әйтпесе есеп бірнеше есе өсіп кетуі мүмкін.
- Серіктестің биологиялық жынысын сұраудан қысылмаңыз. Тайландта трансгендер адам көп, сондықтан мұндай сұрақ қалыпты тәжірибе саналады.
Секс-қызмет көрсететін қыз-жігіттерге құрметпен қараңыз:
- Ешқашан дауыс көтермеңіз, айқайламаңыз және секс-қызмет көрсетушілерге дөрекілік танытпаңыз. Қызмет көңіліңізден шықпаса, себебін сабырмен түсіндіріп, кездесуді сыпайы түрде аяқтаңыз. Тәкаппарлықтан гөрі сабыр мен жылы жымиыс кез келген мәселені әлдеқайда тиімді шешеді.
- Көптеген гоу-гоу барда, секс-шоу мен массаж салонда камера қатаң тыйым салынған. Бұл — қызметкерлердің құпиялығы мен қауіпсіздігіне қатысты талап. Сторис түсіруге не байқатпай кадр жасауға тырыспаңыз. Мұндай орындарда күзет кәсіби түрде жұмыс істейді: жоқ дегенде барлық материалды өшіртіп, ескерту жасайды, артынша айыппұл төлетіп не клубтан шығарып, қайта кіруге тыйым салуы мүмкін.
- Анық әрі өзара келісім қағидатын ұмытпаңыз. Клубта ақша төлегеніңіз немесе көшеде бағаға келіскеніңіз сізге шексіз еркіндік бермейді. Партнер белгілі бір әрекетке «жоқ» десе, демек «жоқ» дегені.
Мынаны да біле жүріңіз
Қызметкердің көбіне бұл жол — таңдап келген саласы емес, отбасын асыраудың жалғыз амалы. Үкіметтік емес ұйымдардың зерттеулеріне (мысалы, Empower Foundation) сүйенсек, секс-қызмет көрсетушілердің басым бөлігі елдің солтүстігі мен солтүстік-шығысындағы кедей аграрлық өңірлерден (Исан) шыққан. Олардың қатарында көрші Мьянма мен Лаос елдерінен келген мигранттар да бар.
Тайландта жезөкшелік ресми түрде тыйым салынғандықтан, бұл сала «көлеңкелі аймақта» қалып отыр. Соның салдарынан қызметкерлер базалық құқықтық қорғаныстан қағылады: олар заңды түрде кәсіподақ құра алмайды, көбінде медициналық сақтандыруы жоқ әрі заң бұзғыш жұмыс берушілер мен жемқор құрылымдарға тәуелді. Секс-қызметке жүгінбес бұрын осы шындықты түсінген маңызды.
Жиі қойылатын сұрақтарға жауап
Ледибойды қалай ажыратуға болады?
Олар туристік аймақтарда өте көп. Егер күмәныңыз болса, бойына, аяқ киім өлшеміне немесе жұтқыншағының (кеңірдек) бар-жоғына мән беруге болады. Дегенмен ең сенімді жолы — сыпайы ғана сұрай салу.
Фаранг деген кім?
Бұл — тайлықтардың ақ нәсілді шетелдіктерге қарата айтатын сөзі. Әдетте бұл сөз бейтарап мағынада қолданылады және ешқандай балағат немесе қорлық мәні жоқ.
Бұл заңсыз емес пе?
Проституцияға ресми түрде тыйым салынғанымен, егер ол жерде есірткі немесе кәмелетке толмағандар болмаса, полиция мекемелердің жұмысына сирек араласады. Соған қарамастан, әрдайым өзіңізді лайықты ұстап, қоғамдық тәртіпті бұзбаған абзал.
Секс-қызметтер денсаулыққа зиян емес пе?
Тәуекел қашанда бар. Ресми клубтарда қызметкерлер тексерістен өтіп тұрады, бірақ бұл 100% кепілдік бермейді. Абай болыңыз және жыныстық жолмен жұғатын инфекциялардан (ЖЖЖИ) қорғану құралдарын қолданыңыз.
