Паттайя жақсы ма, Пхукет пе: Таиландтағы танымал екі жер
Бастысы таңдауда қателеспеңіз, сонда саяхатыңыз өзіңіз армандағандай керемет өтеді.
Бір рет болсын «Таиландтағы демалыс» деп іздеп көрген шығарсыз. Сонда Пхукет жақсы ма, әлде Паттайя ма деген даулы сұрақ алдыңыздан шығады. Бұл жердің бірінде дос-жараның көп думанды кеште жүргендей боласың, екіншісінде тыныш та тұмса табиғат аясында жаның жай табады. Екеуі де жақсы, бірақ әсері әр түрлі. Демалысыңыз ойдағыдай өтуі үшін екі жерді талдап, нұсқаулық дайындадық. Қайсысы көбірек ұнаса, соны таңдаңыз.
Аралдағы демалыс vs қаладағы қаңғырыс
Пху… Патта… деп отырған хабарсыз оқырманға түсіндіре кетейік. Пхукет — арал. Онда тропик табиғаттың жауһарлары бар: пальмалар, ну орман жамылған таулар және құлаққа ұрған танадай тыныштық. Әрине, Патонгта (ең танымал жағажайда) адам қарасы көп, бірақ бірнеше шақырым ұзасаңыз, оңаша жерге жетіп, күн батардағы ұмытылмас көрініске және толықтай дзенге бөленген әлемге тап боласыз. Сонымен қатар Пхукет — Андаман теңізін зерттеймін дегендерге жолын бастайтын мінсіз нүкте. Мұндағы ең көрікті жерлер — аралдар, шығанақтар мен ұлттық парктер сияқты табиғи сұлулық.
Ал Паттайя — құрлықтағы курорт қала. Мұнда аралға тән ерекше тыныс жоқ, есесіне үлкен қаланың күні-түні тыным таппайтын тіршілігі бар. Бұл — гедонистерге, экстраверттерге және жағажайда жата беруден тез жалығатындарға арналған таптырмас мекен. Қаласаңыз, тып-тыныш демалатын жерді де табуға болады, мысалы, Джомтьен немесе Пратамнак аудандарына барыңыз, бірақ жалпы атмосферасы қозғалыс пен қуатқа толы. Паттайяның үлкен артықшылығы — құрлықта орналасқаны. Мұндағы көрікті орындардың көбі — арнаулы бағыттардағы саябақтар, мәдени нысандар мен бақтар, оларға оңай жетесіз.
Сізге қайсысы қызығырақ екенін анықтап алсақ, әр бағыт туралы жеке-жеке айтып берейік.
Пхукетті аралайық: дзен, джунгли және жұмақ жағалау
Пхукет — үлкен, жап-жасыл әрі алуан түрлі арал. Демалыстың тамаша өтуіне 80 пайыз әсер ететін — нақты қай ауданда тұратыныңыз. Егер қызыққұмар болсаңыз, Патонгіге бет алыңыз. Онда түнгі өмірдің эпицентрі саналатын Бангла Роуд көшесі бар, мұны жергілікті Лас-Вегас деп те атайды. Ал әдемі жағажайларда су кешіп, жайлы кафелерде ас ішіп, түнде тыныш ұйықтағыңыз келсе, Карон не Ката ауданындағы қонақүйлерді таңдаңыз. Мұндағы жағалауда сусап тұратын алтын құмда жүресіз; отбасы болып демалуға бар жағдай жасалған. Эстетикаға жақын әрі асықпай серуендегенді ұнататындарға Пхукет-таун бар: түрлі-түсті қытай-португал үйлері, стрит-арт және аралдағы ең үздік жексенбілік базар осында. Атмосфераны сезіну үшін ең көп суретке түсірілетін Soi Romanee көшесін аралап көріңіз. Ал жергілікті колоритті сезініп, жаңа ауланған теңіз өнімдерінің дәмін тату үшін оңтүстіктегі Равай ауданына барыңыз.
Аралдың түр-түрі бар
Пхукетте ондаған жағажай бар, оны көңіл-күйіңізге қарай таңдайсыз. Тура төбеңізден ұшақ ұшып өтіп бара жатқан фотоға түскіңіз келсе, Май Кхаоға барыңыз. Егер тыныштық іздесеңіз, Най Тонды таңдаңыз: ұлттық парк жанындағы кісі көп келмейтін жағажай, снорклингке таптырмас орын. «Қымбат та сәнді» атмосфераны сезініп, әдемі толқындарда фотосессия жасағыңыз келсе, Сурин сізге ұнары анық. Тек абай болыңыз: мұнда суға түсу қауіпті болуы мүмкін, өйткені кері ағын мен биік толқындар болады. Ал көп ешкім білмейтін құпия жерді іздесеңіз, Нуи жағажайына барыңыз: ол жаққа тек жол талғамайтын көлікпен жетесіз әрі кіру үшін ақы төлеу керек, бірақ онысы ақталады. Адам санаулы жүретін жағажайда алаңсыз демаласыз.
Тамақ пен кофе: том-ямнан басқа не бар?
Көрікті дастарқан жайылған сәнді мейрамханаларды ұмыта тұрыңыз, Пхукеттің нағыз гастрономиясы — түнгі базарларда. Бірақ аралдың төл дәмін шынымен сезіну үшін өзіңіз жақсы білетін том-яммен және пад-таймен шектелмеңіз. Міндетті түрде Патонгтағы Banzaan Market-ке соғып көріңіз: мұнда сіз қуырылған асшаян, кальмар және, әрине, тай асханасының басты десерті — манго мен жабысқақ күріштен дәм татып көре аласыз. Сондай-ақ Қытайдан шыққан асшаян қосылған қуырма лапша — ми хоккиенді немесе малай асханасының әсері сезілетін картоп пен жержаңғақ қосылған тойымды массаман-карриден ауыз тиіп көріңіз.
Дәмі тіл үйірер пад-тай іздесеңіз, көпшілік Карондағы көзге түсе бермейтін The Pad Thai Shop кафесіне баруды ұсынады, ал Мишлен гидінде мадақталған ерекше кеспе мен шошқа еті қосылған сорпаны ішкіңіз келсе, Пхукет-таундағы Go Benz-ке соғыңыз. Инстаграмға суретке түсетін көрікті орын іздесеңіз, Пхукеттегі Ma Doo Bua кафесіне барып, алып тұңғиық гүлінің үстінде суретке түсуді ұмытпаңыз.
Аралдың гастрономиялық ерекшеліктері жайлы толығырақ Пхукеттегі асханаларға арналған нұсқаулығымыздан оқи аласыз.
Жағажайдан жалықсаңыз
Құмда жата бергеннен шаршасаңыз, Пхукетте көруге тұрарлық талай нәрсе бар. Міндетті бағдарламаға 45 метрлік Үлкен Будда тұрған төбеге көтерілу мен Ват Чалонг ғибадатхана кешеніне бару кіреді. Ең әдемі көріністерге шолу алаңдарында куә боласыз. Көпшілік баратын Промтхеп мүйісінен бөлек, соның жанында тұрған Windmill Viewpoint-ке соғып көріңіз, ол жерде адам аздау. Ал тауға шығудан тартынбайтындар аралдың панорамасын тамашалайтын Black Rock Viewpoint-қа бара алады.
Пхукеттегі ерекше дәстүрдің бірі — күннің батқанын тамашалау. Ең танымал әрі әсем орын — аралдың оңтүстігіндегі Промтхеп мүйісі. Ал шағын жер, тыныш атмосфераны қаласаңыз, төбедегі Laemsai Cup кафесіне барыңыз немесе Сурин жағажайының құмына отыра кетсеңіз жеткілікті. Кеш түскен соң түнгі өмір басталады: от шоуын әйгілі KYMA жағажай барында коктейль ішіп отырып көріңіз немесе Таиландтағы ең үздік клубтардың бірі саналатын Illuzion Club-қа барып, билеп көңіл көтеріңіз.
Паттайяны аралайық: неон, драйв пен еркіндік
Паттайя — той-думанның қаласы. Өмір қайнаған, шу мен даңғазасы көп, кейде тіпті ессіздеу жер. Мұнда адамдар жағажайда тынығу үшін емес, шексіз еркіндік сыйлайтын эмоцияны сезінуге келеді.
Көңіл көтерудің эпицентрі — атақты Walking Street орналасқан Орталық Паттайя. Ал күндіз у-шудың қақ ортасында болып, түнде тыныш ұйықтағыңыз келсе, оңтүстіктегі Джомтьен не Пратамнак аудандарын таңдаңыз. Мұнда жағажай үлкенірек әрі таза, атмосферасы да жайлы. Жергілікті колорит пен бірегейлікті тану үшін солтүстіктегі Наклуа ауданына барыңыз — онда балық базары мен қаланың негізгі мәдени жауһарларын табасыз.
Тамақ: стритфуд
Паттайяда ішіп-жем арзан, дәмді тамақты тәулік бойы табуға болады. Кешке қарай көшелер алып «дөңгелекті фуд-кортқа» айналып шыға келеді, ал Thepprasit сияқты түнгі базарларда қалаған тағамның бәрін табуға болады. Бірегей төл дәмнен дәм татқыңыз келсе, Boat Noodles деген жазуы бар шағын кафеге кіріңіз — мұнда қою әрі дәмді кеспе көже дайындайды. Ал интерактив тәжірибе іздесеңіз, «швед үстелі» үлгісіндегі гриль-барға барыңыз (мысалы, Ninja BBQ). Белгіленген бағаға сізге теңіз өнімдері, ет пен көкөністерді қалағаныңызша жейсіз әрі олардың барлығын үстеліңіздің үстіндегі грильде өзіңіз қуырасыз.
Көңіл көтеру: храм да, кабаре-шоу да бар
Паттайядағы ойын-сауық оның алып-ұшқан мінезіндей. Кешке бір рет болса да неонды Вавилонға айналатын Walking Street көшесімен серуендеп көріңіз. Күндіз міндетті түрде 100 метрден асатын биіктіктегі ағаштан тұрғызылған ғаламат ғибадатхана — Шындық Храмына барыңыз. Қаланы биіктен тамашалау үшін Пратамнак төбесіндегі шолу алаңына көтеріліңіз. Мұнда шығанақ пен Паттайяның ең әдемі панорамасы көрінеді.
Паттайяда массаж жасату міндетті рәсім саналады әрі бағасы да Таиландтағы ең арзан жерлердің бірі. Көптеген салонда бір сағаттық тай массажы немесе аяқ массажы шамамен 200 бат (шамамен 3 500 теңге) тұрады. Ал маймен жасалатын массаж (oil massage) сәл қымбаттау — 300 баттай (шамамен 5 100 теңге). Арнайы іздеудің қажеті жоқ — массаж салондары іздемей-ақ алдыңыздан шығады.
Қаланың у-шуынан шаршасаңыз, ашық аспан астындағы Кхао Кхео зообағына барыңыз. Бұл — жануарлар табиғи ортасына жақын жағдайда еркін жүретін алып кеңістік. Кіреберісте гольф-кар жалдап алған дұрыс, сонда бүкіл аумақты аралап шығып, жирафтарға не мүйізтұмсыққа жем бере аласыз. Ал таза суда шомылғыңыз келсе, сізге көршілес Ко Лан немесе Самет аралдарына тартып кетіңіз.
Қорыта айтқанда
Пхукет пен Паттайяның бірін жақсы мен жаманды ажырату үшін емес, көңіл-күйге байланысты таңдаңыз. Пхукет — қарбаластан қашатын, табиғаттан ләззат алып, күн батарда жаныңыз жай тауып, тыныштықта тынығатын арал. Ал Паттайя — ешқашан дамыл таппайтын, қуатты энергия сыйлайтын әрі Таиландта зерікпейтініңді дәлелдейтін думанды қала.
Бастысы таңдауда қателеспеңіз, сонда саяхатыңыз өзіңіз армандағандай керемет өтеді. Таиланд таңғалдыруға шебер екенін ұмытпаңыз: тыныш жағажайды да, неон шамдары жарқыраған көшені де таңдасаңыз — еш өкінбейсіз.
