Жапонияны велосипедпен араладық: Шиманами Кайдо бағытын қалай жүріп өтуге болады?
Велосипед, көпірлер мен лимон кекстері.
Сәлем! Менің атым — Ақерке. Осы жылы қыркүйекте күйеуім екеуіміз Жапонияда велосипедпен 70 шақырым жүріп өттік. Бәрі бір күні Instagram-нан Shimanami Kaido туралы рилс көргенімнен басталды. Бұл — асфальтқа көк сызық сызылған велосипед маршруты. Өзім велосипедті көп теппеймін, оның үстіне машиналар жүретін жолға шығудан қатты қорқамын. Соған қарамастан, Жапонияға сапарымызға осы бағытты да қосуды шештік.
Шиманами Кайдо бағытын Имабари қаласынан бастап, Ономитиде аяқтауға не керісінше жүріп өтуге де болады. Біз Имабариден бастадық. Жолдағы көк сызық мәреге дейін бағыт көрсетіп отырады, сондықтан телефондағы картаны қайта-қайта қараудың қажеті жоқ. Біз 70 шақырымды екі күнде жүріп өттік. Шиманами Кайдо велосипедті көп теппейтін адамдарға да қолайлы екен. Бұл сапар Жапониядағы естен кетпес шағын саяхатқа айналды.
Имабариге қалай жеттік?
Біз Жапонияны біраз аралаймыз деп жоспарлағандықтан, велосипедпен жүруге екі күн ғана бөлдік.
Визаны шілденің басында рәсімдедік. Қазақстанда Жапония визасына құжатты тек Астанада қабылдайды. Бірақ рәсімдеген қиын емес: сайтта бәрі түсінікті жазылған, сұхбаттан өтудің қажеті жоқ, ең бастысы — визаға өтініш беру тегін. Жауабы тура бір аптадан кейін келеді. Астанаға өзіңіз бара алмасаңыз, сенімхат рәсімдеп, басқа адамға құжаттарыңызды тапсырып, дайын болғанда алып кетуді тапсыра аласыз.
Жапониядағы саяхатымыз Токиодан басталды. Ол жақтан Окинаваға, кейін Имабариге ең жақын әуежай орналасқан Мацуяма қаласына ұштық. Мацуямадан бірден Имабариге пойызбен жеттік. Өйткені келесі күні таңертең Шиманами Кайдо бағытымен жолға шығуымыз керек еді.
Жолды алдын ала жоспарлап алған дұрыс. Велосипед бағыты басталатын Имабари мен Ономитиге пойызбен жету ыңғайлы. Бірақ нақты қай жолды таңдайтыныңыз қай қаладан келетініңізге және одан кейін қайда баратыныңызға байланысты.
Велосипедті қалай таңдадық?
- Имабаридегі моторлы велосипед
Имабари мен Ономитиде велосипед жалға беретін орындар бар. Бір қаладан велосипед алып, екіншісіне жеткенде тапсыра аласыз. Моторы бар велосипедті сапарға кемінде үш күн қалғанда жалға беру сервисінің ресми сайтынан брондап қойған дұрыс.
Мұнда велосипедтің бірнеше түрі бар: кросс-байк (cross bike), педаль басқанда көмектесетін моторы бар велосипед (battery-assisted), электрлі велосипед (e-bike) және қала ішінде жүруге арналған кәдімгі велосипед (city bike). E-bike велосипедін бір күнге ғана береді, ал қалғандарын бірнеше күнге жалға алуға болады.
Біз моторы бар велосипед таңдадық. Оған екі себеп болды.
Біріншісі — жолдың ойлы-қырлы болғаны. Екеуіміз де спортпен айналысамыз, бірақ велосипед спортымен шұғылданбаймыз. Бұл бағытта 70 шақырым жүргеннен гөрі көпірлерге көтерілген қиындау. Өйткені көпірлер теңізден едәуір биікте орналасқан. Әр көпірдің алдында ұзақ өрге шығасыз, ал көпірден кейін төмен қарай түсесіз. Мотордың көмегімен қатты шаршамадық. Кросс-байк алсақ, әлдеқайда көп күш жұмсайтын едік.
Екіншісі — жүк. Мұндай велосипедтердің алдында себет бар. Біз жолды екі күнге бөліп, аралдардың бірінде түнейміз деп жоспарладық. Сондықтан өзімізбен бірге шағын сөмкелер алған едік. Оларды арқалап жүргеннен гөрі велосипедтің себетіне салып қойған әлдеқайда ыңғайлы болды.
Моторы бар велосипедті жалға алу тәулігіне 4000 иен тұрады. Екі велосипедті екі күнге жалдауға 16 000 иен төледік. Біз барған кезде бір иен шамамен үш теңге еді. Сонда велосипед жалдауға әрқайсымыз 24 мың теңгедей жұмсадық. Ал кәдімгі велосипедтің бір күндік жалдау ақысы — 3000 иен.
Көк сызық пен велосипедшілерге жасалған жағдай
Шиманами Кайдо — жай ғана велосипедпен ұзақ жол жүріп, өзіңді сынайтын бағыт емес. Жолдағы әр аралдың өз ерекшелігі бар. Қалалары, тағамдары, ғибадатханалары мен музейлері де әртүрлі. Әр қалада өзіне тән маскот, яғни қаланың символына айналған кейіпкер бар. Комбини деп аталатын тәулік бойы жұмыс істейтін шағын дүкендердегі тауарлар да, кәдесыйлар да өзгеше. Оларға қарап-ақ өңірдің немен танымал екенін білуге болады: бір жердің ауыл шаруашылығы дамыған, енді бір жер өндіріс не тарихын мақтан тұтады.
Бір кеңесім бар: Жапонияда тегін таратылатын буклеттердің бәрін ала жүріңіз. Олар өте әдемі әрі пайдалы ақпаратқа толы. Мен біздің велосипед бағытымыз туралы жақсы гидті Имабаридегі қонақүйден таптым.
- Теңіз жағалауымен созылған көгілдір сызық
- Жол үстіндегі көпір
- Имабари туралы брошюраның беті
- Имабаридегі қонақүйден алынған бағдар туралы брошюра
- Мацуяма әуежайындағы маскот
Біз күн батқанша жетпей қаламыз ба деп қорқып, көк сызықтан ауытқымадық. Бірақ негізгі жолдың бойында да қызық жер көп екен. Ғибадатханалар, кофеханалар, әдемі көрінісі бар демалыс орындары кездесіп отырды. Келесі жолы барсам, әр аралға тоқтап, асықпай аралап шығар едім.
- Сетодадағы Shishi Lemon маскоты бейнеленген плакат
- Эхименің цитрус желесі
- Сусын автоматы мен көрсеткіш: Ономитиге дейін 63 км
- Көрсеткіш: Ономитиге дейін 50 км
- Татара көпірінің жанындағы лимон пішінді орындық
Велосипедшілерге бар жағдай жасалған. Жапонияда бұл таңғаларлық нәрсе емес.
- Жол басталатын жерде қонақүй мен велосипед жалдайтын орынды оңай табасыз.
- Велосипедпен бірге шлем береді, жол жүру ережелерін анық түсіндіреді.
- Жақын жерде спорт дүкендері бар. Мен солардың бірінен велосипед тебуге арналған арнайы шорты сатып алдым.
- Жол бойында Cycle Oasis деп аталатын 140-қа жуық демалыс орны бар. Онда су, дәретхана, көбіне сусын сататын автоматтар да ұшырасады. Автоматтағы су бағасы қаладағыдай, туристер өтеді деп қымбатқа сатпайды. Мысалы, жарты литр сусын шамамен 350–500 теңге тұрды.
Асфальттағы көк сызық келесі қалаға қанша шақырым қалғанын да көрсетіп отырады. Ал жүргізушілер бұл жолда велосипедшілер көп жүретінін білетіндіктен, өте абайлап жүреді.
Аралдағы өмір: окономияки мен қонақүйдегі мысық
- Порттағы «Сетодаға қош келдіңіз» жазуы
- Сетодадағы велосипедтердің жанында жатқан мысық
- Сетода жағалауында
- Сетода жағалауында
- Жолдың екінші күніндегі көпір
Шамамен 40 шақырым жүрген соң Икучидзима аралындағы Сетода қалашығына жетіп, сонда түнедік. Жолда бір префектурадан екіншісіне өткеніміз де қызық болды. Эхиме префектурасынан шығып, Хиросимаға кірдік. Бұл туралы асфальтқа сүйкімді жазу жазылып қойыпты.
Сетодада алдын ала Booking арқылы брондаған Bed&Cafe Onzo қонақүйіне орналастық. Бір түнге 34 мың теңге төледік.
Бізді қонақүйдің иесі емес, мысық қарсы алды. Сөйтсек қонақүй иесі гестхаусты сол мысықтың құрметіне атаған екен. Иесі бізге бөлмемізді мұқият көрсетіп шықты. Кешкі ас ішуге болатын орындардың тізімін, олардың жұмыс уақытын берді. Жергілікті лимон кекстерін қайдан сатып алуға болатынын да айтты. Ал қоштасарда бізге қазақша «рақмет» деді.
- Окономияки және жергілікті шарап
- Сетодадағы таңғы ас
- Сетоданың лимон кексі
Кешке қалашықты араладық. Жағалаудағы кішкентай шаяндарды тамашалап, жергілікті шараптан дәм таттық. Кешкі асқа окономияки жедік. Бұл — қырыққабат, ет не теңіз өнімдері қосылатын жапон құймағы. Хиросима тәсілімен дайындағанда қоспаларды қабаттап салып, кеспе қосады. Ал Осакадағы классикалық түрінде бәрін қамырмен араластырады.
Келесі күні таңертең таңғы ас ішіп, әлгі лимон кекстерін сатып алдық та, жолымызды жалғастырдық. Кейін бір қорабын алмағанымызға қатты өкіндік. Дәмі керемет екен!
Мәреге жеттік!
- Соңғы жол бөлігіндегі көпір
- Теңіз жағасындағы демалыс
Қалған 30 шақырымды оп-оңай жүріп өттік. Бірінші күннен кейін денеміз велосипедке үйреніп кеткен сияқты.
Соңғы нүкте — Ономитиге жету үшін Мукаисима аралынан паромға отыру керек. Пароммен бар болғаны бес минут жүзесіз, ал велосипедпен бірге билет шамамен 110 иен тұрады. Арал мен қаланы көпір де жалғап тұр. Бірақ ол көпірде велосипед жолы жоқ. Сондықтан велосипедшілерге пароммен өткен дұрыс деп кеңес береді.
Паромда ұзақ болған жоқпыз. Соның өзінде айналаның әдемілігін тамашалап, жүріп өткен жолымызды ой елегінен өткізіп үлгердік. Ономитиге жеткен соң велосипедтерді тапсырдық. Оған бар болғаны он минут кетті.
- Ономитиге бара жатқан паромда
- Ономитидегі мәре селфиі
Велосипед жалдайтын жерден шығып, жаяу кетіп бара жатқанда көзіме жас келді.
Жол бойы өзіме «Осы көріністердің бәрін есіңде сақта, ұмытып қалма» деп қайталай бердім. Бірақ адам миы мұндай сұлулықтың бәрін егжей-тегжейлі есте сақтай алмайды екен. Сол сәтте қолыңда бар ең қымбат нәрсе — дәл қазір болып жатқан сәт екенін түсінесің. Бұл саяхат маған әр сәттің қадірін білудің қаншалықты маңызды екенін тағы бір еске салды.
Саяхатқа қанша ақша жұмсадық?
Велосипедпен жүрген екі күнде жоспардан тыс шығынымыз болған жоқ. Екеуіміздің жұмсаған ақшамызды есептеп шықтық.
- Имабаридегі қонақүй: бір түнге 22 мың теңге.
- Сетодадағы қонақүй: бір түнге 34 мың теңге.
- Тамақ: түскі және кешкі ас, таңғы ас, кофе мен сусындарға 50 мың теңгеге дейін.
- Велосипед жалдау: екі велосипедті екі күнге жалдауға шамамен 48 мың теңге.
- Кәдесыйлар: өзімізге екі футболка, сыйлыққа үш магнит алуға 30–40 мың теңге.
Бұл бағытқа табиғаты мен көпірлері үшін-ақ баруға болады. Әсіресе өрге көтеріліп, төмен қарай түскен сәттер есімде қалды. Велосипедшілерге машиналардан бөлек арнайы жолдар жасалған. Ағаштардың көлеңкесінде велосипед теуіп келе жатасың, айнала тып-тыныш. Бір кезде алдыңыздан теңіз шығады…
