Қазақстандықтар Жапонияға визаны қалай алады? Негізгі сұрақтарға нақты жауаптар
Құжаттарды өзіңіз реттеп, виза агенттігіне кететін шығынды үнемдеңіз.
Сәуір келсе, желіде Жапонияда гүлдеген сакураның суреттері қаптап кетеді. Осы бір ғажап көріністі өз көзімен көрмекке әлемнің әр бұрышынан туристер ағылады. Жапонияның туристік визасы тегін рәсімделеді әрі оны алу Шенген не АҚШ визасын алғаннан әлдеқайда жеңіл екенін сіздің де білгеніңіз жөн.
Анкетаны дұрыс толтырып, визаны алғашқы өтініштен-ақ қалай алуға болатынын түсіндіретін толымды нұсқаулық жазып шықтық. Бұл мақаланы сакура көргісі келіп жүрген достарыңызға да жіберіп қойыңыз.
- Қазақстандықтар Жапонияға виза алуы керек пе?
- Жапонияға кірерде берілетін туристік виза түрлері
- Жапония визасына қандай құжаттар тапсыру керек?
- Қазақстанда Жапония визасына құжаттарды қайда тапсыруға болады?
- Визаға өтінішті өз бетіңізше қалай тапсыруға болады?
- Жапония визасына арналған анкетаны қалай толтыру керек?
- Жапония визасы қанша тұрады?
- Рәсімдеу мен жарамдылық мерзімдері
- Неге виза бермей қою мүмкін?
- Жиі қойылатын сұрақтар
Қазақстандықтар Жапонияға виза алуы керек пе?
Иә, Қазақстан азаматтарына Жапонияға виза міндетті. Турист ретінде, іскерлік кездесуге, оқуға не туыстарға қонаққа — қандай мақсатпен бара жатсаңыз да, виза рәсімдеуіңіз керек.
Жапония визасын рәсімдеу тәртібі басқа көп елмен салыстырғанда қарапайым әрі шығыны аз саналады. Ең басты талап — құжаттарды мұқият дайындап, сапар жоспарын шынайы әрі анық көрсету.
Жапонияға кірерде берілетін туристік виза түрлері
Құжат жинауды бастамас бұрын, ең алдымен қандай виза түрі керек екенін анықтап алған жөн. Саяхатшыларда негізінен екі таңдау бар.
- Бір реттік туристік виза. Ең кең тараған түрі. Бұл виза Жапонияға бір рет кіруге мүмкіндік береді және әдетте 15 немесе 30 күнге дейінгі мерзімге беріледі. Визаның жарамдылық мерзімі — берілген күннен бастап үш ай. Яғни, осы 90 күн ішінде Жапония шекарасынан өтіп үлгеруіңіз керек, әйтпесе виза күшін жояды.
- Көп реттік виза (мультивиза). Бұл виза Жапонияға жыл ішінде, үш жыл немесе тіпті бес жыл бойы бірнеше рет баруға мүмкіндік береді. Бірақ оны алған қиындау: өтініш беруші тұрақты әрі жоғары табысын растауы керек, кейінгі жылдары Жапонияға барып келгенін және ел заңдарын бұзбағанын дәлелдеуі қажет. Сондай-ақ Жапонияда тұратын адамның шақыруы болса, мультивиза алуға көмегі тиюі мүмкін.
Жапония визасына қандай құжаттар тапсыру керек?
Виза алу-алмауыңызға құжаттарды қаншалықты дұрыс әрі толық жинағаныңыз қатты әсер етеді. Жапония елшілігі анкета толтырудағы дәлдікке және ұсынылатын анықтамалардың өзектілігіне мұқият қарайды.
Негізгі құжаттар пакеті
Төменде елшілікке тапсыруға тиіс негізгі құжаттардың толық тізімі берілген. Кей жағдайда консул қосымша растау құжаттарын да сұратуы мүмкін. Толық әрі нақты ақпаратты Жапония елшілігінің сайтынан көруге болады.
Құжат түрі | Қойылатын талап |
|---|---|
Төлқұжат | Паспорттың жарамдылық мерзімі сапар бойы жарамды болуға тиіс. Визаны жапсыру үшін ішінде міндетті түрде бос беттер болуы керек. Паспортты консулға тапсырғанда оны мұқабасыз және ішіне өзге заттар салмай ұсынған дұрыс. |
Төлқұжат көшірмесі | Жеке деректер мен фотосурет көрсетілген бірінші беттің ксерокөшірмесі. Электронды нұсқасы (eGov немесе Kaspi қосымшасынан алынған құжат) қабылданбайды. |
Виза анкетасы | Анкетаның екі данасын толтырасыз. Ол ағылшын немесе жапон тілінде рәсімделуі керек. Анкетаны қалай дұрыс толтыру керегін және қандай маңызды жайттарға назар аудару қажет екенін төменде түсіндіреміз. |
Суреттер | Жақында түсірілген, ашық фондағы 45×35 мм өлшемдегі екі фотосурет. |
Жұмыс орнынан анықтама | Ұйымның ресми бланкісінде берілген, онда қызметі, жұмыс өтілі және жалақы мөлшері көрсетілуге тиіс. |
Қаржылық жағдайыңызды растау | Банктегі шотта қаражат бар екенін растайтын анықтама және кейінгі үш айдағы үзінді көшірме. Сондай-ақ жалақы мөлшері көрсетілген жұмыс орнынан берілетін анықтама да жарайды. |
Сапар бағдарламасы | Әр күннің жоспары көрсетілген Stay Program формасы толтырылуы керек. Онда әр күнді, сол күні жоспарланған іс-шаралар мен тұратын жер (қонақүй не басқа мекенжай) көрсетіледі. |
Билеттер броны | Барар және қайтар әуе билеттері брондалғанын растайтын құжат. |
Қонақүй броны | Сапардың бүкіл мерзіміне арналған тұру орнын растайтын құжаттар (қонақүй броні немесе басқа орналастыруды дәлелдейтін құжат). |
Құжат түрі | Қойылатын талап |
|---|---|
Төлқұжат | Паспорттың жарамдылық мерзімі сапар бойы жарамды болуға тиіс. Визаны жапсыру үшін ішінде міндетті түрде бос беттер болуы керек. Паспортты консулға тапсырғанда оны мұқабасыз және ішіне өзге заттар салмай ұсынған дұрыс. |
Төлқұжат көшірмесі | Жеке деректер мен фотосурет көрсетілген бірінші беттің ксерокөшірмесі. Электронды нұсқасы (eGov немесе Kaspi қосымшасынан алынған құжат) қабылданбайды. |
Виза анкетасы | Анкетаның екі данасын толтырасыз. Ол ағылшын немесе жапон тілінде рәсімделуі керек. Анкетаны қалай дұрыс толтыру керегін және қандай маңызды жайттарға назар аудару қажет екенін төменде түсіндіреміз. |
Суреттер | Жақында түсірілген, ашық фондағы 45×35 мм өлшемдегі екі фотосурет. |
Жұмыс орнынан анықтама | Ұйымның ресми бланкісінде берілген, онда қызметі, жұмыс өтілі және жалақы мөлшері көрсетілуге тиіс. |
Қаржылық жағдайыңызды растау | Банктегі шотта қаражат бар екенін растайтын анықтама және кейінгі үш айдағы үзінді көшірме. Сондай-ақ жалақы мөлшері көрсетілген жұмыс орнынан берілетін анықтама да жарайды. |
Сапар бағдарламасы | Әр күннің жоспары көрсетілген Stay Program формасы толтырылуы керек. Онда әр күнді, сол күні жоспарланған іс-шаралар мен тұратын жер (қонақүй не басқа мекенжай) көрсетіледі. |
Билеттер броны | Барар және қайтар әуе билеттері брондалғанын растайтын құжат. |
Қонақүй броны | Сапардың бүкіл мерзіміне арналған тұру орнын растайтын құжаттар (қонақүй броні немесе басқа орналастыруды дәлелдейтін құжат). |
Қосымша өтініш берушілер санаттары
Жеке кәсіпкерлер (ЖК). Стандартты құжаттардан бөлек, жеке кәсіпкер ретінде тіркелгенін растайтын куәліктің көшірмесі және кейінгі есептік кезеңдегі салық декларациясы қажет. Бұл табыстың заңды әрі тұрақты екенін дәлелдеу үшін сұралады.
Студенттер. Оқу орнынан анықтама тапсыруы керек. Егер сапар шығынын ата-анасы өтейтін болса, демеушілік хат, демеушінің жұмыс орнынан анықтамасы және туыстықты растайтын құжат қоса беріледі (ата-анасы болса — туу туралы куәлік, жұбайы болса — неке туралы куәлік).
Кәмелетке толмағандар. Егер бала ата-анасының бірімен не үшінші тұлғамен сапарға шықса, екінші ата-анадан (немесе екеуінен де) шетелге шығуға нотариалды куәландырылған рұқсат қажет. Сондай-ақ туу туралы куәліктің көшірмесі қоса тапсырылады.
Қазақстанда Жапония визасына құжаттарды қайда тапсыруға болады?
Жапония визасына құжаттарды тек Астанадағы Жапония елшілігінде қабылдайды. Мекенжайы: Космонавттар көшесі, 62. Бұрын Алматыда елдің Бас консулдығы болған, бірақ қазір ол жұмыс істемейтінін айта кетейік.
Әдетте құжаттарды таңертең 09:30-дан 12:00-ге дейін тірі кезек тәртібімен қабылдайды, ал дайын визаларды 14:00-ден 17:30-ға дейін береді. Дегенмен жолға шығар алдында елшіліктің сайтынан жұмыс кестесін нақтылап алған жөн, өйткені маусымның қызған шағында (мысалы, сакура гүлдейтін немесе қызыл үйеңкі жапырақтары жайқалатын кезеңде) алдын ала жазылу тәртібі енгізілуі мүмкін.
Визаға өтінішті өз бетіңізше қалай тапсыруға болады?
Жапония визасын рәсімдеген анау айтқан қиын емес. Мына қарапайым қадамдарды орындасаңыз, өтінішіңіз бірінші реттен-ақ мақұлдануы мүмкін.
1-қадам. Құжаттарды жинау. Алдымен банк пен жұмыс орнынан алынатын анықтамаларды дайындаңыз — олардың жарамдылық мерзімі шектеулі (әдетте бір айға дейін). Сондай-ақ қонақүй брондарының әлі де күшінде екеніне көз жеткізіп алыңыз.
2-қадам. Анкета мен сапар бағдарламасын толтыру. Бұл — ең жауапты кезең. Сапар жоспары қисынды болуы керек: мысалы, Токиоға ұшып келіп, келесі күні бірден Саппороға барамын деп жазсаңыз, оған қандай көлікпен жететініңізді көрсеткен жөн. Анкета ағылшын не жапон тілінде толтырылады.
3-қадам. Құжаттарды елшілікке тапсыру. Елшілікке мүмкіндігінше ертерек барған дұрыс. Құжаттарды өзіңіз тапсырсаңыз, сапар бағыты мен жоспарыңыз туралы қосымша сұрақтарға жауап беруге дайын болыңыз.
4-қадам. Өтініштің қаралуын күту. Әдетте жапон тарапы өтінішті салыстырмалы түрде тез қарайды. Қажет болған жағдайда кейбір мәліметтерді нақтылау үшін сізге телефон шалуы мүмкін. Егер ешқандай ескерту болмаса, виза шамамен бес жұмыс күнінде дайын болады.
5-қадам. Паспортты алу. Шешім шыққаннан кейін дайын визасы бар паспортыңызды елшіліктен алып кетесіз.
Жапония визасына арналған анкетаны қалай толтыру керек?
Анкетаны ағылшын немесе жапон тілінде толтыруға болады. Оған 45×35 мм өлшемдегі фотосуретті жапсырып, күні көрсетіліп, қол қойылуы қажет. Анкета екі дана етіп толтырылады — компьютерде де, қолмен де толтыруға рұқсат етіледі.
Анкетада бос жол қалдырмаңыз. Қажет жерлерде сызықша (—) қойыңыз. Мысалы, «шақырушы тұлға» деген бөлімде ондай адам болмаса, сол жерге сызықша қою керек.
Сондай-ақ анкетаға паспорттағы қолтаңбаңызбен дәл келетін өз қолыңызбен қойылған қол қойған міндетті. Сенімхат болса да, анкетада сенімді адамның қолы қойылған нұсқа қабылданбайды.
Жапония визасы қанша тұрады?
Жапонияның туристік визасы тегін рәсімделеді. Дегенмен кейбір қосымша шығындар болуы мүмкін:
- Нотариус қызметі (егер сенімхат қажет болса) — шамамен 4 500 теңге.
- Визалық орталық немесе агенттік қызметі (құжатты өзіңіз тапсырмасаңыз) — 30 000–60 000 теңге аралығында.
- Құжаттарды басқа қаладан пошта арқылы жіберу — шамамен 3 000 теңге.
Рәсімдеу мен жарамдылық мерзімдері
Әдетте виза өтінішін 5 жұмыс күнінде қарайды. Соған қарамастан құжаттарды ұшардан кемінде 2–3 апта бұрын тапсырған дұрыс. Кейде елшілік қосымша құжат сұратуы мүмкін немесе өтініш берушілер саны көбейіп кетеді.
Виза қанша уақытқа беріледі?
Стандартты бір реттік виза берілген күннен бастап 90 күн бойы жарамды. Осы мерзім ішінде Жапонияға кіріп үлгеруіңіз керек. Ал ел ішінде 15 немесе 30 күнге дейін болуға рұқсат беріледі (визада көрсетілген мерзімге қарай).
Неге виза бермей қою мүмкін?
Қазақстан азаматтарына Жапонияның виза беруден бас тартуы сирек, бірақ ондай жағдайлар болады. Негізгі себептер мыналар:
- Банктегі қаражат жеткіліксіз. Жапония — қымбат ел, сондықтан консул сіздің сапар шығындарын көтере алатыныңызға көз жеткізгісі келеді. Ресми түрде нақты сома көрсетілмеген, бірақ шоттағы ақша қозғалысы күмән тудырмауға тиіс. Мысалы, визаға өтініш берер алдында шотқа ірі сома аударып қойған дұрыс емес.
- Анкетада қате кеткен. Паспорт нөміріндегі немесе басқа деректердегі қате, сондай-ақ анықтамалардағы мәліметтермен сәйкессіздік виза берілмеуіне себеп болуы мүмкін.
- Сапар бағдарламасы шынайы емес. Маршрут күмәнді болмауы керек. Әр қалада кем дегенде бірнеше күн болуды жоспарлаған дұрыс және қонақүй брондарын алдын ала алып тастауға асықпаңыз.
- Бұрын визалық режимді бұзған шығарсыз. Егер бұрын Жапонияда немесе басқа елдерде визалық тәртіпті бұзған жағдайлар болса, бұл да шешімге әсер етуі мүмкін.
Ескеретін жайт: консул виза бермеу себебін түсіндірмеуге құқылы. Мұндай жағдайда тек алты ай өткен соң қайта құжат тапсыруға болады.
Жиі қойылатын сұрақтар
Сапарға дейін визаны қашан рәсімдеген дұрыс?
Құжаттарды ұшардан шамамен бір ай бұрын тапсырған дұрыс. Өте ерте (мысалы, жарты жыл бұрын) берудің қажеті жоқ, өйткені виза 90 күндік мерзімге ғана жарамды, сондықтан сапар басталғанға дейін-ақ күшін жоюы мүмкін.
Жапония визасын алу үшін әуе билеттері қажет пе?
Иә, әуе билеттерінің броны міндетті. Бірақ елшілік билетті алдын ала толық сатып алуды талап етпейді — бронь жасағаныңыз жеткілікті.
Онлайн өтініш беруге бола ма?
Жоқ. Қазір Қазақстан азаматтары визаны елшілік арқылы немесе өкіл арқылы рәсімдеуі керек. Электронды виза жүйесі (e-Visa) біртіндеп енгізіліп жатыр, бірақ әзірше қазақстандықтар олай тапсыра алмайды.
Виза рәсімдеу процесін жеделдетуге бола ма?
Елшілікте визаны жедел қарау қызметі жоқ. Процесті жылдамдатудың жалғыз жолы — барлық құжатты бірден дұрыс әрі толық дайындау, сонда консул қосымша қағаз сұрамайды.
Сақтандыру қажет пе?
Сақтандыру полисі визаға міндетті құжаттардың қатарына кірмейді. Дегенмен елшілік сапар кезінде күтпеген жағдайлардан сақтану үшін сақтандыру рәсімдеп қоюды ұсынады.
