Жапонияға кеттік: арзан билет, қолайлы кезең және сакура гүлдеген бақтар

Көктемгі Жапония — Ghibli мультфильмдеріндегі көріністерді еске салады: салқын самал сакура күлтелерін көкте қалықтатып, мақтадай бұлттар баяу көшіп, қала ырғағы саябырсып, уақыт бір сәтке тоқтап қалғандай болады. 

Сеніп қалдыңыз ба? Әлеуметтік желілер осындай өтірік-шыны мифті таратқанға құмар. Тек Жапонияда көктемде туристік маусым қызып, баспана бағасы шарықтап, Киото саябақтарында адам құжынап кететінін ескерген жоқ. Турист қаптаған жерлерге бармай-ақ, қызғылт аллеяларды аралап шығуға болады. Ең бастысы — танымал бағыттардан тайқып кету. Адам көп жүретін жерлерге де апар десеңіз, осы мақалада бәрін егжей-тегжейлі жазып шықтық.

Сакураның гүлдегенін көруге қашан барған жөн?

Әуелі мынаны ескеріңіз: сакура нақты кестемен гүлдемейді. Жапонияда Sakura Zensen — «гүлдеу майданы» деген ұғым бар. Ол ел аумағында оңтүстіктен солтүстікке қарай толқын тәрізді жылжып отырады. Мәселен, Кюсюде гүлдер жерге төгіліп жатқанда, Токиода ағаштар әлі қарайып тұруы мүмкін.

Сондықтан алдыңғы жылдардың күнтізбесіне қарап сапар жоспарлау — берекесіз тірлік. Наурызда бір апта сәл суық болса болды, гүлдеу маусымы кешігеді де, «шарықтау шегінде көреміз» деп алынған билеттеріңіз «бүршік кезеңіне» арналған билетке айналып шыға келеді.

Бақытымызға орай, жапондар дәлдікке ерекше мән береді. Сол себепті сакура болжамдарын Japan Meteorological Corporation (JMC) және Weathernews сайттарынан қадағалап отырған дұрыс. Бұл платформалардағы деректер температурадағы ең ұсақ өзгерістерге дейін ескеріліп, үнемі жаңартылып отырады.

Сапарды мына кезге туралаңыз:

• Токио мен Камакурада сакура 20–22 наурызда бүршік жара бастайды, ал толық гүлдеуі (mankai) 27 наурыз бен 3 сәуір аралығына сәйкес келеді.
• Осака мен Нарада гүлдеу 25–26 наурызда басталып, фотоға түсудің ең сәтті кезеңі 3–7 сәуірге тура келеді.

Біз берер ең маңызды кеңес — бір қалаға байланып қалмаңыз. Токиодан екі аптаға қонақүй брондап қойып, ал сакура сол сәтте әлі «ояна» қоймаса, ең әдемі мезетті өткізіп алуыңыз мүмкін.

Ең тиімдісі — икемді болу. JR Pass теміржол жолдамасын (жылдам пойыздарға арналған абонемент) сатып алып, гүлдеу толқыны қай қалаға жетсе, сол жаққа жол тартуға дайын тұрған жөн. 

Жапонияға туристік визаны қалай алуға болады?

Жапониядан не әкелдің дегенде, ұялмай беретін сыйлықтар тізімі

Қыз-келіншек қыдырғанға қауіпсіз елдер: Жапония, Сингапур мен Исландия

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Жапонияға қалай жетеміз?

Жапон арманына ұмтылған қазақстандық ең алдымен виза мәселесіне тап болады. Бір жақсысы — оны алған Шенгенге қарағанда әлдеқайда жеңіл (әрі тегін рәсімдеуге болады). 

Бір жаманы — көктемде елшілікте қарбалас басталады. Қабылдауға жазылу кестесі әп-сәтте толып кетеді, ал күту мерзімі созылып кетуі мүмкін. Сондықтан Жапонияға ұшамын деп отырсаңыз, құжат жинауды тап қазір бастаңыз. «Бір аптада реттей салам» деген тәсіл бұл жерде жүрмейді. Жапония визасын қалай алу керегі туралы біз бұған дейін егжей-тегжейлі түсіндіріп бергенбіз.

Әуе билеттеріне келсек, жағдай тіптен күрделі. Ең арзан билет — кеше алынған билет дегенді ұмытпаңыз. Көбірек ақпарат білгіңіз келсе, «арзан әуе билетін қалай сатып алуға болады» нұсқаулығымызға көз жүгіртіңіз. Aviasales.kz-тің телеграм-арнасында ең тиімді ұсыныстар жиі жарияланып тұрады. Арзан билеттен құр қалмас үшін телеграм арнамызға жазылып қойыңыз.

Алматыдан ұшқан қанша тұрады? 

Наурыз басында билетті 251 мың теңгеге алуға болады (бағаларды 10 ақпанда тексердік). Ал гүлдеу шегіне жететін кезеңге (наурыздың соңы–сәуір) таяғанда, 310–450 мың теңге деген бағаға дайын болыңыз. Сакура маусымында арзан тұратын нәрсе тапқан қиын.

Aviasales.kz-ті жай ғана іздеу жүйесі емес, бағыт құрастыратын құрал ретінде пайдаланып көріңіз. Токиоға билет тым қымбат көрінсе, Осакаға ұшатын нұсқаларды қарап шығыңыз. Кейде баға айырмасы ел астанасына дейінгі жылдам пойыз билетін ғана емес, қонақүйдегі бірнеше түнді төлеуге де жетеді.

Алматыдан ұшатын рейстер билеті шарықтап тұрса, Ташкентті тексеріңіз. Кейде баға айырмасы көрші елге жетіп алу шығынын да өтейді, Жапонияда қосымша бір-екі күн артық демалысқа да жетеді. Ең бастысы — түйісетін рейстерді алдын ала мұқият қарап шығыңыз. Транзит аймағында ұзақ уақытқа қалып қоймас үшін ұшу кестесін тексерген маңызды. Транзиттік рейстер қалай жұмыс істейтіні және ауысып міну кезінде нені ескерген жөн екені туралы біз бұған дейін жазғанбыз.

Сакураны қайдан көруге болады?

Сакура маусымының қызған шақта Токиодағы Уэно саябағында ине шаншар жер болмайды. Әрине, бұл да көңілді, өзіне тән атмосферасы бар қыдырыс. Тек әлгі анимелердегідей көріністі тамашалап, баяу серуендеп қайтамын деп отырсаңыз, Уэноға барып әуре болмаңыз.

Адам аз жерлер

​​Аояма зираты. Атауы тосын естілуі мүмкін, бірақ қорқудың қажеті жоқ. Жапонияда зираттар — алып, жасыл желекке оранған, ерекше күтімі бар саябақтар іспетті. Аоямада алып ағаштар жайқалып тұр, ал адам қарасы Уэноға қарағанда әлдеқайда аз. Тыныш қыдырып, кадрға бөгде біреу ілінбей, сол әдемі суреттерді түсіруге таптырмас орын.

Токио маңы. Астананың қарбаласынан шаршасаңыз, пойызға отырып, Канадзаваға не Тохоку өңіріне тартыңыз. Ол жақта сакура сәл кеш гүлдейді, турист те аз, ал «сол баяғы ескі Жапонияның» тіршілігі жақсырақ сақталған. Жеткен де қиын емес: жүрдек пойыздар бар, түнгі автобустар да қатынайды.

Yozakura — түнгі сакура. Күн батқаннан кейін гүлдеген шиенің қалай құбылатынын сөзбен айтып жеткізген мүмкін емес! Туристер саябырсыған сәтте ағаштарда майда шамдар жанады. Шам сәулесі түскен қызғылт жапырақтар ертегідегідей көрінеді. Демалыс күні емес, аптаның бір кешін таңдаңыз — күндізгі у-шудан гөрі әлдеқайда романтик әрі тыныш болады.

Жапонияға алғаш бара жатқандарға

Жергілікті жұрт қабақ шыта қарайтын турист болмас үшін ағашқа қолыңыздың ұшын да тигізуші болмаңыз. Селфи үшін сакураның бұтағын өзіңізге қарай сәл тартып алғыңыз келсе де, тіпті (құдай сақтасын) «гүлден жаңбыр жаудыру» үшін сілкігіңіз келсе де, олай ете көрмеңіз. Жапонияда бұл табиғатқа деген құрметсіздік деп қабылданады. Сүйсініп қараңыз, камераға түсіріңіз. Болды.

Жапондар тыныштық пен табиғаттың тұтастығын жоғары қояды. Ең дұрысы — ағаштың жанында үнсіз тұрып, сол сәттің әсерін жан-тәніңізбен сезіну.

Тағы осы тақырыпта

Жапонияға барар алдында неге дайын болу керек?

Жапониядағы он күнге 2,4 млн теңге кетті. Не істеп үлгердік?

Ішіп-жем

Дәмді әрі тойымды ас ішу үшін Жапонияда қымбат мейрамханадан үстел брондаудың қажеті жоқ. Жақын маңдағы конбиниге (7-Eleven, Lawson немесе FamilyMart) кіріп шықсаңыз жетіп жатыр. Онда дайын бенто жиынтығын сатып алыңыз. Сөйтіп сакура түбіне жайғасып, шағын пикник жасаңыз. Бұл — тиімді, ерекше атмосферасы бар әрі нағыз жапонша демалыс. Жапонияға барғанда тағы нені ескерген жөн екенін біз өткенде жазғанбыз.

Күн жауып кетсе ше?

Сакура — өте нәзік ағаш әрі небәрі бір аптадай ғана гүлдеп тұрады. Бір нөсер жаңбырдың өзі бір кеште-ақ барлық күлтесін түсіріп тастауы мүмкін. Бұған да дайын болған жөн. Сондықтан қызғылт бұлттар орнына шалшық су көрсеңіз, көңіл түсірудің қажеті жоқ. Жапонияға барарда «Ә жоспары» болуға тиіс.

• Онсэндер. Ыстық минералды бұлақтар — жауын-шашынды күннің ең жақсы «емі». Денеңізді босаңсытып, сапардың ырғағын баяулатуға мүмкіндік береді.
• Музейлер мен кітап дүкендері. Tsutaya сияқты жапон кітап дүкендері — өз алдына бөлек әлем. Ішіне кірсеңіз, бірнеше сағаттың қалай өткенін байқамай қаласыз.
• Сауда орталықтары. Uniqlo, Muji немесе Don Quijote дүкендерінен қалағаныңызды алып шығуға да уақыт табылады.

Кейде жоспар бұзылған, «сәтсіз» көрінген күндердің өзі сапардың ең есте қалар сәтіне айналады.

Токио мен Осакадан басқа қайда баруға болады?

Камакура

Тылсым атмосфераны сезінгіңіз келіп, бірақ Алматы метросындағы қарбалас сағаттағыдай тығыздықты қаламасаңыз, балама бағыттарға назар аударыңыз.

Камакура мен Хаконе

Токиоға келіп қойған болсаңыз, ұзақ бөгелмеңіз. Пойызға отырып, Камакураға тартыңыз. Мұнда көне ғибадатханалар мен теңіз бар, ал мұхит аясындағы сакура әлдеқайда әсерлі көрінеді. Одан әрі Хаконеге жол алыңыз: бұл жерде гүлдеген тауларға қарап отырып, онсэнде бой жазуға болады.

Кавагучико мен Мацумото

Ең әдемі көрініс — Фудзи тауы бөктеріндегі сакура. Мұндай кадр үшін Кавагучико көліне барыңыз. Ал жақын маңдағы Мацумото қаласында қара түсті көне қамал бар. Сүйіктіңізге сөз салуға ниеттеніп жүрген болсаңыз, бұл жер — таптырмас орын.

Үлгермей қалсаңыз

Жапонияның солтүстігіндегі Тохоку өңіріне көктем кеш келеді. Токиода сакура күлтелері түсіп жатса, Хиросаки қамалының саябағында бүршіктер енді ашыла бастайды. Бұл — елдегі ең көркем орындардың бірі әрі турист те аз. Токиодағы сакураны өткізіп алсаңыз, осы жаққа шығыңыз.

Ерте барып қойсаңыз

Ертерек барып қойсаңыз, оңтүстікке қарай бет алыңыз: мұнда сакура наурыздың соңына таман-ақ гүлдей бастайды. Кюсю аралы — жайбарақат көңіл күй, қалың жасыл желек пен толассыз ыстық бұлақтар мекені. Мегаполистің жүйткіген ырғағы жаныңызға жақын болмаса, бұл — таптырмас бағыт.

Жапония сапарына кемінде 10–14 күн арнаған дұрыс. Сонда сакураның дәл мезетіне тап келіп, онсэнге де түсіп, жол жүргенде де шаршамай демалуға мүмкіндік болады.

Сакура — жай сылтау

Сакура гүлдеген кезге үлгермей қалып, жерге төгіліп қалған күлтелерді ғана көрсеңіз де, қамықпаңыз. Жапония сұлулықты ұсақ-түйектен, тіпті кемшіліктен кемелдік көруге үйретеді (сәлем, ваби-саби философиясы).

Ұшар алдында мынаны ескеріңіз:

• Күн райын ойлап көңіл түсірмеңіз. Жапонияда жаңбыр жауды деп, мұңайып отырмаңыз. Жақын маңдағы музейге не ерекше кітап дүкеніне бас сұғыңыз.
• Ең ыңғайлы аяқ киімді таңдаңыз. Көп жүресіз, сондықтан сәнді ұмытылып, жайлылықты бірінші орынға қойыңыз.
• Ойланып жүре бермеңіз. Сакура — жай сылтау. Бастысы — билет алып, мүлде бөлек әлемді өз көзіңізбен көріп қайтыңыз.

Билеттер қымбаттап барады, сондықтан «бір белгі күтіп отыра бергеннің» қажеті жоқ. Кім әрекет етпейді — сол Жапонияға жетпейді. 

Суретті салған — Дада Кирей.