Қытайға барарда Arrival Card картасын қалай толтыру керек?
Саспаңыз, қазір бәрін түсіндіреміз.
Қытайға жол жүргелі жатсаңыз, ұшақ билеті мен қонақүй бронынан бөлек, тағы бір құжатты ұмытып кетпеңіз. Қытайға кіретін шетелдіктер Arrival Card деп аталатын келу картасын толтыруға міндетті. Онда аты-жөніңізді, төлқұжат деректерін, сапар мақсаты мен Қытайда қайда тоқтайтыныңызды көрсетесіз. Картаны қайдан және қашан толтыру керек? Бұл мақала осы және өзге сұрақтарға жауап береміз.
Қазақстан азаматтары Arrival Card толтыруы керек пе?
Иә, толтыруға тиіс. Қазақстан мен Қытай арасында визасыз режим бар. Қазақстан азаматтары Қытайда бір сапарда 30 күнге дейін визасыз жүре алады. Бірақ кез келген 180 күн ішіндегі жалпы мерзім 90 күннен аспауы керек. Виза керек болмағанымен, Қытайға кірерде Arrival Card толтыру талабы сақталады.
Дегенмен кейбір жолаушылар, соның ішінде әуежайдың транзит аймағынан шықпай, 24 сағат ішінде басқа рейске ауысатындар бұл талаптан босатылады.
- Елде болу мерзімі — 30 күнге дейін
- Паспорттың жарамдылық мерзімі елге кірген күннен бастап кемінде 6 ай болуы керек
Arrival Card-ты қайда толтыруға болады?
2025 жылы 20 қарашадан бастап келу картасын Қытайға аттанбай тұрып онлайн толтыруға болады. Оның бірнеше жолы бар.
- Ресми сайт. Ең оңай жолы — Қытайдың Ұлттық көші-қон басқармасының ресми сайтына кіріп, сауалнаманы толтыру.
- NIA 12367 қолданбасы. Картаны Қытайдың көші-қон қызметінің мобильді қолданбасы арқылы да рәсімдеуге болады.
- WeChat пен Alipay. Бұл сервистердегі ресми шағын қолданбалар арқылы мәлімет енгізуге мүмкіндік бар.
- Әуежайда не шекарада. Алдын ала толтырып үлгермесеңіз, Қытайға келген соң QR-кодты сканерлеп, арнайы терминалды пайдаланып не қағаз картаны толтыра аласыз.
Уақыт жоғалтпау үшін картаны сапарға шықпай тұрып рәсімдеп алған дұрыс. Arrival Card тегін толтырылады. Ақша сұрайтын делдал сайттардан сақ болыңыз. Қытайдың көші-қон қызметі ресми сайтқа ұқсайтын жалған парақшалар пайда болғанын ескерткен.
Arrival Card-ты қанша уақыт бұрын толтыру керек?
Қытайдың ресми хабарламаларында картаны міндетті түрде ұшуға бірер күн қалғанда толтыру керек деген талап көрсетілмеген. Ең дұрысы — ұшақ билетін алып, Қытайда қайда тоқтайтыныңыз белгілі болған соң, сапарға жақын күндері толтырыңыз. Сауалнаманы жібергеннен кейін берілетін растауды телефоныңызға сақтап қойыңыз. Паспорттық бақылауда қажет болуы мүмкін.
Arrival Card-ты қалай толтыру керек?
Картаны Қытайдың Ұлттық көші-қон басқармасының ресми сайты арқылы рәсімдеу жолын түсіндірейік. Сайттың тіліне және жаңартылған нұсқасына қарай кейбір батырмалардың атауы өзгеруі мүмкін.
1-қадам. Ресми сайтқа кіріңіз
Алдымен Arrival Card толтыратын ресми парақшаны ашыңыз. Сайтта тіл таңдау мүмкіндігі болса, өзіңізге ыңғайлы тілді белгілеңіз. Содан кейін келу картасын толтыру бөліміне өтіп, нұсқаулықпен танысыңыз. Сауалнаманы бастамас бұрын төлқұжатыңызды, ұшақ билетіңізді және Қытайдағы қонақүйдің мекенжайын дайындап қойыңыз.
2-қадам. Төлқұжат деректерін енгізіңіз
Құжат түрін таңдаңыз. Қазақстанның кәдімгі шетелге шығатын төлқұжатымен саяхаттасаңыз, Ordinary Passport нұсқасы сәйкес келеді.
Жүйе төлқұжаттың жеке деректер көрсетілген бетін суретке түсіруді не жүктеуді сұрауы мүмкін. Сурет анық, жарық әрі барлық жазуы көрінетін болсын. Кейбір мәліметтер автоматты түрде толтырылуы мүмкін. Бірақ оларды міндетті түрде тексеріңіз.
Мына деректер дұрыс жазылғанына көз жеткізіңіз:
- Аты-жөніңіз;
- Жынысыңыз;
- Туған күніңіз;
- Азаматтығыңыз;
- Төлқұжат түрі мен нөмірі.
Мысалы, төлқұжатыңызда тегіңіз SULEIMENOVA, атыңыз AIGERIM деп жазылса, сауалнамада да дәл солай көрсетілуі керек.
Одан кейін Қытайға қалай баратыныңызды белгілейсіз.
- Entry Transportation Mode — көлік түрі. Ұшақпен барсаңыз, Flight таңдаңыз.
- Arrival Flight/Train/Vessel Number — Қытайға келетін ұшақ, пойыз не кеме рейсінің нөмірі.
- City of Entry — Қытайға алғаш кіретін қала.
- Port of Entry — елге кіретін әуежай не шекара бекеті.
Мысалы, Пекинге ұшсаңыз, қала ретінде Beijing деп көрсетесіз. Ал әуежайды билетіңізге қарап таңдаңыз. Өйткені бір қалада бірнеше әуежай болуы мүмкін.
3-қадам. Жеке және байланыс деректерін толтырыңыз
Келесі бөлімде қосымша жеке мәліметтер сұралуы мүмкін.
- Chinese Name — қытайша есіміңіз. Егер ондай есіміңіз болмаса және жол міндетті болмаса, бос қалдыра аласыз.
- Country/Region of Birth — туған еліңіз.
- City of Birth — туған қалаңыз.
- Contact Number — телефон нөміріңіз.
- Email — электронды поштаңыз.
Телефон нөмірін халықаралық форматта жазыңыз. Мысалы, +7XXXXXXXXXX.
Байланыс деректерін қатесіз енгізіңіз. Қажет болса, көші-қон қызметі сізбен осы мәліметтер арқылы хабарласа алады.
4-қадам. Қытайға қандай негізде кіретініңізді көрсетіңіз
Бұл бөлімде визаңыз не елге кіруге рұқсат беретін басқа құжатыңыз бар-жоғы сұралады.
- Do you hold a valid visa or other entry permit? — «Сізде жарамды виза не елге кіруге рұқсат беретін басқа құжат бар ма?» деген сұрақ.
Қазақстан азаматы ретінде туристік сапарға визасыз бара жатсаңыз, No («Жоқ») деп жауап бересіз. Одан кейін Entry Policy Selection бөлімінен Visa-free Entry, яғни визасыз кіру нұсқасын таңдаңыз. Ал Қытайға визамен не басқа рұқсатпен баратын болсаңыз, өз жағдайыңызға сәйкес жауап беріңіз.
5-қадам. Сапар туралы ақпаратты жазыңыз
Бұл жерде Қытайға не үшін баратыныңызды, қашан жететініңізді және қай қалаларда болатыныңызды көрсетесіз.
- Purpose of Entry — сапар мақсаты. Демалуға барсаңыз, туризмге қатысты нұсқаны таңдаңыз.
- Date of Entry — Қытайға кіретін күн.
Мұнда Қазақстаннан ұшатын күнді емес, Қытай шекарасынан өтетін күнді көрсету маңызды. Мысалы, 20 желтоқсанда түнгі 23:30-да ұшып, Пекинге 21 желтоқсанда жетсеңіз, 21 желтоқсанды белгілейсіз.
- Destination Cities in China — Қытайда баратын қалаларыңыз.
- Cities of Transit in China — Қытай аумағында жолай өтетін қалаларыңыз.
Мысалы, Шанхайға ұшып келіп, одан әрі Пекинге барсаңыз, Шанхай жолай өтетін қала, ал Пекин негізгі баратын қала болуы мүмкін. Ал Пекинге тікелей ұшып, сол қалада ғана демалсаңыз, оны міндетті түрде транзит қаласы деп көрсету қажет емес. Сауалнаманы нақты маршрутыңызға сай толтырыңыз.
6-қадам. Қытайда қайда тоқтайтыныңызды көрсетіңіз
Келесі бөлімде Қытайдағы мекенжайыңызды сұрайды. Қай қалада тұратыныңызды таңдап, қонақүйдің атауы мен толық мекенжайын енгізіңіз. Мысалы:
- City: Beijing
- Address: қонақүйдің атауы, көше мен ғимарат нөмірі.
Қонақүйдің мекенжайын бронь растамасынан не ресми сайтынан көшіріп алуға болады. Сондай-ақ мынадай сұрақ кездесуі мүмкін:
- Do you have any inviting entities or inviters in China?
Бұл — «Сізді Қытайға шақырған адам не ұйым бар ма?» деген сұрақ. Егер ешкім шақырмаса, No деп белгілеңіз. Ал шақырған адам не ұйым болса, Yes деп жауап беріп, сұралған деректерді енгізіңіз.
7-қадам. Қайту жоспарын көрсетіңіз
Сауалнамада Қытайдан қашан және қалай шығатыныңыз да сұралуы мүмкін.
- Confirmed Departure Itinerary — Қытайдан шығатын нақты жоспарыңыз бар ма деген сұрақ.
Қайту билетіңізді алып қойсаңыз, Yes деп белгілеп, тиісті мәліметтерді толтырасыз.
- Date of Departure — Қытайдан шығатын күн.
- Transportation Mode for Departure — қайтатын көлік түрі.
- Departure Flight/Train/Vessel Number — кері рейстің нөмірі.
- City of Departure — Қытайдан шығатын қала.
- Port of Departure — ұшып шығатын әуежай не шекара бекеті.
Мысалы, Шанхайдан Алматыға ұшсаңыз, қала ретінде Shanghai деп көрсетесіз. Ал әуежайды ұшақ билетіңізге қарап таңдаңыз. Қайту билетіңіз әлі болмаса, ойдан рейс нөмірін жазбаңыз. Сауалнамадағы сұраққа нақты жағдайыңызға қарай жауап беріңіз.
8-қадам. Мәліметтерді тексеріп, сауалнаманы жіберіңіз
Барлық бөлімді толтырғаннан кейін ақпаратты тағы бір қарап шығыңыз. Әсіресе аты-жөніңізді, төлқұжат нөмірін, Қытайға келетін күнді, рейс нөмірін және қонақүй мекенжайын мұқият тексеріңіз. Егер бірге сапарға шығатын адамдар туралы мәлімет енгізу мүмкіндігі болса, жүйедегі нұсқаулыққа сәйкес толтырыңыз. Әр жолаушыға қатысты ақпарат дұрыс болуы керек.
Содан кейін сауалнаманы жіберуге өтіңіз. Жүйе жеке деректерді өңдеу және мәліметтердің дұрыстығы туралы мәлімдемемен танысуды сұрауы мүмкін. Мәтінді оқып, келісіміңізді растаңыз. Егер электронды қолтаңба сұралса, арнайы өріске қол қойып, рәсімді аяқтаңыз.
9-қадам. Растауды сақтап қойыңыз
Сауалнама сәтті жіберілген соң, жүйе берген электронды растауды сақтаңыз. Егер QR-код көрсетілсе, оның скриншотын жасаңыз. Қажет болса, растауды PDF түрінде жүктеп не қағазға шығарып алуға болады. Ең бастысы — Қытайға келгенде құжатты телефоныңыздан тез таба алатындай болсын.
Жиі қойылатын сұрақтар
Сауалнаманы толтырғанда қате жіберсем, не істеймін?
Қатені жібермей тұрып байқасаңыз, тиісті бөлімге оралып, мәліметті түзетіңіз. Ал сауалнаманы жіберіп қойған болсаңыз, ресми жүйеде ақпаратты өзгерту не жаңа карта толтыру мүмкіндігін тексеріңіз. Онлайн түзете алмасаңыз, Қытайға келген соң көші-қон қызметінің мамандарынан көмек сұрауға болады. Шекара бекеттерінде электронды және қағаз картаны толтыру мүмкіндігі қарастырылған.
Arrival Card картасын қағазға шығарып алу керек пе?
Міндетті емес. Қытайдың көші-қон қызметі картаны онлайн толтыруға мүмкіндік береді. Дегенмен электронды растауды телефоныңызға сақтап, қажет болса, интернетсіз де аша алатыныңызға көз жеткізіңіз.
Картаны толтырғаннан кейін рейсім не қонақүйім өзгерсе ше?
Егер сапар күні, рейс нөмірі не тұратын мекенжайыңыз өзгерсе, келу картасындағы мәліметтерді де нақты жағдайға сәйкестендіру қажет. Ол үшін ресми жүйедегі түзету мүмкіндігін тексеріңіз. Қажет болса, Қытайға келген соң картаны қайта толтыру не көші-қон қызметінен көмек сұрау мүмкіндігі бар.
Балаларға да Arrival Card керек пе?
Иә, жалпы тәртіп бойынша Қытайға кіретін балаларға да келу картасы қажет. Оны ата-анасы не бірге жүретін ересек адам баланың төлқұжаты мен сапар деректерін пайдаланып толтыра алады.
Қытай арқылы транзитпен өтсем, Arrival Card толтыруым керек пе?
Әрдайым емес. Егер Қытай әуежайында 24 сағат ішінде басқа рейске ауысып, белгіленген транзит аймағынан шықпасаңыз, келу картасын толтырудан босатыласыз. Ал паспорттық бақылаудан өтіп, Қытай аумағына кіретін болсаңыз, карта қажет болуы мүмкін.
Arrival Card картасын қазақша не орысша толтыруға бола ма?
Сауалнаманың интерфейсінде бірнеше тіл болуы мүмкін. Бірақ барлық тілде бірдей нұсқа бар деп есептемеңіз. Сайтта өзіңізге қолжетімді тілді таңдаңыз. Төлқұжаттағы аты-жөніңізді құжатта көрсетілген латын әріптерімен енгізіңіз. Қала, мекенжай мен рейс туралы ақпаратты да жүйе талап ететін форматта толтырыңыз.
Қытайға әр барған сайын картаны қайта толтыру керек пе?
Иә, жалпы тәртіп бойынша әр жаңа сапарға келу картасы қайта рәсімделеді. Бұрын Қытайға барып, Arrival Card толтырғаныңыз келесі сапарда бұл талаптан босатпайды.
Arrival Card толтырмасам, Қытайға кіргізбей ме?
Картаны алдын ала толтырмағаныңыз үшін Қытайға кіргізбей қоймайды. Оны әуежайға келген соң да толтыруға болады. Бірақ елге кірерде талап етілетін мәліметтерді беруіңіз керек. Arrival Card толтырғанның өзі Қытайға кіресіз дегенге кепілдік бермейді, ақырғы шешімді шекара қызметі қабылдайды.
Суретті салған — Тася Козлова.
