Шырайлы Шанхай: қаладағы мына 11 жерді көрмей кетпеңіз
Ең көрікті орындар, тамағы дәмді жерлер мен Қытайда ауадай керек қолданбалар топтамасы — бәрін бір мақалаға топтап қойдық.
Сәлем, менің атым — Ақмарал. Осы көктемде күйеуім екеуіміз Шанхайға барып-қайттық. Бұл қала — дүңгіршектерде роботтар сауда жасап, кешкісін мыңдаған зәулім ғимараты жарқырап тұратын, ал сәулетінде дәстүрлі қытай стилі мен еуропалық атмосфера үйлесім тапқан футуристік мегаполис екен. Бұл жердің өз айдолдары, брендтері мен поп-мәдениеті бар. Күйеуім екеуіміз бірегей Азияның бұл бөлігін асықпай аралайық, сакура гүлдеген маусымды көрейік деп, қалада он күн болдық. Не тапқанымызды жазып шығайын.
Ең танымал жерлері
Shanghai Expo Greenhouse Garden
- The Bund
- The Bund
- Greenhouse Garden
- Диснейленд
Біздің баға: 100/10
Кіру: 98 CNY (шамамен 6 809 KZT)
Бұл — сапарымыздағы ең негізгі нүктенің бірі. Ауданы шамамен 22 000 шаршы метр болатын алып жабық оранжерея баққа кіргенде, құдды бір ғарыш станциясына тап болғандай күй кешесіз. Кеңістік үш блокқа бөлінген: бір шатырдың астында тропикалық орман, шөл дала, экзотикалық гүлдер мен сарқырамалар жиналған. Павильондар арасында сыртқа шығып, жергілікті дәмханадан тіскебасар алуға, содан кейін жолды қайта жалғастыруға болады. Ересектер де, балалар да көрініске көзі тоймай, кемінде екі сағат қызықтап жүреді. Тек түске дейін, күннің бірінші жартысында келген дұрыс.
Вайтань жағалауы (The Bund)
Біздің баға: 8/10
Кіру: тегін
Хуанпу өзенінің бойымен созылып жатқан Шанхайдың аңызға айналған бұл жағалауы — қаланың ең танымал локациясының бірі. Бір жағында XX ғасырдың басындағы банктер мен консулдықтардың еңселі еуропалық ғимараттары тізіліп тұрса, екінші жағында Шанхай мұнарасы мен «Шығыс інжу-маржаны» телемұнарасы бар Пудун футуристік ауданы көкке бой созады. Бұл — серуенге, әсіресе кешкі уақытта келгенге таптырмас орын. Шамдар қосылғанда, қала кинематографиялық кейіпке енеді. Бір кемшілігі — адам тым көп.
Shanghai Disneyland
Біздің баға: 10-нан 8
Кіру: 475 CNY (шамамен 33 мың KZT) басталады
Шанхай Диснейленді Париждікіне қатты ұқсайды, көлемі жағынан сәл кішірек болғанымен, маған әлдеқайда таза әрі тыныш көрінді. Билеттерді алдын ала Trip қолданбасы арқылы сатып алдық. Паркке жұмыс күндері барған дұрыс, өйткені демалыста ине шаншар жер таппайсыз. Шанхай филиалының ерекшелігі әрі бұл жерге келудің негізгі бір себебі — Tron футуристік аттракционы мен тұтас бір «Аңдар шаһары» (Zootopia) қалашығы.
Басқаша Шанхай
Француз концессиясы және Укан зәулім үйі (Wukang Mansion)
Біздің баға: ауданға — 10-нан 10, Укан ғимаратына — 10-нан 7
Кіру: тегін
Шанхайдағы Француз концессиясы — бұрын шетелдік квартал болған танымал тарихи аудан. Екеуіміз де бұл жерге оннан он бердік, сондықтан көбіне осы маңда жүрдік. Аудан өте тыныш. Жергілікті тұрғындар бұл жерге жайлы кофеханаларда демалуға, еуропалық сәулет өнерін тамашалап, серуендеп қайтуға келеді. Барлық жерде көшелердің үстінен жасыл тоннель боп әдемі платандар өсіп тұр. Кварталдың ең көрікті жері — Укан зәулім үйі. Бұл — 1924 жылы француз ренессансы стилінде салынған сегіз қабатты тұрғын үй. Оның айналасында камера ұстаған туристер қаптап жүреді, сондықтан ғимараттың өзіне берген бағамды сәл төмендеттім.
Синьтяньди (Xintiandi) мен Тяньцзыфан (Tianzifang) аудандары
Біздің баға: Синьтяньди — 10-нан 10, Тяньцзыфан — 10-нан 8
Кіру: тегін
Шанхайдың дәстүрлі шикумэнь нысандары — тас қақпалары мен ішкі аулалары бар көне үйлері тұрған екі аудан. 2000-жылдардың басында Синьтяньди ауданы толықтай реконструкцияланды: тарихи қасбеттері ұқыпты сақталып, ішінен премиум мейрамханалар мен бренд бутиктер ашылды. Бұл — дүкен аралап, десертпен кофе ішкенге тамаша орын. Тяньцзыфан — лабиринт сияқты тар көшелері бар, басқа ешбір жерге ұқсамайтын шығармашылық квартал. Егер бес қабатты алып молдардан шаршасаңыз, өнер галереялары, ерекше стритфуд, авторлық шай мен жергілікті қолөнершілердің қолдан жасаған кәдесыйлары осы жерден табылады.
Цзинъань ғибадатханасы (Jing’an Temple)
Біздің баға: 10-нан 10
Кіру: 50 CNY (шамамен 3 474 KZT)
Біздің заманымыздың 243 жылы негізі қаланған көне буддалық ғибадатхана мегаполистің қақ ортасында, Француз концессиясына жақын жерде, заманауи сауда орталықтарының арасында тығылып тұр. Ғибадатхананың өзі шағын, ықшам әрі тап-таза. Шанхайдың жарқыраған шамдарынан шаршап, қарбалас қаланың ортасынан тыныштық тапқысы келетіндерге бұл — таптырмас орын.
Юйюань ескі көшесі (Yuyuan Old Street)
Біздің баға: 10-нан 6
Кіру: тегін
Дәл осы аттас Юйюань бақтарының жанында орналасқан атмосфералық тарихи аудан. Тар көшелер, шатырлары әдемі иілген дәстүрлі қытай ғимараттары мен қызыл шамдар ескі Қытайды еске салады. Бұл жерде дәстүрлі ханьфу киімін жалға алып, жергілікті стильде макияж бен шаш үлгісін жасатып, көне сәулет фонында суретке түсуге болады. Көшелерде шай дүкендері мен стритфуд павильондары өте көп. Дегенмен үлкен бір кемшілігі — туристер шектен тыс көп. Кешкісін адам нөпірі арасында аяқ алып жүре алмайсыз.
Көпшілік біле бермейтін нүктелер
ZZEAR ресейл-орталығы
Біздің баға: 10-нан 10
Кіру: тегін
Шопоголиктердің Диснейленді деуге болады. Бұл — Қытайдағы ең ірі люкс тауарлардың ресейл-орталығы, ол брендтік сөмкелердің (Louis Vuitton, Dior, Prada), киімдер мен аксессуарлар сатылатын алып супермаркетке ұқсайды. Бұл орын тауарлардың түпнұсқалығын өте қатал тексереді және таңдау өте көп. Сөрелерде сирек кездесетін топтамалардағы бұйымдар да ұшырасады. Келген бойда екеуімізге заттарды ұстауға және киіп көруге рұқсат беретін арнайы қолғап үлестірілді. Екеуіміз дүкеннің қолданбасын жүктеп алып, тауардың құны мен сақталу деңгейін бірден білу үшін биркалардағы QR-кодтарды сканерледік.
Мұнда сауда жасарда WeChat-та профиліңіз болғаны дұрыс. Кассада төлем жасау кезінде сіз жүйе арқылы тауардың тікелей сатушысымен онлайн саудаласып, қалаған затыңызды тағы біраз арзанға сатып ала аласыз.
Louis Vuitton көрмесі
Біздің баға: 10-нан 10
Құны: тегін (QR-код арқылы сол жерде тіркелу қажет)
Louis Vuitton сән үйінің иммерсив көрмесі. Бұл жер сән тарихы мен концептуал арт-кеңістіктерді сүйетін адамдарға сөзсіз ұнайды. Экспозиция түрлі тақырыптағы бірнеше залға бөлінген: ішінде брендтің қалыптасу тарихын айтады, аңызға айналған шабадандар қойылған, танымал заманауи суретшілермен коллаборациялар және интерактив инсталляциялар бар.
Шанхай зообағы
Біздің баға: 10-нан 8
Құны: 40 CNY (шамамен 2 779 KZT)
Қытайдағы ең көне әрі ең ірі зообақтардың бірі, аумағы 740 000 шаршы метрден асады. Аумақтың кең әрі көкпеңбек болғаны сондай — бұл жерді зообақ емес, табиғи парк екен деп қаласың. Мұнда жүз жылдан бері өсетін ағаштар, таза тоғандар мен көлеңкелі аллеялар көп. Жолбарыстар, арыстандар мен құстардан бөлек, мұнда Қытайдың символы — алып панданы көруге болады. Бұл жерге жұмыс күндері түске дейін келген дұрыс, серуенге кемінде үш-төрт сағат уақыт арнаған жөн. Локация балалар арбасымен жүргенге өте жайлы. Жергілікті тұрғындар өзімен бірге төсеніштер, кемпинг заттарын алып келіп, табиғат аясында демалады.
Шанхайда тамақ ішетін жерлер
Шанхайда кез келген бюджетке лайық дәмді жергілікті тағамдарды оңай табуға болады. Бірақ жергілікті асханада шошқа еті мен кеспе басым, ал тамақ әзірлеу кезінде май өте көп қолданылады. Сондай-ақ жергілікті дәмханаларда әдетте асты таяқшамен жейді — үйреншікті шанышқы барлық жерде бірдей бола бермейді. Мейрамханалардағы орташа чек екеуімізде шамамен 15 000–20 000 теңге көлемінде болды, бірақ қалада екі адамға 5 000 теңгеге тойып тамақтануға болатын қарапайым көше дәмханалары да жетіп артылады.
Екеуімізге өте ұнаған орындар:
- Haidilao Hot Pot — ең танымал хого-мейрамханалар желісі. Бұл жерде қызметкерлер өте сыпайы, ағылшынша мәзір де бар.
- Bird Hut — етті кантонша әзірлейтін мейрамханалар желісі. Олардың негізгі тағамы — тіл үйірер үйрек еті. Мәзірі шағын әрі қарапайым, форматы жылдам түскі ас ішкенге өте ыңғайлы.
- Lanzhou Beef Noodles (Fuxing Middle Road-тағы филиалы) — кездейсоқ ұшырасқан кеспехана. Қазақстандықтарға ұнайтын бір артықшылығы — бұл жерде халал тағамдар бар.
- O’Mills — үйреншікті еуропалық таңғы астары бар жайлы заманауи дәмханалар желісі. Олар ыстық тоқаштар мен ашытқыдан жасалған ерекше нандар пісіреді.
Сапалы кофе іздесеңіз, мына желілерге баруға кеңес беремін: Peet’s Coffee, Luckin Coffee не Manner Coffee. Орташа есеппен бір шыныаяқ кофе не матча 2 500–2 700 теңге тұрады. Ал ерекше шай сусындарын іздесеңіз, әйгілі Chagee желісіне бас сұғыңыз — олардың стақандары құдды бір өнер туындысы сияқты, ал жасмин қосылған жасыл сүтті шайы менің фаворитіме айналды (оларда кофеині азайтылған түрі де бар). Матчасүйер қауымға жапондық Tokyo Matcha барлары мен атмосфералық Matcha Wang дәмханасы да ұнары анық, онда бариста нәзік көбік үстіне сүйкімді қошақандардың суретін салып береді (адам көп келеді, сусынды 30–40 минут күтіп қалуыңыз мүмкін).
Қытайға бармас бұрын не істеу керек?
Шанхай — қауіпсіз әрі мұнтаздай таза қала: күнде таңертең қаланың коммуналдық қызметтері асфальтты мұқият жуып шығады, тіпті нөсер жаңбырдан кейін де аяқ киіміңіз тап-таза боп тұрады, ал тегін қоғамдық дәретханалар бүкіл қалада көп ұшырасады. Мегаполис кішкентай балалармен де, егде жастағы кісілермен де саяхаттағанға өте жайлы. Бірақ сапарда түрлі мәселе тумас үшін дайындықты үйде жүргенде-ақ бастап кету керек.
Билет мәселесі мен тұрғын үй
Күйеуім екеуіміз Air Astana әуе компаниясының Алматы — Шанхай бағытындағы тікелей рейспен ұштық. Билеттер екі жаққа бір адамға шамамен 450 000–500 000 теңгеге шықты. Тек әуе компаниясының кері ұшу уақыты таңғы 5:30-ға жоспарланғанын есте ұстаңыз. Бұл уақытта әуежайдағы барлық дәмхана мен дүкен жабық болады, ал тамақты тек сауда автоматтарынан ала аласыз. Қонақүйді Француз концессиясынан брондадық және бұл ауданды бәріне ұсынамыз — бұл жерден негізгі споттарға жаяу жеткен оңай және метроның маңызды желілері осында түйіседі. Отельдерді Trip арқылы брондадық, өйткені Booking Қытайда аса танымал емес. Орташа алғанда, жап-жақсы төрт жұлдызды отель бір түнге 60 000–70 000 теңге, ал бес жұлдызды люкс шамамен 100 000 теңге болады.
Транспорт
Қалада көліктің барлық түрі де жүріп-тұрғанға жайлы. Мұндағы велосипед жолақтары тақтайдай, ал көшелерде велосипедті жалға алған оп-оңай. Жүру жүйесі түсінікті әрі тап-таза метроға небәрі 200–300 теңге төледік, билеттерді автоматтардан сатып алдық. Didi таксиін тікелей Alipay қолданбасының ішінен тапсырыс берген оңай, сапардың орташа чегі 1000–1200 теңге болады.
Байланыс пен бұғаттау
Екеуіміз қазақстандық роумингіден бас тарттық және жергілікті қоғамдық Wi-Fi-ға қосылмадық. Себебі қытайлық желілерге қосылсақ, мемлекеттік сүзгілер бізге үйреншікті барлық мессенджер мен әлеуметтік желіні бірден бұғаттап тастайды. Сондықтан алдын ала Airalo қолданбасынан шексіз интернеті бар халықаралық eSIM сатып алдық — онымен барлық қолданба мен әлеуметтік желі ешбір кедергісіз және VPN қолданбай-ақ жұмыс істеп тұрды.
Міндетті түрде қажет төрт қолданба:
- Alipay — сапарыңыздың цифрлық жүрегі. Онсыз Қытайда өмір сүрген мүмкін емес. Екеуіміз әмиянға кәдімгі қазақстандық картамызды байлап қойдық және дүкендерде еш қиындықсыз төлем жасадық, велосипедтерді жалға алдық, таксиге тапсырыс бердік және мейрамханаларда мәзірді QR-код арқылы аштық. Сомасы 200 юаньнан асатын шоттарды төлеген кезде Alipay 3% комиссия ұстайды. Ұшар алдында иммиграциялық картаны Alipay ішінде алдын ала толтырыңыз. Поштаңызға QR-коды бар рұқсаттама келеді. Шанхай әуежайында екеуіміз бұл кодты қызметкерге көрсеттік, олар саусақ іздерімізді сканерлеп, қанша жүретінімізді сұрап, шекарадан небәрі бес минутта өткізіп жіберді.
- Amap — Google Maps қолданбасының қытайлық баламасы. Карта мінсіз жұмыс істейді, кез келген көліктің маршрутын нақты құрады, орындардағы нақты бағаларды, суреттері мен шынайы пікірлерді көрсетеді.
- Papago — жетілдірілген аудармашы. Шанхайдың қоғамдық орындарында ағылшынша ақпарат атымен жоқ. Екеуіміз жергілікті тұрғындармен ымдасып сөйлестік, ал Papago бір-бірімізді түсіну қажет болғанда құтқарып тұрды.
- Trip — Қытайда отельдерді өз бетінше брондауға, сондай-ақ мұражайлар мен Disneyland-ке жеңілдікпен билет сатып алғанға таптырмас сервис.
Салықты қайтару (Tax-Free)
Салықты тек Uniqlo, COS не Popmart сияқты ірі дүкендерден ғана қайтарып алуға болады. Ескеретін жайт, Шанхай әуежайында салықты тек қолма-қол юаньмен қайтарады. Ресми қайтару мөлшерлемесі — шамамен 11%, бірақ барлық әкімшілік комиссияны шегергеннен кейін нақты пайда сатып алу сомасының шамамен 9% болады.
