Қытайда қалай төлейміз: қазақстандық туристерге нұсқау

Қытайда төлем жасаудың ең кең тараған тәсілі — QR-код. Дүкенде, дәмханада, тіпті базарда да жұрт көбіне телефон арқылы есеп айырысады. Қолма-қол ақшамен және банк картасымен де төлеуге болады, бірақ кей жерде оларды қабылдамауы мүмкін. Сондықтан Қытайға барар алдында төлем жасауға қажет қосымшаларды дайындап алған жөн. Қандай валюта алып барған дұрыс? Қазақстандық банк карталары Қытайда жұмыс істей ме? Қай төлем тәсілі тиімді? Бұл мақалада осы және өзге сұрақтарға жауап беріп, қосымшаларды қалай орнату керегін түсіндіреміз.

Қытайда қолма-қол ақшамен төлеуге бола ма?

Қытайдың ұлттық валютасы — юань. Оның халықаралық белгісі — CNY, ал RMB — валютаның ресми атауының қысқартылған нұсқасы. Юаньның теңгеге шаққандағы бағамы өзгеріп отырады, сондықтан сапар алдында өзекті бағамды тексеріңіз. Мысалы, 2026 жылғы 18 қазанда бір юань шамамен 67,62 теңге болған.

Қытайда қолма-қол ақша базар мен шағын дүкендерде, мобильді интернет істемей қалғанда қажет болуы мүмкін. Қайтарым ақша алу оңай болсын десеңіз, өзіңізбен 5 CNY (шамамен 339 KZT), 10 CNY (шамамен 678 KZT) және 20 CNY (шамамен 1 356 KZT) банкноттар алып жүрген ыңғайлы.

Қандай валютамен барған жөн?

• Юань. Қазақстандағы кей банктер мен айырбастау орындарынан юань сатып алуға болады. Мысалы, Halyk Bank пен МиГ айырбастау пункттерінен сұрастырып көріңіз. Бармай тұрып, қажет соманың бар-жоғын және бағамын телефон арқылы нақтылап алыңыз.
• Доллар не еуро. Юань таппасаңыз, доллар не еуро алып баруға болады. Бірақ банкноттардың таза, жыртылмаған және бүлінбегені жөн. Әйтпесе Қытайдағы банктер мен ақша айырбастайтын орындар оларды қабылдамай қоюы мүмкін.

Мынаны ескеріңіз: Қытайға қолма-қол 20 мың CNY (шамамен 1 млн KZT) артық алып кіруге болмайды. Ал шетел валютасы 5 000 USD (шамамен 2 млн KZT) тең не одан көп болса, кеденде декларациялау қажет. Бұл талап басқа шетел валюталарына да қолданылады.

Қытайға жеткен соң доллар не еуроны бірнеше жерде айырбастауға болады.

Әуежайдағы, қонақүйдегі және басқа да ресми айырбастау орындарында. Ақшаны келген бойда әуежайдан айырбастаған ыңғайлы, бірақ бағамы қаладағы орындарға қарағанда тиімсіз болуы мүмкін. Сондықтан әуежайдан қалаға жеткенге дейін қажет болатын аз соманы ғана айырбастаған дұрыс.

Банктерде. Қытайда валютаны Bank of China, ICBC не China Construction Bank сияқты ірі банктерде айырбастауға болады. Паспортыңызды ала барыңыз. Бөлімшеде кезек болуы және құжаттарды толтыру біраз уақыт алуы мүмкін. Валюта айырбастау қызметінің жұмыс уақытын алдын ала тексеріңіз.

Банкоматтарда. Банкоматтан юань шешіп алуға болады. Бірақ ол үшін банкомат картаңыздың төлем жүйесін оқуы керек: Visa-ға — Visa не Plus, Mastercard-қа — Mastercard не Cirrus, UnionPay-ға — UnionPay белгісін іздеңіз.

Bank of China, ICBC және China Construction Bank банкоматтарын пайдаланып көруге болады. Картаңызбен шетелде ақша шешуге болатынын банктен алдын ала тексеріңіз. Бір операцияда шешіп алуға болатын сома банкоматқа байланысты. Банкомат пен картаңызды шығарған банк комиссия алуы мүмкін.

Экранда қай валютада есеп айырысу керегі сұралса, әдетте юаньды таңдаған тиімді. Осылайша банкомат ұсынған айырбастау бағамынан бас тартып, конвертацияны картаңыздың төлем жүйесі мен банкіне қалдырасыз.

Alipay-ды қалай қолдануға болады?

• 
• 
• 

Қытайдағы төлем жүйесінің маған ұнайтыны — қалтаңызға бір бума қағаз ақша салып жүрмей-ақ, дүкенде, дәмханада, тіпті базарда да QR-код арқылы төлем жасауға болатыны. Ол үшін жергілікті тұрғындар сияқты Alipay қосымшасын пайдалануға болады. Сапарға дейін тіркеліп, банк картаңызды қосып қойсаңыз, барған соң төлем жасау оңайырақ.

1. Қосымшаны жүктеп алыңыз. iPhone қолдансаңыз, App Store-дан, Android болса, Google Play-дан Alipay-ды жүктеңіз. Қосымшада ағылшын тілі қолжетімді.
2. Тіркеліңіз. Қосымшаны ашып, телефон нөміріңізді жазыңыз. Қытай нөмірін сатып алудың қажеті жоқ. Телефоныңызға келген SMS-кодты енгізіңіз.
3. Жеке басыңызды растаңыз. Кейде алғашқы төлем жасағанда жеке басыңызды растау үшін төлқұжат деректерін сұрауы мүмкін. Сондықтан мәліметтерді алдын ала толтырып қойған дұрыс. Жеке деректер бөліміне кіріп, ақпаратты төлқұжаттағыдай енгізіңіз. Бөлімдердің атауы қосымшаның нұсқасына қарай өзгеруі мүмкін.
4. Банк картаңызды қосыңыз. Қосымшадағы Bank Cards («Банк карталары») бөліміне кіріңіз. Карта нөмірін және сұралған басқа деректерді енгізіп, нұсқауларды орындаңыз.

Alipay-ге қандай қазақстандық банк карталарын тіркеуге болады?

Alipay-ге халықаралық Visa және Mastercard карталарын, сондай-ақ кей басқа төлем жүйелерінің карталарын қосуға болады. Қазақстанда мұндай карталарды Kaspi Bank, Halyk Bank, Freedom Bank, Bank CenterCredit, Home Credit Bank және ForteBank сияқты банктер шығарады. Дегенмен картаны қосу мүмкіндігі мен төлемнің өтуі банкке және картаның түріне байланысты. Сондықтан сапар алдында өз картаңызды тіркеп көрген дұрыс.

Alipay арқылы қалай төлейміз?

Қосымша арқылы төлем жасаудың екі негізгі тәсілі бар.

1. Сатушының QR-кодын сканерлеу. Alipay қосымшасын ашып, басты беттегі Scan батырмасын басыңыз. Сатушы ұсынған QR-кодты сканерлеңіз. Қажет болса, төлем сомасын енгізіңіз. Соманы тексеріп, төлемді растаңыз.
2. Өз QR-кодыңызды көрсету. Қосымшадан Pay/Receive бөлімін таңдаңыз. Экранда QR-код пайда болады. Оны сатушыға көрсетіңіз. Сатушы кодты сканерлеп, төлемді қабылдайды. Ақшаның аударылғанын қосымшадағы хабарламадан не операциялар тарихынан тексере аласыз.

Комиссия бар ма?

Alipay-ге шетелдік банк картасын қосып төлегенде, 200 CNY (шамамен 14 мың KZT) аспайтын төлемге әдетте қосымша комиссия алынбайды. Ал төлем 200 CNY (шамамен 14 мың KZT) асса, бүкіл соманың 3%-ы көлемінде комиссия алынуы мүмкін. Мысалы, 300 CNY (шамамен 20 мың KZT) төлесеңіз, комиссия 9 CNY (шамамен 610 KZT) болады. 

Бұған қоса, картаңызды шығарған банк валюта айырбастағаны үшін комиссия алуы мүмкін. Сондықтан төлемді растамай тұрып, Alipay көрсеткен комиссияны тексеріңіз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

WeChat Pay-ді қалай қосуға болады?

WeChat — Қытайда кеңінен қолданылатын мессенджер. Ол арқылы хабарлама жазып, қоңырау шалуға, сондай-ақ WeChat Pay сервисімен QR-код арқылы төлем жасауға болады.

1. WeChat қосымшасына тіркеліңіз. Әуелі телефоныңызға WeChat қосымшасын жүктеп алыңыз. Оны ашып, Sign Up («Тіркелу») батырмасын басыңыз. Телефон нөміріңізді енгізіп, SMS арқылы келген кодты жазыңыз. Қытай нөмірі болмаса да, тіркелуге болады.
2. Жеке басыңызды растаңыз. Қосымшадағы Me, одан кейін Services және Wallet бөлімдеріне кіріңіз. Жеке басыңызды растауды сұраса, төлқұжат деректерін енгізіп, қажет мәліметтерді толтырыңыз. Кей жағдайда төлқұжаттың суретін жүктеу қажет болуы мүмкін.
3. Банк картаңызды қосыңыз. Wallet бөлімінен Bank Cards, содан кейін Add a Card батырмасын таңдаңыз. Халықаралық банк картаңыздың деректерін енгізіп, қажет болса, SMS-код арқылы растаңыз.

WeChat Pay халықаралық Visa, Mastercard және UnionPay сияқты карталарды қолдайды. Бірақ картаны тіркеу мүмкіндігі оны шығарған банкке де байланысты.

WeChat Pay арқылы қалай төлеуге болады?

Сатушының QR-кодын сканерлеу. WeChat қосымшасын ашыңыз да, жоғарғы бұрыштағы «+» белгісін басып, Scan функциясын таңдаңыз. Сатушының QR-кодын сканерлеңіз. Төлем сомасын тексеріп, растаңыз.

Өз QR-кодыңызды көрсету. WeChat қосымшасынан Me — Services — Wallet бөліміне кіріңіз. Money не Pay/Receive функциясын таңдаңыз. Экранда пайда болған QR-кодты сатушыға көрсетіңіз. Төлемнің өткенін тексеріңіз.

WeChat Pay-де де шетелдік картамен 200 CNY (шамамен 14 мың KZT) аспайтын төлемге әдетте комиссия алынбайды, ал одан жоғары төлемге 3% комиссия есептелуі мүмкін. Жаңа пайдаланушыларға арналған уақытша жеңілдіктер де бар. Сондықтан төлемді растағанда нақты шарттарын тексеріңіз.

Қытайда қандай банк карталарын қолдануға болады?

Қытайда Visa, Mastercard және UnionPay карталарымен төлеуге болады. Бірақ олардың ішінде UnionPay кеңірек қолданылады.

Visa мен Mastercard кей жерде, әсіресе шағын дүкендер мен жергілікті дәмханаларда қабылдана бермейді. Картаңыздың жарамдылығын кассадағы терминалдан төлем жүйесінің логотипін қарап не сатушыдан сұрап білуге болады.

Ал кейбір сауда орындары QR-код арқылы төлем қабылдайды. Сондықтан банк картасымен қатар мобильді төлем қосымшасын да дайындап алған жөн.

Kaspi арқылы Қытайда қалай төлеуге болады?

Қытайда Kaspi.kz қосымшасындағы Alipay+ сервисі арқылы осы жүйені қабылдайтын сауда орындарында QR-кодпен төлем жасауға болады.

1. Kaspi.kz қосымшасын ашыңыз.
2. «Қызметтер» бөлімінен Alipay+ сервисін таңдаңыз.
3. Сатушының QR-кодын сканерлеңіз не өз QR-кодыңызды көрсетіңіз.
4. Төлем сомасын тексеріп, растаңыз.

Төлем теңгемен есептеледі, ал юаньға айырбастау Kaspi Bank бағамы бойынша жүргізіледі. Төлемді растамай тұрып, соманы теңгемен де, юаньмен де тексере аласыз. Kaspi.kz арқылы Alipay+ сервисінде төлем жасағаны үшін қосымша комиссия алынбайды.

bcc.kz арқылы Қытайда қалай төлеуге болады?

Қытайда bcc.kz қосымшасы арқылы QR-кодпен төлеуге болады. Ол үшін UnionPay жүйесінде шығарылған DragonCard не GoldCard картасы қажет.

Төлем жасау үшін bcc.kz қосымшасын ашып, «QR арқылы төлеу» дегенді таңдаңыз. Сатушының QR-кодын сканерлеп, төлемді растаңыз. Сондай-ақ «Менің QR-кодым» бөлімінен өз кодыңызды көрсетіп төлеуге болады.

DragonCard цифрлық картасы — 15 мың теңге, пластик картасы — 30 мың теңге. Қызмет көрсету ақысы айына 10 мың теңге, бірақ белгілі талаптар орындалса, тегін. GoldCard Қазақстан резиденттеріне тегін шығарылады және оған ай сайынғы қызмет көрсету ақысы алынбайды.

Halyk арқылы Қытайда қалай төлеуге болады?

Қытайда Halyk Super App арқылы QR-кодпен төлеуге болады. Ол үшін UnionPay картасы қажет. Оны қосымша ішінен ашуға болады. Картаға қызмет көрсету ақысы — айына 3 мың теңге. Бұл тарифтің нақты қай картаға қатысты екенін банкпен тексеріп алған жөн.

Halyk Super App қосымшасын ашып, QR-төлем бөлімін таңдаңыз. Сатушының QR-кодын сканерлеп, төлемді растаңыз. Сондай-ақ өз QR-кодыңызды жасап, сатушыға көрсете аласыз.

Қосымшадағы «Барлық қызметтер» бөлімінен WeChat Pay арқылы төлеу мүмкіндігін де іздеп көріңіз. Бұл қызметті пайдалану үшін де UnionPay картасы қажет. Қосымшаның нұсқасына қарай бөлім атауы өзгеруі мүмкін.

Қай төлем тәсілі тиімді?

Меніңше, негізгі төлем құралы ретінде Alipay не WeChat Pay қосымшасын не Kaspi.kz ішіндегі Alipay+ сервисін қолданған тиімді. UnionPay картаңыз болса, тіптен жақсы. Дегенмен сақтық үшін ақшаның аз бөлігін қолма-қол алып жүрген жөн.

Осы тақырыпта басқа не бар?

Alipay, Amap пен DiDi: Қытайда қажет болатын қосымшалар

Жиі қойылатын сұрақтар

Қытайда Alipay ыңғайлы ма, WeChat Pay ма?

Екеуі де Қытайда QR-код арқылы төлеуге мүмкіндік береді. Екі қосымшаға да халықаралық банк картасын тіркеуге болады. Сапар алдында екеуін де орнатып, баптап алған дұрыс.

Қазақстанда шығарылған UnionPay картасымен Қытайда төлеуге бола ма?

Иә, болады. Бірақ төлем терминалы не QR-төлем жүйесі UnionPay картасын оқуы керек.

Қазақстандық картамен банкоматтан юань алуға бола ма?

Иә, Қазақстандық картамен Қытайдағы банкоматтан юань шешіп алуға болады. Ол үшін банкомат картаңыздың төлем жүйесін — Visa, Mastercard не UnionPay-ді оқуы керек. Ақша шешкенде банкомат пен банк комиссия алуы мүмкін. Бір операцияда шешіп алуға болатын сома банкомат пен банк лимитіне байланысты.

Alipay арқылы төлем өтпесе не істеу керек?

Интернетті, картадағы ақша мен карта деректерін тексеріңіз. Мәселе шешілмесе, басқа картаны не қолма-қол юаньды пайдаланып көріңіз.

Alipay мен WeChat Pay арқылы төлеу үшін интернет керек пе?

Әдетте төлем жасауға интернет қажет. Сондықтан Қытайда мобильді интернет не Wi-Fi болғаны дұрыс. Интернет болмаса, қолма-қол юаньмен төлеуге болады.