Бакуді аралайық: ең көрікті жерлер, бір күндік маршрут пен тамағы дәмді орындар
Көпшілік біле бермейтін жерлерді де жаздық.
Алматыдан Бакуге ұшақпен үш жарым сағатта жетуге болады. Қазақстан азаматтарына визаның қажеті жоқ. Сондықтан Әзербайжан астанасына еңбек демалысын күтпей-ақ, үш-төрт күндік демалыс кезінде-ақ барып қайтуға болады. Мұнда XII ғасырдан қалған Ичери-шехер қамалы мен әйнекпен қапталған Жалын мұнаралары бір-бірінен небәрі 15 минуттық жаяу жерде орналасқан. Ал кешке қала тұрғындары Каспий жағалауына серуендеуге шығады.
Бакуге екі-үш күнге барсаңыз, не көруге болады? Қала сыртындағы қандай жерлерге барған жөн? Қай ауданда тұрған ыңғайлы және қандай тағамдардан дәм тату керек? Мақалада осы және өзге сұрақтарға жауап береміз. Бағалар мен елге кіру ережелері 2026 жылдың қазан айындағы жағдай бойынша берілген.
Бакудің ең көрікті жерлері
Бакудің орталығындағы көрікті жерлердің көбі Ескі қала, Теңіз жағалауы бульвары мен Таулы саябақтың арасында орналасқан. Бәрін жаяу аралап шығуға болады. Ал қала сыртындағы Гобустан, Атешгях пен Янардагқа бару үшін жарты күндік экскурсияға жазылған не такси жалдаған ыңғайлы.
Ичери-шехер — Ескі қала
Ичери-шехер — XII ғасырда салынған қамал қабырғаларының ішіндегі тарихи аудан. Ол Ширваншахтар сарайымен және Қыз мұнарасымен бірге ЮНЕСКО-ның Дүниежүзілік мұралар тізіміне енген.
Мұнда тар көшелер, керуенсарайлар, мешіттер, ескі моншалар мен кілем сататын дүкендер бар. Ескі қалада әлі күнге дейін адамдар тұрады. Аулаларда кір жайылып тұрады, көршілер есік алдында шай ішіп отырады. Қызық дерек: «Гауһар тасты қол» фильміндегі шетел қаласында өтетін көріністер осы жерде түсірілген.
Ичери-шехерге кіру тегін, тек музейлерге билет алу керек. Ескі қалаға «Ичери-шехер» метро станциясының жанындағы Қос қақпа арқылы кірген ыңғайлы. Жергілікті гидтер мұнда таңертең ерте не түнге қарай келуге кеңес береді. Бұл уақытта туристік топтар азаяды. Аулаларда нарды ойнап отырған адамдарды көріп, ескі моншалардың жанында шай ішуге болады.
Қыз мұнарасы
Биіктігі шамамен 28 метр болатын Қыз мұнарасы Ескі қаланың шетінде тұр. Тарихшылар оның қашан және не үшін салынғаны жөнінде әлі бір пікірге тоқтаған жоқ. Бір болжам бойынша, ол зороастризм дінінің ғибадатханасы болған, енді бір нұсқада XII ғасырда қарауыл мұнарасы ретінде салынған делінеді. Аңыздардың бірінде билеушінің қызы сүймеген адамына тұрмысқа шыққысы келмей, осы мұнарадан теңізге секіргені айтылады.
Мұнараның ішінде бірнеше қабаттан тұратын музей бар. Ал төбесіне шықсаңыз, теңіз шығанағы мен бульвар көрінеді. Шетелдіктерге билет — 19 манат, балаларға — 9 манат. Мұнара күн сайын 10:00–19:00 аралығында ашық тұрады.
Ширваншахтар сарайы
XV ғасырда салынған Ширван билеушілерінің резиденциясы Ескі қаланың ең биік жерінде орналасқан. Сарай кешеніне мешіт, кесене, монша мен диван-хане деп аталатын ғимарат кіреді. Бір болжам бойынша, диван-ханеде сот отырыстары өткен. Сарай залдарында кілемдер, қару-жарақ, ыдыстар мен қазынадан қалған әшекейлер қойылған.
Мұрад қақпасын (Мурад гапысы) да көріңіз. Оның төбесі ара ұясына ұқсайтын ұсақ тас өрнектермен безендірілген. Мұндай өрнек мукарна деп аталады. Сарай баспалдағынан теңіз көрінеді. Қазына бөлмесін қоса есептегенде билет құны — 24 манат, балаларға — 12 манат. Кешен күн сайын 10:00–19:00 аралығында жұмыс істейді. Таңертең ашылған кезде барған дұрыс: 11:00-ден кейін экскурсиялық топтар келе бастайды.
Теңіз жағалауы бульвары мен Кілем музейі
Бульвар Каспий жағалауымен бірнеше шақырымға созылып жатыр. Таңертең мұнда адамдар жүгіріп жүреді, күндіз көлеңкеде демалып отырады, ал кешке отбасымен серуендейді. Бульварда «Кіші Венеция» деп аталатын орын бар. Ондағы каналдарда қайықпен жүзуге болады. Жағалаудан серуендеу кемелері де жүреді.
Бульвардың бір шетінде оралған кілем пішінінде салынған Кілем музейі орналасқан. Мұнда Әзербайжан кілемдерінің үлкен коллекциясы сақталған. Ескі жүн кілемдерден бастап қазіргі жібек кілемдерге дейін көруге болады. Билет — 10 манат. Дүйсенбіде музей жабық. Бульвардың жаңа бөлігіне де барып көріңіз. Онда жаңа галереялар мен музейлер ашылған. Солардың бірі — Daş salnamə («Тас шежіре») музейі.
Жалын мұнаралары мен Таулы саябақ
- Таулы саябақтан ашылатын көрініс
- Фуникулёр кіреберісі
- Жалын мұнаралары
Жалын тіліне ұқсайтын үш зәулім ғимарат 2012 жылы салынған. Күн батқан соң мұнаралардың сырты үлкен экранға айналады. Онда жалын жүгіріп, кейін Әзербайжан туы пайда болады. Мұнаралардың дәл түбіне барудың қажеті шамалы. Ішінде кеңселер, пәтерлер мен қонақүй орналасқан. Оның үстіне мұнаралар алыстан әдемірек көрінеді.
Жарық шоуын Таулы саябақтан тамашалаған жақсы. Бұл — теңіз шығанағына қарайтын биік жердегі саябақ. Оған бульвардан фуникулермен көтерілуге болады. Жолақысын BakuCard картасымен төлейсіз. Қаласаңыз, баспалдақпен жаяу да көтеріле аласыз. Саябақта қаза тапқандарды еске алуға арналған Шейіттер аллеясы бар. Сондықтан бұл маңда шуламай, тыныш жүрген абзал.
Гейдар Әлиев орталығы
Сәулетші Заха Хадид жобалаған ғимарат қатып қалған толқынға ұқсайды. Мұнда тік бұрыштар жоқтың қасы. Орталықта заманауи өнер көрмелері өтеді. Ұлттық киім киген қуыршақтар мен елдегі белгілі ғимараттардың шағын үлгілері де қойылған. Ішіне кірмесеңіз де, орталықтың алдындағы төбеде серуендеп көріңіз. Бұл — Бакуде суретке түсуге ең әдемі орындардың бірі.
Билет шамамен 15 манат тұрады. Дүйсенбіде орталық жабық. Ең жақын метро станциясы — «Нариман Нариманов». Одан орталыққа жаяу шамамен 15 минутта жетесіз.
Низами көшесі мен Субұрқақтар алаңы
Низами — Бакудің жаяу жүргіншілерге арналған негізгі сауда көшесі. Жергілікті тұрғындар оны «Торговая» деп атайды. Көше бойында XX ғасырдың басында салынған зәулім үйлер тұр. Ол кезде Баку әлемдегі мұнай өндірісінің шамамен жартысын қамтамасыз еткен. Мұнайдан байыған кәсіпкерлер қала орталығында сәнді сарайлар салдырған. Низами көшесі Субұрқақтар алаңына алып барады. Бұл — тұрғындар кездесетін, дәмханалар, дүкендер мен көше музыканттары көп орын.
Туристер біле бермейтін жерлер: Кубинка, Ботаника бағы мен Биби-Әйбат шамшырағы
Ең көрікті жерлерді аралап болған соң, жергілікті гидтер туристер көп жүрмейтін аудандарға баруға кеңес береді.
Кубинка — бұрынғы Советская көшесінің маңындағы аудан. Мұнда ескі үйлер мен ортақ аулалар сақталған. Тұрғындардың күнделікті тіршілігі ондаған жыл бұрынғыдай жалғасып жатыр. Бірақ көптеген үй күреліп тасталуы мүмкін, сондықтан бұл ауданды қазір көріп қалған жөн.
Жақында Ботаника бағы жөндеуден өтті. Соған қарамастан мұнда турист қарасы әлі де көп емес.
Күннің батуын көру үшін Биби-Әйбат шамшырағына баруға болады. Ол орталықтан алыс орналасқандықтан, таксимен барған ыңғайлы.
Ал көше өнерін ұнатсаңыз, жергілікті гид Динара Таги Шахбази көшесіндегі 8-үйдің ауласын көруге кеңес береді. Онда қабырғаларға суреттер салынған.
Атешгях пен Янардаг
Атешгях — Сураханы кентіндегі отқа табынушылар ғибадатханасы. Оны XVII–XVIII ғасырларда үнді саудагерлері салған.
Бұрын мұндағы от жер астынан шығатын табиғи газдың арқасында жанған. Қазір газ құбыр арқылы беріледі.
Ал Янардаг — ондаған жылдан бері оты сөнбеген төбе баурайы. Мұнда кешке барған дұрыс: қараңғыда жалын айқынырақ көрінеді.
Атешгяхқа билет — 15 AZN (шамамен 3 950 KZT). Атешгях пен Янардагқа арналған ортақ билет 25 AZN (шамамен 6 583 KZT) тұрады және 72 сағатқа жарамды. Ал балшық жанартауларына бару да кіретін билет — 35 AZN (шамамен 9 217 KZT).
Гобустан мен балшық жанартаулары
Гобустан қорығы Бакуден 60 шақырым жерде орналасқан. Мұндағы жартастарда алты мыңнан астам петроглиф, яғни тасқа қашалған сурет сақталған. Оларда адамдар, жануарлар мен қайықтар бейнеленген. Кей суреттердің жасы он мың жылдан асады.
Қорықтағы жаяу маршруттың басында интерактив музей бар. Музей мен қорыққа ортақ билет — 17 AZN (шамамен 4 477 KZT). Музейден көлікпен 15 минут жүргенде балшық жанартауларына жетесіз. Мұнда шағын төбешіктерден суық сұр балшық бүлкілдеп шығып жатады.
Жанартауларға апаратын жол асфальтталмаған. Жаңбырдан кейін жол жабылады. Жергілікті такси жүргізушілері туристерді музейден ескі «Жигули» көліктерімен апарады. Гобустанға кемінде жарты күн арнаңыз.
Жолай түрлі түсті жолақтары бар Карамель тауларына соғуға болады. Мұнда белемниттерді, яғни ежелгі теңіз жануарларының тасқа айналған қалдықтарын іздейді. Ал Гобустанның өзінде қызметкерлерден басқа маршруттарды сұраңыз. Мысалы, Кичикдаш тауына көтерілуге болады.
Бакуде не істеуге болады?
- Яшыл базарда
Бакуде музей аралағаннан бөлек, асықпай серуендеп, жергілікті тұрғындардың күнделікті тіршілігімен танысуға уақыт бөлген жөн.
Базар аралаңыз. Жеміс-жидек, дәмдеуіш пен тәттілерді Yaşıl Bazar және Təzə Bazar базарларынан табасыз. Ал жергілікті тіршілікті көру үшін «8-километр» базарына барыңыз. Жексенбі күндері барахолка да жұмыс істейді, бірақ ол алыс болғандықтан, таксимен барған ыңғайлы.
Теңіз жағалауындағы шайханалардың бірінде армуду деп аталатын алмұрт пішінді стақаннан шай ішіңіз. Шайға ақ шие не інжір тосабын қосып береді.
Хамамға барыңыз. Ескі қала мен орталықта буға түсіп, массаж жасатуға болатын моншалар жұмыс істейді.
Теңіз жағалауындағы Халықаралық мугам орталығында әзербайжанның дәстүрлі музыкасын тыңдаңыз.
Бульвардағы айлақтан кемеге мініп, теңіз шығанағын аралаңыз. Серуен шамамен жарты сағатқа созылады.
United Coffee Beans, Zebra, Coffee Moffie не Botanist кофеханаларынан кофе ішіңіз.
Кешке Kefli, Room не Vintique шарап барларына барыңыз. Қаланы биіктен көргіңіз келсе, Fuzzy Coffee & Wine террасасына шығыңыз. Баку орталығында жұмыс күндерінің өзінде түн ортасына дейін тіршілік тоқтамайды.
Бакуде бір күнде не көруге болады: дайын маршрут
Бакуде бір-ақ күнім бар десеңіз, мына маршрутпен қаланың ең көрікті жерлерін аралап шығуға болады. Көп жерге жаяу жетесіз, такси бір-екі рет қана қажет болады. Ескеретін жайт: дүйсенбіде Кілем музейі мен Гейдар Әлиев орталығы жабық тұрады.
Таңертең
- 09:30–10:00 — Ескі қалада таңғы ас: кутаб пен шай.
- 10:00–11:15 — Ширваншахтар сарайын аралау.
- 11:15–12:30 — Ичери-шехерде серуендеу және Қыз мұнарасына көтерілу.
Түсте
- 12:30–13:30 — Субұрқақтар алаңы маңында түскі ас.
- 13:30–14:00 — Низами көшесін аралау.
- 14:00–15:30 — теңіз жағалауына түсіп, Кілем музейін көру және бульварда серуендеу.
- 15:45–17:15 — Гейдар Әлиев орталығы. Бульвардан таксимен шамамен 15 минутта жетесіз.
Кешке
- 17:45–19:00 — таксимен фуникулерге жетіп, Таулы саябаққа көтерілу. Күннің батуын және Жалын мұнараларының жарығын тамашалау.
- 19:30 — кешкі ас және бульварда серуендеу.
Бакуде қай жерде тұрған ыңғайлы?
Бакудің орталығы шағын, сондықтан таксиге тәуелді болмау үшін орталықтан баспана таңдаған дұрыс. Жергілікті тұрғындар мына аудандарды ұсынады.
- Ичери-шехер («Ичери-шехер» метро станциясы). Ескі үйлердегі шағын қонақүйлер бар, көрікті жерлер жақын. Бірақ өрге көп жүруге тура келеді, ал такси кейде қонақүйдің есігіне дейін жете алмайды.
- Субұрқақтар алаңы мен «Сахиль» метро станциясы. Қаланың қақ ортасы. Жағалау, дүкендер, дәмханалар мен хостелдер көп. Кешке шулы болады.
- «Низами» метро станциясының маңы. Бұл да орталық, бірақ тынышырақ. Дәмханалар жеткілікті.
- «28 Мая» метро станциясының маңы. Теміржол вокзалы мен әуежай автобусының аялдамасы жақын. Ескі қалаға жаяу шамамен 20 минут. Шулы болғанымен, шабаданмен келген адамға ыңғайлы.
- Бульвар мен Жалын мұнараларының маңы. Теңіз көрінетін ірі қонақүйлер орналасқан. Мысалы, Fairmont — Жалын мұнараларының бірінде, Four Seasons пен Hilton — бульвардың қарсы бетінде, ал JW Marriott Absheron — Азадлыг алаңының жанында.
Бакуде не жеген дұрыс және қайда баруға болады?
Әзербайжан асханасы — Бакуге барғанға тамаша себеп. Ең алдымен мына тағамдардан дәм татып көріңіз.
- Палау. Бакуде оны бірнеше әдіспен дайындайды. Күріштің қасына тауық еті, балық не бауыр, жаңғақ, шие не көк қосылған гару деп аталатын қоспаны бөлек береді. Ал ең сәнді түрі — лаваштан жасалған қабықтың ішіне салынған шах-палау.
- Долма. Жүзім жапырағына оралған ет пен күріштен жасалатын тағам.
- Кутаб. Ішіне көк, ет не асқабақ салынған жұқа нан.
- Гюрза. Шеті өрім сияқты түйілген тұшпара.
- Лявянги. Ішіне жаңғақ пен қышқыл езбеден жасалған қоспа салынған тауық.
- Сорпалар. Ұсақ тұшпара қосылған дюшбара, қой еті мен ноқаттан қыш құмырада дайындалатын пити, бозбаш және үй кеспесі қосылған эриште.
- Пахлава мен шекербура. Жаңғақ қосылған дәстүрлі тәттілер.
Қайда тамақтануға болады?
- Qaynana
- Əriştə
- Əriştə
- Əriştə — бағасы арзан, үй тағамдарын ұсынатын орын.
- Qaynana — Ескі қаладағы жергілікті асхана. Бағасы орташа, кешкі асқа үстелді алдын ала брондаған дұрыс.
- Cafecity — қала бойынша бірнеше желісі бар, мәзірі түсінікті әрі бағасы қолжетімді дәмханалар желісі.
- Ескі қаладағы керуенсарай мейрамханалары — ортағасырлық керуенсарай ауласында кешкі ас ішуге болады.
Жергілікті тұрғындар таңғы асты көбіне жол-жөнекей ішеді. Наубайханадан дәмдеуіш қосылған қатпарлы гогал тоқашын, терезеден сатылатын кофені не entree желісінен круассан алады. Жүрек жалғап алғанға Молокан бағының жанындағы Seyidin Doneri, сондай-ақ Avtosh Doner, Bir-Iki Doner мен Shaurma #1 орындары қолайлы.
Франция елшілігінің жанындағы шағын дүңгіршекте картоп салынған қуырылған бәліштер сатылады. Оны аджикаға батырып жейді. Дәмханада түскі ас бір адамға шамамен 15–25 AZN (шамамен 3 950–6 583 KZT), ал мейрамханада кешкі ас 30–50 AZN (шамамен 7 900–13 мың KZT) тұрады.
Жиі қойылатын сұрақтар
Бакуге алғаш баратындар жиі қоятын сұрақтарға жауап берейік.
Қазақстан азаматтарына Әзербайжанға баруға виза керек пе?
Жоқ. Әзербайжанның Мемлекеттік көші-қон қызметінің мәліметінше, Қазақстан азаматтары елде 90 күнге дейін визасыз жүре алады. Шетелге шығатын паспорт қажет. Қазақстанның жеке куәлігімен Әзербайжанға кіре алмайсыз. Елде 30 күннен артық қалсаңыз, тұрғылықты мекенжай бойынша тіркелу керек. Қонақүйде тұрсаңыз, мұны әдетте қызметкерлер рәсімдейді. Ал пәтер жалдасаңыз, үй иесінен алдын ала сұраңыз.
Мынаны ескеріңіз: Әзербайжанның құрлықтағы шекаралары 2020 жылдан бері жолаушыларға жабық. Ерекше карантин режимі 2027 жылғы қаңтарға дейін ұзартылған. Сондықтан елге тек ұшақпен кіруге болады. Грузиядан көлікпен не автобуспен бара алмайсыз.
Қазақстаннан Бакуге қалай жетуге болады?
Алматыдан Бакуге Azerbaijan Airlines (AZAL) күн сайын, ал Air Astana аптасына төрт рет ұшады. Астанадан AZAL тікелей рейстер орындайды. Ақтаудан, Атыраудан (Air Astana) және Шымкенттен (AZAL) де рейстер бар. Алматы — Баку бағытына бір жаққа билет 62 мың теңгеден, Астана — Баку бағытына 75 мың теңгеден басталады.
Әуежайдан орталыққа Aero Express H1 автобусы қатынайды. Күндіз әр 20 минут сайын, түнде әр 45 минут сайын жүреді. «28 Мая» метро станциясына шамамен 30 минутта жетеді. Жолақысы — 1 манат 30 гяпик. Төлемді тек BakuCard картасымен жасауға болады. Картаның өзі 2 манат тұрады, оны терминалдан шыққан жердегі автоматтардан сатып аласыз.
Бакуге қай мезгілде барған дұрыс?
Ең қолайлы уақыт — сәуірден маусымға дейін және қыркүйек пен қазан айлары. Қазанда күндіз ауа температурасы +17…+22 °C шамасында болады. Кешке салқындайды, ал Каспийде шомылуға суық.
Жазда ауа температурасы +35 °C-тан асуы мүмкін. Қыста шамамен +5 °C, ылғалды әрі желді болады. Бакуді желдер қаласы деп атайды. Сондықтан қай мезгілде барсаңыз да, желден қорғайтын күрте алған жөн. Наурыздың соңында қалада Наурыз мерекесі тойланады. Бұл кезде халық серуендеп, от жағып, дәстүрлі тәттілер пісіреді.
Бакуде қандай көлікпен жүрген ыңғайлы?
Қаладағы негізгі көлік — метро. Жолақысы 60 гяпик. Төлемді BakuCard (әзербайжанша BakıKart) картасымен жасайсыз. Оны метро станцияларындағы автоматтардан сатып алуға болады. Картаны m10 қосымшасы арқылы да толықтыра аласыз. Бір картаны бірнеше адам пайдалана алады. Автобуста да осы картамен төлейсіз. Автобус жолақысы 60 гяпиктен басталады.
Таксиді қосымша арқылы шақырған дұрыс. Bolt әдетте Uber AZ-ге қарағанда арзанырақ. Көшеден такси тоқтатпаған дұрыс, әсіресе әуежай алдында тұрған жүргізушілерге отырмаған жөн. Қарбалас уақытта метро таксиден жылдамырақ болуы мүмкін.
Бакуде интернет пен ақшаны қалай пайдалануға болады?
Nar, Bakcell не Azercell операторларының жергілікті SIM-картасын 28 Mall сауда орталығының маңындағы байланыс салондарынан сатып алуға болады. Көп жерде банк картасымен төлем қабылдайды. Бірақ базар мен шағын дүкендерге қолма-қол ақша қажет. Өзіңізбен доллар алып барып, қаладағы айырбастау орындарында манатқа ауыстыруға болады.
Баку қауіпсіз қала ма?
Жергілікті гидтердің айтуынша, Баку — тыныш қала. Жалғыз саяхаттайтын қыз-келіншектерге де салыстырмалы түрде қауіпсіз. Көшелерде полиция қызметкері көп. Қала орталығынан тыс жерлерде тым ашық киінбеген жөн. Егер көшедегі біреудің назары не әрекеті ыңғайсыздық тудырса, полиция қызметкеріне жүгінуге болады.
Бакуден не әкелуге болады?
- Базарда
- Qaynana-дағы тосынсыйлар
- Corabb брендінің шұлықтары
Бакуден жұрт көбіне мына заттарды алып келеді:
- армуду стақандары мен жебіршөп қосылған әзербайжан шайы;
- ақ шие, інжір не жасыл грек жаңғағынан жасалған тосап;
- наршараб — етке қосылатын қою анар тұздығы;
- анар шарабы және алыча жемісінен жасалған жұқа қышқыл пастила;
- пахлава мен шекербура;
- кялагаи — өрнекті жібек орамал. Оны жасау өнері ЮНЕСКО тізіміне енген;
- жергілікті Corabb брендінің суретті шұлықтары;
- Handicraft Baku және Stock in Stock out дүкендеріндегі жергілікті дизайнерлердің бұйымдары;
- кілем.
Кілем сатып алсаңыз, бір нәрсені ескеріңіз. Бакуде сатып алынған кез келген кілемді елден алып шығу үшін сертификат қажет. Ресми дүкендер оны сатып алған кезде береді, ал базарда сертификат табылмауы мүмкін. Сертификатсыз кілемді кедендегі тексерістен өткізбеуі мүмкін.
Тосап пен тұздықтарды багажға салыңыз. Көлемі 100 миллилитрден асатын сұйықтықты қолжүкке өткізуге болмайды. Шарапты да тіркелетін жүкке салған дұрыс. Қазақстанға бір ересек адам үш литрге дейін алкогольді баж салығынсыз алып кіре алады.
Бакуге барарда не білген жөн?
Сапарыңыз жайлы өтуі үшін мына кеңестерді ескеріңіз.
- Бакуге үш-төрт күнге барған дұрыс. Екі күнде қала орталығын аралап, Гобустан мен Апшерон түбегіндегі отты жерлерге жарты күннен арнай аласыз.
- Сапарыңыз дүйсенбіге түсіп қалмай ма, тексеріңіз. Бұл күні Кілем музейі мен Гейдар Әлиев орталығы жабық.
- Мешітке жабық киіммен кіру керек. Әйелдер орамал таққаны жөн.
- Алдымен BakuCard сатып алыңыз. Онсыз әуежайдан автобуспен кете алмайсыз және метроға кіре алмайсыз.
- Әзербайжан тілінде бірнеше сөз үйреніп алыңыз: Salam — «сәлем», Çox sağ olun — «рақмет», Neçəyədi? — «қанша тұрады?».
- Әр минутыңызды жоспарлап тастап, кесте бойынша жүріп-тұруға тырыспаңыз. Жергілікті тұрғындардың сөзінше, кейде картаны жауып қойып, қала көшелері мен аулаларын асықпай аралаған әлдеқайда әсерлі болуы мүмкін.
