Бакудегі бір күн: 13 мың теңгеге не істеп үлгеруге болады?
Бір күнге арналған маршрут: таңғы ас, кілемдер мен «Кіші Венеция».
Негізі Бакуде үш күн болып, қаланы біраз аралағым келген. Бірақ тек бір тәулік уақытым болды. Бакуге биыл шілдеде өткен Джастин Тимберлейктің концертіне барып едім. Бір күнге жоспарлаған бюджетім де аса көп болмады — 50 доллар (шамамен 26 мың теңге).
Спойлер: Мен соның бар-жоғы 25 долларын жұмсадым. Мұның ішіне такси, мұражайлар билеті мен тамақ ақысы кіреді. Ақша үнемдеудің, алданып қалмаудың өзім білетін жолдарын айтып берейін.
Әуежайда алданып қалмай, қалаға қалай жетуге болады?
Гейдар Әлиев әуежайынан (Терминал 1) қалаға барудың ең қолайлы жолы — такси. Мен BOLT қосымшасын жүктеп, картамды тіркеп, сол арқылы көлік шақырдым. Менен ертерек келген құрбыларым тарифті «комфортан» төмен таңдама деп ескерткен.
Мұндағы такси жүргізушілерінің туристерді алдайтын бір айласы бар. Оған өзім де куә болдым. Көлікке отырғаным сол еді, жүргізуші «тарифті қате таңдағанымды» айтып, есептегіш қазір километрін 10 манаттан (≈ 3 125 теңгеден) есептеп жіберетінін, ал қолма-қол ақшамен төлесем арзанырақ шығады деп «ұсынды».
Мен Стамбұлда тұрамын, такси жүргізушілерінің қулығын әбден біліп алғанмын. Сондықтан бұл да бір айла екенін бірден түсіндім. «Есептегіш істемейді», «сапарды тоқтатып, жаңадан бастайық» деген сияқты сөздер — адамнан ақша істеп қалғысы келетін жүргізушісінің әңгімесі.
Сондықтан таксиске еш саспастан: «Айналайын, маған басқа көлік шақыр, сенімен бармаймын» дедім. Ол тапсырысты басқа жүргізушіге берді. Екінші келген көлік жақсырақ болды. Біз отельге ешқандай қосымша төлемсіз, қосымшада көрсетілгендей 5 000 теңге сомамен жеттік. Шамамен 20 минут жүрдік.
Бакуде қайда тоқтауға болады?
Қалада ірі шаралар (Формула-1 немесе ауқымды концерттер) өтпейтін кезде, қонақүй бағалары қолжетімді — жақсы деңгейдегі екі кісілік нөмір шамамен 26–37 мың теңге тұрады. Біз IBIS қонақүйінен нөмір брондадық, екі адамға 50 мың теңге төледік. Орталыққа аса жақын дей алмаймын, бірақ қонақүйдің өзі таза әрі жайлы екен.
Бір күнге арналған маршрут: таңғы ас, кілемдер мен «Кіші Венеция»
Аш қарынға серуендеген қиын, сондықтан саяхатты таңғы ас ішуден бастадық. Бакуде тоғыз жыл тұратын танысымның кеңесімен Qaynana мейрамханасына бардық. Атмосферасы жағымды, бағасы тиімді, қызмет көрсетуі де жақсы екен. Дегенмен үстелді алдын ала брондап қойған дұрыс.
Мен Баку қызанағы қосылған омлет, ыстық лаваш пен қою гянджи қаймағын алдым. Лавашты қаймақпен және балмен қосып жегенде қандай сезімді бастан кешкенімді сөзбен айтып жеткізе алмаспын. Оны өзіңіз көруіңіз керек. Таңғы ас шамамен 6 300 теңге шықты.
Qaynana-да орын болмаса, қасында тұрған Manqal Old та жақсы. Оның кіреберісінде бір әже нан жауып отырады.
Таңғы астан кейін ескі көшелерді араладық. Мұндағы әрбір бұрыш — ғажап жәдігер. Суретке түсе бергің, түсіре бергің келеді. Сондай-ақ антикварлық дүкендер мен кілем сататын дүңгіршектер де жиі ұшырасты.
Сол жерден әйгілі Шағын кітаптар мұражайына кезіктік. Кіру тегін. Коллекциясы бір кездері Гиннестің рекордтар кітабына «әлемдегі ең үлкен кішкентай кітаптар жиынтығы» ретінде енген.
«Бриллиант қол» фильміндегі орын
Баку бульвары
Әрине, «Бриллиант қол» фильмі түсірілген көшеде суретке түспей кете алмадым. Одан кейін Баку бульварына бардық. Бұл — әлемдегі ең ұзын теңіз жағалауы бульварларының бірі. Жергілікті тұрғындар кешке осында серуендегенді жақсы көреді.
Бульвар бойында оралған кілем пішініндегі футуристік ғимарат тұр. Бұл — Әзербайжан кілем мұражайы. Кіру билеті шамамен 3 200 теңге тұрады. Кірсеңіз өкінбейсіз. Бір залда тіпті шеберлер көптің көзінше кілем тоқып отырады. Айтпақшы, кілем тоқу дәстүрі ЮНЕСКО-ның материалдық емес мұралар тізіміне енген.
кілем мұражайы
Сол маңда «Кіші Венеция» аттракционы бар. Каналдар бойымен гондоламен жүру бағасы — 1 500 теңге. Венецияның өзінде дәл осындай серуенге шамамен 50 мың теңге жұмсар едіңіз.
Барғым келген тағы бірнеше орын болды, бірақ бір күнде үлгермедім:
- «Ширваншах» мейрамхана-мұражайы — ұлттық интерьер, дәстүрлі тағамдар және жанды музыка. Қаласаңыз, даяшылар шағын экскурсия өткізеді.
- Passage 1901 — бұрынғы базар ғимаратында орналасқан ерекше мейрамхана
- Art Garden — XII ғасырдағы керуен-сарай аумағында орналасқан.
Туристік күнді Flame Towers кешеніндегі көрініс алаңында аяқтадық. Ғимараттар қараңғыда жарқырап, жанып тұрады. Одан кейін концертке кешігетінімізді түсініп, қонақүйге қайттық та, жақын маңдағы дәмханада 800 теңгеге кебаб алып, жүрек жалғап алдық та концертке ұштық.
Бір күнге қанша ақша жұмсадым?
Такси (қонақүй мен Ескі қала арасы): 1200 теңге.
Qaynana-дағы таңғы ас (омлет, лаваш, кілегей, шай): 5 680 теңге.
Кілемдер мұражайы: 3 200 теңге.
Кішкентай Венециядағы гондола: 1 500 теңге.
Кешкі ас (кебаб): 800 теңге.
Такси (қонақүйге қайтар жол): 1400 теңге.
Барлығы: 12 948 теңге.
Бакуден не ала келген жөн?
Бакуде тоғыз жылдан бері тұратын құрбым Маша екі дүкеннің заттарын мақтады — екеуі де Duty Free аумағында орналасқан.
- ABAD Crafts — жергілікті отбасылық кәсіпорындар мен шеберлердің өнімдері: бал, тосап, керамика мен қолдан жасалған бұйымдар сатылады.
- Soroka Souvenirs — винтаж заттар мен ерекше сувенирлер бар концепт-дүкен. Оның иесі түрлі заттарды жинағанды жақсы көреді, сондықтан достары оны «сауысқан» деп атап кеткен екен. Командасы өте креатив, мұндағы бұйымдар әсіресе қыздарға ұнары анық.
