Жапониядағы қыздар кеші: не істедік және бәріне қанша кетті?
Онсэнге түсіп, юката киіп, шығыс тағамдарына тойып келдік.
Сәлем! Менің атым — Баян, жасым 27-де. Шымкентте туып-өстім. Бір стартап жобада операциялық менеджер болып істеймін. Биыл тұрмысқа шықтым. Тойға дейін, мамыр айында үш құрбыммен Жапонияға барып, қыздар кешін өткіздік.
Бұл сапарға дейін төртеуіміз де Жапонияда болғанбыз. Сондықтан бұрын көрген негізгі туристік орындарды қайта аралағымыз келмеді. Жапондардың өз арасында танымал жерлерді көріп, онсэнге түсіп, шопинг жасауды жоспарладық. Бүгін сол сапарымызды қалай ұйымдастырғанымызды, қайда барғанымызды және оның бәріне қанша ақша кеткенін айтып беремін.
- Жапония визасын алып, сапарды жоспарладық
- Куала-Лумпурда аялдап, Камакураға бардық
- Осакада апартамент жалдап, Токиода тыныш ауданды таңдадық
- Қыздар кешін Аримада өткіздік
- Онсэнге түстік, шырақ қоңыздарды көрдік
- Сыпыртқымен ұшып, кілегейлі сыра іштік
- Токиода армансыз яшопинг жасадық
- Әуежайда шабадандарымызды қайта жинадық
- 2 млн теңгедей кетті. Қайда жұмсадық?
- Құрбыларыңызбен саяхатқа шығарда мынаны ескеріңіз
Жапония визасын алып, сапарды жоспарладық
Ақпанда ұшақ билеттерін қарап отырсақ, жеңілдік болып жатыр екен. Сөйтіп ойламаған жерден Жапонияға барамыз деп шештік. Төртеуімізге бірдей тиімді бағамен билет алу оңай болған жоқ. Қыздармен Google Meet арқылы кездесіп, билеттерді бірге қарай бастадық. Төрт билетті бірден рәсімдеудің орнына бір-бірден сатып алдық. Билеттерді қайта-қайта қарап жүргенде бағасы да өсіп кетті. Үш құрбым барар билеттің әрқайсысын 83 мың теңгеге алған еді. Бір сағаттың ішінде сол билет 200 мың теңгеге дейін қымбаттады! Ақыры 93 мың теңгеге билет тауып алдым.
Барар билетті багажсыз алдық. Жапонияда шабадан сатып алып, қайтарда багажбен келеміз деп шештік. Сондықтан қайтар билет қымбатырақ болды — әрқайсымыз шамамен 250 мың теңге төледік. Жапонияда сәуірдің аяғы мен мамырдың басында «Алтын апта» деп аталатын ұзақ мерекелік демалыс болады. Бұл кезде ел ішінде саяхаттайтындар көбейіп, билет пен қонақүй бағасы қымбаттауы мүмкін. Сол кезеңге тап келмес үшін сапарымызды 14–27 мамырға жоспарладық.
Билет алған соң виза рәсімдеуге кірістік. Құжаттарды жинап, Астанадағы танысымызға eGov арқылы сенімхат рәсімдеп бердік. Бір сенімхатқа шамамен 5 мың теңге жұмсадық. Алғашында төртеуіміздің үшеуімізге ғана виза берілді. Бір құрбымның өтініші бойынша жауап шықпай қойды. Құжаттарын қайта қарап, толықтырып жібердік. Бірнеше күннен кейін төртінші құрбымыз да визасын алды.
Жапония визасына өтініш бергенде сапар жоспарын көрсету керек. Қаржыңызды растайтын құжаттар да маңызды. Біз сапардың әр күніне шамамен 100 доллардан есептеп, оған тұратын жеріміздің шығынын қостық. Әрқайсымыз банк шотымызда миллион теңгеден астам қаражат барын көрсеттік. Бірақ мұны бәріне қойылатын міндетті талап деп қабылдамаңыз. Визаға тапсырарда нақты нұсқау бойынша әрекет еткен жөн.
Жапонияда 13 күндей болдық. Маршрутымыз мынадай еді: Токио — Камакура — Токио — Кобе — Арима — Осака — Нара — Киото — Осака — Токио. Өзім жоспар құрғанды жақсы көремін. Google Maps-тің My Maps сервисіне барғым келетін жерлерді белгілеп, ортақ карта жасадым. Таныстарым Осака мен оның айналасындағы қалаларды аралап болған соң Токиоға қайта оралуға кеңес берді. Біз де солай істедік. Алдымен шағын қалаларды көріп, Токионы сапардың соңына қалдырдық. Өйткені сатып алған заттарымызды бір қаладан екіншісіне тасып жүрмейік дедік.
Куала-Лумпурда аялдап, Камакураға бардық
- Куала-Лумпур әуежайында
- Ауысып отыру кезінде қалаға шығып, Петронас мұнараларын көріп үлгердік
- Камакура жағалауында
- Кобе порты, осы жерден Аримаға аттандық
Алматыдан AirAsia әуе компаниясымен Малайзия арқылы Токиоға ұштық. Куала-Лумпурда алты-жеті сағат уақытымыз болды. Соны пайдаланып, қалаға шығып, Петронас мұнараларын көріп қайттық. Токиода Ханеда әуежайына қондық. Одан қалаға пойызбен жеттік.
Алғашқы күндері Токиодан Камакураға бардық. Бастапқыда Фудзи тауын да көргіміз келген. Бірақ күн бұлтты болғандықтан тауды анық көре алмаймыз деп, жоспарымызды өзгерттік. Камакура — теңіз жағасындағы әдемі қала. Мұнда жағалаумен жүретін әйгілі жасыл Эноден пойызы бар. Соған мініп, мұхит көрінісін тамашаладық.
Камакурадан кейін бірден Кобеге кетуге болатын еді. Бірақ біз кешкі Токионы көріп, ертеңіне асықпай жолға шыққанды жөн көрдік. Әйтеуір сапар бойы ұйқымызды қандырып жүруге тырыстық. Күні бойы көп жүретіндіктен, жақсылап тыныққан бізге өте маңызды болды.
Осакада апартамент жалдап, Токиода тыныш ауданды таңдадық
- Токионың тұрғын үй кварталдарында
- Осакадан Киотоға барып, ескі көшелерді кимономен араладық
- Нарадағы Тодайдзи ғибадатханасы
- Нарада бұғылар ғибадатхана қақпасының дәл алдында жүреді
Сапарға шығар алдында қонақүйлерді ертерек брондаған дұрыс. Тұратын жерді таңдағанда қай әуежайдан ұшатыныңызды және метро не пойыз станциясына қаншалықты жақын екенін ескеріңіз. Біз Токиода алғашында Нихонбаси станциясының маңынан шағын апартамент таптық. Аримада бір түн болып, кейін Осакаға бардық. Осакада үш күн аялдап, сол жерден Киото мен Нараға пойызбен қатынадық.
Бұл бізге тиімді шешім болды. Киотодағы қонақүйлер қымбатырақ еді, ал Осакадан Киото мен Нараға бір күнде барып қайтуға болады. Сөйтіп қонақүй ауыстырып, шабадан тасып жүрмедік. Осакада төрт адамға арналған кең бөлмеде тұрдық. Төрт түнге шамамен 130–170 мың теңге төледік. Бірнеше адам болып саяхаттағанда тұратын жердің ақшасын бөліп төлеген тиімді.
Токиоға қайта оралғанда Рёгоку ауданындағы APA қонақүйіне орналастық. Жалпы Токиода тек туристер көп баратын аудандарда тұру міндетті емес. Жергілікті тұрғындар жиі жүретін аудандар да қызық. Біз кейде жапондардың өзі тамақтанатын шағын дәмханаларға бардық. Сол кезде елдің күнделікті тіршілігін жақынырақ көресің.
Қыздар кешін Аримада өткіздік
- Арима таудағы қала екен: көшелер бірде қыр, бірде сай
- Arima Gyoen рёканындағы бөлмеміз
- Сябу-сябу: ет пен көкөністі дастарқан басында қайнатады
- Салат, жеміс-жидек және десерттер
Қыздар кешінің негізгі бөлігін Аримада өткізгіміз келді. Жапонияға барып қана қоймай, оның мәдениетін жақынырақ сезінгім келді. Сондықтан дәстүрлі жапон қонақүйі — рёканда тұрып, татами төселген бөлмеде футонға жатып ұйықтауды, шайханада матча ішуді және онсэнге түсуді жоспарладық. Аримадағы Arima Gyoen қонақүйін таңдадық.
Аримаға жеткенде қаланың біз ойлағаннан үлкенірек екеніне таңғалдық. Алдын ала суреттерін көріп, біздің ауылдар сияқты шағын елді мекен шығар деп ойлағанмын. Бірақ таулы жерде орналасқан кәдімгі курортты қала екен. Көшелері бірде қыр, бірде сай. Қонақүйге жеткенше шабадандарымызды сүйреп, әбден шаршадық.
Сапарды өзім ұйымдастырған соң құрбыларымның көңілін ойлап келемін. Олардың аһылап-үһілеп жүргенін көріп, «Сен бізді қайда әкелдің?» деп айтпаса екен деп уайымдадым. Бірақ қонақүйге кіргенде бәрінің көзі жайнап кетті. Сол сәтте көңілім орнына түсті.
Біз төрт адамға арналған үлкен бөлме жалдадық. Бір түнге шамамен 143 мың теңге төледік. Жапон қонақүйлерінің бір ұнаған жері — кейбірінде тіс щеткасы, паста, шұлық, юката сияқты керек-жарақты қонақтарға тегін ұсынады.
- Юката киіп, қонақүй холында отырмыз
- Терезеден бақ көрінетін кешкі ас
- Қонақүй бағындағы өзен, түнде осы жерден шырақ қоңыздар көрдік
Қонақүйге орналасқан соң мақта матадан тігілген дәстүрлі жапон киімі — юката киіп, кешкі асқа дайындалдық. Юката кимоноға ұқсайды, бірақ жеңілірек әрі күнделікті кигенге ыңғайлы. Бөлмеміз кең әрі тап-таза еді. Еденіне татами төселген. Терезеден бақ, оның ар жағынан өзен көрінеді. Мұндай жерде отырып тамақтанғанның өзі ерекше әсерлі.
Қонақүй қызметкерлеріне қыздар кешін өткізіп жатқанымызды алдын ала айтқан едік. Олар бізге тегін мерекелік дастарқан дайындап берді. Дастарқанда ет пен көкөністі сорпаға салып пісіретін сябу-сябу, суши, сашими және тунецтен жасалған тағамдар болды. Қонақүй атынан шағын стақандарға күріштен жасалатын жапон сусыны — саке құйып берді. Сөйтіп тауға қарап отырып, жапон тағамдарына тойып алдық.
Онсэнге түстік, шырақ қоңыздарды көрдік
- Юката киіп, қыздар кешін өткіздік
- Онсеннен кейінгі шай
- Бөлмеде снек жеп, кино көрдік
- Түнгі Арима
Кешкі астан кейін онсэнге түстік. Онсэн — табиғи ыстық бұлақ суына шомылатын орын. Онсэнге кірер алдында міндетті түрде жақсылап жуынып алу керек. Әдетте мұнда суға киімсіз түседі. Жуынатын жер мен ыстық суға түсетін орын бөлек болады. Шағын сүлгіні суға салмай, басыңа не шетке қойып қоясың.
Ашық аспан астындағы онсэндердің айналасы қоршалған. Ыстық минералды суға түсіп, табиғатқа қарап демаласың. Біз барған онсэннің суы қоңырқай екен. Одан кейін массажға бардық. Біз таңдаған қызметтер қонақүй бағасына кірді.
Массаждан соң бақты аралап қайтайық дедік. Көпірден өтіп бара жатып, арғы бетте әлдененің жанып-сөніп тұрғанын байқадық. Жақындасақ, шырақ қоңыздар екен! Тура анимедегідей. Түнгі бақта олардың кішкентай шамдары жанып тұрғандай көрінді.
Бөлмеге қайтқан соң да кешімізді жалғастырдық. Күндіз сатып алған тіскебасарларымызды шығарып, бірге кино көрдік. Сол түн сапарымыздағы ең жылы естеліктердің біріне айналды.
Сыпыртқымен ұшып, кілегейлі сыра іштік
- Warner Bros. Studio Tour Tokyo студиясындағы Хогвартс макеті
- Хогвартс-экспресс
- Тыйым салынған ормандағы Хагрид
Кейбір көрікті жерлерге билетті алдын ала алдық. Мысалы, Токиодағы Хәрри Поттер студиясына — Warner Bros. Studio Tour Tokyo-ға бір ай бұрын Klook сайтынан билет сатып алдық. Бір адамға шамамен 18 мың теңге төледік. Синкансэн пойыздарының билеттерін де осы сервис арқылы алдық.
Студияда Хәрри Поттер фильмдерінің декорацияларын, костюмдерін және түсірілім қалай өткенін көрсетеді. Мұнда фильмдегі әйгілі Хогвартс залын, Хагридтің үйін, орманды, Хәрридің Дурслилер үйіндегі баспалдақ астындағы кішкентай бөлмесін көрдік. Қозғалатын баспалдақтардың қалай жасалғанын, сиқырлы заттардың қалай жұмыс істейтінін, фильмдегі дыбыстар мен арнайы эффектілердің қалай жасалғанын түсіндіретін көрмелер де бар.
Кейбір көріністерге өзің де қатыса аласың. Мысалы, сыпыртқыға мініп ұшып бара жатқандай видео түсіруге, трибунадағы жанкүйерлердің арасында тұрғандай әсер алуға болады. Турдың соңында «Нимбус» сыпыртқысына мінгендей видео мен суретке түстік. Әйгілі кілегейлі сырадан дәм татып, студияның кафесінде тамақтандық. Хәрри Поттердің жанкүйері болсаңыз, баруға кеңес беремін.
Токиода армансыз шопинг жасадық
Жапонияға баруымыздың тағы бір себебі — шопинг. Елден көп киім алмай шықтық. Токиода жаңа киімдер мен басқа да заттар сатып алуды жоспарладық.
Жапонияда туристерге арналған tax-free сауда жүйесі бар. Бірақ салықсыз сатып алу тәртібі дүкенге байланысты өзгеруі мүмкін. Кейбір дүкендерде тиісті жеңілдік кассада рәсімделеді, ал кейбір сауда орталықтарында арнайы бөлімге бару керек. Сондықтан төлқұжатыңызды бірге алып жүріңіз және сатып аларда tax-free тәртібін сұрап алыңыз.
Токиода көбіне Apple Pay қолдандық. Бірақ кей жерлерде физикалық карта не қолма-қол ақша қажет болды. Әрқайсымыз шамамен 300 доллардан қолма-қол ақша дайындадық. Оны Арима, Киото сияқты жерлерде және карта қабылдамайтын орындарда жұмсадық.
Меніңше, Токиода күндіз қаланы аралап, кешке дүкендерге барған ыңғайлы. Бірақ дүкендердің жұмыс уақытын алдын ала тексеріңіз. Көбі кешкі жеті-сегіз шамасында жабылады. Төртеуіміздің алғымыз келетін заттарымыз әртүрлі болғандықтан, шопинг кезінде бөлініп жүрдік. Бір сауда ауданына барған соң кездесетін уақыт пен орынды белгілеп алатынбыз. Бұл уақыт үнемдеуге көмектесті.
Такешита көшесіне барғанда Adidas-қа кіріп, бірден үш аяқ киім алдым. Бағасы тиімді болды, әрі Қазақстандағы дүкендерден көрмеген үлгілерді таптым. Ең қымбат сатып алған затым — британ брендінің үнді былғарысынан тігілген күртешесі. Оған 450 мың теңге төледім.
Өзім жоспарлаған дүкендерді аралап болған соң құрбыларымды іздедім. Сөйтсем, олар жақын жердегі Uniqlo-да жүр екен. Сол кезде дүкенде жеңілдіктер болып жатты. Жалпы, ұнатқан затымызды бірден алуға тырыстық. Өйткені Токиода дүкен өте көп. Бір көшеден екіншісіне кетсең, бұрынғы дүкенге қайта оралуға уақыт таппай қалуың мүмкін.
Қайтар алдында MUJI дүкеніне де кірдік. Бұл жерде киімнен бастап ыдыс-аяқ, кеңсе заттары мен азық-түлікке дейін сатылады. Дүкенді аралап жүріп, тіс щеткасын іліп қоятын кішкентай ұстағышты көрдім. Болашақ жұбайым екеуімізге сатып алдым. Қазір үйде қолданып жүрміз. Көрген сайын Жапониядағы сол күндер есіме түсіп, қуанып қаламын.
Әуежайда шабадандарымызды қайта жинадық
Бұл сапарда саудаға миллион теңгеден астам ақша жұмсадым. Ең қымбат затым — 450 мың теңгелік былғары күртеше. Қалған киімдер мен ұсақ-түйекке шамамен 700 мың теңге кетті.
Бірақ сонша зат алған соң оларды салатын шабаданым болмай қалды. Сөйтіп үлкен шабадан іздей бастадым. Токио вокзалының жанындағы Daimaru сауда орталығынан бірнеше нұсқаны қарадық. Ақыры Samsonite брендінің қара шабаданын таңдадым. Көлемі де, ішкі бөліктері де ыңғайлы екен. Алматыдағы дүкендерден дәл осындайын көрмеппін. Оның үстіне Жапонияда бағасы тиімдірек болды.
Қайтар күні әуежайға барар алдында Синдзюку ауданын аралап үлгердік. Автобус станциясындағы жүк сақтайтын шкафтарға шабадандарымызды қалдырып, зәулім ғимараттарды көріп, суретке түсіп қайттық. Кейін автобусқа отырып, әуежайға жеттік.
Әуежайда багажымыздың салмағы рұқсат етілген мөлшерден асып кеткенін білдік. Бәріміз шабадандарымызды ашып, заттарды қолжүкке және бір-біріміздің бос орындарымызға ауыстыра бастадық. Бір шабаданды өлшейміз, салмағы асып кетсе, қайта ашамыз. Басқасына саламыз, оны да өлшейміз. Әйтеуір біраз әуреленіп, бәрін сыйғыздық. Онсыз да әрқайсымыз бір үлкен шабадан мен бір кішкентай қолжүк сүйреп, әуежайға әрең жеткен едік.
2 млн теңгедей кетті. Қайда жұмсадық?
- Осакадағы вагю
- Гиндзадағы суши
- Кобедегі удон
Барлық шығынды тиынына дейін есептеген жоқпын. Бірақ 13 күндік сапарға қанша ақша жұмсағанымды шамамен есептеп шықтым. Төменде — бір адамға кеткен шығын.
- Ұшақ билеттері (барып-қайту) — 343 мың теңге.
- Қонақүйлер мен апартаменттер (төртеуіміз бөліп төлегенде) — 330–350 мың теңге.
- Тамақ — 200 мың теңге.
- Қоғамдық көлік (Suica картасы) — 40 мың теңге.
- Шопинг — шамамен 1 миллион 150 мың теңге.
- Сапар шығыны (шопингті есептемегенде) — 800–900 мың теңге.
- Жалпы шығын (армансыз шопинг жасасаңыз) — 1,5–2 миллион теңге.
Қоғамдық көлікке Suica картасын қолдандым. Жапонияға бармай тұрып оған 30 мың теңге салып, кейін тағы екі рет 5 мың теңгеден толтырдым. Осы картамен метро, автобус және кейбір қалааралық пойыздардың жолақысын төледім. Ең арзан сапарым шамамен 413 теңге болды.
Интернетке eSIM алмадым, Activ роумингін пайдаландым. Бірақ ол кейде дұрыс істемей қалды. Сондайда сауда орталықтары мен басқа қоғамдық орындардағы тегін Wi-Fi көмектесті.
Құрбыларыңызбен саяхатқа шығарда мынаны ескеріңіз
- Камакурадағы Хококудзи ғибадатханасының бамбук бағы: Арасиямаға үлгермей, осында келдік
- Хококудзи ғибадатханасының жанында
- Ғибадатхана жанындағы шайханадағы матча
Сапардың аяғына қарай мен ауырып қалдым. Бірақ әлі де сатып алғым келетін заттар бар еді. Оның үстіне интернетім дұрыс істемеді. Сол кезде Аружан құрбыма сеніп тапсырдым. Ару заттарымды көтерісіп, жағдайымды жасап, керек жерлеріме ертіп жүрді. Оған әлі күнге дейін ризамын.
Достарыңызбен саяхаттағанда мынаны білген дұрыс.
- Бюджет пен жоспарды алдын ала келісіп алыңыз. Кім қайда барғысы келеді, нені міндетті түрде көргісі келеді — бәрін талқылаған дұрыс. Мысалы, Киото маңындағы Арасияма бамбук орманына үлгермейтінімізді түсіндік. Сондықтан оның орнына Камакурадағы Хококудзи ғибадатханасының бамбук бағына бардық.
- Бір-біріңіздің күн тәртібіңізге бейімделіңіз. Біреу ерте тұрады, біреу кеш оянады. Тамақтану талғамымыз да әртүрлі болуы мүмкін. Біз бәріміз бірдей тамақ жегіміз келмесе, бөлек барып келуге келістік.
- Үнемі бірге жүру міндетті емес. Мысалы, Токио мұнарасын көргеннен кейін екеуіміз қонақүйге жаяу қайтқымыз келді, қалған екеуі шаршап, таксимен кетті. Ешкім ренжіген жоқ.
- Шабаданда бос орын қалдырыңыз. Егер көп зат сатып алуды жоспарласаңыз, жолға шыққанда шабаданды толтырмаңыз. Қосымша шабадан алатын болсаңыз, оның өлшемі мен салмағы әуе компаниясының талабына сай келетінін тексеріңіз.
- Туристер аз баратын аудандарды да көріңіз. Жапондардың өздері тамақтанатын дәмханаларға кіріп, тұрғын аудандарды аралаңыз. Сонда елдің күнделікті өмірін басқа қырынан танисыз.
Сапардан кейін де қызық біткен жоқ. Қазақстанға оралған соң құрбыларыммен тағы бір қыздар кешін өткіздік. Сол кезде олар маған ерекше сыйлық жасады. Жапонияда жүргенде бір сауда орталығынан Marc Jacobs сөмкесін көрген едім. Қатты ұнады, бірақ сатып алмадым. Кейін екі құрбымның сол дүкенге қайта барып, сөмкені маған сыйлыққа алған екен.
Олар сөмкені сатып алу үшін біраз жерге қайта барып, пойызға үлгеруге асыққан екен. Мұның бәрін маған білдіртпей жасауға тырысқан. Ең қызығы, әуежайда шабадандарымызды қайта-қайта ашып, заттарымызды бір-бірімізге бөліп салып жатқанда да сөмкені байқамаппын. Құрбым оны қолжүгіне жасырып қойған екен.
Қазір сол сөмкені де, Жапониядан алған басқа заттарымды да қолданып жүрмін. Әрқайсысы сапардағы жақсы сәттерді еске түсіреді. Бұл сапардың маған ең маңызды тұсы — шопинг те, жаңа қалаларды көру де емес, құрбыларыммен бірге өткізген уақыт болды. Бәріміздің бір нәрсеге таңғалып, бірге қуанып, кейін сол сәттерді еске алып жүргеніміздің өзі — үлкен бақыт екен.
