Чехия визасысын алу: қандай құжаттар керек және оған қанша ақша кетеді?
Виза бермесе, себебін түсіндіреді.
Күзде Прага сондай әсем: ескі көшелер мен қызыл шатырлардың арасын алтын түске боялған жапырақтар көмкеріп, құдды бір ертегіге топ ете қалғандай боласыз. Ал тыныш демалысты ұнатсаңыз, әлемге әйгілі Карловы Вары курортына барып, сан түрлі минерал бұлақтардан асықпай су ішіп, серуендеуге болады. Чехияны көргім келеді деп жүрсеңіз, алдымен виза рәсімдеу тәртібін біліп алған дұрыс. Бұл мақалада қазақстандықтарға Чехияға қандай виза керек, қандай құжат жинау қажет, оның құны қанша және қанша уақытта дайын болатынын түсіндіреміз.
- Чехияға қазақстандықтарға виза қажет пе?
- Чехия визасының қандай түрлері бар?
- Чехия визасына қандай құжаттар қажет?
- Қазақстаннан Чехияға туристік визаны қалай рәсімдеуге болады?
- Қазақстанда Чехия визасына құжаттарды қайда тапсыруға болады?
- Чехия визасы қанша тұрады?
- Чехия визасы қанша уақытта дайын болады?
- Чехия визасы қандай мерзімге беріледі?
- Неліктен Чехия визасынан бас тартуы мүмкін?
- Виза беруден бас тартса, не істеу керек?
- Жиі қойылатын сұрақтар
Чехияға қазақстандықтарға виза қажет пе?
Иә, Қазақстан азаматтарына Чехияға бару үшін виза қажет. Чехия Шенген аймағына кіреді, ал Қазақстан азаматтары Шенген елдеріне визасыз кіре алмайды. Сондықтан турист ретінде барсаңыз да, жұмыс, оқу немесе басқа мақсатпен сапарға шықсаңыз да, алдын ала тиісті виза рәсімдеу керек.
Чехия визасының қандай түрлері бар?
Сапар мақсаты мен ұзақтығына қарай Чехия визасы негізінен екіге бөлінеді: қысқа мерзімді C санатындағы Шенген визасы және ұзақ мерзімді D санатындағы ұлттық виза.
Қысқа мерзімді C санатындағы Шенген визасы
C санатындағы визамен Чехияда немесе Шенгеннің басқа елдерінде 180 күн ішінде 90 күнге дейін жүруге болады. Мұндай виза көбіне саяхатқа, іссапарға, туыстарға қонаққа баруға, мәдени немесе спорттық шараларға қатысуға беріледі. Виза бір реттік, екі реттік немесе көп мәртелік болуы мүмкін.
Ұзақ мерзімді D санатындағы виза
D санатындағы ұлттық виза Чехияда 90 күннен ұзақ қалатындарға арналған. Ол көбіне оқуға, жұмыс істеуге, ғылыми зерттеу жүргізуге, отбасымен қосылуға немесе басқа да ұзақ мерзімді мақсаттарға беріледі. Бұл визамен Чехияда ұзақ уақыт заңды түрде тұруға болады.
Чехия визасына қандай құжаттар қажет?
Чехия визасына өтініш бергенде мына құжаттар қажет:
- жарамды шетелдік паспорт;
- толтырылған визалық анкет. Оны қалай толтыру керегін бұрын түсіндіргенбіз;
- бір биометриялық фотосурет;
- медициналық сақтандыру полисі;
- сапар мақсатын растайтын құжаттар, мысалы, шақыру хаты, оқу немесе іссапар құжаттары;
- қайда тұратыныңызды растайтын құжат, мысалы, қонақүй броні немесе жалдау шарты;
- сапарға жеткілікті ақшаңыз барын растайтын құжаттар: банк шотынан үзінді көшірме, жұмыс орнынан анықтама және т.б. Мысалы, сапар кезінде әр күнге 80 EUR (шамамен 40 мың KZT) есептеуге болады;
- Қазақстанға қайтып келетініңізді растайтын құжаттар, мысалы, жұмыс немесе оқу орнынан анықтама, мүлік құжаттары;
- сапар мақсатына қарай сұралатын басқа да құжаттар.
Шенген ережесі бойынша шетелдік паспортыңыз Шенген аймағынан шығатын күннен кейін кемінде тағы үш ай жарамды болуы керек. Паспорт кейінгі 10 жылда берілген және ішінде кемінде екі бос бет болуы қажет.
Құжаттар тізімі сапар мақсатына қарай өзгеруі мүмкін. Сондықтан өтініш берер алдында қазіргі талаптарды Чехияның Қазақстандағы визалық орталығының ресми сайтынан тексеріп алған дұрыс.
Қазақстаннан Чехияға туристік визаны қалай рәсімдеуге болады?
1-қадам. Құжаттарды дайындаңыз
Алдымен қажет құжаттың бәрін жинаңыз. Құжаттар қазіргі талаптарға сай болуға тиіс және сапар мақсатын растауы керек.
2-қадам. Визалық анкетаны толтырыңыз
Шенген визасына арналған анкетаны латын әріптерімен мұқият толтырыңыз. Ондағы мәліметтердің бәрі шетелдік паспортыңыздағы ақпаратпен сәйкес болуы керек.
3-қадам. Құжат тапсыруға жазылыңыз
Қазақстанда Чехия визасына өтінішті VFS Global визалық орталығы қабылдайды. Алдымен сайтта тіркеліп, құжат тапсыратын күн мен уақытты таңдаңыз.
4-қадам. Визалық және сервистік алымдарды төлеңіз
Құжат тапсырғанда консулдық алым мен VFS Global сервис ақысын төлеу керек.
- Ересектер үшін — 90 EUR (шамамен 45 мың KZT).
- 6–12 жастағы балалар үшін — 45 EUR (шамамен 23 мың KZT).
- VFS Global сервис ақысы — шамамен 14 430 теңге.
5-қадам. Құжаттарды тапсырып, биометриядан өтіңіз
VFS Global сайтынан құжат тапсыратын күнді таңдаңыз. Белгіленген күні визалық орталыққа барып, құжаттарыңызды тапсырып, саусақ іздерін бересіз. Егер кейінгі 59 айда Шенген визасына биометриялық дерек тапсырған болсаңыз, кей жағдайда саусақ ізін қайта тапсырудың қажеті болмауы мүмкін.
6-қадам. Шешімді күтіп, паспортыңызды алыңыз
Шенген визасына өтініш әдетте кемінде 15 күн қаралады. Кей жағдайда бұдан да ұзаққа созылуы мүмкін. Өтінішіңіздің қай кезеңде екенін VFS Global сервисі арқылы онлайн бақылауға болады.
Қазақстанда Чехия визасына құжаттарды қайда тапсыруға болады?
Қазақстанда Чехия визасына өтінішті VFS Global визалық орталықтары қабылдайды. Құжаттарды Астана не Алматыдағы визалық орталыққа тапсыруға болады. Ол үшін алдын ала онлайн жазылу керек.
Астанада визалық орталық Қабанбай батыр даңғылы, 6/1 мекенжайындағы «Каскад» бизнес-орталығында орналасқан. Алматыда визалық орталықтар «Alatau Grand» бизнес-орталығы мен «Forum» сауда ойын-сауық орталығында орналасқан.
Чехия визасы қанша тұрады?
Қазақстан азаматтары үшін қысқа мерзімді Шенген визасының консулдық алымы — 90 EUR (шамамен 45 мың KZT). Төлем теңгемен қабылданады. Бұған қоса VFS Global сервис ақысын бөлек төлеу керек. Қазір оның мөлшері — 14 430 теңге.
Балаларға жеңілдік бар. 6 жасқа дейінгі балалар консулдық алым төлемейді. Ал 6–12 жастағы балалар үшін виза алымы — 45 EUR (шамамен 23 мың KZT).
Чехия визасы қанша уақытта дайын болады?
Шенген визасына өтініш әдетте кемінде 15 күнтізбелік күн қаралады. Кей жағдайда бұл мерзім 45 күнге дейін созылуы мүмкін. Сондықтан құжаттарды сапарға бірнеше апта қалғанда тапсырған дұрыс.
Чехия визасы қандай мерзімге беріледі?
Визаның жарамдылық мерзімі әр өтінішке жеке белгіленеді. Туристік Шенген визасы әдетте өтініште көрсетілген сапар мерзіміне беріледі.
Виза бір реттік, екі реттік немесе көп мәртелік болуы мүмкін. Онымен Шенген аймағында 180 күн ішінде 90 күнге дейін жүруге болады. Визаның нақты мерзімі туралы соңғы шешімді Чехияның консулдық қызметі қабылдайды.
Неліктен Чехия визасынан бас тартуы мүмкін?
Виза берілмесе, әдетте өтініш берушінің…
- құжаттары толық емес;
- өтініштегі мәліметі жалған не шала көрсетілген;
- сапар мақсаты анық дәлелденбеген;
- сапарға жететін қаражаты жоқ;
- Қазақстанға қайтып келеріне күмән бар;
- бұрын Шенген визасының ережесін бұзған.
Виза алу мүмкіндігіне кері әсер етпеуі үшін құжаттардың бәрін мұқият дайындап, тек шынайы әрі расталған ақпарат берген дұрыс.
Виза беруден бас тартса, не істеу керек?
Чехия визасын бермесе, алдымен бас тартудың себебі жазылған ресми хабарламаны мұқият оқыңыз. Онда көрсетілген мәселелерді түзетіп, құжаттарды толықтырып, қайтадан өтініш беруге болады.
Виза беру туралы шешімге шағымдануға да болады. Шағымды қалай және қай уақытқа дейін беру керегі бас тарту туралы құжатта көрсетіледі.
Қайта өтініш бергенде алдыңғы жолы виза бермеуге себеп болған мәселені түзеткен маңызды. Мысалы, қаражатыңыз жеткілікті екенін нақтырақ дәлелдеуге, сапар мақсатын толығырақ көрсетуге немесе жетпеген құжаттарды қосуға болады.
Мен Чехияға концертке барғым келді. Концерт пен ұшақ билеттерін алдын ала сатып алып, қонақүйлердің бәрін брондадым, сапар бағытын да жоспарлап бердім. Визаға екі рет өтініш бердім: алғашында өзім, екінші рет кеңесшінің көмегімен. Екі жолы да құжаттарым түгел болды: бәрін сайттағы тізіммен салыстырып тексердім, тіпті консулдыққа қоңырау шалдым. Екінші рет кеңесші сапарға не үшін баратынымды түсіндіретін хат жазуды ұсынды, бірақ соған қарамастан тағы да виза бермеді. Бірінші жолы шотымдағы ақша талап етілген сомадан көп болса да, «қаражат жеткіліксіз» деп бас тартты. Екінші жолы екі банктегі шотымнан үзінді көшірме тапсырдым, бірақ бұл жолы «сапар мақсаты түсініксіз» деген себеп айтты. Демек, құжаттарың түгел болып, не үшін баратыныңды анық түсіндірсең де, виза бермеуі мүмкін.
Жиі қойылатын сұрақтар
Қаржылық қаражатты және сапар мақсатын қалай растауға болады?
Сапарға ақшаңыз жеткілікті екенін банк шотынан үзінді көшірме, жалақы туралы анықтама не басқа ресми құжаттармен растауға болады.
Ал сапар мақсатын қонақүй броні, шақыру хаты, саяхат жоспары, оқу не жұмысқа қатысты құжаттармен растауға болады. Нақты қандай құжат керек екені сапар мақсатына байланысты.
Чехия визасына медициналық сақтандыру міндетті ме?
Иә. Шенген визасын алу үшін медициналық сақтандыру міндетті. Сақтандыру Шенген аймағының барлық елінде жарамды болып, кемінде 30 мың EUR (шамамен 15 млн KZT) көлеміндегі медициналық шығындарды жабуы керек.
Чехия визасымен басқа Шенген елдеріне баруға бола ма?
Иә. Чехия берген Шенген визасымен басқа Шенген елдеріне де баруға болады. Бірақ сапардың негізгі мақсаты Чехия болуы керек. Сондай-ақ визада көрсетілген мерзім мен Шенген ережелерін сақтау қажет.
Құжаттарды өзім барып тапсыруым керек пе?
Иә, көп жағдайда құжаттарды өзіңіз тапсырып, биометриялық дерек, яғни саусақ ізін беруіңіз керек. Егер соңғы 59 айда Шенген визасына биометрия тапсырған болсаңыз, кей жағдайда оны қайта тапсыру талап етілмеуі мүмкін.
Сапарға дейін қанша уақыт бұрын құжат тапсыру керек?
Шенген визасына өтінішті сапарға дейін алты ай бұрыннан бастап беруге болады. Өтінішті қарауға кемінде 15 күн қажет, ал кей жағдайда бұл мерзім 45 күнге дейін созылуы мүмкін. Сондықтан құжатты реттеуге ертерек қамданған дұрыс.
Виза берілмесе, визалық алым қайтарыла ма?
Жоқ. Виза берілмесе де, төленген консулдық және сервис алымдары қайтарылмайды. Өйткені бұл ақша визаның өзіне емес, өтінішті қабылдап, қарау қызметіне төленеді.
Суретті салған — СашаШура.
