Шенген визасының сауалнамасы: қазақстандықтарға арналған қадам-қадам нұсқаулық

Еуропадағы Шенген аймағына кіретін елдердің визасына тапсыру үшін арнайы сауалнаманы толтыру керек. Кейбіреулер қобалжып, ақша төлеп біреуге толтыртып жатады. Бірақ бұл сіз ойлағандай қиын процесс емес, тек мұқият болсаңыз жеткілікті. Шенгеннің бір реттік визасын (single entry) алты рет, мультивизасын бірнеше рет алған саяхатшы ретінде сауалнаманы қалай өз бетімізше толтыруға болатынын түсіндіріп берейін. 

• 

   
• 

   

1. Surname, Family Name

Бұл жерге тегіңізді жазасыз — ол шетелге шығатын паспорттағыдай латын әріптерімен жазылуы керек. Мысалы, Kanatov.

2. Surname at birth, Former Family Name

Егер тегіңізді өзгертсеңіз, екінші жолаққа бұрынғы тегіңізді жазу керек. Бірнеше рет өзгертсеңіз, әрқайсын үтір қойып тізіп шығасыз. Мысалы: Aspanov, Senbekov.

3. First name, Given Name

Есіміңізді паспорттағыдай латын әріптерімен жазасыз. Мысалы: Arman.

4. Date of Birth

Туған күніңізді күн-ай-жыл форматы бойынша жазу керек. Мысалы: 01-12-1997.

5. Place of Birth

Туған жеріңізді жазасыз. Ауылда тусаңыз, облыс пен ауыл атауын сыйдырыңыз (мысалы: East Kazakhstan Region, village Akzhar), қалада тусаңыз, жай ғана қала атауын (мысалы: Almaty), ал шетелде өмірге келсеңіз, ел мен қаланы көрсетесіз.

6. Country of Birth

Туған еліңіз жазылады. Шетелге шығатын паспортыңыздағы көрсетілген елді жазсаңыз жеткілікті. Мысалы: Kazakhstan.

7. Current Nationality

Азаматтық жайлы деректер көрсетілуі тиіс. Current Nationality деген тұсқа қазіргі азаматтығыңызды жазасыз. Егер туған кезде басқа елдің азаматтығы болса, Nationality at Birth, if Different деген тұсқа сол елді жазу керек. Әдетте қазақстандықтарда екі азаматтық болмайды сондықтан Other Nationalities деген тұсқа минус («–») қойып кетеміз.

8. Sex (жынысы)

Male — ер, Female — әйел, Other — басқа.

9. Civil Status

Отбасылық жағдайыңызды белгілейсіз — сауалнамада бірнеше нұсқа берілген, сондықтан өзіңіздікін таңдап, белгі қоясыз. 

• Single — Бойдақ
• Married — Үйленген 
• Registered Partnership — Тіркелген партнер 
• Separated — Бөлек тұрады
• Divorced — Ажырасқан 
• Widow(er) — Әйелі / күйеуі қайтыс болған

10. Parental authority/legal guardian

Бұл жолақ кәмелетке толмаған баланың сауалнамасында толтырылады. Баланың ата-анасының, қамқоршысының аты-жөні, мекенжайы, телефоны, электронды поштасы, азаматтығы көрсетіледі. Барлығы паспорттағыдай латын әріптерімен жазылуы тиіс.

11. National Identity Number

ЖСН нөмірін жазсақ жеткілікті.

12. Type of Travel Document

Виза алуға берілген паспортымызды белгілейміз. Әдетте көбіміз Ordinary Passport (қарапайым паспорт) деп белгілейміз. Ал дипломатиялық немесе қызметтік паспортпен тапсырсаңыз, соны белгілеу керек болады.

13-16. Паспорт туралы ақпарат

• Number of Travel Document: паспортыңыздың нөмірі;
• Date of Issue: паспорт берілген күн (күн-ай-жыл);
• Valid Until: жарамдылық мерзімі (күн-ай-жыл);
• Issued by (Country): паспортты берген ел.

17. Personal data of the family member who is an EU, EEA or CH citizen

Бұл тұсқа Еуропа одағына мүше елдердің, Швейцарияның азаматтығы бар жақыныңыз болса, соның аты-жөнін, туған күнін, азаматтығын, Еуропа еліндегі паспортының нөмерін жазасыз.

18. Family relationship with an EU, EEA or CH citizen 

Бұл жерге Еуропа одағына мүше елдерінің, Швейцарияның азаматтығы бар жақыныңыз сізге кім болып келетінін көрсетесіз. Яғни, әйелім / күйеуім, немерем, балам дегеннің бірін таңдайсыз. Ал әпке-ағаңыз болса, Other деген тұсқа ағылшын тілінде (brother, sister) жазасыз.

19. Applicant's home address and e-mail address, telephone number

Мекенжайыңызды, электронды поштаңызды және телефон нөміріңізді жазу керек.

20. Residence in a country other than the country of current nationality: 

Қазақстан азаматы ретінде басқа елде тұруға рұқсатыңыз болса, сол туралы ақпаратты жазу керек. Бар болса, елдің атын, сол ел берген құжат нөмірін және жарамдылық мерзімін көрсетесіз. 

21. Current Оccupation 

Мамандығыңыз жазасыз. Студент болсаңыз студент екеніңізді көрсетесіз.

22. Employer and employer’s address and telephone number. For students, name and address of educational establishment

Жұмыс орныңыздың мекенжайы мен телефонын көрсету керек. Студенттер оқу орнының атын және мекенжайын жазады.

23. Purpose(s) of the Journey

Сауалнамадағы өте маңызды пункт — осылайша консул сіздің Шенген аймағына сапарыңыздың мақсатын біледі. Сондықтан бара жатқан мақсатыңызды нақты көрсетіңіз. 

• Tourism — Туризм 
• Business — Бизнес сапар
• Visiting family or friends — Туысқан немесе досыңызға қонаққа бару
• Cultural  — Мәдени шара
• Sports — Спорт жарысы 
• Official visit — Ресми сапар
• Medical reasons — Медицина
• Study — Оқу 
• Airport transit — Әуежайдағы транзит 
• Other (please specify) — Басқа себеп болса түсіндіріп жазасыз 

Осы тұста айта кететін жайт: егер қолыңызда мәдени шараға, оқуға, спорт жарысына шақырту не Еуропада тұратын туысыңыздан қонаққа шақырту болып, сіз туризм деп белгілесеңіз консул виза бермеуі мүмкін. Яғни, сапар мақсаты шақыртуда басқа, ал сауалнамада басқа болса, қате кетті деген сөз. Сондықтан бұл жолақты дұрыс толтырыңыз.

24. Additional information on purpose of stay

Сапарыңызға қатысты қосымша ақпарат жазсаңыз болады. Мысалы, туысыңызға шақыртумен қонаққа немесе спорт я мәдени шараға бара жатсаңыз, сол туралы қысқаша ақпарат бересіз. 2023 жылы бір досым Прагаға The Weeknd-тің концертіне виза сұрап, осы жолаққа концертке билет алғаны жайлы жазған еді.

25. Member State of main destination (and other Member States of destination, if applicable)

Шенген аймағында бара жатқан негізгі еліңізді көрсетесіз. Әдетте қай елдің визасына тапсырсаңыз сол елді көрсету керек. Шенген аймағына 29 ел кіреді.

26. Member State of first entry

Шенген аймағында бірінші кіретін еліңізді жазасыз. 

27. Number of entries requested

Шенген аймағына неше рет кіріп-шығатыныңызды белгілейсіз. 

• Single entry — бір рет кіру;
• Two entries — екі рет кіру;
• Multiple entries — бірнеше рет кіру (мультивиза).

Әдетте Шенген визасына бірінші рет тапсырсаңыз, консул бір рет кіріп-шығуға рұқсат береді. Мен Шенген визасын бес мәрте (бір рет кіру) алған соң ғана мультивиза берді.

Intended date of arrival of the first intended stay in the Schengen area.

Шенген аймағына кіретін күнді жазасыз.

Intended date of departure from the Schengen area after the first intended stay.

Шенген аймағынан шығатын күнді жазасыз.

28. Fingerprints collected previously for the purpose of applying for a Schengen visa.

Егер бұрын Шенген визасына саусақ таңбасын тапсырсаңыз, Yes деп белгілейсіз. Тапсырған датаны білсеңіз, күнін және виза нөмірін жазасыз.  

• No — Жоқ тапсырмадым;
• Yes — Иә, тапсырдым;
• Date, if known — Саусақ таңбасын тапсырған күн;
• Visa sticker number, if known — Cаусақ таңбасын тапсырған соң алған визаның нөмірі.

29. Entry permit for the final country of destination, where applicable 

Бос қалдыруға немесе No деп жазуға болады.

30. Surname and first name of the inviting person(s) in the Member State(s). If not applicable, name of hotel(s) or temporary accommodation(s) in the Member State(s)

Бұл жерге сізді шақырған адамның не қонақүйдің аты, телефоны, электронды поштасы және мекенжайы жазылады. Егер сізді қандай да бір адам қонаққа шақырса, оның аты-жөні мен мекенжайын көрсетесіз, ал қонақүйге тоқтасаңыз, атауын жазасы. Telephone number деген тұсқа телефон нөмірі, Address and e-mail address деген тұсқа мекенжайы мен электронды поштасы жазылуы керек.

31. Name and address of inviting company/organisation

Сізді Шенген аймағына қандай да бір компания (мысалы, қандай да бір іс-шараға, спорт жарысына, оқуға, конференцияға) шақырса, сол компанияның атын жазасыз. Surname, first name, address, telephone no., and e-mail address of contact person in company/organisation деген тұсқа компания өкілінің атын, мекенжайын, телефоны мен электронды поштасын көрсету керек.

32. Cost of travelling and living during the applicant’s stay is covered: by the applicant himself/herself 

Бұл жолақ толығымен қаржы туралы ақпаратқа арналған. Егер Шенген аймағына сапардың шығынын өзіңіз төлесеңіз, сол жақтағы жолақты толтырасыз. Әдетте барлық шығынды өзіңіз көтергенде Cash деген пунктіні белгілегеніңіз жөн. 

• Cash — Ақшалай;
• Traveller’s cheques — Чек (Қазақстан банктері чек бере бермейді, сондықтан бұл пунктіні белгілемей-ақ қойыңыз);
• Credit card — Кредит картасы;
• Pre-paid accommodation – Алдын-ала төленген жатын орын;
• Pre-paid transport  — Алдын-ала төленген транспорт;
• Other (please specify) — Басқа қаржы.

Ал егер сапарыңыздың шығынын шақырушы / демеуші тарап төлесе, оң жақтағы жолақты толтырасыз: by a sponsor (host, company, organisation) — демеуші (қонаққа шақырушы, компания, ұйым). Нақты кім екенін де нақтылау керек:

• Referred to in field 30 or 31 — 31 не 32-жолақта көрсетілген шақыртушы тарап;
• Оther (please specify) — Басқа (нақтылауыңыз керек).

Қолдау түрін де көрсетесіз:

• Cash — Ақшалай;
• Accommodation provided — Үймен қамтамасыз етеді;
• All expenses covered during the stay — Сапардың барлық шығынын көтереді;
• Pre-paid transport — Транспорт алдын-ала төленген;
• Оther (please specify) — Басқа (нақтылауыңыз керек).

33. Surname and first name of the person filling in the application form, if different from the applicant.

Бұл жолақты кәмелет жасқа толмаған балалардың ата-аналары, қамқоршысы толтырады. Ал 18 жастан асқандар міндетті түрде өздері толтыруы керек.

Сауалнаманың соңына толтырылған жері мен күні (мысалы, Almaty, 15.05.2025) жазылып, визаға өтініш берген адамның қолы қойылады. Кәмелет жасқа толмаған балалар үшін толтыруға көмектескен ата-анасы немесе қамқоршысы қол қояды.

Бастысы — сауалнама толтырарда алаңдамаңыз, дегенмен мұқият болыңыз. Ал сапарға арзан ұшақ билеттерін қашанда Aviasales.kz-тен таба аласыз.