Қазақстанда ұшақ билетін кім тегін не жеңілдікпен ала алады?

Ұшақ билеттерін арзанырақ алу үшін міндетті түрде науқанды күтудің қажеті жоқ. Кейбір жолаушыларға әуе компаниялары арнайы тарифтер мен жеңілдіктер береді. Осы мақалада нақты кімнің қандай жеңілдік ала алатынын, қандай құжаттар тапсыру керегін және арзан билет қайдан табуға болатынын түсіндіріп береміз.

Жастар да, қарттар да жеңілдекпен ұшады

Air Astana әуе компаниясында жолаушының жасына қарай арнайы тариф бар. Жас және қарт жолаушыларға билеттер әдеттегі бағадан 10–20% арзан сатылады.

Мұндай тарифпен онлайн тіркеле алмайсыз — жолаушының жасы әуежайдағы тіркеу кезінде тексеріледі.

Air Astana

• Жастар билеті 16 мен 25 жас аралығындағы жолаушыларға (Дели бағытына/бағытынан ұшқанда — 28 жасқа дейін).
• Егде жастағы жолаушы билеті 60 жастан асқан азаматтарға сатылады.

Ішкі және халықаралық бағыттарда екі тариф те жұмыс істейді, бірақ жеңілдікпен берілетін орындар саны шектеулі, сондықтан алдын ала брондаңыз. Билетті ресми сайттағы «Жас ерекшелігіне арналған билеттер» бөлімінен сатып алуға болады. 

Мысалы, Астанадан Алматыға 5 ақпандағы рейске билет іздесеңіз: қарапайым билет 37 593 теңге, ал жас ерекшелігіне арналған билет 19 913 теңге тұрады. Сонда 17 680 теңге немесе билет құнының шамамен жартысын үнемдейсіз.

Стандартты билет

Жас ерекшелігіне арналған билет

Студенттер

Халықаралық бағыттарда көбіне студенттік тарифтер бар. Оны пайдалану үшін жоғары оқу орнында оқитыныңызды растау керек. 

Turkish Airlines — 12–35 жас

• Ішкі рейстерде — 20% дейін, халықаралық транзиттік рейстерде — 15% дейін, Түркия мен Солтүстік Кипр Түрік Республикасы арасындағы рейстерде — 20% дейін жеңілдік.
• Сатып алу үшін: Miles&Smiles жүйесіне тіркеліп, студент екеніңізді университет порталы арқылы растаңыз немесе билет брондау кезінде студенттік құжатты жүктеңіз.
• Шарттар бағыт пен брондау класына байланысты өзгеретінін ескеріңіз.

Qatar Airways — 18–30 жас

• Маусымдық жеңілдіктер: бірінші сапарға — 10%, екіншіге — 15%, үшінші және төртінші сапарға — 20% жеңілдік беріледі.
• Сатып алу үшін: SheerID платформасы арқылы студент мәртебеңізді растаңыз және қажет құжаттарды жүктеңіз.

Emirates — 16–31 жас

• Эконом санатында — 10%-ға дейін, премиум және бизнес санаттарында — 5%-ға дейін жеңілдік беріледі.
• Сатып алу үшін: брондау кезінде STUDENT промокодын енгізіңіз, ал тіркеу кезінде студенттік билетіңізді немесе оқуға түскеніңіз туралы хатты көрсетіңіз.
• Промокод 31.03.2026 жылға дейін жарамды (мерзімін әуе компаниясынан нақтылаған жөн). 

Lufthansa — 16–32 жас

• Еуропадан Азияға, Африкаға және Оңтүстік Америкаға бағыттарда — 15%-ға дейін жеңілдік бар.
• Сатып алу үшін Travel ID жүйесінде тіркеліп, студент екеніңізді растаңыз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Балалар

Екі жасқа дейінгі балалар 90% жеңілдікпен, кейде тіпті тегін ұша алады. Мұндай билетті әдеттегідей әуе компаниясының сайтынан, агенттік арқылы немесе Aviasales.kz сайтынан сатып алуға болады. Ол үшін бас бетте бағыттар мен күндерді таңдайтын жерден жолаушылар санатын таңдаңыз. Нәтижелер жүктелгеннен кейін жүйе барлық билеттің, соның ішінде балалар билеттерінің де жалпы бағасын көрсетеді.

Бөлек орынсыз ұшатын балалар саны ересектер санына тең болуы керек. Бір ересек адам екі немесе одан да көп сәбиді бірге алып ұша алмайды.

Қазақстан ішінде ұшатын рейстер

Ел ішіндегі сапарға билет рәсімдеу үшін баланың туу туралы куәлігі, баланың паспорты немесе баланың ата-анасының паспортына тіркелген болса, ата-ананың паспорты қажет. Балаларға ересектер тарифінен 50%-ға дейін жеңілдік қарастырылған, ал екі жасқа дейінгі балалар тегін ұша алады. Айырмашылық тек жас шектеуінде:

• FlyArystan, Air Astana және Qazaq Air (VietJet Qazaqstan) әуе компанияларында 50% жеңілдік 2 жастан 14 жасқа дейінгі балаларға қолданылады;
• SCAT компаниясында дәл осы жеңілдік 15 жасқа дейінгі балаларға беріледі.

Халықаралық рейстер

Шетелге ұшатын болсаңыз, балада жеке паспорт (тіпті нәрестелерде де) және қажет болған жағдайда виза болуға тиіс. Тұрақты тұруға кетіп бара жатқанда, баланы тек әкесі не шешесі ертіп жүрсе, екінші ата-ананың нотариалды келісімі қажет.

• Air Astana-мен екі жасқа дейінгі балалар тегін ұшады, ал 2 жастан 11 жасқа дейінгі балаларға 50% жеңілдік беріледі. Сапар Қазақстан арқылы транзитпен өтсе (мысалы, Ташкент–Астана–Лондон), онда балаларға 25% жеңілдік жүреді.
• SCAT 2 жастан 12 жасқа дейінгі балаларға ересектер тарифінің 50% мөлшерінде жеңілдік береді.
• Qazaq Air (VietJet Qazaqstan) 2 жастан 11 жасқа дейінгі балаларға 50% жеңілдік ұсынады.

Шетелдік әуе компанияларында жеңілдіктер біршама аз, дегенмен үнемдеуге мүмкіндік жоқ емес.

Халықаралық әуе компанияларының балалар билеттеріне берілетін жеңілдіктің мөлшері

Тағы осы тақырыпта

Баланы жеке саяхатқа қалай жіберуге болады?

Мүгедектігі бар балалар мен ересектер

Қазақстанның барлық әуе компаниясы мүгедектігі бар азаматтар мен оларды ертіп жүретін кісіге билет аларда жеңілдік береді. Төменде барлық әуе компаниясының шарттары көрсетілген.

SCAT

• I топтағы мүгедектігі бар жолаушыларға — жылына бір рет 100% жеңілдік беріледі.
• II топтағы мүгедектігі бар жолаушыларға — жылына бір рет F класы тарифінің 50%-ы мөлшерінде жеңілдік беріледі.
• 18 жасқа дейінгі кез келген топтағы мүгедектігі бар балаларға — жылына бір рет 100% жеңілдік беріледі.
• Жеңілдік ішкі тұрақты рейстерге және еріп жүретін адаммен бірге ұшарда ғана беріледі (еріп жүретін адам билет құнын толық төлейді). 

FlyArystan (Komek жобасы)

• I топтағы мүгедектігі бар жолаушылар мен оларды ертіп жүретін адамға 50% жеңілдік бар, жылына бір рет алуға болады.
• Жеңілдікпен билет алу үшін толтырылған өтінім мен мүгедектік туралы анықтаманы (немесе QR-коды бар Egov деректерін) [email protected] поштасына жіберу қажет.
• Жеңілдік жылына бір рет және тек ішкі рейстерге беріледі. Әр рейске жеңілдікпен бір орын беріледі.

Air Astana (емге ұшатындарға арналған жеңілдіктер)

• Қазақстанда емі жоқ аурулар бойынша шетелге емделуге немесе операцияға баратын тұрмысы төмен отбасылардың балаларына 100% жеңілдік беріледі.
• Тегін билет алу үшін құжаттардың толық пакетін брондау орталығына немесе әуе компаниясының кеңсесіне тапсыру қажет.
• Әуе компаниясына өтінім көп түсетіндіктен, олар басымдық тәртібімен қарастырылатынын ескеріңіз. 

ҰОС ардагерлері

Кейбір қазақстандық әуе компаниялары Ұлы Отан соғысының ардагерлеріне және оларды ертіп жүретін адамдарға тегін билет береді. Мұндай билетті алу үшін алдын ала өтінім толтырып, ҰОС қатысушысының немесе зейнеткерлік куәлігін ұсыну қажет. Алымдар мен салықтар бөлек төленеді.

• FlyArystan: ҰОС ардагерлері мен оларды еріп жүретін бір адам тек ішкі бағыттар бойынша жылына бір рет тегін ұша алады. Билетке 20 кг жүк және 5 кг қол жүгін тасымалдау кіреді.
• Air Astana: ҰОС ардагерлеріне, тыл және азаматтық авиация ардагерлеріне Қазақстан, Орталық Азия және Кавказ бағыттарындағы рейстерге 100% жеңілдік беріледі.

Сурет салған — маша пипетка.