Төрт айлық баламен Швейцариядағы кинофестивальге қалай барып қайттым?

Декреттің үшінші айы еді. Баланың іші кебуін, атопиялық дерматит пен алғашқы өсу кезеңдерін өткеріп жатқан қызығы мен шыжығы көп күндердің бірінде өзімнің тек ана емес екенім еске түсті.

Маусым айында кешкі серуен кезінде қызымның ұйқы режимін тексеру үшін смартфонымды ашсам, бір хабарлама келіп тұр екен. Швейцариядан келген хат! «Сіздің қысқаметражды фильміңіз Локарно кинофестивалінің халықаралық байқауына өтті» деп тұр. Тамызда бізді фильмнің әлемдік премьерасына шақырып жатыр екен!

Сол кезде «иә, мен режиссер едім ғой!» деген ой келді. Элина дүниеге келгенге дейін Еуропада оқып, дипломдық жобамды түсіргенмін. Оны фестивальдерге жіберіп, содан кейін перзентханаға кетіп, фильмім туралы ұмытып та кетіппін.

Локарно деген не өзі?

Локарно — Альпінің оңтүстігінде, Маджоре тау көлінің жағасында орналасқан Швейцарияның кино астанасы. Бұл — Швейцарияның италиялық бөлігі саналатын Тичино кантоны. Сондықтан мұнда италиялықтарша сөйлейді, пицца пісіріп, ыстықта желато жеп салқындайды. Нағыз dolce far niente, яғни ештеңе істемейді, демалыстан ләззат алады.

Locarno Film Festival Канн, Венеция мен Берлинале фестивальдерімен қатар әлемдегі ең ірі бес кинофестивальдің қатарына кіреді. Оның Piazza Grande алаңындағы ашық аспан астындағы көрсетілімдермен аты шыққан. Былтыр фестивальге Жеки Чан, Эмма Томпсон мен Люси Лью келген.

Локарноға бару менің арманым еді. Бұл — мансабым мен болашақ жобаларыма барар жолдағы маңызды қадам. Мұндай мүмкіндік туғанына сенудің өзі қиын болды. Ал төрт айлық баламен жолға шығуға шешім қабылдау одан да қиын еді.

Элинаны үйде әжелеріне қалдырып кетеміз деген ой болған да жоқ. Күйеуім барайық деп мені қолдап, фестиваль сапарымыз шағын демалысқа ұлассын деді. Сонымен алдымызда емізулі баламен саяхатты жоспарлап, премьераға жету деген үлкен міндет тұрды.

Дайындық: виза, билет пен багаж

• 

  Ұшақтың ішінде
• 
• 

  Поезд

Істейтін шаруамыз көп еді: екпе салдырып, паспорт пен виза алып, жолға қамданып, баспана тауып, заттарды жинау керек болды. Мұның бәріне бір жарым ай ғана уақытымыз болды.

Шығынның бір бөлігін фестиваль көтерді: фильмімнің премьерасы мен көрсетілімдері өтетін күндері тұратын жердің, фестиваль бойы пойыз бен автобус билеттерінің ақысын төледі.

Екпе. Гексаксим мен Превенар дейтін негізгі екпелерді салдырдық. Фестивальге оларсыз да кіргізер еді, бірақ жолда баланың денсаулығына қауіп төндіргіміз келмеді.

Паспорт. Біздің бала кезіміздегідей балалардың суретін ата-анасының паспортына жапсырмайтынын білдік. Сондықтан Элинаға үш жұмыс күнінде жеке шетел паспортын жасаттық. Ол үшін баланың ХҚКО-ға өзі баруы міндетті болды. Паспортқа — 17 300 теңге, жеделдетуге 1771 теңге төледік.

Виза. Фестивальдің шақыртуымен VFS Global арқылы құжат тапсырдық. Балаға да броньдардың толық жинағы мен біздің банк шоттарымыздың көшірмесі керек болды — Элинаның жөргек пен қоспаға ақшаны қайдан алатынын дәлелдеуіміз керек екен. Құжат тапсыруға баланы апарудың қажеті болмады.

Визаны тура бір аптада берді. Консулдық және қызмет көрсету алымдары бір ересек адамға — 65 345 теңге, балаға — 15 845 теңге болды. Үшеуімізге жалпы 146 535 теңге кетті.

Ұшақ. Алматы–Милан бағыты бойынша Neos әуе компаниясының сегіз сағаттық тікелей рейсін таңдадық. Екі адамға билет 856 мың теңге болды. Күнін өзгертуге болатын тарифті алдық: баламен жүргенде кез келген жағдайға дайын болған дұрыс.

Барып-қайтқан екі рейсте де ұшақтың жартысы бос болды. Жанымыздағы орын да бос қалды. Әуе компаниясы эконом-класта балаларға арналған бесік бермейді екен. Сол себепті ұшаққа арналған үрлемелі бесік сатып алдым. 15 мың теңгеге алған ең пайдалы заттарымның бірі болды. Элина бос орындыққа жайғасып, бірнеше сағат бойы тәтті ұйықтады.

Көлік. Миланның Мальпенса әуежайынан Локарноға пойызбен 2,5 сағатта жеттік. Жолда бір рет ауысып отырдық. Бір бағытқа пойыз билеті қашықтыққа қарай бір адамға 25 CHF (шамамен 13 мың KZT) басталады. Біздің есебімізше, фестиваль берген жол жүру ваучерлерінің арқасында бүкіл сапарда кемінде 100 CHF (шамамен 54 мың KZT) үнемдедік.

Багаж. Бір үлкен шабадан алдық. Оның жартысынан көбіне Элинаның заттары кетті. Күйеуім екеуіміз бес күнге жететін киім салып, қалғанын сол жерде жуып, қайта киеміз деп шештік. Үйдегі ауыр арбаның орнына салмағы 6 келі Babyzen YOYO арбасын Алматыдан жалға алдық. Бұл арқамызды, дәлірек айтқанда, күйеуімнің арқасын құтқарды. Арбаны 11 күнге жалдағанға 18 800 теңге бердік.

Локарнода қайда тұруға болады және қалай артық ақша жұмсамауға болады?

• 
• 

  Минусиода
• 

  Қонақ үйімізде

Сапарымыз 11 күнге жоспарланды. Фильмім көрсетілетін үш күнге фестиваль қонақүйден бөлме берді. Төрт айлық баламен келетінімізді білген ұйымдастырушылар бөлмені бала кереуеті бар отбасылық нөмірге  қуана-қуана ауыстырып берді.

Қалған күндерге Booking арқылы пәтер жалдадық. Бізге асүйдің болғаны маңызды еді. Бөтелке мен сүт сауғышты зарарсыздандырамыз әрі тамаққа кететін ақшаны үнемдей аламыз. Сонымен бірге лифті бар не бірінші қабаттағы, тыныш ауданда орналасқан үй іздедік. Күн күйіп тұрғасын кондиционері де болуы керек дедік. Термометр біз үйренген 33–35 градусты көрсеткенімен, ылғалдық жоғары болғандықтан ыстық әлдеқайда қатты сезілді.

Фестиваль кезінде Локарно орталығындағы баспана бағасы шарықтап кетеді. Сондықтан көршілес Минусио ауданынан пәтер таптық. Фестивальге жаяу 20 минутта жетуге болады, жанында теміржол станциясы бар, ал ауласындағы ағаш түбінде сүйкімді әткеншек тұрды. Фестиваль қатысушыларының қоғамдық көлікте тегін жүретіні де жақсы көмек болды.

Балалармен саяхаттау туралы мақалалар

Төрт баламен әлем шарлап жүрміз. Саяхат бізге не үйретті?

Баламыз және әжемізбен 10 күн Кореяда болдық

Біз Черногорияға балаларымызбен және турагенттіксіз қалай барып қайттық

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Фестивальге жеттік: премьера, көрсетілім мен баланың режимі

• 
• 
• 
• 

Фестиваль күндері Локарнода тіршілік қайнап жатады: кино көрсетілімдері, көрме алаңдары, өнер саласының адамдарымен кездесулер, питчингтер мен кештер өтеді. Баламен барған соң бірден жоспарымды жеңілдетіп, күніне көп дегенде екі шараға ғана бара алатынымды түсіндім.

Күніміз шамамен былай өтетін:

07:00 — Маджоре көлінің жағасында таңғы серуен.

11:00 — Күн ыси бастайды. Азық-түлік сатып алып, үйге қайтамыз.

12:00–17:00 — Швейцариялық сиеста. Күйеуім мен қызым кондиционердің астында демалады. Мен сүтімді сауып қалдырып, күндізгі көрсетілімге жүгіріп кетемін. Өзіме тиген осы бірнеше сағат еркіндікті үйге қайтар жолда желато жеп атап өтемін: Mini Gelateria, Vera Gelateria.

19:00 — Кешкі қаланы аралаймыз.

21:00 — Үйге қайтамыз. Қарбалас күннен кейін Элина бірде тыныш қана, кейде біраз қарсыласып, ұйықтап қалады. Содан кейін екеуіміздің біріміз Piazza Grande-дағы түнгі көрсетілімге кетеміз.

Ашық аспан астында жақсы кино көргеннің әсері ерекше. Марапат алу үшін сахнаға Оливия Уайлд, Моника Беллуччи, Изабелла Росселлини мен Даррен Аронофски шықты. Ал Петра Волпенің Frank and Louis фильмі көрсетіліп жатқанда алаңның үстінен комета ұшып өтті.

Барлық кеш сағат 23:00-ден кейін басталатын. Мен оларға баруға қанша тырыссам да, әр жолы қызымды құшақтап жатып ұйықтап қалатынмын. Сосын өзіме «ертең міндетті түрде барамын» деп уәде беремін.

• 

  Премьерада
• 
• 

Фильмімнің премьерасы 11 тамызда өтті. Бізді арнайы фотосессияға, басқа режиссерлер мен фестиваль командасы қатысқан түскі асқа шақырды. Одан кейін премьера мен сұрақ-жауап бөлімі өтетін кинотеатрға апарды.

Күйеуім мен қызым да фильм делегациясының мүшесі ретінде осы шаралардың бәріне шақырылды. Элина фотосессия мен түскі асты ұйықтап өткізді. Бірақ мен сахнаға шығардың дәл алдында көнбей кетті. Сөйтіп фильмімді көрерменге қызымды құшақтап тұрып таныстырдым.

Фестиваль аяқталған соң үш күніміз бар еді. Көрші Аскона мен Лугано қалаларына барып қайттық. Қалған уақытта көл жағасында серуендеп, Маджореде шомылып, желато жеп, фестивальдің қарбаласынан кейін жақсы демалдық.

Қалада баламен жүргенге жайлы ма?

Швейцария кішкентай баламен саяхаттауға өте қолайлы екен. Жалғыз кедергі — Еуропаның ескі қалаларына тән тас төселген көшелер. Бірақ оларды тегіс веложолдармен айналып өтуге болады.

Барлық жерде пандус пен бала арбасына арналған жол бар, ал адамдар жол беріп, көмектесуге дайын тұрады. Бала туу көрсеткіші төмен елде кішкентай балаларды көрген жұрт шынымен қуанады екен. Элина жүрген жерінде «piccolina», «molto bella», «bellissima» деген жылы сөздер естіп, оларға ұялып күлімсіреп қоятын.

Қанша ақша кетті?

Төрт айлық баламен халықаралық кинофестивальге барарда уақытты ғана емес, бюджетті де мұқият жоспарлауымыз керек болды. Шығынның бір бөлігін ұйымдастырушылар көтерді: фильм көрсетілетін күндері қонақүй мен тамаққа, сондай-ақ Швейцария ішіндегі пойыз билеттеріне фестиваль төледі.

Сапарға жалпы 2 328 706 теңге жұмсадық. Иә, бұл ақшаға Түркияда бір жарым ай демалуға болар еді. Бірақ мұндай тәжірибені ала алмас едік.

Бізге ең көп көмектескен заттар

• 
• 

  Арбамыз
• 

Шабаданымыздың жартысын қызымыздың заттары алды. Бірақ мына заттар жолда көп көмектесті:

• Эргорюкзак — баспалдағы көп жерде және әуежайда таптырмайтын зат.
• Жеңіл жалдамалы арба (YOYO) — ықшам жиналады, көлікке оңай сыяды, қол жүгі ретінде алып жүруге болады.
• Сүт сауғыш, сүтті жылытатын портатив құрылғы мен қоспа — анда-санда баланы әкесіне тастап кетіп, өз шаруаңмен айналысуға мүмкіндік береді.
• Ұшаққа арналған үрлемелі бесік — Элинаның ұшақта жайлы ұйықтауына көмектесті.
• Бала арбасына тағылатын портативті желдеткіш — тамыздағы 30 градустық ыстықта көп көмектесті.
• Дәрі қобдишасы — күтпеген жағдайларға және уайымшыл ата-ананың көңілі тыныш болуы үшін.

Төрт айлық баламен кинофестивальге барған қалай екен?

Оңай емес, әрине. «Еркін әрі алаңсыз демаламын» деп ойлаушы да болмаңыз. Күн тәртібі сізге байланысты емес, бәрі ең кішкентай саяхатшының көңіл күйі мен қажетіне қарай өзгереді.

Бірақ сонымен бірге бұл — ерекше тәжірибе. Өз фильміңнің әлемдік премьерасына қатысқан, балаңды құшақтап Альпі көлінің жағасында серуендеген, ана атанғаның өмірің мен мансабыңды тоқтатып тастамағанын сезінген — аса маңызды әрі баға жетпес дүние.

Жоспарды дұрыс құрсаңыз, жақындарыңыз қолдап тұрса, ыңғайлы арба алсаңыз, баламен бірге мұндай үлкен сапарға да ойланбастан шыға беруге болады.