Екі баламды Швейцарияда босандым: перзентхана қандай, ақысы қанша?
Дәрігер мен перзентхананы қалай таңдау керек, «базалық сақтандыру» және палатадағы all inclusive деген не?
Біз алты жылдан бері Швейцарияда тұратын қазақтармыз. Үй ішімізбен 2019 жылы осында көшіп келгеніміз нағыз экстрим болды. Себебі ай-күнім жетіп отыр еді.
Қалай босанар екем деп қатты қорықтым. Бір айдың ішінде дәрігер тауып, перзентханаға тіркеліп, жаңа пәтерге көшуіміз керек болды. Бірақ Швейцарияда бәрі сағат сияқты мүлтіксіз жұмыс істейді екен. Ретімен шешіле берді. Оның үстіне, көшіп-қону жұмыстарының бәрін күйеуім өз мойнына алған.
Екі баламыз да осы елде туды. Осыны айтсам, адамдар қызыға тыңдап, көп сұрақ қояды. Сондықтан көргенімді көп адам білсін деп, осы мақаланы жазып отырмын.
Жүктілік: дәрігер мен перзентхана іздеу
Бір байқағаным, Швейцарияда адамдар жүктілікке байыппен қарайды екен. Оларға бұл табиғи процесс, сондықтан бәрі өз ретімен болса дейді. Дәрігерге барғанымда да қабылдауы өте жайлы әрі тыныш жағдайда өтеді. Сондықтан психологиялық күйім тұрақты болды.
Дәрігерге қанша рет барғаным нақты есімде жоқ, бірақ бәрі жақсы болса, босанғанға дейін әйелді шамамен 10–15 рет қабылдайды. Дәрігер тапқан қиын емес: интернет, email не телефон арқылы іздейсіз. Дегенмен дәрігерді бала жоспарлап жатқанда тауып қойған жөн.
Мен дәрігерімді достарымның нұсқауымен таптым. Жүктілік кезінен бастап барлық қабылдау мен перзентханада жатқан күндер «базалық сақтандырудың» есебінен өтелді. Онсыз дәрігерге жазылу мүмкін емес.
Ескеріңіз:
- Бұл сақтандыруды елдің резиденттері ғана ала алады. Туристер оны рәсімдей алмайды.
- Сіз Швейцарияға босану не емделу үшін арнайы келгіңіз келсе, медициналық виза қажет болады. Резидент болмасаңыз, барлық шығынды өзіңіз төлеуге тура келеді.
- Базалық сақтандыру шығынның бәрін түгел қамтымайды. Қаласаңыз, қосымша пакеттерді таңдап, кейбір қызметтерге үстеме ақы төлей аласыз.
Перзентхана мынадай болса екен деп іріктеген жоқпын. Тұңғыш сәбиім болғандықтан «бәрі жақсы болса екен» деп қана жүрдім. Интернеттен бірнеше перзентхананың сайтын салыстырып, ұнағанын таңдадым. Нәтижесінде екі баламды да «See-Spital» перзентханасында босандым. Таныстарымның көбі «Triemli-де» босанған. Әрине, жеке клиникалар да бар. Бәрі бюджетіңізге байланысты.
Босанғаным мен палатадағы All inclusive жайлы
Толғағым басталып, перзентханаға келгенімде медбикелер ерекше ықыласпен күтіп алды. Палатаңды алдын ала дайындап қояды екен. Сондықтан ішіне кіргеніңде ауруханаға емес, айрықша атмосферасы бар қонақүй бөлмесіне кіргендей боласың.
«Мына жерде былай босанасың» деп ешкім нұсқау бермейді. Медбикенің «Сенің бойыңды өзіңнен артық білетін ешкім жоқ, сондықтан өз бойыңа ерік бер» деген сөзі есімнен кетпейді. Расымен, әйел өзін қауіпсіз әрі оны қолдайтынын сезінсе, бәрі әлдеқайда жеңіл өтеді екен. Күйеуім де екі жолы да жанымда болды.
Екі жүктілігім де жеңіл өтті, ешқандай қиындық болған жоқ. Перзентхананың маған ұнағаны сонша — тіпті үйге қайтқым келмегені есімде.
Бала туған соң әйел перзентханада жағдайына қарай шамамен 3–4 күн жатады. Қызмет көрсету сапасы ғажап. Күніне үш рет мәзір әкеледі де, мейрамханадағыдай өзің қалаған тағамға тапсырыс бересің. Тамақтары пайдалы, дәмді әрі құнарлы: ет, сорпа, десерт, жеміс — бәрі жаңа босанған анаға қуат береді.
Палатада керектің бәрі бар:
- әйелге арналған жеке гигиена заттары (сабын, шампунь, тіс пастасы, щетка, майлық, крем); палатада киетін киім мен босанғаннан кейін керек болатын заттар;
- баланың киімі, жөргек пен жаялық.
Яғни өзіңмен бірдеңе ала барудың қажеті жоқ. Палаталар тап-таза, төсек жаймасын жиі ауыстырады, кереует ыңғайлы. Дәрігерлер күніне бірнеше рет келіп, жағдайыңды сұрап, тексеріп кетеді. Ал шақырғыңыз келсе, төсектегі батырманы басасыз, палатаға жедел келеді.
Қанша теңге жұмса(ма)дық?
Перзентханадан шыққаннан кейін бір ай шамасында (10–15 рет) арнайы медбике — hebamme — үйге келіп тұрады. Ол әйелдің де, сәбидің де жағдайын бақылап, баланың салмағын өлшейді, емізуге көмектеседі және сұрақтарға жауап береді. Өте ыңғайлы.
Енді бәрін қызықтыратын сұрақ — Швейцарияда босанған қанша тұрады дегенге жауап берейін:
Әрине, бәрі жүктілік қалай өткеніне байланысты. Орташа есеппен шамамен 10 000 доллар (≈ 5,3 млн теңге) болады. Менің жағдайымда бұл шығынның бәрін базалық сақтандыру өтеп берді. Бұл сомаға мына қызметтер кіреді:
- Босанғанға дейінгі дәрігердің барлық қабылдауы;
- Перзентханада босану;
- Үй келетін hebamme қызметі.
Менің босануым табиғи әрі жеңіл өтті. Анестезия, кесар тілігі не тағы басқа қосымша көмек қажет болса, қызмет құны жоғарылайды.
Бюрократия: азаматтық пен ат қою
Көпшілік жаңа туған балалар азаматтық ала ма екен деп сұрайды. Швейцарияда шетелдік ата-анадан туған балалар автоматты түрде азаматтық ала алмайды.
Ел бірнеше кантонға бөлінген, әрбірінің заңы өзгеше, бірақ ортақ ереже бар — азаматтық алу үшін елде кемінде 10 жыл тұрып, тілін, заңдарын және мәдениетін білу керек.
Құжат рәсімдеу тәртібі:
- Швейцария бойынша: босанған соң жергілікті ХҚКО үйге хат жібереді, онда баланың деректерін толтыру қажет. Айтпақшы, Швейцарияда баланың атын ойдан шығарып қоюға немесе күлкі тудыратын есім беруге тыйым салынған. Мысалы, бізден балаларымыздың есімдерінің мағынасын түсіндіруді сұрады.
- Қазақстан бойынша: туу туралы куәлікті алу сәл ұзақтау. Апостиль қойылған құжаттар, олардың неміс тіліне нотариалды аудармасы, ата-ананың паспорттары мен неке туралы куәлігі қажет.
Сөз соңында
Мен балаларымды Швейцарияда босанғаныма өте қуаныштымын және барлық әйел дәл осындай жағдайда босанса екен деп тілеймін. Адамнан адам шыққаны оңай емес, мұндай сәтте әйелге ең әуелі қолдау мен қамқорлық қажет.
Швейцария перзентханасында өзімнің қауіпсіз жерде жүргенімді шын сезіндім — медбикелер әр өтінішімді мұқият тыңдап, күйеуім де жанымнан бір елі ажырамай, қолымнан ұстап отырды.
Былай істе деп ақыл айтқан дұрыс па, жоқ па — білмеймін, әркімнің өз жолы бар ғой. Бірақ жүкті кезде ең бастысы — өзіңді күту. Ал мүмкіндігіңіз болып жатса, шет тілдерді үйреніп, көбірек саяхаттау керек.
