Швейцарияға саяхаттауға қанша ақша керек? Санап бердік!
Бір адам үшін Швейцарияға баруға қанша шығын кетеді? Есептеп көрелік.
Мамырдан бастап Швейцария жасыл желекке оранып, құлпыра түседі. Альпі тауының ғажабын, Швейцарияның табиғи алқаптары мен көлдерін көремін десеңіз, бұл елге мамыр мен қыркүйек арасында барған жөн. Өз басым Швейцарияға жазда екі рет барып, сұлулығына тамсанып қайтқанмын. Сол кезде саяхатты бірнеше ай бұрын жоспарлап, билет, қонақүй алып қойдым. Сіз де Швейцарияға саяхатты кемі 3–4 ай бұрын жоспарлаңыз. Мәселен, сапарды 22–29 шілдеге белгіледіңіз дейік. Енді осы уақытқа орайластырып жоспар құрып, шығынын есептеп көрейік.
Виза
Алдымен Швейцарияға виза жасатамыз. Бұл ел Шенген аймағына кіреді. Сондықтан Швейцарияға немесе Шенгенге кіретін Еуропаның басқа елі арқылы виза алу керек. Швейцарияның визасына құжаттарды Астана я Алматыдағы VFS Global орталығы арқылы өткіземіз — Шенген визасының құны мен VFS Global орталығы алатын төлемді қосқанда, 65 500 теңге кетеді. Бұған қоса сақтандыру жасатуға 25–30 мың теңге жұмсайсыз.
Виза шығыны: 65 500 теңге.
Сақтандыру шығыны: 35 000 теңге.
Ұшақ билеті
Мәселен, Алматыдан Ыстанбұл арқылы Цюрих қаласына барсаңыз, ұшақ билеті шамамен 357 000 теңге болады. Turkish Airlines әуе компаниясының рейсіне багаж және тамақ кіреді. Ал Pegasus әуе компаниясының билеті 345 мың теңгеден басталады, бірақ бұл сомаға багаж кірмейді. Жалпы Швейцарияға билет құны 350–410 мың теңге аралығында болатынын ескеріңіз. Билеттерді Aviasales.kz сайтынан таба аласыз.
Билет шығыны: шамамен 404 000 теңге.
Қонақ үй
Бір апта бойы Швейцарияның әртүрлі қаласында қонуыңыз мүмкін. Ал бұл елде таңғы ас беретін қонақүй бағасы бір адамға бір түнге 51–85 мың теңгеге дейін шығады, ал хостелдегі бір төсек орын, таңғы асты қосқанда, 40–50 мың теңге болады. Демек, қонақүйден бөлме алсаңыз, 357 000 теңгеден кем кетпейді. Ал жеті күнге хостел аламын десеңіз кемі 280 000 теңге жұмсайсыз. Швейцарияның әр кантонында (облысында) баға да әртүрлі. Сондықтан жеті күнге баспана шығынын 330–400 мың теңге деп есептеген жөн.
Қонақ үй шығыны: 330–400 мың теңге.
Пойыз билеті
Швейцарияны пойызбен аралаған ыңғайлы. Оның билетін әр қалаға жеке-жеке сатып алсаңыз қымбатқа шығады. Сондықтан бірден алты күнге я сегіз күнге Swiss Travel Pass билетін сатып алыңыз. II класс вагонына алты күндік билеттің бағасы — 379 франк (237 000 теңге), сегіз күнге құны 419 франк (262 000 теңге) болады. Алты я сегіз күндік билетті алсаңыз, Швейцарияның бүкіл пойызына, қалаларындағы қоғамдық көлігіне (трамвай, автобус, метро) мініп жүре бересіз. Swiss Travel Pass болса, кейбір аспалы жолдарына жеңілдік беріледі. Билетті мына сайттан ала аласыз. Бірақ Swiss Travel Pass Швейцарияның көрікті жерлерін аралататын Bernina пойызына жарамайды. Ол пойызға билетті бөлек алу керек. Оның құны 156 франктан (97 400 теңге) басталады.
Пойыз шығыны: 334 400 теңгеден басталады.
Ас–ауқат
Тамаққа кететін ақшаны үнемдеу үшін таңғы ас беретін қонақүй не хостелді таңдаған жөн. Ал түскі ас пен кешкі асты шағын кафелерден, фаст–фуд мейрамханаларынан, түрік асханаларынан ішіп жүруге болады. Швейцарияда тамақ қымбаттау — фаст–фудтың өзі 20 франктан (12–13 мың теңге) кем тұрмайды. Ал бағасы орташа кафелерде 35–45 франкқа (21–28 мың теңге) тамақ ішесіз. Мен түскі асқа 10 франкқа (5–6 мың теңге) супермаркеттен дайын салаттар мен тоқаштар алып, ауқаттанып жүрдім. Ал кешкі асты кафе–мейрамханалардан іштім. Сонда тамаққа 300 000 теңгедей жұмсадым.
Ас–ауқат шығыны: кемі 300 000 теңге.
Басқа да шығындар
Роуминг қостыру я интернеті бар eSIM алуға, музейлерге баруға, кәдесыйлар алуға, аспалы жолдармен жүруге қажет деп кемі 150 000 теңге алып барыңыз. Қалауыңызға қарай одан да көп жұмсауыңыз мүмкін. Қаншалық үнемді болсаңыз, соншалық аз шығын кетеді.
Басқа да шығындар: кемі 150–200 мың теңгеден бастап.
Қорытынды
Шығын | Сома, теңге |
|---|---|
Виза мен сақтандыру | 95 500 |
Ұшақ билеттері | 345 000–357 000 |
Қонақ үй | 330 000–407 000 |
Пойыз | 334 400 |
Тамақтану | 300 000 |
Басқа шығындар | 150 000–200 000 |
Жалпы | 1 613 900–1 740 500 |
Виза мен сақтандыру
Сома, теңге
95 500
Ұшақ билеттері
Сома, теңге
345 000–357 000
Қонақ үй
Сома, теңге
330 000–407 000
Пойыз
Сома, теңге
334 400
Тамақтану
Сома, теңге
300 000
Басқа шығындар
Сома, теңге
150 000–200 000
Жалпы
Сома, теңге
1 613 900–1 740 500
Шілдеде Швейцарияға бір аптаға барып демалып қайтамын десеңіз, сапардың құны 1 590 000 теңге мен 1 840 000 теңгенің арасында болады. Бастысы сапарды кемі 2–3 ай бұрын жоспарлаңыз — сонда ақша үнемдейсіз. Виза алған соң бірден әуе билетін сатып алыңыз, одан кейін қонақүйлерді брондаңыз. Виза алмай тұрып, билет я қонақүйге төлем жасамаңыз — виза бермей қойса, ақшаңыз қайтарылмай қалуы мүмкін. Саяхатқа шыққан кезде валюта бағамы өзгеріп, шығын аздау я көптеу болатынын да ескеріңіз.
Қосымша: Швейцарияда бару керек бес аймақ
Маттерхорн
Лаутербруннен
