Әлемдегі розетка түрлері бойынша толық гайд
Саяхатқа шыққанда неге қуаттағышыңыз басқа елдегі розеткаға сай келмеуі мүмкін екені туралы айтып береміз.
Саяхат кезінде телефоныңыз бен басқа да электрондық құрылғыларыңызды қуаттап отыру өте маңызды. Егер басқа елге барғанда, қуаттағышыңыз жергілікті розеткаға сай келмей қалса, бұл үлкен қиындық тудыруы мүмкін. Мұндай жағдайда не істеу керек? Қайда барған жөн? Әрине, жат жерде түн ортасында жаңа қуаттағыш іздеп жүгіре алмайсыз. Сондықтан мұндай келеңсіздіктің алдын алу үшін алдын ала қамданған жөн.
Бұл мақалада әртүрлі елдерде қолданылатын розетка түрлерін және қай елге сапар шеккенде адаптер алып жүру қажет екенін қарастырамыз.
Неліктен вилка түрлері көп?
Әр елде тоқ кернеуі мен жиілігі әртүрлі болғандықтан, розеткадан келетін тоқ та өзгеше болады. Мысалы, Қазақстанда стандартты кернеу — 220–240 вольт, ал жиілігі — 50 герц. Алайда мұндай жүйе барлық елде бірдей емес. Бұл неге маңызды? Өйткені Қазақстанда қолданып жүрген құрылғыңызды АҚШ-тағы қонақүйде тоққа қоссаңыз, нағыз отшашуды көресіз. Бірақ сізге бұл мүлдем ұнамауы мүмкін…
Бағытымызға қарай қандай розетка түрлері болады?
Түркия, Египет, Индонезия (Балиді қосқанда), ТМД, Еуропа
Үйреншікті Type C және F
Бұл елдердің басым бөлігінде Қазақстандағы сияқты Type C үлгісі қолданылады. Сондықтан аса қатты алаңдаудың қажеті жоқ. Дегенмен, Швейцарияға барсаңыз, сәл әбігерге түсуіңіз мүмкін. Бұл елде Type J-ді қолданады.
Тайланд, Оңтүстік Корея, Малайзия
Тайландта «көп форматты» розеткалар орнатылған. Ең жиі кездесетіндері — екі тесікті (Type C/F) және үш тесікті (Type G) түрлері. Сондықтан құрылғыларыңызды еш қиындықсыз қосып, пайдалана аласыз. Оңтүстік Кореядағы розеткалардың барлығы дерлік біздегі Type C/F үлгісіне сәйкес келеді — ешқандай мәселе туындамайды. Ал Малайзияда тек Type G розеткалары қолданылады. Сол себепті өзіңізбен бірге адаптер алып жүрген артық етпейді.
БАӘ, Ұлыбритания, Ирландия, Кипр
Бұл елдерде қолданылатын розетка түрі — Type G, ел ішінде оны әзілдеп «үш басты айдаһар» деп те атап жатады. Ішінде кіріктірілген сақтандырғышы болады — ол қауіпсіздік мақсатында тоқ күшін реттеп, артық жүктемеден қорғайды.
АҚШ, Канада, Мексика, Жапония
Бұл елдерде тоқ кернеуі 110–120 вольт шамасында, әрі Type A үлгісіндегі розеткалар қолданылады. Сондықтан тоқ көзіне қосар алдында құрылғыларыңыздың қандай кернеуге арналғанын міндетті түрде тексеріп алған жөн.
Жақсы жаңалық: заманауи смартфондар мен ноутбуктердің көпшілігі әмбебап — олар 100-ден 240 вольтқа дейінгі кернеуде жұмыс істей береді.
Егер 220 вольтқа арналған құрылғыны 110 вольттық розеткаға қоссаңыз, ол мүлде жұмыс істемеуі мүмкін. Ал керісінше, төмен кернеуге арналған құрылғыны жоғары кернеулі тоқ көзіне жалғасақ, оның күйіп кету қаупі бар.
Аргентина, Бразилия, Колумбия
Оңтүстік Америкаға барғанда бір рет сатып алып, чемоданыңызға салып қойған әмбебап адаптеріңіз 100% ақталады.
Аргентина: Мұнда негізінен Type I розеткалары қолданылады — Қазақстандағы құрылғыларға арналмаған. Сондықтан адаптер міндетті түрде қажет.
Бразилия: Елде ресми түрде Type N стандарты қабылданған (үш дөңгелек ұшы бар), бірақ оған біздің Type C де жиі сәйкес келе береді. Алайда Бразилиядағы басты мәселе — тоқ кернеуі. Мысалы, Рио-де-Жанейрода — 127 В, ал ел астанасы Бразилиада — 220 В. Құрылғыларыңыздың белгісін (мысалы, «100–240V») тексеріп, қонақүйден нақты кернеуді сұрап біліп алған жөн.
Колумбия: Көп жерде америкалық Type A розеткалары қолданылады (екі жалпақ ұшты). Тоқ кернеуі де америкалық үлгіде — 110 В. Адаптерсіз әрі құрылғылардың үйлесімділігін тексермей, тоққа қоса салуға болмайды.
Перу: Мұнда жағдай екіұшты — бір жерлерде америкалық Type A розеткасы тұрса, басқа жерлерде бізге таныс Type C кездеседі. Туристер жиі баратын қонақүйлерде екі нұсқасы қатар орнатылады.
Чили: Негізінен Type L үлгісіндегі розеткалар (үш дөңгелек ұшы қатар орналасқан) кең таралған, алайда олардың көбіне біздің Type C де сай келе береді.
Аустралия және Жаңа Зеландия
Жердің арғы бетінде сізді мүлде бөлек стандарт — Type I розеткасы күтіп тұр (бірінші суретте белгіленген). Мұнда арнайы адаптерсіз құрылғыларыңызды тоққа қосу мүмкін емес.
Ылғи жолда жүретіндерге арналған лайфхактар
Адаптер сатып алыңыз. Сапарға шыққанда жаныңызда жүруі тиіс ең маңызды заттардың бірі — әмбебап адаптер. Оны кез келген техника дүкенінен табуға болады. Таңдау кезінде адаптердің әртүрлі розетка түрлеріне сай келетініне және әртүрлі құрылғылармен үйлесімді екеніне көз жеткізіңіз. Мұндай ұсақ-түйек детальдар сіздің сапарыңыздың ойдағыдай өтуіне тікелей әсер етуі мүмкін.
Адаптер ұмытып кеткеніңіз — проблема емес. Алдымен қонақүйдегі ресепшннен көмек сұраңыз, оларда қосымша адаптер немесе қуаттағыш табылуы мүмкін. Сондай-ақ бөлмеңіздегі теледидардан немесе басқа құрылғылардан USB-порт бар-жоғын тексеріп көріңіз. Мұндай порттар кейде уақытша да болса құрылғыларыңызды қуаттауға көмектесе алады. Егер қолыңызда пауэрбанк болса, оны пайдалану арқылы бір-екі күнге дейін амалдай тұруға болады.
Үшайыр (тройник) ала жүріңіз. Чемоданыңызға үшайыр немесе ұзартқыш салып алыңыз — осы арқылы сіз жалғыз адаптер қолданып, бірден өзіңіздің бірнеше құрылғыңызды қуаттандыра аласыз!
Сурет салған — Алина Минасян.
