Жаңа жылды шетелде тойлау: билетті қашан алсаңыз ұтылмайсыз?
Қаңтардағы мерекеге ұшақ билетін қашан сатып алған тиімді екенін айтамыз.
Биыл Жаңа жылда 1–4 қаңтар аралығында — қатарынан төрт күн демаламыз. Қысқа саяхатқа тартып кеткенге өте ыңғайлы! Ал оқушылардың қысқы каникулы 28 желтоқсаннан 10 қаңтарға дейін созылады. Демек, желтоқсанның соңында әуежайға ағылатын адам көп болады.
Біз былтыр Жаңа жыл мерекесі кезінде ұшақ билеттерінің бағасы қалай өзгергенін қарап, билетті ұшуға қанша күн қалғанда сатып алған тиімді екенін анықтадық.
2027 жылғы қаңтарда қалай демаламыз?
Биыл 31 желтоқсан бейсенбіге түседі. Ал 2 қаңтар сенбі болғандықтан, демалыс күні 4 қаңтар, дүйсенбіге ауыстырылады. Сонда қаңтардағы демалыс кестесі мынадай болады:
- 1–4 қаңтар (жұма–дүйсенбі) — төрт күн демалыс;
- 5–6 қаңтар — жұмыс күндері;
- 7 қаңтар (бейсенбі) — православ Рождествосы, демалыс;
- 8 қаңтар (жұма) — жұмыс күні;
- 9–10 қаңтар — әдеттегі демалыс күндері.
Оқушылардың қысқы каникулы 2026 жылғы 28 желтоқсанда басталып, 2027 жылғы 10 қаңтарды қоса алғанда екі аптаға созылады. Сондықтан билетке сұраныс тек 31 желтоқсанда емес, отбасылар демалысқа шыға бастайтын 28 желтоқсанда да артады.
Жаңа жылға билетті қашан алған дұрыс?
Билетті тәуліктің қай уақытында, аптаның қай күні сатып алғаныңыз не іздеу бетін қанша рет жаңартқаныңыз бағаға әсер етпейді. Мұны арзан әуе билетін сатып алу туралы нұсқауымызда түсіндіргенбіз.
Ал Жаңа жыл мерекесінде үш нәрсе маңызды: ұшуға қанша күн қалғаны, бағыттың қаншалықты танымал екені және ұшатын күніңіздің мерекеге қаншалықты жақын екені.
Aviasales.kz дерегінше, Жаңа жыл қарсаңындағы рейстер қымбатырақ болады. Сондықтан билетті ертерек алған дұрыс. Бірақ әр бағыттың өз ерекшелігі бар: Вьетнам мен Қытайға ұшатын билетті екі-үш апта бұрын алсаңыз жеткілікті болуы мүмкін, ал Тайландқа екі ай бұрын алған тиімді.
Мереке жақындаған сайын билеттер де қымбаттайды. Ал Жаңа жылдан кейін, қаңтардың ортасында ұшатын болсаңыз, асықпауға болады. Ондай билеттерді екі апта бұрын да артық ақша төлемей сатып алуға мүмкіндік бар.
Неге мереке жақындағанда билеттер қымбаттайды?
Әуе компаниялары бір рейстегі орындарды әртүрлі бағамен сатады. Әуелі арзанырақ билеттер өтеді, кейін қымбатырақ тарифтер қалады.
Жаңа жылда ұшқысы келетіндер көп болғандықтан, арзан билеттер әдеттегіден ерте таусылады. Бірақ билет нашар сатылып жатса, әуе компаниясы арзан тарифті қайта ұсынуы мүмкін.
Жаңа жылға билетті қанша күн бұрын алу керек?
Біз 15 желтоқсан мен 15 қаңтар аралығындағы рейстерді талдап, әр бағытқа билетті қанша күн бұрын алған тиімді екенін есептеп шықтық.
Қазақстан ішіндегі рейстер
Қашан алған дұрыс: неғұрлым ерте болса, соғұрлым жақсы.
Ішкі рейстерге билеттің бағасы белгілі бір күні күрт көтеріліп кетпейді. Мереке жақындаған сайын біртіндеп қымбаттайды. Сондықтан ұшатын күніңіз белгілі болса, билетті бірден алған дұрыс.
Ақша үнемдеудің ең тиімді жолы — сапар күнін өзгерту. Мереке қарсаңындағы билеттер қымбат болады. Ал бір-екі күн ертерек ұшсаңыз не сәл кешірек қайтсаңыз, арзанырақ билет табылуы мүмкін.
Біріккен Араб Әмірліктері
Қашан алған дұрыс: ұшуға 40 күн қалғанда.
Қазақстаннан Әмірліктерге тікелей рейстер көп, оның үстіне виза қажет емес. Сондықтан қысқы каникулға билеттер тез сатылып кетеді. Ұшатын күн жақындаған сайын бағасы да айтарлықтай өседі.
Қытай
Қашан алған дұрыс: ұшуға 20 күн қалғанда.
Мысалы, 31 желтоқсанда ұшқыңыз келсе, билетті шамамен 11 желтоқсанда алған тиімді. Оған дейін Қытайда қалай төлем жасауға болатынын және миграциялық картаны қалай толтыру керегін біліп алыңыз.
Вьетнам
Қашан алған дұрыс: ұшуға 15–20 күн қалғанда.
31 желтоқсанда ұшамын десеңіз, билетті шамамен 15 желтоқсанда алған тиімді. Тізімдегі бағыттардың ішінде билетті ең кеш сатып алуға болатын ел — осы.
Тайланд
Қашан алған дұрыс: ұшуға екі ай қалғанда.
Бұл — тізімдегі билетті ең ерте алу қажет бағыт. Ұшатын күн жақындаған сайын баға біртіндеп өседі. Сондықтан сапар күнін ертерек белгілеп алған дұрыс. Жолға шығар алдында Тайландтың электрондық миграциялық картасын — TDAC-ты толтыруды ұмытпаңыз.


Жаңа жылда ұшақ билетін тағы қалай арзанырақ алуға болады?
Билетті алдын ала сатып алудан бөлек, ақша үнемдеудің басқа да жолдары бар.
Ұшатын күніңізді бір-екі күнге өзгертіңіз
Мереке кезінде бір-біріне жақын күндердегі билеттердің бағасы қатты ерекшеленуі мүмкін. Сондықтан сапарды бір-екі күнге жылжытып көру — ақша үнемдеудің ең сенімді тәсілдерінің бірі. Бір қызығы, 1 қаңтарда ұшқысы келетіндер аз. Сол себепті бұл күнгі билеттер көбіне арзан болады. 2027 жылы 1 қаңтар жұмаға түссе де, осы үрдіс сақталуы мүмкін.
Жаңа жылдан кейін ұшыңыз
Демалыс міндетті түрде 31 желтоқсанда басталуы керек демесеңіз, сапарды қаңтардың ортасына жоспарлаңыз. Каникул аяқталған соң билетке сұраныс азаяды. Сондықтан билетті ұшуға екі апта қалғанда да қолайлы бағамен алуға болады.
Алматы мен Астанадан басқа қалаларды да қараңыз
Шымкент, Ақтау мен Атыраудан да халықаралық тікелей рейстер бар. Кейде осы қалалардан ұшқан арзанырақ болуы мүмкін.
Көрші елдерді де қарастырыңыз. Мысалы, кей бағыттарға Ташкент пен Бішкектен ұшу Қазақстаннан ұшқаннан арзанға түседі. Оның үстіне Алматыдан Бішкекке көлікпен не автобуспен бірнеше сағатта жетуге болады, ал Шымкенттен Ташкент алыс емес.
Мұндай сапар қашан тиімді болатынын Ташкенттен ұшудың артықшылығы туралы мақаламызда талдағанбыз.
Чартер рейстерін тексеріңіз
Тұрақты рейстерге ұшар алдында жеңілдік сирек болады. Өйткені соңғы сәтте билет алатын жолаушылар көбіне қымбат баға төлеуге дайын.
Ал чартер рейстерінде басқаша. Туроператор орындарды алдын ала сатып алып, ұшақ ұшқанша бәрін сатып үлгеруге тырысады. Сондықтан соңғы күндері арзан билет табылып қалуы мүмкін.
Чартердің тұрақты рейстен айырмашылығын чартер рейстері туралы нұсқауымыздан оқи аласыз.
Ауысып ұшатын бағытты өзіңіз құрастырыңыз
Мереке күндері тікелей рейстер қымбат болса, Ыстанбұл, Әбу-Даби не Кутаиси арқылы ұшатын бағыттарды қараңыз. Әр рейске билетті бөлек сатып алған кейде арзанырақ болады.
Бірақ қыста екі рейстің арасына кемінде үш-төрт сағат қалдырған дұрыс. Қар, қолайсыз күн райы мен ұшақты мұздан тазарту салдарынан рейстер кешігуі мүмкін.
Транзит визасы қажет пе, соны да тексеріңіз. Билеттер бөлек сатып алынса, алғашқы рейс кешіккен жағдайда екінші рейске үлгермей қалу қаупі бар.
Лоукостерлерден қорықпаңыз, бірақ багажды есептеңіз
Лоукостер билеттері көбіне арзан болады. Бірақ оның бағасына жүк тапсыру мен әуежайда тіркелу кірмеуі мүмкін. Қысқы киімдер мен сыйлықтарды бес келілік қол жүгіне сыйғызу қиын. Сондықтан багаж құнын бірден есептеп, билеттерді толық бағасымен салыстырыңыз.
Төлем жасар алдында соңғы бағаны салыстырыңыз
Іздеу кезінде көрсетілген баға мен төлем бетіндегі баға кейде әртүрлі болады. Себебі билет іздейтін сервистер кейде жүйеде бұрын сақталған бағаны көрсетеді. Ал арзан билет сатылып кетсе, жаңа баға тек брондау кезінде жаңаруы мүмкін.
Кей қосымшалар кешбэк, бонус не промокод ұсынады. Бірақ тек жеңілдікке қарап шешім қабылдамаңыз. Әртүрлі сервистегі барлық төлем мен жеңілдікті есептегендегі соңғы бағаны салыстырыңыз.
Aviasales.kz арқылы Жаңа жыл билеттерінің бағасын қалай бақылауға болады?
Билеттердің бағасын күн сайын өзіңіз тексеріп отырмас үшін Aviasales.kz сервистерін пайдаланыңыз:
- Таңдаулылар: ұнаған рейсті сақтап қойыңыз. Бағасы өзгерсе, хабарлама келеді.
- Арзан билеттер картасы: ұшатын күніңіз белгілі, бірақ қайда барарыңызды әлі шешпесеңіз, «Кез келген бағытқа» дегенді таңдаңыз.
- Ыстық билеттер: алдағы 30 күнде ұшатын, әдеттегіден кемінде 10% арзан билеттер топтамасы.
- Aviasales.kz Telegram-арнасы: билеттердің жеңілдікпен сатылатыны туралы хабарламалар осы жерде жарияланады.
Суретті салған — СашаШура.