Жағажайлар, пальмалар және Vice City атмосферасы: Вьетнамға өз бетіммен барып, алғаш рет мұхитты көргенім жайлы
Тек пиксельді пальмалардың орнына — нағыз пальмалар
Бәрі теңіз жағасына барамын деген қарапайым тілектен басталды. Визалық қарбалыссыз, жүйке тозбайтындай және, мүмкіндігінше, әмиянға ауыр соққысыз болса. Ойыма классикалық нұсқалар келді: Түркия, Мысыр… Бірақ бұл қымбат, тағы бір демалысымды «барлығы қосылған» тәртібінде бассейн жағасында өткізгім келмеді. Жаңа, шынайы, туристер үшін аршылмаған бір нәрсе қажет болды. YouTube-та шұқшия бастадым да, кездейсоқ Дананг туралы бейнемазмұнға тап болдым. Міне, осыдан бәрі басталды. Ұзын жағажай, жағалаудағы пальмалары, кең даңғылдар және GTA Vice City-ге ұқсас бір сезім. Мұны шынымен ойнағандар түсінеді. Тек пиксельді пальмалардың орнына — нағыз пальмалар. Ал ең бастысы — былтырдан бастап Астанадан тікелей чартер бар. Пазл өздігінен құрастырылды. Осылайша, мамыр айында мен Вьетнамға — турагентсіз, өз бетіммен жеттім.
Бұл мақалада мен чартерлік рейске билет қалай алғанымды, қонақүйге қалай үнемдегенімді және өзімді GTA кейіпкеріндей сезінетін қалада қалай демалғанымды айтып беремін.
- Тиімді чартерлік билеттерді қалай табуға болады?
- Тақыр кедей болып қалмай, мұхитқа көрінісі бар қонақүйді қалай табуға болады
- Вьетнамдық хамам және алғашқы әсерлерім
- Қажетті дүниелер: валюта айырбастау, байланыс пен көлік
- Құдайлар, таулар мен маймылдар: Дананг пен одан тыс қайда баруға болады
- Гастрономиялық ләззат, таңсық жемістер және пластикалық орындықтар
- Қорытынды
Тиімді чартерлік билеттерді қалай табуға болады
Тур сатып алғанда, чартерлік рейс автоматты түрде пакетке кіреді. Ал егер өзің бөлек ұшқың келсе, нағыз квест басталады: сайттарда тек қымбат тұрақты рейстер ғана көрсетіледі, чартерлер мүлде жоқ сияқты. Бірақ Aviasales.kz сайтынан арзан чартерлік билет тауып алдым. Бұл маған расымен тосынсый болды. Дәл осындай билет, әдетте, турфирмалар арқылы туристерге беріледі. Оны City Travel агенттігі сатты — Aviasales-тің ресми серіктесі.
Шынымды айтсам, басында күмәндандым: интернеттегі пікірлер онша жақсы емес еді. Тікелей Aviasales қолдау қызметіне жаздым: «Достар, сенімді ме?» — деп. Олар жылдам әрі сабырмен: «Серіктес тексерілген, бәрі дұрыс», - деп жауап берді. Тәуекелге бел будым: барып-қайту билеттерін 182 мың теңгеге сатып алдым, бірнеше минуттан кейін олар поштама келді.
Жүйе былай жұмыс істейді: егер ертерек сатып алсаң, тұрақты рейстер кейде арзанырақ болуы мүмкін. Бірақ ұшуға бір-екі апта қалғанда чартерлік рейс тауып үлгерсең, жақсы үнемдеуге болады. Иә, чартер — бұл тәуекел: кешігулер, уақыт ауысуы болуы мүмкін. Бірақ менде бәрі мінсіз өтті. Ұшақ уақтылы ұшты, әуе кемесі — Sunday Airlines-тің Boeing 737 ұшағы (SCAT компаниясының еншілесі). Жеті сағат жолда, ыстық тамақ, сусындар — бәрі талапқа сай болды.
Тақыр кедей болып қалмай, мұхитқа көрінісі бар қонақүйді қалай табуға болады
Қонақүй іздеуді классикалық әдістен бастадым — Booking сайтына кіріп, бірінші жағалау сызығында орналасқан сәнді төрт жұлдызды Chicland қонақүйін таптым. Мұхиттың дәл алдында, таңғы аспен, скандинав стиліндегі интерьерімен және жайлылық пен еркін атмосферасымен бірден ұнады. Бірақ бағасы қымбат болды: жеті түн, екі адамға — шамамен 230 000 теңге.
Содан тереңірек іздеуді шешіп, Google арқылы ары қарай қаза бастадым. Осылайша Agoda деген брондау сервисіне тап болдым. Жаңа қолданушыларға олар 20% жеңілдік ұсынады екен, және дәл сол бөлме маған 182 000 теңгеге түсті. Қонақүй де, күндері де бір, бірақ мен шамамен елу мың теңге үнемдедім.
Вьетнамдық хамам және алғашқы әсерлерім
Әуежайдан шыға салып, өзімді хамамға кіріп кеткендей сезіндім. Ылғал мен ыстық сені біреу қатты құшақтап алғандай орап алады… және жібере қоймайды. Алғашқы бірнеше минутта жаңа жағдайға үйреніп үлгересің. Бірақ ағза тез бейімделеді, және екі сағаттың ішінде бұл климатты жергілікті атмосфераның бір бөлігі ретінде қабылдай бастайсың.
Сапар алдында өзімді классикалық квестке дайындап қойған едім. «Қонақүйге қалай жетем және адасып қалмаймын ба?»,- деген сұрақ мазалады. Бірақ бәрі әлдеқайда оңай екен. Жай ғана шығып, Grab қосымшасын аштым (бұл — Яндекс Go-дың жергілікті нұсқасы), және 13 минуттан кейін қонақүйде болдым. Он үш минут, Карл! Мына мақаланы сіз одан да көп уақыт оқисыз.
Қажетті дүниелер: валюта айырбастау, байланыс пен көлік
Қаражат
Ақшаны бірден әуежайда айырбастап алдық. Бұл ыңғайлы, жылдам және, қызығы, айырбас бағамынан аса ұтылмадық. Қаладағы бірнеше айырбастау орнын тексеріп көрдік — айырмашылық жоқтың қасы. Сірә, бұл әуежайдың қаланың ішінде орналасқанына және тек туристерге емес, жергілікті тұрғындарға да қызмет көрсететініне байланысты шығар.
Шамаланған бағам: 1 теңге ≈ 50 донг.
Картамен төлеуге болатын орындар көп: қонақүйлерде, сауда орталықтарында және жақсы дәмханаларда еш қиындықсыз төлем жасай аласыз. Бірақ Вьетнамда қолма-қол ақша — мастхэв. Міне, қолма-қол ақшасыз шешілмейтін жағдайлар:
- Көше тағамдары мен базарлар. Мұнда картамен төлеу кезінде сатушылар шамамен 3,5% қосымша комиссия қосады. Ал қолма-қол ақшамен төлеу әрі тиімдірек, әрі саудаласуға да болады.
- Такси. Grab арқылы қала сыртына шығу кейде қымбатқа түсуі мүмкін, ал жүргізушімен тікелей келісіп, қолма-қол төлесеңіз — арзанырақ. Жергілікті таксистер агрегаторға комиссия төлемеу үшін қолма-қол ақшаны құп көреді. Сізге — жеңілдік, оларға — үнем.
- Бағалар. Жергілікті валютадағы нөлдердің көптігі басында сәл шатастыруы мүмкін. Мысалы, чипстердің бір қаптамасы 50 000 донг тұрса — бұл бар болғаны бірнеше жүз теңге. Сол себепті конвертация функциясы бар калькулятор — туристің ең жақын досы.
Көлік
Данангтағы қозғалыс ара ұясындай — жүздеген мотоцикл, көлік пен жаяу жүргінші сапырылысып жүреді. Жол жүру ережелері мұнда тек бағыт-бағдар ретінде ғана. Көшеден өту — бөлек бір спорт түрі дерсің. Тіпті жаяу жүргіншілер өткелінде де жүргізушілер тоқтамайды, бар болғаны — сәл жылдамдықты азайтады.
Сізге біреу жол береді деп күтпеңіз. Жергілікті тұрғындар жолдан жай жүріп өте береді — баяу, сенімді, тоқтамастан, ал көліктер оларды айналып өтеді. Жанынан қатарласып жүріңіз — сонда қауіпсіз.
Қалада қозғалудың ең ыңғайлы тәсілі — Grab қосымшасы арқылы мото-такси шақыру. Ыңғайлы, жылдам, әрі арзан. Жалғыз саяхаттап жүрсеңіз — таптырмас нұсқа: жүргізуші келеді, желмен жарысып, алып кетеді, діттеген жерге бірнеше минутта жетесіз. Егер екі-үш адам болып жүрсеңіздер, әрқайсыңыз өз телефоныңыздан бір уақытта тапсырыс беріңіздер. Сонда бәріңіз бірге, бірақ әр түрлі мотоциклмен кете аласыздар. Тек аудармашы арқылы жүргізушілерге бір топ екеніңізді түсіндіріңіздер, сонда бірден түсініп, бір жолмен жүреді.
Қалада кептеліс болмайды деуге болады, ал жолдары — тегіс әрі күтімі жақсы. Оған қоса, мұхит көрінісі, бетке ұратын тұзды жел мен толық еркіндік сезімі — нағыз рахат.
Grab — бұл сапардың нағыз қаһарманы. Қарапайым интерфейс, арзан жолақы, болжамды. Сонымен қатар қосымша арқылы мото-таксиге де тапсырыс беруге болады — көлік емес, мотоциклді таңдайсыз. Бұл тезірек, арзанырақ әрі көңілді.
Бірнеше күн өткен соң, жергілікті таксистер тек жүргізуші емес, нағыз жеке гид секілді екенін түсіндім. Мен Ba Na Hills пен Хой Анға барғым келді. Grab-тан бағасын қарап көрдім, бірақ жүргізуші тікелей, агрегаторсыз барып қайтуды арзанырақ ұсынды. Кейін сол жүргізуші өзінің танысы арқылы Ba Na Hills-ке билет алуды да ұсынды. Әрине, сайттағы бағамен салыстырдым — бірдей екен. Маған бұл қызмет ұнады, қосымшадан арзанырақ, әрі уақтылы.
Сондықтан, егер сапардан кейін жүргізуші WhatsApp алмасайық десе — келісе беріңіз. Әсіресе қала сыртына шыққыңыз келсе. Ең бастысы: маршрутты, уақытты және бағаның нақты екенін алдын ала біліп алыңыз.
Байланыс пен интернет
Егер сізге SIM-карта керек болса — еш тартынбай Viettel немесе Mobifone алыңыз. Бір аптаға арналған интернет шамамен 1500–2000 теңге тұрады, және сіз қаладағы кез келген жерде байланыста боласыз. Бірақ шын айтқанда, бұған көп бас қатырудың қажеті жоқ — Wi-Fi барлық жерде бар.
Тіл
Ағылшыным мінсіз емес, бірақ өз ойымды жеткізе аламын. Туристік орындарда вьетнамдықтар ағылшынша сөйлейді. Ал егер бір-бірімізді түсінбей жатсақ — Google Translate қолдандық. Бұл — мұнда қалыпты жағдай: жергілікті тұрғындар таңғалмайды, өздері де туристерге солай жауап береді.
Карталар мен навигация
Интернетпен бәрі оңай — Google Maps немесе Яндекс Карталар еш қиындықсыз жұмыс істейді. Бірақ егер SIM-картаға ақша үнемдегіңіз келсе, алдын ала MAPS.ME бағдарламасын жүктеп алуға кеңес беремін. Бұл — офлайн-карталар: керекті қаланы таңдап, картасын жүктеп аласыз, сонда барлық маршрут, көрікті орындар мен дәмханалар қолыңызда болады.
Құдайлар, таулар мен маймылдар: Дананг пен одан тыс қайда баруға болады
Ba Na Hills
Егер сіз Данангқа барып, Ba Na Hills-ке соқпай қайтсаңыз, саяхатыңыз толық болмады деген сөз. Бұл жай ғана саябақ емес — 1500 метр биіктікте, таулар мен джунгли арасында жасырылған тұтас бір әлем. Қаладан небәрі 30–40 минуттық жерде орналасқан. Таксимен баруға болады. Бұл сапар әр минутын ақтайды.
Жол — нағыз шытырман оқиға. Елестетіп көріңіз: арқанжол кабинасына отырасыз, аяғыңыздың астында — жасыл тереңдік, шыбын-шіркейдің ызыңы, құстардың сайрауы, джунглидің дымқыл ауасы, ал сіз — шынайылықтан ажыраған күйде көтеріле бересіз. Биіктей келе, сіз бұлттардың ішіне тап боласыз. Иә, бұлттарды ұстап көре аласыз!
Жоғарыда — басқа ғаламға түскендей боласыз. Жайлы салқын ауа райы, еуропалық стильдегі көшелер, кафелер мен мейрамханалар, қамалдар, саябақтар, субұрқақтар, түрлі-түсті көгалдар. Мұның бәрі — таулар мен бұлттардың арасында, көз тартатын көріністермен қоршалған. Және, әрине, Instagram-нан көрген әйгілі «алақанды көпір» — өз көзіңмен көргенде тіпті әсерлі.
Бір күнде бұл жерді толықтай аралап үлгеру қиын. Сол себепті бір күнге толық жоспарлап барған дұрыс, тіпті қонып қалған жөн. Иә, төбеде орналасқан қонақүйлер бар.
Ba Na Hills — бұл «Ғажайыптар еліндегі Алисаның» вьетнамдық нұсқасы сияқты: тек арқанжолмен, азиялық атмосферамен және таудың басындағы вьетнамдық тағамдармен.
Леди Будда мен маймылдар
Cіз Дананг жағалауларымен серуендеп жүргенде, ерте ме, кеш пе, төбеде алыстан көзге түсетін аппақ мүсінді байқайсыз. Бұл — Вьетнамдағы ең биік Будда мүсіні, Леди Будда. Ол — қаланың ең танымал нышандарының бірі. Өз көзіңізбен көргенде ол фотосуреттерден де асқақ көрінеді: биіктігі — 67 метр, ал тұрған жері — төбе басында.
Мүсіннің жанында пагодалар мен тоғандары бар тұтас ғибадатханалар кешені бар. Ал қарау алаңынан қалаға, мұхитқа және шығанаққа керемет көрініс ашылады.
Бірақ осы мекеннің жергілікті тұрғындарды — яғни, маймылдарды ұмытпаңыз. Бұл — хайуанаттар бағы емес: олар мұнда еркін жүріп-тұрады, ағаштар мен баспалдақтарда серуендеп, туристердің тамақтарын аңдып отырады. Егер жеміс толы пакет немесе су бөтелкесін қараусыз қалдырсаңыз — бір минуттан кейін оны құйрықты «банда» алып кетсе, таң қалмаңыз.
Егер +35 °C аптап пен 90% ылғалдылықта «қуырылып» серуендеуді ұнатпасаңыз, 16:00-ден кейін келгеніңіз дұрыс. Бұл уақытта күн онша ыстық емес, адам аз, әрі «алтын сағатты» — фотосуретке таптырмас жұмсақ жарықты ұстап үлгересіз. Атмосферасы да ерекше рақат сыйлайды.
Мәрмәр таулар: үңгірлер, ғибадатханалар және Шығыс философиясы
Тасты төбелердің арасында мүсінделген храм кешені орналасқан. Мұндағы ғибадатханалар мәрмәр тастың өзінен қашалып жасалған, үңгірлердің ішінде Будда мүсіндері орнатылған, ал қарау алаңдарынан қалаға, мұхитқа және джунглиге керемет көрініс ашылады. Бір үңгірден екіншісіне өткен сайын, жай ғана серуендеп қоймай, ішкі рухани жолдан өтіп жатқандай боласың.
Бұл жерде шығыс философиясы айқын сезіледі — пафоссыз, туристік у-шу мен жасандылықсыз. Бар болғаны тыныштық, жасыл желек пен асқақ атмосфера. Бұл — медитацияға, ой елегінен өткізуге және әдемі суретке түсетін тамаша орын. Әсіресе күн батқанда, мәрмәр тас алтын түске боялып жарқырай бастағанда — тіпті ғажап.
Гастрономиялық ләззат, таңсық жемістер және пластикалық орындықтар
Вьетнам тағамдары айтарлықтай ащы емес. Керісінше, хош иісті, балғын әрі туристерге өте жағымды. Дәмханалардың барлығында дерлік тағамды «ащы қылмай» (not spicy) дайындап беруін сұрауға болады. Көбінесе олар дәмдеуіштің мөлшерін бірден шетелдіктерге бейімдеп дайындайды.
Сапар бойындағы сүйікті тағамымның бірі — фо сорпасы болды. Ыстық, дәмді сорпа, күріш кеспесі, көкөніс пен ет. Бұл тағамды кез келген дәмханадан — пластик орындық қойылған көше асханасынан бастап сәнді мейрамханаларға дейін табуға болады.
Вьетнамда мен бұған дейін дәмін көрмеген жаңа жемістерді жеп көрдім: маракуйя, личи, мангостин, рамбутан, папайя, гуаваны және атауын енді айта алмайтын талай түрін таттым. Көптеген жеміс жабайы, әрі біз үйреніп қалғандай тым тәтті емес. Мысалы, кокос сүті кәдімгі сәл тәттілеу суды еске салады. Тіпті «бір қасық қант қосып жіберсе ғой» деген ой келді. Ал манго — ерекше ұнады: шырынды, піскен, тәтті және өте арзан.
Жемісті смузи мен коктейльдер — тағы бір керемет олжа. Сергітеді, бағасы арзан, әрі көшенің әр бұрышынан табуға болады.
Енді теңіз өнімдері туралы. Бәрін жеп көрдім: шаяндар, лангустиндер, сегізаяқтар, омарлар. Дәмі — керемет, әсіресе грильде пісірілгені. Жалғыз кемшілігі — омардың ішінде ет аз, қазақша айтқанда, бір тойып, тыңқиып жейтіндей емес.
Дананг мейрамханалары: гастрономиялық ләззаттан бастап балғын сегізаяққа дейін
С шеф-поваром в Le Comptoir
Данангтағы атақты мейрамханалар расында да өте танымал. Кешке, әсіресе демалыс күндері, алдын ала орын брондамасаңыз, теңіз жағасында дәмхана іздеп, құр алақан қалуыңыз әбден мүмкін. Мен Google мен TripAdvisor арқылы мейрамхана контактілерін тауып, алдын ала бронь жасап жүрдім — солай бірнеше танымал жерде кешкі ас ішуге үлгердім.
Le Comptoir — мишлендік сән-салтанатты француз мейрамханасы. Алған әсерімді сөзбен айтып жеткізе алмаймын. Мұнда сегіз мини-тағамнан тұратын мәзір мен шарап ұсынады. Бұл мөлшер туралы емес, дәм, эмоция мен ерекше тарту жайлы. Бағасы — бір адамға шамамен 60 000 теңге. Иә, арзан емес. Бірақ «гастрономиялық ләззат деген не?» деген сұраққа жауап іздесеңіз — оны осы жерден табуға болады.
Moc Seafood — бұл кешкі ас пен шоу бір арнада тоғысқан жер. Қарапайым әрі нағыз азиялық жер: аквариумдарға жақындап, жегің келетін теңіз жәндігін таңдайсыз және оны сіздің көзіңізше бірден пісіріп береді. Балық, шаян, сегізаяқ, кальмар, асшаян — бәрі балғын. 10–15 мың теңгеге нағыз теңіз тағамдарынан той дастарханын жаюға болады.
Lan Gio — бұл жайлылық, дәм және атмосфера жайлы. Тиянақты дайындалған тағамдар, стильді интерьер, жұмсақ жарық және тыныш әуен — асықпай кешкі ас ішуге таптырмас орын. Ал дәл қарама-қарсы бетте әдемі кафедралды собор орналасқан.
Көше тағамы және пластик орындықтар
Вьетнамда көше тағамы — жай ғана жеңіл-желпі тамақ емес, бұл — мәдениеттің бір бөлігі. Қай жерге барсаңыз да, әрбір жол айрығында, әрбір базардың жанында аласа пластик орындықтары бар колоритті асханаларға тап боласыз.
Мен айтарлықтай талғампаз емеспін, бірақ сақтық шараларын қолдандым:
- TripAdvisor мен Google Maps-та жақсы пікірлері бар орындарды таңдадым.
- Тағамның қандай еттен дайындалатынын — тауық, сиыр немесе шошқа еті — әрдайым нақтылап сұрайтынмын.
- Күдікті орындарда теңіз өнімдерінен бас тарттым.
- Егер бір нәрсені алғаш рет жейтін болсам — балықты немесе асшаяндарды тазалап беруді, бақалшағын аршуды, ішек-қарнын алып тастауды сұрайтынмын.
SPA, мұражайлар мен жағажайдағы демалыс: соңғы кеңестер мен әсерлер
Ыстық, мотоциклдар мен тропикалық жемістерден кейін қайта сергіп, күш жинаудың ең жақсы жолдарының бірі — жақсы салонда массаж алу. Мен Herbal Spa Danang орталығында болдым. Одан нағыз «уау» әсер алдым. Бар болғаны 18 000 теңгеге екі сағаттық рахатқа бөлендім: дене массажы, ыстық тастар, хош иісті майлар, жылы сүлгілер мен босаңсытатын музыка астындағы медитация. Бағалар прайс-парақшада орыс тілінде көрсетілген, қызметкерлер сыпайы, қызмет жоғары деңгейде.
Ал Данангтағы мұражайлар жағы сәл көңілге қаяу түсіреді. Егер сіз эстет немесе мәдениетке жақын турист болсаңыз, сәл ренжіп қалуыңыз мүмкін. Жергілікті мұражайлар — ыстық, тар, зең иісі сезілетін, бұрыштарында аздап көгерген жерлері бар орындар. Мен пікірлерге сеніп, 3D Арт мұражайға бардым. Әсер алғым келіп еді, бірақ кринж ұстап, бір сағат уақытымды жоғалттым.
Егер әлі күшіңіз болса — ең дұрысы, жағажайға барыңыз. Су қауіпсіз: медуза, акула не суасты қайықтар кездеспейді, суы таза, жағасы жайпақ. Ал кешке қарай жағажай тірілгендей болады — музыка, шамдар жанады, дәмханалар ашылады, шағын дискотекалар мен көше музыканттары шығады. Бұл, әрине, Ибица емес. Бірақ бір коктейль алып, кешкі жағажай бойымен неге серуендеп қайтпасқа?
Қорытынды
Мен Вьетнамды National Geographic телеарнасындағыдай елестеттім — қоңыздар, кесірткелер мен шаяндар толы жер деп ойладым. Бірақ бүкіл сапар барысында бірде-бір жәндікті, тіпті кішкентайын да көрмедім. Сірә, жергілікті халық оларды алдын ала басқа жаққа «көшіріп» қойған сияқты
Егер сіз мұхит жағасында демалып, керемет көріністерді тамашалап, дәмді тағамдардан дәм татып, соның бәріне көп ақша жұмсағыңыз келмесе — Дананг тамаша таңдау болмақ.
Жеті күндік демалысқа — жайлы жағдаймен, экскурсиялармен және гастрономиялық ләззаттармен — мен шамамен 450 000 теңге жұмсадым. Бұл — ештеңеден бас тартпай, өзіме қалағанымның бәрін рұқсат еткен кездегі сома. Саяхатымды өзім жоспарладым және бір сәтке де өкінбедім. Иә, Вьетнамда басқа да курорттар мен көрнекі орындар көп. Бірақ Дананг жеңілдігімен, қауіпсіз атмосферасымен, қолжетімді бағаларымен, тікелей рейстерімен және жайлы өмір ырғағымен есімде қалды. Визасыз, әуре-сарсаңсыз — бәрі ыңғайлы.
