Шонжыдағы ыстық су: қалай барамыз, қанша кетеді?
Сыртта −10 градус аяз, ал сіз буы бұрқыраған 38 градус суда шомылып жүрсіз. Аспаннан жауған қар бетіңізге тиер-тимес еріп жатыр. Дәл осы сезім үшін біз отбасымызбен бес жылдан бері қыста Шонжыдағы ыстық суға барамыз. Бұл материалда Шонжыға қалай баруға болатынын, өзіңізбен бірге не алу керегін және бұл демалысқа қанша ақша кететінін айтып береміз.
Ыстық су қайда орналасқан?
Шонжы — Алматыдан шамамен 243 шақырым жерде, Алматы облысының Ұйғыр ауданында орналасқан ауыл. Бірақ жұрт «Шонжыдағы ыстық су» деп атайтын демалыс орындары ауылдың өзінде емес. Олардың көбі Шонжыдан шығысқа қарай, Қалжат тасжолының бойында орналасқан. Арасан аймағы ауылдан шамамен 50 шақырым жерде, ал демалыс орындары жол бойына шашырай орналасқан.
Бұл жердің басты ерекшелігі — жер астынан шығатын ыстық минералды су. Түрлі жылдары жасалған зерттеулерде Шонжыдағы жер асты суының құрамында натрий, калий, кальций, магний, хлоридтер, сульфаттар, фтор сияқты минералдардың бары анықталған. Демалыс орындары осы суды бассейндерге жинап, келушілерге шомылуға жағдай жасаған.
Алматыдан Шонжыдағы ыстық суға қалай жетеміз?
Жеке көлікпен
Шонжының өзіне Алматыдан көлікпен шамамен 3,5–4 сағатта жетуге болады. Бірақ демалыс орындарының көбі ауылдан әрі қарай орналасқандықтан, нақты базаға дейінгі жол бұдан ұзағырақ болуы мүмкін.
Өз көлігіңізбен барсаңыз, жолда қалаған жеріңізге тоқтап, өзіңізге ыңғайлы уақытта жүре аласыз. Жолға шығар алдында таңдаған демалыс орныңыздың нақты координатын сақтап алған дұрыс.
Таксимен
Біз көлігіміз болмаған соң, Шонжыдағы ыстық суға үнемі таксимен барамыз. Әдетте бұл бағытқа тұрақты қатынайтын жүргізушілер бар. Оларды inDrive арқылы да табуға болады. Жүргізушімен бірден барып-қайту жолын келісіп алған ыңғайлы. Кейде сізді апарған жүргізуші өзі қайтара алмаса да, басқа такси тауып беруге көмектеседі — бір ауыз сұрасаңыз болғаны.
Жолақысы уақытқа, көлікке және нақты демалыс орнына қарай өзгеріп тұрады. Сондықтан тапсырыс бергенде тек «Шонжы» демей, баратын базаңыздың нақты атауын көрсетіңіз. Әдетте бір адамға бір бағытқа қарай 5–7 мың теңге шамасында төлейміз.
Бір нәрсені ескерген жөн: Шонжының өзіне дейінгі жол мен нақты демалыс орнына дейінгі жол — екі бөлек. Бағана айтқанымыздай, демалыс орнының көбі ауылдан әрі орналасқан. Сондықтан жүргізушімен бағаны келісерде соңғы нүктені нақты көрсеткен дұрыс.
Автобуспен
Алматыдан Шонжыдағы ыстық суға туристік автобустар да қатынайды. Кей туркомпаниялар демалыс күндері арнайы рейс ұйымдастырып, сенбі күні таңертең апарып, жексенбі кешке Алматыға қайтарады.
Мысалы, Onyx Tour автобустары Алматыдағы Байтұрсынов көшесінің бойынан, «Астана» қонақүйінің маңынан жүреді. Компанияның өзі де жөнелту орны мен уақытын бронь кезінде қайта нақтылауды ескертеді. Сондықтан жолға шығар алдында кесте мен бағаны туркомпаниядан тексеріп алған дұрыс.
Трансфері бар дайын тур арқылы
Instagram-нан «Шонжыдағы ыстық су» деп іздесеңіз, сан алуан тур шығады. Ал нақты бір демалыс орнын таңдап қойсаңыз, сол жердің желідегі парақшасын қарап көріңіз. Қазір ондағы көптеген демалыс базасы өзінің дайын тур пакетін жасап, сататын болған. Жеке трансфері де бар. Бағасы әркімде әртүрлі.
Шонжыдағы ыстық суда қалай демалуға болады?
Негізінен мұнда күндіз барып қайтуға не түнеп демалуға болады.
Күндізгі демалыс. Әдетте 10:00-23:00 аралығында демалуға болады. Бағасы бір адамға шамамен 5–10 мың теңге. Бұл ақшаға әдетте аумаққа кіру, бассейндер мен киім ауыстыратын бөлмені пайдалану кіреді. Бірақ кей демалыс орны күндізгі демалысты ұсынбайды.
Түнеп қайту. Бөлмеге әдетте 14:00–15:00-ден кейін кіргізеді, ал қайтар күні түске қарай босату керек. Бағасы бір бөлмеге 25 000 теңгеден басталады. Әдетте оған жатын орын, бассейн мен таңғы ас кіреді. Қарапайым орындар арзанырақ болса, SPA, хамам, мейрамхана, балалар алаңы мен басқа қызметтері бар жаңа кешендерде екі адамға арналған бөлме 50 мың теңгеден жоғары тұруы мүмкін.
Баға маусымға, аптаның күніне, бөлменің түріне және таңдаған қызметіңізге байланысты өзгеріп отырады. Сондықтан төмендегі бағаларды да бағдар ретінде қабылдап, бронь жасар алдында демалыс орнының өзінен нақтылап алған дұрыс.5е
Шонжыдағы ыстық судағы демалыс орындары
Alma Park
Мекенжайы: Алматы облысы, Ұйғыр ауданы, Қарадала тасжолы, 58.
Байланыс: +7 708 850 7402, @alma_park.chundzha.
Alma Park демалыс кешенінде минералды ыстық сулы төрт бассейн бар: екеуі далада, бірақ төбесі жабық, біреуі ғимарат ішінде, тағы біреуі балаларға арналған таяз бассейн. Аумағында мейрамхана, бар, сауна, балалар бөлмесі, ойын алаңы, күркелер мен киіз үйлер бар. Кешке қонақтарға ашық аспан астында тегін кино көрсетеді. Бұдан бөлек, караокеге барып, PlayStation ойнауға болады.
Мұнда түнеп қалуға да болады. Бағасы бір түнге 18 мың теңгеден басталады. Екі адамға арналған бөлме не үлкен компанияға жеке коттедж жалдай аласыз. Бағаға жатын орын, таңғы ас, бассейндерге түсу, балалар бөлмесін пайдалану, сондай-ақ халат, сүлгі, тәпішке мен жеке гигиена құралдары кіреді.
Артықшылықтары: балалармен демалуға қолайлы, бассейндері таза, аумағы жақсы күтілген. Халат пен сүлгіден бастап жуынуға қажет заттарға дейін бөлме бағасына кіреді.
Нені ескеру керек: караоке мен PlayStation жалдау үшін бөлек ақы төлейсіз. Демалыс және мереке күндеріне бөлмелер тез брондалып қалады. Сондықтан сапарды екі-үш апта бұрын жоспарлаған дұрыс.
NAMMU Spa & Wellness
Мекенжайы: Алматы облысы Ұйғыр ауданы Добын ауылы, Алматы — Қалжат тасжолы, 48Б.
Байланыс: +7 701 750 33 00.
Instagram: nammu.resort.
Бұл демалыс орнында сегіз ашық және жабық бассейн, виллаларға арналған екі жеке бассейн, SPA, массаж, фитобөшке, фитнес-зал, караоке, балалар алаңы, мейрамхана, Wi-Fi және автотұрақ бар.
Мұнда күндізгі билет жоқ, демалу үшін кемінде бір түнге бөлме жалдау қажет. Екі адамға арналған стандарт бөлме 90 000 теңгеден басталады. Бағаға жатын орын, таңғы ас және ашық әрә жабық бассейндерді, SPA, спортзалды, сауна мен хамамды пайдалану кіреді.
Артықшылығы: бөлмелері жаңа, таза әрі әдемі. Барлық керек зат — халат, тәпішке, сүлгі, гигиена заттары, шай бар. Жайлы әрі әдемі жерде демалғысы келетіндерге қолайлы.
Ескеретін нәрсе: бағасы басқа демалыс орындарына қарағанда жоғары. SPA процедуралары бөлек төлеу керек. Сырттан тамақ алып кіруге болмайды.
Four Seasons
Мекенжайы: Алматы облысы Ұйғыр ауданы, Қалжат тасжолы.
Байланыс нөмірі: +7 708 809 59 59.
Instagram: four_seasons_chundzha.
Мұнда төрт ашық және үш жабық бассейн, бөлмелер мен коттедждер, балаларға арналған ойын орындары бар. Бассейндер тәулік бойы істейді.
Бұл демалыс орнында күндіз де, түнеп те демалуға болады. Күндізгі демалыс уақыты – 10:00-23:00. Ал түнеп қайтамын десеңіз, екі адамға арналған бөлмелер 60 000-75 000 теңге тұрады. Бағасы бөлменің орналасқан жеріне және бассейнге шығатын жеке террасасының бар-жоғына байланысты. Бұл сомаға жатын орын, таңғы ас, бассейндер, хамам, сауна, ойын алаңдары кіреді.
Артықшылығы: үй ішімен не достармен демалғанға ыңғайлы. Ойын алаңдары, караоке-бар бар.
Ескеретін нәрсе: күндіз келген балаларға халат пен сүлгі берілмейді. Оны өзіңізбен алып келуге не сол жерден жалға алуға болады. Тамақ алып кіруге болмайды. Оған қоса бұл халықаралық Four Seasons Hotels and Resorts желісіне қатысы жоқ, жергілікті демалыс орны.
All Seasons
Мекенжайы: Алматы — Қалжат тасжолы, 48, Добын ауылы
Байланыс нөмірі: +7 707 911 08 80
Instagram: allseasons.chundzha
All Seasons демалыс орнында бес бассейн бар. Оның ішінде сырғанақтары бар бассейн, джакузи, спорттық бассейн және балаларға арналған екі бассейн бар. Сонымен қатар SPA, сауна, мейрамхана, лаунж-бар, балаларға арналған ойын алаңдары жұмыс істейді. Кешке қонақтарға тегін кино көрсетіледі. Бильярд, караоке, PlayStation, үстел теннисі сияқты ойындар да бар, бірақ кейбірі ақылы.
Күндіз барып қайтуға да болады. Демалыс уақыты 10:00–22:00 аралығында. Түнеп қайтқысы келетіндер бөлме жалдай алады. Екі адамға арналған бөлмелердің бағасы бір түнге 55 000 теңгеден басталады. Бұл сомаға жататын орын, таңғы ас пен бассейн, зал, хамам сияқты орындарды қолдану кіреді.
Артықшылығы: дүйсенбі-бейсенбі аралығы демалсаңыз, 14:00–16:00 аралығында түскі ас та тегін беріледі. Ал демалыс және мереке күндері түскі асқа бөлек ақы төлеу керек. Туған күн иелеріне, зейнеткерлерге арнайы жеңілдіктер бар.
Ескеретін нәрсе: сырттан тамақ пен сусын әкелуге болмайды. Кейбір ойын-сауық түрлеріне бөлек төлеу керек. Қыста бассейндегі сырғанақ істемейді.
Sakura
Мекенжайы: Алматы — Қалжат тасжолы, Добын ауылының маңы
Байланыс нөмірі: +7 777 008 00 95, +7 777 008 00 96, +7 777 008 00 97
Instagram: sakura_rest.zone
Мұнда жеті бассейннен бөлек SPA-аймақ, сауна, джакузи, балалар алаңы мен ойын бөлмесі бар. Қонақтарға таңғы ас беріледі, автотұрақ пен Wi-Fi да бар. Бассейндегі су температурасы — 36-42 градус аралығы.
Екі адамға арналған стандарт бөлменің бағасы бір түнге 55 000 теңгеден басталады. 6 жасқа дейінгі балалар тегін. Бөлме бағасына таңғы ас, SPA аймағы, жабық және ашық бассейндерді пайдалану кіреді.
Көп адамға арналған бөлмелер мен коттедждер де бар. Кейбір коттедждің жеке бассейні, моншасы және барбекю жасайтын орны бар. Үй ішімен не үлкен топпен барған ыңғайлы.
Ескеретін нәрсе: сырттан дайын тамақ алып кіруге болмайды. Бірақ арнайы бөлінген жерде шашлык пісіруге болады, барбекю орны жалға беріледі.
Aqua SPA Resort
Мекенжайы: Алматы облысы Ұйғыр ауданы, Шонжы маңы
Байланыс нөмірі: +7 701 222 23 59
Instagram: aquaspa_resort
Aqua SPA Resort — Шонжыдағы ыстық су маңындағы жаңа әрі заманауи демалыс кешендерінің бірі. Онда төрт термалды бассейндер, қонақ үй, мейрамхана және басқа да демалыс қызметі бар. Бассейндегі су температурасы — 38-47 градус аралығы.
Жұмыс күндері екі адамдық бөлмесінің бағасы 48 000 теңгеден, ал демалыс және мереке күндері 60 000 теңгеден басталады.
Демалыс орны аумағында караоке-бар, массаж кабинеті, балаларға арналған ойын бөлмесі, сондай-ақ ересектер мен балаларға арналған су сырғанақтары істейді. Кешен жаңа салынған, инфрақұрылымы жақсы.
Ескеретін нәрсе: жататын орын жалдамай демала алмайсыз. Оған қоса тамақ алып кіруге болмайды.
Жиі қойылатын сұрақтар
Шонжыдағы ыстық суға қай мезгілде барған дұрыс?
Шонжыдағы демалыс орындарының көбі жыл бойы жұмыс істейді. Сондықтан мұнда жылдың кез келген мезгілінде баруға болады. Жазда бассейнге түсіп, күнге қыздырынып, серуендеген жақсы. Күзде ауа салқындап, ыстық суға түсу ерекше жайлы болады. Маған әсіресе қыста барған ұнайды. Су бетінен бу көтеріліп, айнала қар болып тұрғанда атмосферасы тіпті бөлек. Көктемде күн жылына бастаған кезде табиғат аясында серуендеп, жылы бассейнде демалуға болады.
Шонжыдағы ыстық суға баруға қанша шығын кетеді?
Шығын демалыс түріне байланысты. Күндіз барып қайтсаңыз, жол, бассейнге кіру және тамаққа кететін ақшаны есептеу керек.
Ал түнеп демалатын болсаңыз, екі адамға арналған бөлмелердің бағасы демалыс орнына қарай айтарлықтай өзгереді. 2026 жылғы ашық ұсыныстарда жақсы жабдықталған кешендердегі екі адамдық бөлме шамамен 50 мың теңгеден басталып, 90 мың теңгеден де асуы мүмкін. Оған жол, түскі және кешкі ас, SPA процедуралары мен басқа ақылы қызметтер қосылады. Сондықтан нақты бюджетті таңдаған демалыс орныңызға қарай алдын ала есептеген дұрыс.
Алдын ала бронь жасау керек пе?
Иә. Әсіресе демалыс және мереке күндері жақсы бөлмелер тез толып қалады. Сондықтан ертерек қамданған дұрыс.
Өзіңмен бірге не алып бару керек?
Өзіңізбен бірге суға түсетін киім, ауыстырып киетін киім мен сүлгі ала барған дұрыс. Әсіресе қыста дымқыл киімнің кебуі қиын. Сондықтан қосымша киім болғаны жақсы. Бөлмеде халат пен сүлгі берілетін-берілмейтінін алдын ала нақтылап алыңыз. Егер берілмесе, өзіңізбен бірге апарған жөн. Қыста бассейннен бөлмеге дейін халатсыз жүру қолайсыз.
Сырттан тамақ алып кіруге бола ма?
Көп демалыс орны сырттан тамақ әкелуге рұқсат бермейді. Дегенмен кейбірінде тамақ пен кәуапқа арналған етті алып кіруге болады. Сондықтан жолға шықпай тұрып бұл туралы әкімшіліктен сұрап алған жөн. Суға түскеннен кейін қарын тез ашуы мүмкін. Сол себепті бағасы аса қымбат емес асханасы бар не сырттан тамақ алып кіруге рұқсат беретін демалыс орнын таңдаған дұрыс.
Ыстық суға қанша уақыт түсуге болады?
Шонжыдағы демалыс орындарындағы ыстық су толтырылған бассейндерге күндіз де, түнде де түсуге болады.
Бірақ ескеретін жайттар бар. Демалыс орындарында ашық және жабық бассейндер болады. Дала суық болғандықтан, көпшілік жабық бассейнді таңдайды. Бірақ ондағы судың температурасы 36-40 градусқа дейін жетуі мүмкін. Сондықтан суда ұзақ отырмай, арасында үзіліс жасап тұрған дұрыс. Әйтпесе жүрегіңіз қысылып кетуі мүмкін. Ыстық суда ұзақ отырған ағзаға салмақ түсіреді. Арақ-шарапты да көп ішпеген дұрыс.
Суретті салған — СашаШура. Фото — @nazema.123; @arruwkii.
