Бурабайға гид: Көкшенің көрікті жерлері мен қонақтарға қызық орындар
Бурабайды бес саусағындай білетін адамның ақыл-кеңесі.
Жаз шықса болды, бәріміз демалысты жоспарлап кетеміз. Әсіресе, мегаполистерге барып, топ-локацияларды көрсем деп жүргендер бәрін тәптіштеп, нақты ойластырады. Биыл жазда Астанаға жол түсе қалса, Бурабайға соқпай кетпеңіз. Ал Арқаның алтын алқасы аталып кеткен бұл мекен бұрыннан уиш-лисіңізде тұрған болса, тіпті керемет. Қай жерлерге барып, не көруге болатыны туралы егжей-тегжей гайд дайындап қойдық.
Бурабайға қалай жетуге болады?
Бурабай — Қазақстандағы ең белгілі курорт аймақтардың бірі. Ол елдің солтүстігінде, Ақмола облысында орналасқан. Саф ауасы, тұмса табиғаты келген жанды тамсандырмай қоймайды.
Курорт Астанадан — 250 шақырым, Көкшетаумен 80 шақырым жерде тұр. Бұл аймақтағы Бурабай ауылы мен Щучинск қаласы негізгі туристік орталық саналады.
Астанадан қалай жетуге болады?
Көлік
Бас қаладан көлікпен шықсаңыз, діттеген жерге тақтайдай теп-тегіс автобанмен тартып отырып, үш сағатта-ақ жетесіз. Таксимен барар болсаңыз, адам басына 5 мың теңгеден басталады. Түгел салонды аламын десеңіз, 20 мың теңгеден жоғары сұрайды. Жазда баға күрт өседі. Сондықтан жол ақысы келіскеніңізге қарай құбыла береді.
Пойыз
Астанадан «Бурабай курорты» бекетіне күн сайын жолаушылар пойызы қатынайды. Билет бағасы санатына қарай әр түрлі. Плацкартқа отырсаңыз, 4 мың теңгедей төлейсіз. Жолға 3-4 сағат кетеді. Теміржол вокзалынан түскеннен кейін курортқа автобус не таксимен жетуге болады. Сондай-ақ аптасына бес рет қатынайтын Burabay Express электр пойызына да отыра аласыз. Еш жерге тоқтамастан 2,5 сағатта жетеді. Билет құны 3 мың теңгеден басталады. Курортқа дейін такси салонына 5 мың теңге шамасында алады. Ал шағын автобус құны — адам басына мың теңге.
Автобус
Автовокзалдан Щучинск пен Көкшетауға күнделікті автобустар жүреді. Билет бағасын кассадан нақтылап алу керек. Өйткені туристер ағылатын маусымда қымбаттап кетуі мүмкін. Оған қоса, жүктеме көбейсе, кестені өзгертіп тастайды. Ресми сайты болғанымен, кейде ақпарат уақытылы жаңармайды.
Басқа қалалардан қалай жетуге болады?
Бурабайда әуежай жоқ. Егер ұшақпен барамын десеңіз, онда бұл жаққа ең жақын орналасқан қала — Көкшетау. Тіке рейс тек Scat әуе компаниясында бар. Оған қоса ол аптаның белгілі бір күндерінде ғана ұшады. Мысалы, Алматыдан Көкшетауға сәрсенбі мен сенбіде ұшады. Билет бағасы — 35 мың теңге. Көкшетауға дейін жетіп алып, әрі қарай таксиге 2-3 мың теңге төлейсіз.
Бурабайдың көрікті жерлері
Бурабай (Әулиекөл) көлі
Ауылдағы ең танымал жер — Бурабай көлі. Суы мөлдір, ауасы тап-таза, жағалауында серуендегеннің өзі бір ғанибет. Жазда қайыққа отырып, катамаран тебуге болады.
Жұмбақтас жартасы
Талай аңызға арқау болған, Бурабайдың символына айналған жартас. Ол көлдің қақ ортасында тұр. Жұмбақтас бір қырынан қарағанда бұрымы төгілген бойжеткенге ұқсаса, енді бір қырынан — келіншекке, үшінші қырынан көз тастағанда кейуанаға ұқсап кетеді.
Оқжетпес жартасы
Аймақтағы әйгілі табиғи ескерткіш. Көкшетау қыратының ең биік нүктесі — Көкшенің тұсынан орын тепкен. Тік беткейлі, қарағай мен қайың өседі. Бұл жартас жайлы да ел ішінде тараған аңыз жетерлік.
Абылай хан алаңы
Көкшенің етегінде, Әулиекөлден жүз шақырымдай жерде орналасқан тарихи ескерткіш. 18-ғасырдың ортасында осы маңда үш жүздің билері Абылай ханды ақ киізге көтеріп, хан сайлаған деседі. Қазір бұл алаң туристер көп келетін жерге айналды. Атқа мінуге, қазақтың ұлттық киімдерін киіп суретке түсуге болады.
Биші қайыңдар
Табиғаттың ерекше туындысы. Ақмоладағы бұл қайың орманы Әулиекөл көлінің солтүстік жағалауында орналасқан. Ағаштардың діңі жерге тиіп тұрғанымен, бұтақтары көкке ұмтылып, жайқалады. Құдды қайыңдар мың бұрала билеп тұрғандай әсер қалдырады. Атауы содан шыққан.
Көкше тауы
Бурабай ұлттық паркінің ең биік нүктелерінің бірі. Тау шыңына шығуға арналған туристік соқпақтар бар. Ұшар биігіне шықсаңыз, Бурабайдың көлдері, қарағайлы ормандары мен жартастарын анық көруге болады.
Шортанды көлі
Осы маңдағы ең терең көл. Суы тұп-тұнық бұл көлде шортан ғана емес, балықтың басқа да түрі жетіп артылады. Қазақстанның түкпір-түкпірінен балықшылар осы жаққа арнайы келеді.
Кенесары үңгірі
Бурабай көлінен 500 метрдей жерде тұр. Туристер соқпай кетпейтін тағы бір жер. Аласа ғана шоқының үстінен орын тепкен бұл үңгір Көкшетау қыратының гранит сілемі үгілгеннен пайда болыпты. Кіребересіндегі қуыс биіктігі үш метрдей болады. Ел аузына жүрген аңызға сүйенсек, бұл жер Кенесары ханның бекінісі болған.
Бурабайда қайда баруға болады?
Шолу алаңдары
Бурабайда не көп — шолу алаңы көп. Былтыр ғана жеті бірдей алаң ашылды. Бүкілі баспалдақ, арт-нысан, демалыс орындарымен жабдықталған. «Биші қайың» жақта әткеншектер орнатқан, «Аютас» маңында терраса салынып, «Құмай тазы» мүсіні пайда болды. Ал «Кебістас» алаңқайынан көлдер мен қарағайлы ормандар керемет көрінеді.
«Бөлектауға» қанатын кеңге жайған бүркіттің арт-нысаны қойылды. Көңілі романтика қалайтындар «Махаббат алаңына» барып фотосессия жасап, көкке шықса болады. Белсенді демалыссүйер қауымға «Мойнақ жартасы» ұнары сөзсіз. Ал жалғыз жортқанды жақсы көрсеңіз, «Иманай бұлағындағы» шағын ғана шолу алаңына барғайсыз. Ең атмосферасы ғажап нүкте — «Күйген мүйіс». Киіз үй сияқты жасалған. Тау жақта күннің батқанын тамашалауға таптырмайтын орын.
Қайық, паром мен катамаранға отыру
Жазда Бурабайға баратындар міндетті түрде қайыққа не катамаранға отырады. Кемінде көлдің қақ ортасында тұрған Жұмбақтасқа жету үшін жалдайды. Мұндай қызметті ұсынатындар көп. Бағасы да әр түрлі. Жарты сағатқа шамамен 4-5 мың теңгедей болады. Оған қоса, сап борд, каяк жалға беретіндер бар. Бурабай көлімен паромға мініп серуендеуге де болады. Ересектерге — 3 мың, балаларға — 1500 теңге.
Атқа міну
Бурабайдың қарағайлы ормандары мен таудың бөктері атқа мініп серуендегенге өте жайлы. Туристер серуен ұзақтығын қалауына қарай таңдай алады. Мысалы, Абылай хан алаңы жақта жарты сағаттық серуен 3 мың теңгедей болады. Ал орман мен көлдерді жағалағыңыз келсе, нұсқаушымен не өзіңіз серуендесеңіз болады. Бағасы 10 мың теңгеден басталады.
Арқан саябақтар
Белсенді демалысты жақсы көретіндер арқан саябақтарға барса болады. Бұл жерде балаларға да, ересектерге қиындық деңгейі әр түрлі маршрут бар. Биікте жүру, троллей бағыттары, кедергілерден өту сынды активити отбасылық демалысты қызық ете түседі.
Этно ауылдар мен музейлер
Бурабай табиғатымен ғана емес, тарихи-мәдени мұрасымен де көпке қызық. Көлдер мен тау-тасты аралап болған соң, өңірдің тарихы мен дәстүрлерімен танысу үшін жергілікті музейлерге барған жөн.
Табиғат музейі
Жұмыс уақыты: күн сайын 09:00–18:00.
Мекенжайы: Бурабай кенті, Кенесары көшесі, 38.
Бурабай ұлттық паркінің флорасы мен фаунасымен танысуға мүмкіндік береді. Экспозицияда жануарлар мен құстардың тұлыптары, минералдар коллекциясы және ұлттық парк макеті ұсынылған. Музей жанында шағын хайуанаттар бағы жұмыс істейді.
Абылай хан музейі
Жұмыс уақыты: сейсенбі–жексенбі, 09:00–18:00.
Мекенжайы: Бурабай кенті, Абылай хан алаңы маңы.
Музей Абылай ханның өмірі мен қызметіне арналған. Мұнда тарихи құжаттар, сирек кездесетін кітаптар мен хан дәуіріне қатысты жәдігерлер сақталған.
Щучинск тарихи-өлкетану музейі
Жұмыс уақыты: сейсенбі–жексенбі, 09:00–18:00.
Билет бағасы: 500 теңгеден басталады.
Мекенжайы: Щучинск қаласы, Абай көшесі, 83.
Музей қорында 8 мыңнан астам экспонат бар. Экспозициялар өңірдің археологиясы, этнографиясы мен қазіргі тарихына арналған. Мұнда арагідік көрмелер де өтіп тұрады.
Мультимедиялық-интерактив кешен
Жұмыс уақыты: дүйсенбі-жексенбі, 10:00–18:00.
Мекенжайы: Бурабай кенті, Абылай хан алаңы маңы.
Елдің тарихы, мәдениеті мен технологиясынан хабар беретін жер. Кешен тоғыз залдан тұрады. Виртуал экскурсия жасауға мүмкіндік беретін бұл орынның Қазақстанда баламасы жоқ. Абылай алаңы жақта орналасқан.
Nomad Soul этно ауылы
Жұмыс уақыты: дүйсенбі-жексенбі, 10:00–19:00.
Шоу-бағдарламалар уақыты: 12:00-13:00, 16:30-17:30
Маршрутқа қосуға лайық келесі бір жер — Nomad Soul этно ауылы. Биыл ғана ашылған. Көшпенділердің тұрмыс-тіршілігімен танысасыз. Бауырсақ пісіріп, құмыра жасап, бұйымдарды бояп үйрететін шеберлік сабақтары, шоу-бағдарламалар болады. Осы жерден киіз үйді таңнан кешке дейін ыдыс-аяқпен қоса жалдағыңыз келсе, ақысы — 100 мың теңге. Ал қонғыңыз келсе, адам басына — 7 мың теңге. Кешкі бестен ертеңгі онға дейін беріледі. Кемінде 3 адам болып жалдау керек. Одан аз болса, үш адамның ақысын төлейсіз.
Бурабайда қайда қонуға болады?
Мұнда қонатын жер тапқан қиын емес. Бәрі қалауыңыз бен қалтаңызға байланысты.
Пәтер жалдау
Туристер көбіне шағын пәтерлер жалдайды. Қарапайым, ауылдың жер үйінен бастап, екі қабатты коттедждерді де таба аласыз. Кейбірінде дәретхана сыртта болуы мүмкін. Осыны ескеруді ұмытпаңыз. Krisha сервисіндегі нұсқаларға сүйенсек, бір бөлмелі пәтерлер тәулігіне 15 мың теңгеден басталса, 2 бөлмелі пәтерлердің құны 30 мың теңгеден асады.
Қонақүй
Қонақүйлерді Щучинск қаласынан да, Бурабайдан да таба аласыз. Бағасы санаты мен орналасқан жеріне қарай құбыла береді.
Мысалы, Tumar Halal қонақүйі қарағайлы орманның арасында орналасқан. Жазғы маусымда сфераларды — 80 мың теңгеге (2 ересек, 4 бала), қонақүй бөлмелерін — 40 мың теңгеден бастап (2 адамға), эко-үйлерді 80 мың теңгелен бастап жалдауға болады. Edem Spa болса, таңғы ас, джакузи, кинозал, ойын алаңы сынды опцияларды қосып, 2 адамдық эконом бөлмені 55 мың теңгеге бағалаған. Ал 4 кісілік VIP бөлме бағасы — 149 мың теңге.
Жиі қойылатын сұрақтар (FAQ)
Бурабайға қай уақытта барған жөн?
Бурабайға жыл он екі ай бара беруге болады. Себебі жазда туристер көлде шомылып, қайыққа отырып, тауға шығады. Күзде табиғат аясында серуендеп, фотосессия жасай аласыз. Қыста шаңғы, тюбинг пен қысқы серуен түрлері бар. Ал көктемде турист аз болғандықтан, тыныштықта осы жаққа келіп демалсаңыз болады.
Бурабайға қанша күнге барған дұрыс?
Бурабайдың көрікті жерлерін аралауға 2-3 күн жетеді. Егер көл жағасында демалып, жаяу серуендеп, музейлер мен табиғи нысандарды асықпай көргіңіз келсе, асықпай 4-5 күн арнасаңыз болады.
Бурабай көлдеріне түсуге бола ма?
Иә, жазда Бурабай, Шортанды және Үлкен Шабақты көлдерінің жағаларында шомылуға болады. Су әдетте маусым соңынан тамыздың аяғына дейін жылы болады. Бастысы, жабдықталған жағажайларда ғана шомылып, абай болсаңыз болғаны.
Бурабайдағы ең әдемі жерлер қайсысы?
Туристер арасындағы ең танымал жерлер қатарында Жұмбақтас, Оқжетпес, Көкше тауы, Бөлектау шолу алаңы, Абылай хан алаңы, Кенесары үңгірі мен Бурабай көлі бар.
Жазда Бурабайға барғанда қайда тоқтаған дұрыс?
Туристер көбіне Бурабай кентіне не Щучинск қаласына тоқтайды. Бурабай кенті көлге, жағажайларға, ең көрікті жерлерге жақын. Ал Щучинск қаласында қонақүй мен демалыс базасы көп. Бағасы да Бурабайдан арзандау.
Бурабайда балалармен қайда баруға болады?
Баламен жүрсеңіз, қызық жетерлік. Арқан саябақтары, қайық пен катамаран, музейлер, этно ауыл, Dino Park, шолу дөңгелегі сынды локациялар бар. Оған қоса, қонақүйлердің прайс-пакетінде көбіне ойын алаңдары мен балаларға арналған активити түрлері қосылады.
Бурабайға барғалы жүрген туристерге айтарым
- Жазда қонақүйді алдын ала брондап қоймасаңыз, орын таппай қалуыңыз мүмкін.
- Тауға шығатын болсаңыз не ұзақ жаяу жүретін ойыңыз болса, аяқ-киіміңіз ыңғайлы болуы керек.
- Кешке күн суытып кетуі мүмкін. Тау жақта түн салқын болады. Сондықтан қалың киім ала барыңыз.
- Орманға барарда маса, кенеге қарсы құралдар жағып, сеуіп алыңыз.
- Ұлттық парк аумағында қоқыс тастамаңыз.
- Белгіленген соқпақтардан шықпай жүруге тырысыңыз.
- Демалыс күндері турист саны көбейетіндіктен, көрікті жерлерге таңертең барып алған жақсы.
- Шолу алаңдары мен тауға шығар алдында күннің қалай болатынын қарап алыңыз.
