Бурабайдағы сіз білмейтін жерлер: ерекше локацияларды көріп қайтыңыз
Дәмді тағам, жайлы қонақүй мен әдемі жерлерді жинадық.
Қаладағы қарбалас пен күйбең тірліктен шаршағанда, бір уақыт табиғат аясында тынығып қайтыңыз. Астаналықтарға бұл тіптен оңай: жақын маңда Бурабай бар. Бүгін біз Бурабайда Оқжетпес, Жұмбақтас пен Абылайхан алаңынан басқа көретін не бар деген сұраққа жауап береміз.
Шолу алаңдары
Биыл Бурабайда жеті жаңа шолу алаңы ашылды. Бұрын ондағы табиғат кереметтерін төбеден көру үшін тауға жасақталмаған жол арқылы ғана өрмелеп шығуға болатын. Әрі жолсыз жермен тауға шыққан балалар мен қарттарға қиын еді. Енді арнайы аспа жолдар мен ағаш баспалдақ арқылы оп-оңай көтерілуге болады. Шолу алаңдарының тізімі мен локациялары төмендегідей:
- «Аютас» жартасы — «Құмай тазы» мүсіні, баспалдақтар, ақпараттық маңдайшалар мен пейзажды жақыннан тамашалауға арналған бақылау телескопы бар алаң.
- «Кебістас» (Туфелька) жартасы — орындықтары мен от жағуға арналған алаңы бар, орман мен көл жағасы ерекше көрінеді.
- «Бөлектау» тауы — бүркіт бейнесіндегі арт-нысаны бар орталық алаң, мұнда баспалдақтар, әткеншектер мен бақылау телескопы орнатылған.
- «Махаббат алаңы» — ландшафт дизайнымен ерекшеленетін, фотосессияларға арналған романтикалық орын.
- «Мойнақ жартасы» — белсенді демалыс аймағы. Мұнда арқан паркі мен демалуға арналған орындықтар бар.
- «Максимка» жартасы — үш көпірмен жалғасқан шолу алаңы, мүсіндер мен пикникке арналған аймақтар жасақталған.
- «Иманай бұлағы» — орындықтар мен табиғатты шолуға арналған телескоп орнатылған шағын алаң.
Бурабайда қайда бару керек?
Бурабайдың табиғатына қанығып қана қоймай, тарихына тереңінен үңіліп, баурайында мекендейтін жануарлары туралы анығырақ білуге де болады. Себебі мұнда түрлі муйзейлер мен жануарлар фермасы жұмыс істейді.
Aqmaral орман фермасы
Кіру: адам басына 1 500 теңге.
Жұмыс уақыты: күн сайын 9:00-ден 19:00-ге дейін.
Бурабай көлінен 18 шақырым жерде орналасқан маралдар мекені. Орман арасында тұрған бұл ферма маралдарды күтіп-бағады. Ферма аумағында панто-ем ұсынатын қонақүй, эко-дүкен мен киіз үйлер бар. Онда маралға тамақ беріп, фотоға түсуге болады. Әсіресе, қыста аппақ қар мен сыңармүйізді маралдардың арасындағы атмосферадан ерекше мерекелік көңіл-күй туады. Мұнда түрлі отбасылық той-думанды да өткізуге болады. Ұлттық киім киіп, фотосессия ұйымдастыруға да рұқсат етілген.
Burabay damu
Кіру: тегін.
Жұмыс уақыты: күн сайын 10:00-ден 20:00-ге дейін.
Балаларға сөзсіз қызық болатын жер. Мұнда Бурабай табиғатын таныстыратын музей, аттракциондар мен зообақ бар. Бәрінің арасы жақын.
Ботай-Бурабай музейі
Кіру: ересектер билеті — 500 теңге, балалар билеті — 300 теңге.
Жұмыс уақыты: бейсенбі–жексенбі 11:00-ден 16:00-ге дейін. Дүйсенбіден сәрсенбіге дейін — демалыс.
Бурабайға кіреберіс жердегі этнографиялық музей. Аумағында Ежелгі Ботай мәдениетіне тән жеті жерасты үйі бар. Ішіне сол дәуірдің құрал-саймандары мен қару-жарағы, ыдыс-аяқ пен киім-кешектің түр-түрі қойылған. Балаға да, ересекке де қызық болары сөзсіз. Бес мың жыл бұрын тап осы ботайлықтар жылқыны қолға үйретіп, үй сала бастаған деседі.
Қайда қонуға болады?
Қонақүй сәтсіз таңдалса, демалыстың шырқы бұзылады. Бурабайда тұратын жер бойынша таңдау көп: бар жағдайы жасалған кешендерден бастап, тек сіз бен тиіндер ғана жүретін шағын глэмпингтерге дейін бар. Демалып келген адамдардың пікіріне сүйеніп, бірнеше локацияны ұсынып отырмыз.
Wyndham Garden Burabay
Бурабай кентіндегі 4 жұлдызды үлкен қонақүй. Бөлме жалдау құны 90 мың теңгеден басталады. Ақысынына таңғы ас кіреді. Хауыз, монша, спа, балалар ойын алаңы мен автотұрақ қолдану да тегін. Қосымша ақы төлеп, фитнес, бильярд, караоке, кафе, мейрамханаға да баруға болады. Ал ауласында арқанжол, балалар ойын алаңы, серуендейтін аллея жасақталған. Әр күнге вело-серуен, шағын футбол, аквааэробика, скандинавиялық серуен, шеберлік сағаттары бар түрлі белсенділік бағдарламасы қарастырылған. Қонақүй бағдарламасы мен жайлылығын бірінші орынға қоятындарға бұл жер — таптырмас локация.
Биыл Бурабайдағы Wyndham Garden-де үй ішімізбен демалып қайттық. Ауласы балаларға керемет ыңғайлы, ағаштары әдемі, жабық жағажайы да ұнады. Аумағында күзетшілер жүреді, демек қауіпсіз. Іші таза, жайлы, бассейннің түр-түрі бар. Екі адамдық номерде қызымыз диванға жатты, ал кенже ұлыма балалар кереуетін әкеп берді. Екі күнге 225 мыңдай төледік, ақшасына тұрады. Бірақ таңғы астары орташа, Түркия қонақүйлеріне жетпейді енді.
Інжу
Бұл да Бурабай кентіндегі қонақүй. Номерлер бағасы 50 мың теңгеден басталады. Бұл бағаға таңғы ас, хауыз, джакузи, балаларға арналған батут орталығы кіреді. Айналасында тегін автотұрақ бар. Бурабай көліне тиіп тұр, жақын маңда зообақ пен кафе-мейрамхана көп. Күні бойы Бурабайды кезіп, демалуға арналған таптырмас жер.
Көктемде осы қонақүйде достарымызбен бірнеше отбасы болып бардық. Бөлмесі, төсек-орны таза, өте кең екен. Екі баламызбен еркін сыйып жаттық. Ең қызығы, біздің қабатта балаларға арналған үлкен ойын бөлмесі болды. Ата-ананың бір сәт демалуына таптырмас жер, ұлым ойыны қанғанша сонда жүрді. Таңғы ауамен тыныстап, жаяу серуендегенге ыңғайлы жол бар. Мейрамханасының сапасына баға бере алмаймын, үнемі сырттан тамақтанып жүрдік.
Лес
Орман ортасында тұрған Pinterest стиліндегі глэмпинг. A-Frame, Forest house, Nest house, Glass house деп стиліне қарай бірнеше түрге бөлінетін үйшіктерден тұрады. Бағасы бір тәулікке 40 мың теңгеден басталады. Бұл төлемге таңғы ас пен спа-орталық кіреді. Глэмпинг аймағында монша бар, ақысы бөлек есептеледі.
Қайдан тамақ ішеміз?
Таза ауада тез қарын ашады. Қайда барамын деп іздеп әуре болмас үшін, тамағы дәмді орындарды жинадық.
Dostar TÖR
Орташа чек: адам басына 5 мың теңге.
Жұмыс уақыты: 9:00-ден 22:00-ге дейін.
Үш қабатты үлкен мейрамхана. Еуропа, қазақ, шығыс асханаларының тағамдарын әзірлейді. Халал сертификаты бар. Балаларға арнайы ойын бұрышында жүрсе болады. Оңаша отырғысы келетіндерге бөлек дәретханасы бар VIP-бөлмелері жасақталған. Тұрған жері ыңғайлы, Бурабай көліне, жоғарыда айтылған қонақүйлер мен Burabay damu-ға жақын.
Демалыстың нағыз ләззатын сездіретін жайлы орын. Ас мәзірі ерекше. Әсіресе, стейктері өте дәмді екен. Лимонадтары да ұнады. Бурабайдағы үздік мейрамхананың бірі деп сенімді айта аламын.
Tary
Орташа чек: адам басына 10 мың теңге.
Жұмыс уақыты: 9:00-ден 21:00-ге дейін.
Жұмбақтас жақта орналасқан этно-кофехана. Қазақи тағамдар әзірлейтін толыққанды мәзірі бар. Мұнда да балаларға арналған ойын бөлмесі ашылған. Панорама терезесінен тұмса табиғатқа қарап отырып, ыстық шай ішуге болады.
Аль-Баракат
Орташа чек: адам басына 5 мың теңге.
Жұмыс уақыты: 11:00-ден 23:00-ге дейін.
Шығыс пен еуропалық тағамдарды ұштастырған отбасылық мейрамхана. Алты жасқа дейінгі балаларға ойын аймағы бар. Бурабай кентінен алыстау — 20 шақырым жерде, Щучинск қаласында орналасқан. Көлік не автобуспен баруға болады. Бірақ «Бурай курорты» станциясына жақын.
Бургер, кәуап, палау — тағамының бәрі өте дәмді. Адам көп. Бірақ даяшылар бәріне үлгеріп жүрді. Көп адам боп келгенде VIP-бөлмесін жалдаймын, өзіміз ғана отырғанға ыңғайлы. Интерьері әдемі. Айтпақшы, бұл жерде қымыз сатады, маған дәмі ұнады.
Бурабайға барар жол
Көлік не такси. Астана мен Бурабайдың арасы 250 шақырымдай, көлікпен шамамен 3 сағаттық жер. Такси жалдасаңыз, адам басына алты мың теңге кетеді. Көкшетаудан тіпті жақын: көлікпен бар-жоғы бір сағатта жетесіз.
Қазақстанның басқа қалаларынан ұшсаңыз, Астана немесе Көкшетау әуежайын таңдаған дұрыс. Көкшетаудан жеткен жақынырақ, бірақ Астанаға билет әдетте арзанырақ болады.
Пойыздар. Электр пойызымен 1 700 теңгеден отырып баратын билет алсаңыз, 3–4 сағатта жетесіз. Жолда ұйықтап барғанды жөн көрсеңіз, кәдімгі пойызға үш мың теңгеден басталатын билет алыңыз. Пойыздар «Бурабай курорты» станциясына тоқтайды. Әрі қарай туристік нүкте саналатын Бурабай кентіне дейін шамамен 25 шақырым, такси жалдап барсаңыз болады, не екі ортада автобус та қатынайды.
Қорытынды
Бурабайға қашан барған жөн?
Табиғат қай мезгілде де тамаша. Бәрі нені ұнататыныңызға байланысты. Жазда пикникке шығып, суға түсіп, атқа отырып серуен құрып, хайкингімен айналысуға болады. Қыста шаңғы теуіп, баллонмен сырғанап, моншаға түскен жақсы. Күзде қызғылт-сары жапырақтарды жинап, музей аралап, бал қарағайдың жұпарымен тыныстаған күшті. Көктемнің ортасында құлпырған табиғатты тамашалап, квадрациклге отырып, адреналин сезінген ұмытылмас әсер сыйлайды.
Бурабайда қайда тоқтаған абзал?
Курорт аймағы болғандықтан таңдауыңыз бен қаржыңызға қарай үй-жай тапқан қиын емес. Сервис пен жайлылықты, бағдарлама мен жүйелілікті ұнататындар қонақүйді таңдаса, табиғат аясында жалғыз қалғанды, орман арасында түнегенді жақсы көретіндер глэмпингіге бет бұрады. Хостелдер мен эконом-класс сегментіндегі отельдер аз емес.
Бурабайда балалармен қыдырған қызық па?
Көк тіреген қарағайлардың арасында табиғатпен танысқанға — Бурабай таптырмас жер. Оның үстіне серуендейтін жолдардың бойында велосипед, самокат тебуге ыңғайлы аймақ бөлек жолақпен білгіленген. Орман ішінде тиін, қоян мен құстың түр-түрін көруге болады. Музей мен зообақтар да бар. Шолу алаңдарына да балалармен көтерілген қиын емес. Сондықтан, иә, Бурабай үй ішіңізбен демалып қайтқанға жайлы жер десек, қателеспеспіз.
Суретті салған — Дада Кирей.
