Көкшетауда көретін не бар өзі?
Қаланың әйгілі балмұздағын жеп, жағалауда серуендеп қайтайық.
Сәлем, менің атым — Аружан! Мен Көкшетаудың тумасымын. Бұл — Қазақстандағы ауасы ең таза қала. Шынымды айтсам, таза ауа әлдебір қаланың артықшылығы болады екен-ау деп бұрын еш ойламаппын. Тек басқа жаққа кеткенде ғана оның қадірін түсіне бастайсың.
Көкшетаудан көк тіреген ғимараттар мен зәулім нысандар іздеп әуре болмаңыз. Бұл қаланың өз атмосферасы бар: ол мұрынды жаратын қарағай иісімен, жарты сағаттық жерде тұрған көгілдір көлдерімен және тіршілігі баяу қала тынысымен баурайды. Әр тасы тарихтан сыр шертетін Көкшетауға келе жатсаңыз, бұл нұсқаулық сізге арналады.
Көкшетаудың ең көрікті жерлері
Мұндағы табиғат — жай декорация емес, қаланың ажырамас бөлігі. Тіпті Көкшетаудың ең танымал орындарының өзі оның ландшафтымен тығыз байланысты.
Қопа көлінің жағалауы
Кіру құны: тегін.
«Жағалау» атты жаңа қалалық кеңістік былтыр ашылды. Қопа көлі бұрын да бар еді, бірақ енді сәні кірді. Жағалау үш бөлікке бөлінген: орталық аймағы серуендеуге арналған. Мұнда судың дәл іргесімен соқпақтар төселген, орындықтар мен күнқағарлар орнатылған. Кешкісін осы жерге келсеңіз, күн тура көлдің ішіне батып бара жатқандай көрінеді. Шығыс бөлігі — бір орында отыра алмайтындарға арналған. Мұнда бетон памп-трек, балаларға және спортпен айналысқанға арналған заманауи алаңдар салынған. Ал батыс сектор іс-шараларға арналған: амфитеатр мен жазғы концерттерге арналған ашық сахна бар.
Бұқпа шоқысы мен «денсаулық баспалдағы»
Жұмыс уақыты: тәулік бойы.
Кіру құны: тегін.
Жеңіл хайкинг жасағыңыз келсе, кроссовкаңызды киіп, Бұқпа шоқысын бағындыруға аттаныңыз. Шыңға көтерілетін жол шамамен 220 баспалдақтан тұратын арнайы «денсаулық баспалдағымен» жабдықталған (бұл Алматыдағы баспалдақтан төрт есе аз, сондықтан аса қиын болмауы керек). Жол бойында дем алып, алғашқы панорамалық суреттерді түсіруге арналған күркелер бар. Ең биік нүктеден қала кварталдары мен Қопа көліне тамаша көрінеді. Бәрін анық көргісі келетіндерге дүрбі орнатылған. Тек оған тастайтын тиын ала шығыңыз. Көлікті шоқының етегіндегі тұраққа қалдыруға болады. Ал қоғамдық көлікпен жүрсеңіз, №1 және №8 автобустар барады («Қанай би» аялдамасы).
Көтерілуді таңертең ерте немесе күн батар уақытқа жоспарлаңыз — күндіз көлеңке аз, сондықтан ыстық болуы мүмкін.
Орталық мәдениет және демалыс паркі
Жұмыс уақыты: тәулік бойы.
Кіру құны: кіру тегін, аттракциондар бағасы — 350 теңгеден басталады.
Нағыз парк: ішінде тир, әткеншектер мен тәтті мақта бар. Кіру тегін, тек аттракциондар бағасы 350 теңгеден басталады. Қала тұрғындары бұл жердегі қалың қарағайды жақсы көреді, балмұздақ жеп, балаларды батутқа жібереді. Қыста мұнда мұз айдыны мен сырғанайтын мұз төбешіктері жасалады.
Тәуелсіздік алаңы мен Абылай хан ескерткіші
Жұмыс уақыты: тәулік бойы.
Кіру құны: тегін.
Қаланың басты алаңы, оның ортасында Абылай ханның ескерткіші тұр. Бұл — қала үшін маңызды тұлға, кезінде мұнда хан ордасы болған. Мереке күндері алаңдағы өмір қайнап жатады: концерттер, жәрмеңкелер мен халықтық серуендер осында өтеді. Орталық көшелердің сәулетімен танысуды тап осы жерден бастаған дұрыс.
Мәңгілік алау
Жұмыс уақыты: тәулік бойы.
Кіру құны: тегін.
Екінші дүниежүзілік соғыста қаза тапқандарға арналған мемориал. Тыныш та салтанатты орын. Кешеннің өзі суық стильде жасалған: тас, марқұмдар тізімі мен өшпес естелік символы ретіндегі мәңгілік алау тұр. Мұнда кешке қарай барсаңыз, жарықтың әсерінен мемориал өте әсерлі көрінеді.
Көкшетауда не істеуге болады?
Көкшетаудың көрікті жерлерін аралап болсаңыз, енді мәдени демалысқа көшейік. Қаланы тани түсу үшін мынадай бірнеше орынды ұсынамын.
Көкшетау қаласының тарихы мұражайы
Мекенжайы: Қанай би көшесі, 32.
Жұмыс режимі: 10:00-ден 17:30-ға дейін (демалыс күндері 17:00-ге дейін), дүйсенбі — демалыс.
Бағасы: кіру тегін.
Мұражай тұрған көне ғимараттың өзі сәулет ескерткіші саналады. Кезінде мұнда Валериан Куйбышевтің отбасы тұрған, ал соғыс жылдарында госпиталь болған. Ішінде бес зал бар, олар Қопа көлінің жағасындағы кішкентай елді мекеннің қалай облыс орталығына айналғанын кезең-кезеңімен баяндайды. Мұнда алғашқы қала тұрғындарының тұрмыстық заттарын, сирек фотосуреттер мен құжаттарды көре аласыз.
Ақмола облыстық тарихи-өлкетану мұражайы
Мекенжайы: Абай көшесі, 83.
Жұмыс режимі: 9:00-ден 18:00-ге дейін (сенбіде 17:00-ге дейін), жексенбі — демалыс.
Бағасы: ересектер билеті — 400 теңге, студенттік — 300 теңге, балалардікі — 200 теңге.
1920 жылы негізі қаланған елдегі ең көне мұражайлардың бірі. Қорда 83 мыңнан астам жәдігер сақталған. Ол бұрынғы қойма кешені болған әдемі кірпіш ғимаратта орналасқан. Қала тарихы мұражайында тек Көкшетау тарихы баяндалса, мұндағы жәдігерлердің ауқымы кеңірек: музейде бүкіл Ақмола облысының табиғаты, ежелгі тарихы мен мәдениеті жайлы көп дерек біле аласыз.
Ш. Құсайынов атындағы театр
Мекенжайы: Мұхтар Әуезов көшесі, 216.
Жұмыс режимі: спектакльдер кестесін сайттан тексеріңіз.
Бағасы: билеттер 800 теңгеден басталады (премьералар — 1000 теңгеге дейін).
Қазақ музыкалық-драма театрын айналы терезелері бар, «Г» әрпі тәрізді заманауи ғимаратынан бірден тануға болады. Бұл — қаланың негізгі мәдени орны, мұнда Шекспир мен Камю классикасынан бастап, Шыңғыс Айтматов пьесалары мен заманауи қойылымдарға дейін сахналанады. 1995 жылы ашылған бұл театр — әлі күнге дейін көкшетаулықтардың сүйікті орны.
Тамағы дәмді жерлер
Қалада дәстүрлі асхананы да, тамаша стрит-фудты да табуға болады. Қалада іші де, тамағы да сүйкімді қандай жерлер бар десеңіз, міне, мына орындарды ұсынамын.
Ұлттық асхана
Қаладағы негізгі мейрамхана — Samruk. Көкшетаулықтар Қазақстандағы ең дәмді ет — солтүстіктің еті деп біледі. Сол ет пен қазының дәмін осы жерден табасыз. Тамақпен бірге бапталған қымыз не шұбат алыңыз. Демалыс күндері үстелді алдын ала брондаған жөн. Орташа чек: адам басына 5 000–10 000 теңге.
Грузин асханасы
Хинкали, хачапури мен қолдан жасалған шарапты «Тбилиси» мейрамханасынан табасыз. Кешкісін мұнда жанды дауыста музыка шырқалып тұрады, ал түскі уақытта бизнес-ланчтар беріледі. 5–15 адамға арналған үлкен сетке тапсырыс беруге болады, ал сыйлыққа қонақтар санына байланысты бір литр морс, шарап не чача әкеледі. Орташа чек: адам басына 5 000–10 000 теңге.
Түрік асханасы
Етті, ыстық тамақты жұқпа нанға орап жегіңіз келсе, түрік асханасына барыңыз. Көкшетауда дәмді кешкі ас ішетін бірнеше жер бар: біріншісі — Rumman. Онда кебаб, пиде мен сорпа өте дәмді. Evde-де халал мәзір, әсем декор мен классикалық түрік тағамдары бар. Аңызға айналған Atajurt кафесін айтпай кете алмаймыз. Көкшетаудың 20 жылдық тарихы бар классикасы деуге болады. Жақында бұл орын жаңартылып, енді кафе-наубайхана ретінде жұмыс істеп жатыр. Көкшетаулықтар мұнда әйгілі жасымық сорпасын ішуге келеді, қазір оған симит, ачма мен пахлава қосылды.
Шығыс-Еуропа асханасы
Қай асхананы таңдарыңызды білмесеңіз, мәзірі кең заманауи мейрамханаға барыңыз. Тексерілген нұсқалардан Salma ресторанын ұсынамын. Қуырылған мәнтісін жеп, қарақат пен барбарис қосылған шайын ішіп көріңіз. Мейрамханада ойыншықтар қойылған бұрыш бар. Сондай-ақ жылқы етінен жасалған котлет не стейк жеймін десеңіз, Beduin кафесіне кірген жөн. Таңсық дәмге тартпай тұрса, Көкшетауда бәріне таныс Coffee Boom да бар.
Стрит-фуд пен фастфуд
Тез-ақ тамақтана салғыңыз келсе, Kokshetau Mall не жаңартылған РИО-ға барыңыз — онда неше түрлі тамақ бар. Kokshetau Mall-да Burger King, жергілікті тұрғындар арасында танымал МясоRубка бургерханасы, ал РИО-да — All Off Burger, Kiki’s, Korean Street Food не Atithi үнді асханасы бар.
Кофе ішетін жерлер
STEPPE
Көкшетауда суретке түскенге ең әдемі кофейня осы шығар. Қалада екі филиалы бар, бірақ жағалаудағысын таңдаған дұрыс — онда Қопа көлі тамаша көрінеді. Мәзір веналық пісірмелер мен жергілікті интерпретациядағы бірнеше классикалық дәм ұсынады: мысалы, мұнда жылқы еті не құрт қосылған круассандар жеп көруге болады.
BlackБери
Бұл жердің фильтр-кофесіне ішуіңіз керек. Меніңше, қаладағы ең үздік кофелердің бірі осында: дәмі таза, экстракциясы дұрыс және дәнге ерекше ұқыпты қарайды. Әр маусым сайын кофейняда спешл шығады: мысалы, көктемде фисташка-апельсин матчасын не шырғанақ қосылған фильтрді ішіп көру керек.
Friends
Қаладағы ең дәмді пісірмелері бар кофейня-наубайхана. Витринада үнемі ыстық бөлкелер, торттар, тәттінандар тұрады. Таңғы асқа келуге немесе түскі асқа қалуға болады. Көктемгі мәзірдегі сусындарды міндетті түрде татып көріңіз: қарақат қосылған матча, жасмин мен маракуйя қосылған айс-ти немесе салқын кештерге арналған глинтвейн.
Жиі қойылатын сұрақтар
Көкшетауға қалай жетуге болады?
Ең жылдам жолы — Алматы, Ақтау не Шымкенттен SCAT әуе компаниясының ұшағымен. Әуежай қаладан 17 км жерде орналасқан, ол жерден таксимен жету оңайырақ. Пойызбен жеткен арзандау, вокзал орталықта. Көршілес Астана не Петропавлдан таксимен (Яндекс не Indrive) жетуге болады, ақылы тас жолмен шамамен 3,5–4 сағат жол жүресіз.
Көкшетауға қай кезде барған дұрыс?
Ең қолайлы мезгіл — мамырдан қыркүйекке дейінгі кез. Солтүстіктің қысы қатал: температура -45 °C-қа дейін төмендеуі мүмкін, сондықтан мұндай аязда серуендеген аса ұнай қоймауы мүмкін.
Қала ішінде немен жүруге болады?
Такси шақыртқан ыңғайлы. Бағасы 500–1 500 теңге шамасында. Автобуста (жол жүру ақысы 100 теңге) жолкіреге көлік не банк картасымен төлеуге болады.
Көкшетаудан не әкелуге болады?
«Гормолзавод» өнімдері
Әйгілі «Гормолзавод» балмұздағы осы Көкшетауда шығады. Қала қонақтарының бәрі оны өзімен бірге алып кеткісі келеді. Бірақ балмұздақты тасымалдаған оңай емес-ті. Бір жақсысы, бұл балмұздақты қазір Қазақстанның басқа қалаларынан да табуға болады — Астанада түрлі павильондар бар, ал Алматыда қарапайым дүкендерде де сатылады. Олардың мекенжайлары «Гормолзавод» парақшасында көрсетілген.
Егер жолға шыдайтын бірдеңе алғыңыз келсе, құрт не қоспа (тәттілеу, майлылығы жоғары сүзбе) алыңыз. Ерімейді, бұзылмайды, жолға жақсы шыдайды.
«Блэк» табиғи ағаш бұйымдары
Бұл — ұлттық ағаш ыдыстар мен интерьер заттарын жасайтын жергілікті бренд. Кеседен бастап сандық пен бесікке дейін табасыз. Оларды табиғи ағаштан, көбіне емен не қайыңнан жасайды. Егер багажда орын болса, ағаш астау — Көкшетаудан ала келген ең жақсы кәдесый болмақ.
Исмаил балы
Бурабай мен Зеренді маңайынан жиналатын табиғи бал. Бұл жақтың солтүстік балы ерекше қанық болады дейді. Сондай-ақ оларда табиғи бал сабыны мен шай қоспалары сатылады.
Фермерлік ірімшік
«Буррата» — сүттің төрт түрінен авторлық ірімшіктер жасайтын қолөнер сырханасы. Олар ірімшіктің 20-дан астам түрін дайындайды: буррата мен страчателладан бастап, халуми, моцарелла, сулугуни, сондай-ақ жартылай қатты және сақталған авторлық ірімшіктерге дейін табылады. Бәрі табиғи сүттен жасалған, артық қоспасыз. Мұнда дайын сыйлық бокстарын жинауға болады: қолдан жасалған ірімшіктер, ет деликатестері, бал, соустар, жаңғақтар мен кептірілген жемістер — тамаша сыйлық.
