Алматының кәуаптары-ай! Дәмді етті қайдан жейміз?
Қызым екеуіміз Алматыдағы ең дәмді кәуапты қалай іздегеніміз (және ақыры тапқанымыз) жайлы жазба.
Сүйіктіммен қарым-қатынасымды қайткенде берік ете түсемін деген сұраққа түрлі жауап бар. Біреу әуелі сенім мен сыйластық керек дегенді алға тартса, енді біреу шынайы бол не уақытты бірге өткіз дейді. Бәрінікі жөн. Бірақ, меніңше, бірге тамақ ішкен де өте маңызды. Ойым былай: бірге тамақ ішкен пайдалы, ал бірге дәмді ас ішкен екі есе пайдалы.
Сондықтан қызым екеуіміз арамызды берік ете түсейік деп, сіздерге Алматының кәуапханалары бойынша гайд дайындау үшін бір ай бойы түрлі жерден кәуап жедік. Біз барған әр дәмхана — қаладағы танымал не дос-жаранымыз барып көруге кеңес берген жер.
Shipudim
Мекенжайлар:
Әуезов–Қабанбай батыр
Желтоқсан–Гоголь
Желтоқсан–Райымбек
Розыбақиев–Қарасай батыр
Розыбақиев–Төле би
Абай–Алтынсарин
Тапсырысымыз: қой етінен кавказша жасалған екі кәуап, қой етінен жасалған антрекот, әчичүк, лаваш, Coca-Cola.
Төлегеніміз: 10 060 теңге
Көп алматылық кәуап десе, әуелі осы — Shipudim-ді ойлайды. Қалада нүктесі көп, бағасы жақсы, кәуаптары да дәмді.
Біз Желтоқсан–Гоголь көшелерінің қиылысындағы нүктесіне бардық. Нәзік сезім тұнған фильмге кіріп кеткендей болдық: жарық жоқ екен, ал үстелдерде шам жанып тұрды. Мәзірдегі тамақтан тек кәуап пен салаттар қалған екен. Бізге керегі де сол еді. Кәуап дәмді болды, үстінен маринадталған пиязды үйіп берді. Әчичүк орташа шыққан. «Совет» кәуабы көңілден шықпады: сірке суы тым көп, еттің дәмі кетіп қалған. «Кавказ» кәуабы тамаша екен. Дәмхана іші қарапайым, бірақ қараңғыда ғажап көрінеді.
Chayhanshik
Мекенжайы: Тимирязев-Жароков.
Тапсырысымыз: қой етінен жасалған кәуап, гиждуванша пісірілген люля-кебаб, әчичүк, картоп фриі, Coca-Cola.
Төлегеніміз: 9 053 теңге.
Биыл қаңтарда ашылып, кәуапсүйер қауымның топтамасына қосылып жатыр. Іші көздің жауын алады: қыш ыдыстар қойылған, өзбек музыкасы тербеп, ерекше вайб есіп тұр. Бірақ кәуабы таңдандыра қоймады: еті майлы екен. Біз наурызда барып едік, қой етін жеуге ерте ме екен деп ойладық. Дегенмен мәзірінде таңдау көп: лағман, палау, самса мен шығыс асханасының басқа да тағамдары бар. Бұл жерге тағы бір мүмкіндік берерміз, бірақ енді басқа тағамдарынан ауыз тиеміз.
Шашлык от Али
Мекенжайы: Тимирязев–Айманов.
Тапсырысымыз: қой еті мен қабырғасынан жасалған кәуап, әчичүк, картоп фриі, лаваш, Coca-Cola.
Төлегеніміз: 11 143 теңге.
Эстетика іздемей, тамағы дәмді әрі жақын жерге бара салғысы келгендерге осы — «Шашлык от Али» дәмханасын ұсынамын. Интроверт жұптарға жұмақ жер десек болады: әр үстел жеке кабинаға қойылған, ішінде жылытқыш пен даяшы шақыратын түйме бар. Айналада артық көз де, қарбалас та жоқ: тек екеуіңіз, дәмді кәуап және сырға толы тыныштық.
Еті дәмді, маринады қанық екен (тіпті еттің дәмімен қатар сезіліп тұрды). Кейбір жері майлы болуы мүмкін, бірақ лавашқа орап жей берсеңіз болады. Тек бір ақылым — жеткізу қызметі арқылы алып жеудің қажеті жоқ. Неге екені білмеймін, әйтеуір үйге алдырған кәуабымыз осында жегеніміздей болған жоқ.
Центр плова и шашлыка
Мекенжайы: Тимирязев-Марков.
Тапсырысымыз: антрекот, тауық қанаттары, әчичүк, Coca-Cola.
Төлегеніміз: 8 074 теңге.
Әуелде «Шашлычный дворға» кірмек болғанбыз, бірақ осы жерді таңдадық: атауы сенім ұялатты, іші сырттай қарағанда жайлы сияқты көрінді. Даяшы сыпайы, айналасы жап-жасыл гүлге толы, үстелде балаларға беретін боямақ пен түрлі-түсті қарындаш бар екен. Бірақ дәмхананың оң тұсы осымен бітеді. Біз отырғанда екінші қабат пойыз кетіп бара жатқандай дірілдеп тұрды. Тамағын жегенде екіұдай күй кештік. Тауық қанаттары жаман емес, бірақ антрекоты нашар шыққан: іші піспей қалған, сыртының кей жері күйіп кеткен. Әчичүктің тұзы аздау, ал лавашты бүтіндей әкеле салды. Сол күні біздің жолымыз болмады-ау.
Zaman Empire
Мекенжайы: Манас–Шевченко.
Тапсырысымыз: қой еті мен қабырғасынан жасалған кәуап, антрекот, әчичүк, лаваш, Coca-Cola.
Төлегеніміз: 11 079 теңге.
Даяшысы сыпайы болғаны сонша — шайпұл қалдырғымыз келген жалғыз орын осы болды. Кәуап та көңілімізден шықты: жұмсақ еті мен антрекоты әдемі піскен, қабырға еті де жаман емес. Әчичүкке қосылған бұрыш салат дәміне әдемі реңк бергенімен, пияздың ащы дәмінен көзімізге жас келді. Интерьері жайлы, бірақ жазғы алаңы жоқ екен. Бұл көрмеден кейінгі тамаша гастро-финал болды.
Хачапури Хинкальевич
Мекенжайлары:
Абай–Момышұлы
Абай–Манас
Зенков–Қабанбай батыр
Достық–Бөгенбай батыр
Тапсырысымыз: қой етінің жұмсағы, қозы қабырғасынан жасалған кәуап, антрекот, грузинше жасалған салат, картоп фриі, лаваш, Ташкент шайы.
Төлегеніміз: 17 292 теңге
Топтаманы әйгілі «Хачапури Хинкальевичпен» түйіндейін. Тамағы қымбаттау екен, бірақ дәмі соны ақтап тұр. Маринадты шебер жасаған. Интерьері сәл ескірген, бірақ тозып тұр дей алмаймын. Біз сыртта отырдық. Айналадағы көлік шуы пен ойнап-күлген жеткіншектер дауысы бәріне бірдей ұнай қоймауы мүмкін.
Кәуаппен бірге берілетін пияздың аздығы мен әчичүктің болмағанын кемшілігі дер едім. Оның орнына грузинше жасалған салат алуға тура келді, бірақ ол, өкінішке қарай, әчичүктің орнын баса алмады.
Қорыта айтқанда
Енді фаворитімді айтайын. Бағасы да, тамағы мен жайлылығы да көңілден қатар шыққаны — Shipudim болды. Бұл дәмхана көп жылдан бері тек кәуап пісірумен айналысады. «Мен он мың түрлі соққы білетіннен емес, бір соққыға он мың рет жаттығатын адамнан қорқамын» деген әлгі сөз осындайда ойға оралады екен.
Ал сіз өзіңізді сүйікті орныңызды осылай жүріп табыңыз. Ең бастысы — сүйіктіңізге сезім мен уайымыңызды бүкпесіз айтып, дәмді кәуаптың соңғы тілімін бөлісуге дайын болыңыз.
