Ақтауда көретін не бар? Қала қонағына дайын гид
Фишбармақ және Каспий жағасындағы басқа да қызықтар.
Сәлем! Менің атым — Айдана. Ақтауда тұрып жатқаныма тоғыз жыл болды. Бұл қаланы бес саусағымдай білем әрі оны жан-тәніммен жақсы көрем. Себебі қаланың көркі де, климаты да, халқы да ерекше. Басқа өңірден ең үлкен бір ерекшелігі — мұнда теңіз бар! Келген адамның қайтқысы келмей қалатыны да содан шығар. Қалаға жолыңыз түсіп жатса деп, осы материалға Ақтаудағы ең көрікті жерлерді жазып шықтым.
Ақтауда баруыңыз керек жерлер
Бұл қаланың басты байлығы да, басты көркі де — Каспий теңізі. Ақтаудағы ең танымал орындардың көбі осы — теңізбен байланысты.
Жартасты соқпақ
Жұмыс уақыты: тәулік бойы.
Кіру құны: тегін.
Бұл — Ақтаудың ең танымал орындарының бірі. Теңіз жағасындағы жартастардың етегімен салынған заманауи жаяу жүргіншілер жолының ұзындығы екі шақырымнан асады. Бір жағыңызда — табиғи жартастар мен үңгірлер, екінші жағыңызда — Каспийдің көгілдір суы. Кешке жарық диодты шамдар жанғанда, маңайдың бәрі жарқырап кетеді. Жол бойында демалатын орындықтар мен суретке түсетін алаңдар бар. Тек арбамен жүрген ыңғайсыз, баспалдақ көп.
Жағалау
Жұмыс уақыты: тәулік бойы.
Кіру құны: тегін.
Қаланың 7 және 15-шағын аудандарындағы жағалау серуендегенге өте қолайлы. Теңіз бойымен шамамен үш шақырымға созылған жолмен жаяу жүруге, жүгіруге не велосипед тебуге болады. Жағалау бойында түрлі мүсіндер мен инсталляциялар, пальмалар, ағаштар, кофе мен балмұздақ сататын дүңгіршіктер бар. Толқындардың шуын тыңдап, теңіздің таза ауасымен тыныстауға таптырмас жер. Ал нағыз курорттық атмосфераны сезінгіңіз келсе, қаланың төменгі жағындағы «Солдатский» жағажайына не ақылы жағажайлардың біріне барған жөн. Бұл аумақта заманауи қонақүйлер, аквапарктер мен демалыс орындары жетерлік.
Шатырдағы шамшырақ
Жұмыс уақыты: сырттай кез келген уақытта көруге болады. Әскери нысан болғандықтан ішіне кіруге рұқсат жоқ.
Ақтаудағы 4-шағын ауданда орналасқан 10 қабатты тұрғын үйдің төбесінде кәдімгі шамшырақ тұр. Ол 1974 жылы орнатылған. Жеке мұнара салғаннан гөрі салынып жатқан тұрғын үйдің шатырына орналастыру әлдеқайда тиімді болған. Бүгінде шамшырақ әлі де Каспийдегі кемелерге бағыт көрсетіп тұр. Теңіз деңгейінен 73 метр биіктікте орналасқан оның жарығы 38 шақырымға дейін жетеді. Бұл — Ақтаудың басты урбанистік символдарының бірі әрі ең ерекше көрікті орындарының қатарында.
Маңғыстау облыстық тарихи-өлкетану музейі
Жұмыс уақыты: 09:00–18:00 (дүйсенбі — демалыс).
Бағасы: 300–500 теңге.
Каспий теңізінің ежелгі Тетис мұхитынан қалай қалыптасқанын білгіңіз келсе, осы музейге соққан жөн. Мұнда сол дәуірде өмір сүрген акулалар мен басқа да жануарлардың қазба қалдықтары сақталған. Айтпақшы, бүгінде туристер көп баратын Бозжыра мен Тирамису шатқалдары да бір кездері сол мұхиттың түбі болған.
ҚР Тұңғыш Президенті саябағы
Жұмыс уақыты: тәулік бойы.
Кіру құны: тегін.
Бұл — Ақтаудың жаңа бөлігіндегі ең үлкен әрі заманауи саябақтардың бірі. Оның аумағы 23 гектарды алып жатыр. Бұрын қаңырап жатқан ми далада бүгінде мыңдаған ағаш өсіп тұр. Оларды суару үшін арнайы жерасты жүйесі мен тамшылатып суару технологиясы қолданылған. Саябақта балаларға арналған үлкен ойын алаңдары, серуен жолдары және белсенді демалысқа арналған кең аумақтар бар.
«Аквариус» кешені
Жұмыс уақыты: орнында нақтылаңыз.
Бағасы: океанариумге экскурсия — ересектер билеті 2 000 теңге, 3 жастан 15 жасқа дейінгі балалар үшін 1 000 теңге.
Бұл — Каспийдің басты байлығы саналатын бекіре тұқымдас балықтарды қолдан өсіретін ТМД-дағы ең ірі ғылыми-инкубациялық орталықтардың бірі әрі океанариум. Кешен бес жұлдызды Caspian Riviera қонақүйінің аумағында орналасқан. Мұнда келушілер балық шабақтарының қалай өсетінін бақылап, алып бекірелерді көре алады. Үлкен аквариумдардың жанында орналасқан мейрамханада отырып, су асты әлемінің ерекше атмосферасын сезінуге болады.
Ал енді мақаланың ең дәмді бөлігіне көшейік.
Мейрамханалар мен кофеханалар
Бекіре етінен жасалған фишбармақты жағалаудағы «Айдын» мейрамханасынан жеп көріңіз. Ақтаулықтардың көбі бекірені «қызыл балық» деп атайды. Фишбармақты арнайы тұздыққа батырып жесеңіз, дәмі аузыңыздан кетпейді.
Менің сүйікті мейрамханам — Twins. Атмосферасы мен жанды музыкасы үшін жақсы көремін. Қуырылған асшаянын міндетті түрде байқап көріңіз. Қаланы және теңізді биіктен тамашалай отырып түскі ас ішкіңіз келсе, Panorama-ға тартыңыз. Ақтауға келген қонақтардың көбі осы жерді таңдайды. Әсіресе түрікше таңғы асы мақтауға тұрарлық.
Ең дәмді бургерлер Бархан Burger-де. Мұнда ондаған түрлі бургер дайындалады. Тіпті асшаян қосылған түрін де табасыз. Сушиді жақсы көрсеңіз, Hanzo-ға барыңыз. Балықтан жасалған тағамдарға тойып қайтасыз.
Теңіз көрінісіне қарап отырып кешкі ас ішкіңіз келсе, Caspian Riviera қонақүйіндегі Terrassa Silk Alley мейрамханасына барыңыз. Фотоға түсуге де өте әдемі орын. Әлеуметтік желіге сурет түсіруге қолайлы орындардың тағы бірі — TeQuiero кофеханасы. Ол пирстің үстінде тұр. Айналаңыз — көкпеңбек теңіз. Мұнда келушілер шағалаларға жем беріп, суретке түсуді ұнатады.
Жағалаудағы Palace-тен де теңіз тамаша көрінеді. Екі қабатты орынның төменгі қабатында кофехана, жоғарғысында лаундж-аймақ орналасқан. Соңғы уақытта танымал болып келе жатқан орындардың бірі. Ал La Terrasse-дегі таңғы астардың мен үшін орны ерекше. Ақтауға келсеңіз, кем дегенде бір рет барып көріңіз.
Koktem Cafe атауына сай көктемдей жайлы атмосферасымен ұнайды. Мұндағы ірімшіктен жасалған сырниктер ерекше дәмді. Ал ақсерке қосылған ең дәмді круассанды Coffee Original кофеханасынан табасыз. Ерекше сусын ішкіңіз келсе, Burka кофеханасындағы урбеч қосылған айс-фьюриді байқап көріңіз. Кішкентай ғана орын болғандықтан, көбіне өзіңізбен бірге ала кеткенге ыңғайлы.
Теңіздегі қызықтар
Ақтауға келіп, жағажайда жай ғана күнге қыздырынып жату аздық етеді. Қазір Каспий теңізі адреналин мен белсенді тревел-блогерлердің орталығына айналды.
Катер мен яхта
Катерге не яхтаға отырып теңізге шықсаңыз, қаланы мүлде басқа қырынан көресіз. Жағалауды теңіз жақтан тамашалап, Каспийдің салқын самалын сезінуге болады. Әсіресе күн батар шақтағы серуен ерекше әсер қалдырады. 1 және 4-шағын аудандарда осындай қызмет көрсететін орын көп. Әдетте катермен серуендеу адам басына шамамен 2 000 теңге тұрады. Ал үлкен компаниямен келсеңіз, бір яхтаны толық жалдауға болады. Бағасы шамамен сағатына 40 000 теңгеден басталады.
Сапборд
Сапбординг кейінгі жылдары Ақтау жастары арасында танымал демалыс түріне айналды. Оның мәні — үрлемелі тақтаның үстінде тұрып, ескекпен жүзу. Ең танымал формат — сапборд үстінде тұрып, таңғы сағат 05:30 шамасында таңды қарсы алу. Бұл уақытта теңіз суы айнадай тегіс болады. Тіпті алғаш мінген адам да 10–15 минуттың ішінде тепе-теңдік сақтауды үйреніп кетеді. Оның үстіне, бұл кез — фотосессия жасағанға да таптырмас сәт.
Ақтау жағажайлары — өз алдына бөлек әңгіме. Тегін де, ақылы да, аквапаркі бар да, демалыс базаларының аумағындағы да жағажайлар жеткілікті. Олар туралы біз бұрын жазғанбыз.
Ақтауға қалай жетуге болады?
Ең жылдам әрі ыңғайлы жолы — ұшақ. Ақтау халықаралық әуежайына Air Astana, FlyArystan мен SCAT әуе компаниялары Алматы, Астана, Шымкент, Көкшетау қалаларынан ұшады.
Әуежай қаладан 25 шақырым жерде орналасқан. Таксимен жеткен оңай. Теміржол вокзалы да қала сыртында орналасқан. Пойызбен Алматыдан шамамен 55 сағатта, Астанадан 49 сағатта, Қарағандыдан 42 сағатта жетуге болады. Билет бағасы 15 000 теңгеден басталады.
Көшелер қайда?
Ақтауда көпшілік үйренген көше атаулары жоқ. Мекенжайлар үш бөліктен тұратын сандар арқылы көрсетіледі. Мысалы, «14-32-105» деген мекенжай 14-шағын аудан, 32-үй, 105-пәтер дегенді білдіреді. Yandex Maps пен 2GIS бұл жүйеге жақсы бейімделген. Тіпті «14-32» деп қана жазсаңыз да, қажетті нүктені тауып береді.
Ақтаудан естелікке не ала кетуге болады?
- Каспийдің балығы. Кептірілген немесе ысталған балық түрлері туристер арасында сұранысқа ие. Егер бекіре сатып алсаңыз, міндетті түрде чек пен рұқсат құжатын сұраңыз. Бұл балықты заңсыз аулауға тыйым салынған. Әуежайда құжатсыз өткізбей қоюы мүмкін.
- Жергілікті дәм. Балқаймақ, тәтті құрт, ірімшік, талқан, жент, сарысекер мен тарыдан жасалған тәттілер жақсы сыйлық болады.
- Жемістер. Каспийдің арғы бетінде Әзербайжан орналасқандықтан, мұнда жеміс-жидек мол. Соның ішінде ең ерекшесі — фейхоа. Қыркүйекте пісетін бұл жемістің дәмі киви мен ананастың қосындысы сияқты. Хош иісінен жалбыз бен лаймның ноталары сезіледі. Ақтаулықтар одан тосап пен лимонад әзірлейді.
- Әшекей. Ақтауда ұлттық нақыштағы күміс әшекей жасайтын зергер көп.
- Ұлттық киімдер. Маңғыстау қазақы дәстүрді жақсы сақтаған өңірлердің бірі саналады. Мұнда кәжекей, орамал, жадағай, бешпет, камзол сияқты ұлттық киімдерді күнделікті өмірде де кездестіруге болады. Осындай киім тігетін дүкендер де жеткілікті. Ең танымалдарының қатарында March17, Medina Saktaganova, NurShah және «Шоғы» бар.
Суретті салған — Кира Кустова.
